Sabbath Nitak
Tu Kaal Sung Sim Ding: Jer. 31:31–34;
Matt. 5:17–28; Hos. 2:18– 20; Isa. 56:6, 7; Heb. 8:7, 8; Heb. 10:4; Matt.
27:51.
KAMNGAH: “En un, Topa in kongcihin-ah Israel minamte leh Judah minamte tawh thuciamna thak khat ka bawl ni hun hong tung ding hi” (Jeremiah 31:31).
Sawtlam khatin magazine sungah cartoon kigelhna khatah company makai khat in company makai honpi khat mai-ah ding hi. Amah in a mai-a om a naseppihte muh dingin a khutah khutsilna bung khat tawi hi. Tua a bung tungah “ A Thak” ci-in kigelh hi. A bung tunga kigelh laimal in “a thak” cih bek hi-in tua lo bung sung aom sappiangte ahih leh a thak hi lo hi.
Lamkhat panin thuciamna thak zong thuciamna lui bulphuh hi; thuciamna lui sunga thute mah pulaak hi. Thuciam in Pasian hong hehpihna leh Ama migitna hi-in, tua thuciamna in itna tungah kinga hi. Tua itna in mihing mawhna leh ginatlohna khempeuh sangin lian zaw hi.
Tu Kaal Thusin
Tomlakna: Thuciamna lui leh thuciamna thak sungah bang thute in kibang hiam?
Thuciam sungah thukham in bang panmun nei hiam? Kua in kua tawh thuciamna bawl
hiam? Hebrew Bu in “A Hoihzaw Thuciamna” a cih in bang hi ding hiam? (Heb.
8:6). Koi bangin thuciam leh vantung biakbuk in kizopna nei hiam?
SUNDAY May 30
En Un, A Hun Hongnaita Hi…….
Jeremiah 31:31–34 sim inla, a nuai-a dotnate dawng in.
1. Kua in thuciam tawsawn hiam?
______________________________________________________
2. Kua thukham thu kigen hiam? Bang thukham hi ding hiam?
______________________________________________________
3. Pasian in a mite tawh kizopna deih ahihlam bang munte in pulaak uh hiam?
______________________________________________________
4. Pasian in a mite aitangin bang sem a, tua in thuciamna a thugilpen hong suak hiam?
______________________________________________________
Thuciamna thak in Sinai panin Israelte tungah a kipia thuciamna lui tawh a kilamdang hi lo hi, cih pen kician mahmah hi. Sinai-a kipia thuciamna in kum tamsawt khin luata hi; tuhun tawh kituak nawn lo hi, ci-in thuciamna thak kipia hi lo hi. Thuciamna lui kipalsat ahihmanin buai-na lianpi hong suak hi zaw hi (Jer. 31: 32). A tunga dotnate na dawnna in thuciamna thak sungah thuciamna lui kihel hi, cih na mu ding hi. “Thuciamna thak” in a taktakin thuciam phawksakkikna hi zaw hi. Thuciamna thak in thuciamna lui a tangtunsakna ahih keileh a kicinsakna hi.
Jeremiah 31:34 a nununglam limtak ngaihsun in. Tua sungah Topa in Israel leh a mite mawhna leh khialhna khempeuh maisak ding hi, ci-in kipulaak hi. Amaute lungtang in thukham a palsat lungtang hi taleh, amaute lungtang tungah “Ka thukham ka gelh ding hi,” ci-in Topa in kamciam hi. Hih munah a kitukalh thu na mu hiam? Kitukalh lo hi, na cihleh bang hangin kitukalh lo hi ding hiam? Romans 2: 15 sungah i lungtang tungah thukham kigelh cih ciangin a khiatna in bang hi ding hiam? (Matt. 5:17–28).
___________________________________________________________
___________________________________________________________
A tunga i pulaak Lai Siangtho munte siksanin koi bangin thuciamna thak in Pasian thukham sawmte in beisak hi, ci-in thukham a nialte dawngkik ding na hiam? Tua bangin thukham bei hi, ci-in kigenna Lai Siangtho sungah om hiam? Koi bangin tua munte mah siksanin thukham kip tawntung ahihna pulaak hiam?
MONDAY May 31
Lungsim Takpi Tawh Nasem
A sawt lo-in khanglam Judah gam in bei ding a, Babylon gamah saltangin a kipaipih madeuhin Pasian in Ama kamsang Jeremiah tungtawnin “thuciam thak” thu pulaak hi. Hih in Lai Siangtho sungah thuciam thak a kipulaak masakna hong suak hi. Ahi zongin saklam gam Israelte in suksiatna thuak ding hi ta uh hi; Jeremiah nasepma kum 150 laihun bawl hi ding hi. Hosea hun ciangin thuciam thak kipulaak kik hi (Hos. 2:18– 20).
Hosea 2:18–20 sim in. Jeremiah tungah kigen thu – Jer. 31: 31 – 34 sunga thute mah bang kipulaak kik hiam? Limcinna bang kipulaak kik hiam? Thuciam a khiatna bulpi leh thuciam pianzia bang pulaak hiam?
_________________________________________________________
_________________________________________________________
Pasian in a mite tawh thuciam bawlin a mite in tua thuciam panin lam a pial uhteh Pasian in amaute langpanna leh upna lohna thute hilh dingin kamsangte a sawl hi. Amaute in Pasian manggilhin nusia khin uh hi mah taleh, amau langpanna leh thuman lohnate siksan lo-in Topa in Ama thuciam siksanin a kisik mite in A thupiak mangin Ama kamciamte muang ding cih pen Topa deih ahi hi.
Anuai-a Lai Siangtho
munte en in. Thuciamna thak cih kammal a pulaak loh uh hangin thuciamna thak
thuguipite bang pulaak uh hiam?
Ezek.
11:19______________________________________________
Ezek. 18:31______________________________________________
Ezek.
36:26______________________________________________
Topa in hong sik ding hi “ Keimah in Topa ka hihlam theihtheihna lungsim ka pia ding hi” (Jer. 24:7). Amah in “a suang lungtangte uh la-khia ding a, sa lungtang guan ding a,” (Ezek. 11:19), “lungtang thak leh lungsim thak a pia ding hi” (Ezek. 36:26). Tua banah Amah in “Note sungah ka Kha Siangtho ka bua ding hi,” ci hi (Ezek. 36:27). Hih bangin Pasian sep thute in thuciamna thak kinga-na a thu bulpi hi.
Mi khat in “ Lungtang thak ka deih hi; ka lungtang tungah thukham gelh ding ka ut hi; Topa ka thei nuam hi; ahi zongin koi bangin ngah thei ding ka hiam, cih ka thei kei hi,” hongci hi leh, hih bangin dotnate koi bangin na dawng ding hiam?
TUESDAY June 1
A Lui Thuciam Leh A Thak Thuciam
“Ama na a sem ding, Topa’ min a it ding, ama nasem a suak dingin Topa
pawlin amah a beel gamdang mite, Sabbath ni tangin a siasaklo, ka thuciamna hoihtakin a lenkip mi peuhmah, ka mual siangtho-ah paipihin keima thungetna innsungah ka lungdamsak ding a, amaute’ meihal biakna leh a biakpiaknate uh ka biakna tau tungah kisang ding hi. Bang hang hiam cih leh ka inn pen mi khempeuh-a’ dingin thungetna inn kici ding hi” (Isa. 56:6, 7).
Jeremiah genna-ah thuciam thak in Israel innkuan tawh a kibawl ding thuciam hi,” ci hi (Jer. 31:33) . Hih in silesa panin Abraham suanlekhak khempeuh, Jew mi suakin Jew sisan nei mite in thuciam thak kamciam ngah ding uh hi, a cihna hi ding hiam? Tua bang hi lo hi. Thuciam Lui hunlai-in zong Jew sisan neite tungah kipia kamciam hi lo hi. Hebrew gambup tungah kipia thuciam hi mah hi. Ahi zongin tua bangin Jewte tungah a piak hi mah taleh namdangte’n tungah a kipia lo hi lo hi. A taktakin Jew ahi a Gentile ahi zongin, mi khempeuh tungah a hong kipia kamciam hi-in, tua kamciam sung i lut nadingin thukimna kisam hi. Tu-in zong tua mah ahi hi.
Isa. 56: 6, 7 sim in. Topa na a sem nuam mite in bang thu tungah kinga ding cih hong hilh hiam? Isaiah hunlai mah bangin tuhunin zong tua thu mah a kisam hi lo hiam? Na ngaihsutna sungkhia in.
________________________________________________________________
______________________________________________________________
Thuciam thak in “ a hoih zaw” thuciam hi; ahi zongin thuciam lui leh thuciam thak a thubulpi in a kilamdang hi lo hi. Thuciam lui a pia in Pasian hi; thuciam thak a pia zong Pasian mah hi. Thuciam lui-ah zong hotkhiatna in hehpihna tawh ahih mah bangin thuciam thakah zong hotkhiatna in hehpihna tawh a hong kipia ahi hi (Pai. 34:6, Rom. 3:24); upna tawh Ama kiang vazuan mi mawhmaisakna a pia Pasian hi; ( Jer. 31:34, Heb. 8:12); Jew ahi a Gentile mi ahi zongin upna tawh tua Pasian tawh a kizomin Amah a zui mite lungtang tungah thukham kigelh hi (Jer. 31:33, Heb. 8:10).
Thuciam Thak sungah
Jewte in hehpihna thu a um mite in Jesuh Khrih leh Ama hotkhiatna thu a sang uh
hi. Hun khat sung amaute in pawlpi thugil hi; a cianlai pawlpi zong hehpihna
tawh teltuam ngah uh hi; amaute in Topa thu-ah a lungkhauhte tawh kibang lo uh
hi (Rom. 11: 5, 7). Tua bang hi taleh a beisa-in Gentile kimkhat in thu-um lo
hi taleh tu-in hotkhiatna thu pom thei uh hi; amaute in Pasian mite tawh Khrih
sungah pumpi khat suak uh hi; minam leh pau tuamtuam nei ahih hangun Khrih
sungah pumkhat hong suak uh hi (Rom. 11:13–24). Hun khatlai Khrih tawh a
kigamla Gentile-te, Israelte nopsakna sungah khualmi ahih uh hangin tu-in
amaute tawh thuciam gamh luahkhawm thei uh hi (Eph. 2:12); Khrih tawh kinai
takin om thei uh hi; minam kuamah deidan om lo-in thu- um mi khempeuh in
thuciam thak gamh luah a suah theih nadingun Khrih in lampi a hong bawl hi
(Heb. 9:15).
WEDNESDAY June 2
“A Hoihzaw Thuciam” (Heb. 8:6)
Zanni thusinna-ah thuciam lui leh thuciam thak a thubulpite kibang ahihna i gen thu in: tua thubulpi in i mawhnate hong maisak Pasian sungah upna tawh hotkhiatna hong ngahsak hi; hotkhiat thamcing dingin dikna nei ihi kei a, Pasian hong hehpihna hang bekin a hong honkhia hi zaw hi.
Mawhmaisak ngahna panin eite in Pasian tawh kizopna sungah kalsuanin upna tawh Amah tungah kipia-in Ama thupiak bangin a nungta thei ihi hi. Koi bangin Hebrews bu in thuciam thak pen a hoih zaw thuciam hi hiam? Koi bangin hih thu theitel i hiam? Koi bangin thuciam lui in thuciam thak sangin hoih zaw hiam? Thuciam lui in koi munah kitangsapna nei hiam? (Heb. 8:7, 8).
Thuciam lui tungtawnin hotkhiatna kingah thei lo ahihna ahang in thuciam lui mahmah a khialhna hang hi lo-in, mite in upna a neihlohna hang uh hi zaw hi (Heb. 4:2). Thuciam thak in thuciam lui sangin a hoih zawkna ahang in ganhing tawh biakpiakna tangin Jesuh mahmah in Ama sihna leh siampi a hong sepman hi zaw hi. Cihnopna-ah thuciam lui piak hotkhiatna leh thuciam thak piak hotkhiatna in a kibang hotkhiatna hi. Thuciam thak sungah Pasian hong kilaakna, a puk mihingte a hong itna a kicing zaw leh a lian zaw-in i mu thei hi. Thuciam lui in a zat limcinna, genkholhnate Jesuh sungah tangtung hi; mawh nei lo ama nunna, a sihna leh vantung siampilian a sepna khempeuhte leitung biakbuk leh a sung a nate in limcingkhol hi (Heb. 9: 8-14).
Tu-in ahihleh limcinna, etkakna, lim tuamtuamte hi nawn lo-in Jesuh mahmah i nei hi; Amah mah in eite mawhna hangin thahna thuak Tuuno hi ; (Heb. 9:12), eite tangin vantungah Siampilian nasemin om hi (Heb. 7:25). Thuciam lui leh thuciam thak hong piak hotkhiatna in a kibang hi mah taleh Amah mah a hong kilaakna hangin thuciam lui sangin thuciam thak hong hilh thu in kicing zaw-in vanglian zaw hi.
Heb. 8:5 leh Heb.
10:1 sim in. Laigelhpa in bang kammalte zangin thuciam lui biakbuk sung
nasepnate pulaak ahi hiam? Koi bangin tua kammalte in thuciam thak in a
vangliat zawkna hong theitelsak hiam?
_____________________________________________________________
______________________________________________________________
Hih thu ngaihsun in:
Bang hangin leitung biakbuk sungah na kisemte sangin Khrih nunna, a sihna leh
eite tangin siampi-lian ahihna in Pasian theihtelna hong guan zaw hi ding hiam?
THURSDAY June 3
Thuciam Thak Siampi
Hebrews Bu sungah Jesuh in vantung a eite Siampi Lianbel hi, ci-in hong hilh phapha hi. Thuciam Thak sung a Hebrew Bu in Khrih in eite Siampi Lianbel a hong hilh thu kician mahmah hi. Vangtung biakbuka Khrih siampi nasep leh thuciam thak in a kizom mawkmawk hi lo hi. Thuciam Lui sunga biakbuk nasepnate in thuciam tawh kipawl thuman thute hong hilh uh hi. Tua thute in meihal biakpiakna leh palaai khat tawh kizopna tungah kinga hi. Ganhing kigote sisan tawh siampite in mawhthumna nei uh hi. Hihte khempeuh in Jesuh sung bek a kingah hotkhiatna limcinna vive hi. Meihal biakna leh ganhing sisante in hotkhiatna hong pia hi lo hi.
Hebrews 10:4 sim in.
Banghangin ganhing tawh biakpiakna sungah hotkhiatna om lo hiam? Banghangin
ganhing tawh biakpiakna in hotkhiatna ngah nadingin kicing zo lo hiam?
_________________________________________________________________
Meihal biakpiakna khempeuh leh siampite palai sepnate khempeuh in limcinna nei hi; tua limcinnate khempeuh in Jesuh sungah tangtung khin hi. Jesuh in meihal biakpiak nadingin Amah mah hong kipia hi; thuciam thak in Ama sisan tungah kinga hi. Khrih sisan in thuciam thak kipsak hi; Amah in Sinai panin thuciam leh thuciam lui a hawmpi a suaksak hi. Mi khempeuh ading leh a tawntung adingin biakpiakna mantak om khin hi (Heb. 9: 26).
Khrih hong si khin ahih manin ganhing tawh meihal biakpiakna kisam nawn lo hi. Leitung biakbuk nasep khempeuh tangtung khin hi.
Matthew 27:51 sim in.
Khrih a sihteh leitung biakbuk siangtho mun leh siangtho bel mun kikal kidalna
puan kikhek hi. Hih thupiang in koi bangin meihal biakpiakna khengkhia hiam?
________________________________________________________________
_______________________________________________________________
Ganhing tawh meihal biakpiakna-ah Levi mite in a mipihte taang dingin mawhthumna nei uh hi. Meihal biakpiakna a bei khit ciangin amau nasep zong a bei hi pah hi. Tua nasepna khempeuh in Jesuh sungah tangtung khin hi; tu-in Jesuh in vantung biakbukah Ama sisan tawh mawhthumna hong neihsak hi ( Heb. 8:1–5). Hebrews in Khrih in Ama sisa tawh vantung va lutin eite adingin Siampi Lian sem hi (Heb. 9:12). Hih in i lametna leh i pom kamciamte kingakna bulpi hi.
Tu laitakin Khrih in
Ama sisan tawh vantungah eite tangin mawhthumna nei hi, cih thu na ngaihsut
ciangin koi bangin na nungta hiam? Bangzahin hotkhiatna sungah khamuanna leh
muanna na nei hiam?
FRIDAY June 4
Ngaihsutbeh Ding: “Khrih in a nungzuite tawh khomun ne-in leenggahtui a dawnkhopna-ah amau Honpa hi ding ahihna Amah mah a hong kiciam hi. A hong piak thuciam thak a um mi khempeuh in Pasian ta suahtheihna pia-in Khrih tawh gamhluahza a pia hi. Hih thuciam tungtawnin tu leh a tawntung adingin vantung thupha a hong pia hi. Khrih sisan in hih thuciam a kipsak hi. Khrih in a mangthang mimal khat ciat adingin sihna thuakma-in, ama sihna limcing khol dingin, Amah mah in makaihin a nungzuite tawh khomun ne-in leenggahtui a dawn khawm uh hi” Ellen G. White, The Desire of Ages, p. 659. 14
“Hih kilemna thuciam panin a deihhuai penpen a kimu thei thu in mi khat in ama mawhna kisik a, a mawhna nusia-in mawhmai-na a ngettak ciangin hehpihna ngahin a mawhna kimaisak hi. Kha Siangtho pulaakna-ah lungdamna thu in Pasian hehpihnate hangin hotkhiatna i ngah hi. ‘A mawhna uh kisik ahih manin amaute mawhna leh a khialhna uhah amaute ka hehpih ding a, tua bangte phawkin ka nei nawn kei ding hi,”na ci hi (Heb. 8:12).
Pasian in mimawhte tungah thu tanna panin hehpihna-ah kihei hiam? Tua
bang hi lo hi; Pasian thupiak a palsatnate hangin Amah mah in gimna hong thuakna
tawh Ama thukham sianthona a lak hi. Thuciam thak nuai-ah nuntakna in genbaang
lo thumanna tungah kinga hi. Mawhnei khat in a mawhna kisikin mawhmai ding a
thuum ciangin amah in mawhmaisakna a ngah hi. Ama sih tangin Khrih sihna in
mawhmaisak ngahna hangin a lungnuam thei hi. A mawhna kisikin a um mi khempeuh
adingin Khrih in thukham kalhna khempeuh a kicingsak hi.” Ellen G. White, God’s
Amazing Grace, p. 138.
Kikup Ding Dotnate
1. Suang tunga kigelh thukham sangin lungtang tunga kigelh thukham in hamphatzawkna bang hong pia zaw hiam? Suang tung a kigelh thukham leh lungtang tung a kigelh thukham, koi kimangngilhbaih zaw hiam?
2. Mihingin mawhna sung a puk a kipan, lampi tuamtuam tawh thuman hong kilang hi taleh, hotkhiatna in Jesuh tungtawn bekin kingah hi. Tua bang mahin thuciam in zong ahun leh amun zui-in kikhel hi lo hiam?
3.
Tuni thusinna sunga Ellen G. White laigelh a nihna
pen ngaihsun kik in. Thuciam tawh kizopna-ah paubaang lo thumanna” in bang hi
ding hiam? Kua in paubaanna om lo-in thumang hiam? Koi bangin thumanna in
thukham hong kalh thute kicingsak hiam?
Tomkaihna: Thuciam
thak in a kicing zaw, a hoih zaw, a lian zaw-in hotkhiatna thu hong lak hi. Tua
hotkhiatna thu upna tawh a pom mi lungtangah thukham kigelh a, ama sung panin thumanna
hong phulkhia ding hi.
