June 12
Fabiola Padilla, 36
Fabiola in a kituiphum khit ciangin a pa in zong Jesuh tungah kipia-a a kituiphum nadingin kum 18 sung thungen hi. A pa kikhel ding lamet om pha nawn lo hi. A pa in Lai Siangtho um lo-in Mary leh misiangthote tungah thungen hi. Zu tawh kidiah a, a zi vua-in kitawng denin hehna tawh nitum den uh hi.
Fabiola in Jesuh thu genzel a, ahi
zongin a pa in za nuam lo-in vakkhia pahpah hi. Fabiola in lungkia lo-in a pa
ading thungen den hi. Pawlpi mite tungah zong pulaakin a pa kikhel nadingin
thungenkhawm uh hi.A tawpna-ah Pasian in Fabiola thunget pia hi. Ahi zongin ama
lamet bang hi lo hi. A pa in kum 75 a phak ciangin kal cancer natna ngah hi.
Siavuante in a natna lianlua khin ahih man kibawl thei nawn lo ding hi, ci-in
gen uh hi. A sawt lo-in a pa in sihsan ding cih a theih ciangin Fabiola in a pa
adingin khitui luangin thungen hi.
Nipi kaal khat sung zingsang leh nitak
sialin “Topa aw, ka pa tungah ka gen ding kammal hong pia in,” ci-in ngen hi.
“Tha hong guan in,” ci-in thungen hi.
Tua ciangin a pa lupna gei-ah pai-in a
pa khut lenin thungen hi. A pa in pai khia in, hongci tam maw, ci-in lunghimawh
mahmah kawmsa-in “ hong it mahmah ing, pa aw, ci-in hopih a, tu zing a
kong gen ding Pasian pen ka up ka muan ka Pasian hi. Amah in nang hong
damsak thei hi. Thungenkhawm ni,” ci-in a pa hopih hi.
Ama lamet bang lo-in a pa in thungetna
nial lo hi. Tua ni a kipan a pa tawh zingsang leh nitaksialin thungenkhawm den
uh hi. Fabialo in thungenin, Lai Siangtho sim uh a, Pasian phatna lasa hi. A pa
in limtak ngai hi. Tua bangin thungen, Lai Siangtho sim, lasa-in a om pen
kimanna nei ding hiam, ci-in Fabiola
ngaihsun kha zel hi. Ahi zongin tatsat lo-in tua bangin zomto suaksuak hi.
Pawlpi mite in zong tua bangin tutpih uh a, antangin thungen khawm uh hi. A pa
natna suk semsem ahih manin hong gim zaw semsem hi. Fabiola in a cih nading thei lo hi.
A lawm Rita pen Adventist thu-um mi
khat hi-in Fabiola pa adingin Lai Siangtho thu sinpihna leh thungetna nei
dingin a gen ciangin aman zong sang thei pah hi.
A pa omzia naang semsem ahih manin
Rita in Lai Siangtho thu a sinpihna manlang takin paipih hi. Nipi kaal khat in
thulu 7 bang zawhpih hi. Lesson 7 na a zawh uh ciangin Rita in Fabiola pa
tungah Jesuh tungah na ki-ap nuam hiam, kituiphum lo ding na hiam, ci-in dong
hi. A pa in zong kituiphum dingin thukimpah hi.
Southeast Zato a chaplain sem Roger
Pech in, inn nung ah naupangte kimawlna tuipuan sungah tuisungin Wednesday
nitak khat nai 1:30 in Fabiola pa tuiphumna pia hi.
Tua nitakin a pa in a lupna inn sungah
lum nuam lo hi.A innkuanpihte tawh leengla khaan ah om nuam zaw hi. Zan kim
khit deuhin a pa in sihsan hi.
A pa maitangin hehna tawh kidim ngei
khat hi.Ahi zongin tu-in lungnuam takin hankuang sungah kisial hi. Sigal a hong
pai mite in Fabiola pa in biakinn a
pai-man hiam, ci-in dong uh hi. A pa in Jesuh tungah a nuntakna buppi ki-ap
ahih manin lungdamhuai mahmah hi. Fabiola in Pasian in nalamdang bawl hi, ci-in
um hi. A pa in a sihma deuh kha nih sung
a nuntakna Topa tungah ki-ap hi.
“ Ka pa in keima deihna bangin Pasian
tungah kipia hi lo-in Pasian deihna bangin a nuntakna kipia hi,” ci-in Fabiola
in pulaak hi. Mihing in ama tha tawh a sep zawh loh thu Pasian in semzo hi.
2018 kum quarter masa Sabbath School sumpi in Southeast
Zato innpi adingin kipuak a, hih munah Chaplain Roger Pech in nasem hi.
MUC in
tu quarter Sabbath School 13na sumpi minpuasakin Tuikhing pawlpi huang
ki-umsak hi.
