Inn khat khit inn khatah

13th SABBATH  June 26

Ashley Alvarez, 20 

 

Ka  khankhiatna mun in US leh Mexican gamgi panin nai nih kipai-na khua no khat hi. Hih khua-ah ka sangkahpih ka lawm Ketzy tawh kikhawlin amah pen  Seventh-day Adventist hi.  Sangpua lamah vakkhia zel ding leh pawlpi nasepnate-ah kihel dingin hong zawn thei zel hi. Ahi zongin tua bangin hong zot ciangin ka nial hi.

“Hong zui thei kei ning, ka pate phalna ngennai keng,”ci-in nial hi. Ahi zongin pai nuam pha mel lo ka hih manin, ka nulepate phalna ka ngenkha ngei kei hi.  Ama hong sapna pen ka bil langkhatah lutin a langkhatah paikhia hi.

Khatvei ciangin Ketzy tawh Sabbath thu tawh kisai ka kinialzel uh hi. Ama’n ama  upna hong gen, ke’n keima upna ka gen hi. A taktakin ka upna thute ka theitel taktak kei hi; amah ka langpanna dana ka gen hi lel hi. Ka pa in bang ni bang ni-in Pasian biak phamawh lo hi, ci-in hong hilh hi.

Tan Sawm ka zawh khit ciangin siavuan sin ding ka khensat hi; ahi zongin sintheih nading ka ngah kei hi.Pasian in hong mangngilh hi ding hiam, ci-in ka ngaihsun hi. Kum khat sung tawntung dahna tawh ka kidim hi. Tua bang dinmun ka om laitakin Ketzy in camp ah  kihel dingin hong zawn a, ka zui pah hi. Hih camp sung nuam mahmah hi. Ni thum sung sawtin pawlpi nasepna bulphuh a kibawl camp khat hi. Gunte hahsiang banah Adventist biakinn puahpha cihte ka sem uh hi. Inn khat pan inn khatah pai in ka lungsim hong sukha pen hi.  Lasa-in, Lai Siangtho simin ka om khit uh ciangin mipite mai in maitai thei mahmah uh hi. Thungetsakna tungtawnin amaute kikhel uh hi, cih kilang hi.

Nidangin pawlpi nasep sungah ka kikhel ngei kei hi.  Tu-in ka kihel manin nuam kasa mahmah hi. Mun tampi-ah ka kihel nuam hi. Hih camp in ka nunzia hong khel hi. Ka dahna khempeuh hong bei hi. Nuntakna in mannei-in ngimna khat tawh nungta ding cih ngaihsutna a hong lut hi. Ka nu le pa tungah zong hih camp thu ka gen a, ahi zongin bangmah lunglutna nei lo uh hi.

Sabbath hong tungin biakinn ah ka kikhawm hi. Pawlpi mite in hong muakin pawlpi nasepnate ah hong kihelsak uh hi. Lai Siangtho thusinna nuam kasa a, tua a kipan Sabbbath hong tunsialin ka kikhawm hi.

Camp ka neih khit zawh uh kha khat khit ciangin Montemorelos University pan Lai Siangtho sangnaupang khat in nipi kaal khat sung Pasian thugenna hong nei hi. Ka inn ah ka sam a, ka innkuante tungah Lai Siangtho thusinna hong neihpih hi.  A ciah khiat ding ciangin “ na kituiphum nuam hiam” ci-in hong dong hi.

“Tua hi ka zaknop” ci-in ka kituiphumpah hi.

Kha khat khit ciangin Pathfinder thusinna khat Montemorelos University ah om a, kei zong ka kihel hi. Teci panna hun hong uh a, kei zong ka pianzia ka pulaak hi.  Tua bangin teci pangin ka gen thu a za mipi in lamdangsa mahmah uh hi. Kikhop khit ciangin makai khat in amah pen Montemorelos sangkah nuam hi, ci-in mipi zasak hi. A taktakin kei bel sangkah nuam lo, sum nei lo, tua banah ka nulepa tawh a omkhawm ka hih manin sangkah ding pen lem thei lo hi.

Tua bangteng tawh sangsia khat in khuakhal sung laibu zuak ding hong gen ciangin ka nial zo kei hi. Inn khat khit innah pai-in laibu zuakin hotkhiatna thu ka gen kawikawi hi. Tua bangin ka omna tungtawnin ka upna thu zong ka tel zaw semsem a, ka upna zong hong khauh semsem hi, cih ka phawk hi. Ka neulai pek a inn khat khit inn khatah pai-in laibu zuak ding ka lunggulh pen tu-in a tangtung takpi ahihlam ka mu hi. Laibu zuak nuam ka sa mahmah hi. Khuakhal hong bei ciangin ka nute’n innciah dingin hong vaikhak uh hi. Inn ka tun ciangin sangkah ding ka lunggulh hi. Laibu zuakna tungtawnin sang kikah thei ding cih ka theih ciangin sangkahnopna lungsim hong hat semsem hi. Tu-in laibu zuak nasep zomsuak dingin Pasian in hong sawl hi ding hi, ci-in ka ngaihsun hi.

A tawpna-ah ka nute’n sangkah ding hong phal kei uhleh laibu zuak nasem veve dingin ka ngaihsun hi. Sangkah dingin ka pai khia a, ka nulepa lungkimlo-in, sang huang sungah hong koih uh a, kam beek hong paupih lo uh hi. Hamsa ka sa mahmah hi.

“Topa aw, hong huh in, nang simloh kuamah dang hong huh ding om lo hi,” ci-in thu ka ngen hi.

Kha khat khit ciangin ka nulepa tawh kithuzakna bangmah om nawnlo hi. Ka khialhna hinteh ci-in ka pa ka hopih hi. Inn hong ciah nuam ing, ci-in ka gen leh, ka pa in “ hong ciah kei o, na sangzom suak in; na nu tawh Adventist pawlpi-ah kituiphum khin ung” ci-in hong dawng hi. Ka pa hong gen thu ka um zo kei phial a, ka kap hi. Ka pau thei nawn kei a, ka kapkap hi.

Tua bangin laibu zuakin sangkah dingin ka khensat pen ka nulepa in lamdangsa mahmah uh ahihlam ka nungtheih hi. Laibu zuakna tawh Pasian nasem dingin ka khensat pen Ama deihna hi, cih ka phawk hi.

Sanghuang sungah hong koih khit uh ciangin ka nu le pa in Adventist thu na kan uh  hi. Lai Siantho thusinna nei uh a, a na kituiphum uh hi. Amau kituiphum ka zak masiah, ka nu le ka pa  in kei tungah heh tawntung dingin ka ngaihsun hi.

Ka pa tawh ka kiho khit uh nipi kaal guk khit ciangin ka nu le pa, ka sanggam pa kum 17 pha khat leh ka sanggam numei kum 13 pha khat kituiphum uh hi. Pasian tungah citakna tawh laibu zuak nasemin ka omna tungtawnin ka innkuanun a kituiphum thei ka hi uh hi.

          Ka teenna uh San Fernando pen khuapi  lianlua hi lo hi; ka khuapihte un ka innkuanun Adventist pawlpi ah kituiphum cih thu thei khin uh hi. Ka nu le pa in Adventist pawlpi sungah hong lut khit uh ciangin midangte tungah zong Sabbath thuman a genna uh tungtawnin  mi tampi in Adventist sung hong lut uh  hi.

          Tu quarter Sabbath School 13 na sumpi in Montemorelos University leh a dang 12 ah kipuak ding  hi.

MUC in  tu quarter Sabbath School 13na sumpi minpuasakin Tuikhing pawlpi huang ki-umsak hi.

Nung Sabbathin i kizaksakna om bangin tu ni-in Sabbath 13na sumpi khiat ngei a zah thum a khiat ciat ni.

Topa’n mimal khat ciat tungah a zah tampi hong dinkik zaw tahen.