September 25, 2021

 William A. Spicer in Pasian A Masak Manin

 William A. Spicer in na dangdangte sangin Pasian masak zaw hi. Mun tuamtuamah zin kawikawi-in Adventist mission a phuankhia masa pen hong suak hi. Pasian i masak zawh nadingin ama nunzia in eite hong tawsawn hi.

           Spicer in kum 23 hi pan taleh England  gamah va zinin pawlpi nasep va sem hi. USA ah hong ciah kik in General Conference zumpi pan sawlna tawh gamdang nasepna tawh kisai lai-etpi sem hi. Pastor Spicer in india gamah 1898 kumin missionary va pai-in tua hun laitakin Southern Asia huam sungah tuiphumsia thumte lakah amah zong kihel hi. Adventist laihawm pankhia-in, pawlpi nasepna khangto mahmah hi. USA ah kum 1902 ciangin hong ciah kikin General Conference secretary sem hi.

Ama panmun bulpi in  mun tuamtuamah nasepna tawh kisai vaisai hi; hih panmunah kum 20 sung bang sem hi. Mun tuamtuamah Pasian nasemte paisakin, mun tuamtuam pan amau teenna mun a zuan kik cih bangin nasep gim mah mah hi. Spicer in SDA pawlpi nasepna-ah a muibun mahmah makai khat hi. Tua panin General Conference makaipi sem a, kum 8 sung sem hi.

Kum zalom 20 kimtengin leitung khualzinna hamsat mahmah laitak hi-in, Spicer in mun tuamtuamah  va zin khia zo hi.   Na dangdangte sangin Pasian masak zaw ahih manin pawlpi nasep in mainawt mahmah hi. Seventh-day Adventist Pawlpi in mun tuamtuam, pau nam tuamtuamte lakah  missionary khahkhia  hi. Spicer in ama kipiakna hangin tu-in i pawlpi in hih ciang dinmun a tung thei ahi hi.

          Jesuh in eite a hong hotkhiat nadingin na khempeuh nusia hi. Ama hong itna in Amah i masak nadingin hongkai hi.