Zuki leh Pali in Pasian A Masak Manun
Zuki leh Pali in nasep lawhcing mahmah
nupa hi. Amau nasep in innlam tawh kisai hi. A ngah masak uh sumkholin biakinn
lam ding ngaihsun uh hi. Ahi zongin lamet loh hamsatna lianpi thuakin, lamet
bei-in om uh hi. Na khempeuh suplawh ding hi phial taleh Pasian masak ding
khentat uh hi. Annek tuidawn hamsa taleh
amau khentatna om bangin biakinn aa dingin sum tuamkoih tawntung uh hi.
Naseppih lawyer leh sum sazian bawlte in mihai bangin ngaihsun uh hi. Ahi
zongin na khempeuhah Pasian masak ding nunung lo uh hi.
Na khempeuhah Pasian masak ding a lem
hangin hun khat ciangin hamsa mahmah thei hi. Hamsatna hong tun ciangin Pasian
masak ding cih pen a piang thei lo dinmun tawh kibat hun om hi. Tua bang hun
ciangin Kha Siangtho ompihna bekin na
khempeuhah Pasian masak zawhna hong guan ding hi.
Zuki leh Pali in biakinn a zawh zawh nadingun nasep hanciam hi. Inn
panin biakinn mun a tun nadingun mawtaw
tawh nai nih bang pai uh hi; nasemte in nasem uh a, amau nupa in vaizai in om
uh hi. Bang bang piang taleh biakinn
kizawh mateng hanciam ding kisam hi, ci
hi. Nasemte in zong lungnuam
takin nasem uh hi. Sum om nawn lo ahih manin a mawtaw uh leh a inn uh bank in
la kik dingin za sak hi. Bang cih ding, koi ah
om ding cih lungkham uh hi. Bank in a lak madeuh ni 3 kisapin Zuki in Durban
khuapi, South Africa gamah van puak ding khat contract ngah ahihlam kizasak hi.
Tua panin nasep maban zomto thei uh a, tu-in biakinn kizo siangin a inn leh mawtaw
nei suak thei uh hi.
Pasian
in ompih in Pasian nasepna mun tampi-ah mapang thei uh hi. Ellen White in hih
bangin gelh hi: “Pasian aa dingin
nasepna-ah kihel manin a zawnlawh mite in bang ngah ding uh hiam? Khrih in nang
le kei aa dingin zawnna hong thuak hi. Ahizongin ama zawnna in nang le kei
tawntung hauh nading hi. A bei ngei lo ding nopsakna sungah na neih na lamhte
khol in. Leitung neih le lamh in bei
mang ding hi. Ahi zongin tawntung vankholhna in bei hun nei ngei lo hi. Gutate in luh zawh lohna, ngetin a nektum
theih lohna munah khol in. (Counsels on Stewardship, 41).
Zuki leh Pali in na khempeuhah Pasian
masak uh hi. Amau upna in tu-in tha hong guan hi. Jesuh in eite a hong hotkhiat
nadingin na khempeuh nusia hi. Ama hong itna in Amah i masak ding hongkai hi.
