Saul in Pasian A Masak Loh Manin
Na khempeuhah Pasian i masak ding hamsa hi. Pasian a masak lo Saul nunzia tungtawnin pelh ding leh zuih ding thu om hi lo hiam?
Mi kimkhat in eima ngaihsutna ei deihna
mah ultungsak hi. Sawmah khat leh sumpi tawh kisai-in Pasian hong hilhna sangin
eima hoihsak khat peuh zuih ding hi lo hi.
Saul in ahihna khempeuhah Pasian a
masak ding hamsa-sa hi. Eite in zong hamsa i sa ciat hi. Saul in Pasian a masak
loh ciangin dawi gi lo in a ukcip ding Pasian in daltan lo hi. Pasian in mimal
khentatna leh deihtelna bangin hong nungta-sakin Ama thupha a sang nuam leh a
nial ding eima khentatna bang hi. Dawi gilo in Saul ukcipin lunggimpi-in David
nungdelh hi. Saul tapa Jonathan lawmhoih penpen in David hi.
David in Saul tungah bangmah siatna
bawl lo hi napi, Saul in David thah dingin nungzuih den hi. David in kumpi a
sep ding Saul in haza hi. A nungsang ciangin Saul in Pasian hopihna za nuamin
dawi aisan theite tawh kipawl hi. Pasian in dawite tungtawnin Saul hopih lo hi.
Saul in Pasian zuan kik ding ngaihsun a, ahi zongin a lampi tot man lo hi;
Pasian phal loh lampi tawh Pasian kiang zotsawm hi. Saul in na nengno khat
tungah Pasian a masak lohna hangin a
kumpi gam taan hi.
Sawmah khat leh sumpite tungah Pasian i
masak loh ciangin i nuntakna sungah siatna namcin hong lut hi. Pasian in
hehpihna tawh kidimin na mawhna hong maisak hi. Tuni a kipan na khempeuh tungah
Pasian masak in.
Saul in Pasian a masak ding a nialna
hangin amah leh a mipihte in siatna thuak uh hi. Pasian hong itna in Ama leh A
gam zong masa, na khempeuhah Amah masak ding hongkai hi. Saul bang lo-in Pasian
i masak ding kisam hi.
