Israelte in Pasian A Masak Loh Manin
Daniel
in Babylonah saltangin a kipaipihin
khangno khat hi. Tua huni Babylon in leitung khempeuh a uk gam khat hi. Kumpi
Nebuchadnezzar in galdo-in a zawh gamte sung pan ama nasem dingin a pil pente, a
siam pente kaikhawm hi. Tua bangin a kaihkhop mite Babylon biakna leh ngeinate
a hilh uh hi. Tua bangin Babylon ukna kizel dingin ngaihsun hi.
Daniel leh a lawmte tawh midang tulsawm
val bang kumpi nasem dingin om uh hi.
Amaute tungah sittelna masa in nek le dawn hi. Pasian masak uh ahih
manin Lai Siangtho hong hilh bangin ne ding dawn ding a ngetna uh hangin
hamsatna lianpi thuak uh hi; nuntakna bei ding dong tung thei hi. Ahi zongin
hih khangnote in bangbang a thuak ding hi zongin Pasian masak ding khentat uh
hi. Kuakua in a sawl zongin Pasian
deihna tawh kituak peuhmah zuih dingin a ngaihsun kei uh hi.
Daniel
leh a lawmte in annekna-ah Topa thupiak bangin citak uh a, Pasian in amaute
pilna leh theihna a guan hi. Babylon sangnaupang khempeuh lak pan Daniel leh a
lawmte bangin pilna leh theihna nei kuamah a om kei uh hi.
A
nungciangin Babylon mipil khempeuh tungah ukna nei dingin Daniel a kikoih hi.
Babylon ukpi khat hong suak hi.
Bangbang piang taleh Daniel in Pasian a masak zawkna hangin tua bangin
minphatna ngah ahi hi. Pasian nusiat
ding sangin meikuang sungah kiat ding a tel zaw uh hi. Daniel 3:17 “ Meikuang
sung panin a na kasep uh Pasian in hong honkhia thei hi. Kumpi pa khut sung
panin Pasian in hong honkhia ding hi; a hong hotkhiat kei phial leh zong nangma
milim bia-in a mai-ah ka kun kei ding uh hi.”
Daniel in teek khin hi taleh Pasian
nusiat ding sangin humpi kikoihna sungah khiat thuak ding phamawh a sa kei hi.
Ahi zongin Pasian in humpi suksiat ding panin a honkhia hi. Daniel in Pasian
min phatin Babylon gam sungah gam makaipi-in kikoih hi.
Daniel in na khempeuhah Pasian masak
hi. Ama nunzia in eite’n zong Pasian masak ding hongkai hi lo hiam?
