Solomon
in Pasian a Masak loh Manin
Na khempeuhah Pasian i masak ding hamsa hi. Solomon nunzia in i pelh ding leh i zuih ding hong hilh om hi lo hiam?
Solomon in a nuntakna-ah nopsakna tawh
kipan hi. A kumpi nasepna hangin a kisam
penpen pilna a nget ciangin Pasian in pia hi. Pilna banah minthanna, neih le
lamh hauhna, nopsakna zong pia hi. Ahi zongin Solomon pilna in leitung pilna
hong suah ciangin na khempeuh a mawkna hi, ci-in ngaihsun hi; a tawpkhakna-ah
Pasian thukham palsat hi.
Solomon in Topa inn ding lam a, nasem
mi tampi sawl hi. A sepna khempeuh matutna ngah hi. Namdang tuamtuam panin a zi dingin kaikhawm
hi. A galte tawh thukimna bawl hi. Solomon in a zite aa dingin biakna tau
tuamtuam bawl hi. Namdang pasian in a kumpi inn sung hong tung hi.
Biakbuk sangin a zah thum a gol zaw-in
kumpi inn gol khat hong lam hi. Tua bangin a minthanna, a liatna khempeuh
nuamsa hi. Ahi zongin a sawt lo-in phiangsiah tampipi kaikhawm a, tagah
meigongte cimawhin thuman lohna tawh nasepna hong tam semsem hi. Pasian in a
tawntungin nopsakna tawh kidimin a geelsak hi napi, tu-in Solomon in ama si le
sa deihna a zuih tak ciangin siatna sung hong tung hi.
Solomon in Pasian masak lo ahih manin
lungkhamna tawh hong nungta a, ama khit ciangin a kumpi gam in khennih kisuah
hi. Tuhunin zong leitung mipil tampi in amau ngaihsutna siksanin nungta uh a,
Pasian thukham palsat uh hi. Pasian masakna i cih in Ama kammal thupi
ngaihsutin nuntakpihna hi. Naupang khat in a nu le a pa cih bangbangin a gamtat
bangin, Pasian in eite cidam nading, nopsak nading lampi i zuih ding kisam hi.
Nu le pa in tate ading a hoih pen a ngaihsutsak uh mah bangin Pasian in A mite
aa dingin a hoih pen hong geelsak hi.
Khat veivei ciangin Pasian nusia ihih
manin Pasian in Ama thupha kongkhak thei hi. Tua bangin Pasian in ama thupha
hong piak lohna in Amah i phawkkik theih nading hi thei hi. A thuneu no khat tungah citak hi lehang, Topa
in na lianpi tungah hong muang ding hi. Na khempeuhah Pasian i masak ding kisam
hi.
Pasian neihsa kemte ihi hi. Ama neihsa
limtak a kem ding ihi hi. Solomon in na khempeuhah Pasian a masak ding phawk lo
ahih manin amah leh a mipihte in siatna lianpi tuak uh hi.
Pasian
hong itna in Ama gam zong masa ding leh na khempeuhah Amah i masak dingin
hongkai hi.
