Eli tate in Pasian a Masak loh Manin
Pasian i masak ding hamsa hi. Eli in na khempeuhah Pasian a masak lohna hangin a tuah thute in eite tungah vauhilhkholhna hi lo hiam?
Eli
pen milian khat hi. A siampi nasep limtak sem hi. Thukhente uk sungin mun
tuamtuam panin mite hong pai-in meihal biakpiakna pia uh hi. Eli in biakbuk
limtak kemin biakpiakna pia dingin a hong pai mite makaih hi. Kumsialin tua
bangin biakpiakna pia-in hong pai mi tul tampi om hi. Ni khat ta nei lo numei
khat in ta deihin thungen dingin biakbukah hong pai hi. Eli in tua nu taneih
nading thungetsak a, tua nu in ta nei hi. Hannah in ta nei-in, Pasian biakbukah
nasem ding a tapa ap hi. Pasian a masak numei khat hi
Eli
in naupang Samuel limtak pantah hi; Pasian thu, biakbuk thu leh meihal biaknate
limtakin hilh hi. Ni khat Pasian in naupang tungtawnin Eli thuhilh hi. Zankim laitakin Pasian in naupang Samuel thum
vei hopih hi. Pasian in naupang Samuel tungtawnin Eli a hilh thu i ngaihsun kha
kei zel hi.
Eli in Israel mite tungah nasep citak
mahmah hi napi ama tate limtak hilh kha lo hi.
Eli in a innkuan sung, a tate limtak hilh a
pantah ding cih pen Pasian a masakna khatin ngaihsun lo hi. Eli in a tate a
hilh lohna hangin siatna lianpi thuak uh hi.
Eli
tate in Pasian a masak ding uh phawk lo ahih manun siatna sungah nungta uh hi.
Israel mite in meihal biakpiakna a
paipihte uh Eli tate in zahtak lo uh hi; thaangbawl uh hi.
“Eli tate in Topa muhna-ah siatna lianpi
bawl uh hi; biakpiakna kimawlpih uh hi”
(1 Samuel 2:17). Tua bangin a gamtatna uh in
Pasian a zahtak lohna uh kilang hi.
Pasian in Eli tate siatna thuak zo nawn
lo ahih manin Philistine mite khut sungah Eli tate a si uh hi. A tate sihni mahin Philistine in
Thuciam Singkuang man uh cih a zak ciangin Eli zong a nuntakna bei hi.
Khat veivei ciangin sawmah khat leh
sumpi zahtak ding zahin i zahtak kei hi. Piangsakpa i zahtakna leh sumpi
zahtakna in kizopna nei hi. Sumpite zahtak lohna in Pasian zahtak lohna suak
hi.
Eli tate in Pasian masak lo uh hi. Tua
manin siatna lianpi thuak uh hi. Pasian hong itna in Ama gam zong masa-in
Pasian i masak tawntung ding hong sawl hi lo hiam?
