Noah in Pasian a Masak Manin
Na teenna khua in Pasian a awlmawh lo
khua hileh, Noah thuakzia ding na thei ding hi.
A taktakin tua khua mite in Pasian awlmawh lo hi bek lo-in amau le amau,
khat le khat zong ki-thusim lo, ki-awlmawh lo uh hi. A gitlohna uh lian
mahmahin mihing khempeuh a beimang loh phamawh dinmun hong tung hi.Tua bang hun
laitakin Pasian in leitung hong honkhiat kipan hi.
Noah in Pasian a masak dingin kihilh
hi. Kum za-lom khat val bang a nuntakna khempeuh Pasian sawlna bangin tembaw
lamin a hun zang hi. Hih hun sung mahin mawhna kisikna thu leh nunzia kikhel
dingin tangko hi. Tua bangin a gamtatna
hangin mite simmawhna, ciamnuih bawlna thuak hi. A thuhilh a za mite mahmah in
tua bangin simmawh bawl uh hi taleh Noah in a nasep nusia lo hi. Nisimin
Pasian masak denden hi; Ama lamlahna bangin nungta hi.
Mihing
in eima deihna leh eima ut khat i masak tawntung hi. Makai khat in ama siamnate leh nate tungah kingaknopna
lungsim nei zel hi. Nuntak hamsa-in nektawm zong mi khat in Pasian mangngilh
kha zel hi. Noah mah bangin eite khat ciat in zong nisim, kaalsim, khasim a Pasian i masak tawntung ding, Ama gam leh
deihna zong masa ding kisam mahmah hi. Tua bang hileh i kitangsapna a om khempeuh
Topa in hong sik ding hi, cih kamciam hong pia hi. Pasian in a kamciamte pel ngei lo hi.
Leitung
nusia dingin tuicin hong tungin tembaw sungah Noah leh a innkuanpihte in nuam
takin om hithiat thei uh hi.Mihing in suahtakna ngah hi.
Noah hunlaite mahbangin Pasian mite in
simamawhna, langpanna i thuak hi. Ahi zongin a sawt lo ni khat ni ciangin
Pasian in eite a hong honkhia dingin hong pai ding hi. Amah a masak mi khempeuh
tungah i vawh bangin a gah at ding leh thaman a hong kipia ding hi. Noah in tembaw
a lamna-ah Pasian masak hi. Amah bangin eite in zong Pasian a masak dingin hong
sawl hi. Nisimin Pasian i masak dingin a hong to den hi.
