Tu
Kaal Sung Sim Ding: Isa. 7:14–16, Isa. 7:17–25, Isa. 8:1–10, Isa. 8:11–15,
Isa. 8:16–22.
KAMNGAH: “ Jacob innkuante pan-a a mai a selpa TOPA ka ngak ding hi. Amah ka muang ding hi” (Isaiah 8:17).
New York khuapi-a Harlem innpi meikang a,
inndawi li-na munah mittaw numei khatin kongkhak panin khuadak hi. Meiphelhte
in cih nading thei lo uh hi. Kahlei om lo, kahto thei lo uh hi; meiphelhte in
khau kiphan puan khat kidawh hi, na omna
panin hong tuaksuk in, ci-in a gen uh hangin tua numei in khuamul lo ahih manin
tuaksuk ngam lo hi. A sawtteh a pa hong tungin a pa in bawngtal kii khat tawh
kiko-in hong tuaksuk in, hong na dawntuah ding hi ung, ci-in a gen ciangin, a
pa thupiak muanna tawh tua numei in tuaksuk hi; bangmah liamna om lo-in, a guh
a taang bangmahci lo hi. A pa tungah muanna kip nei hi. Amah in a pa aw a zak
ciangin, a pa sangin a muanzawk dang kuamah om lo hi. Edited by Michael P.
Green, 1500 Ilustrations for Biblical Preaching, p. 135.
Tua bang mahin Pasian in a tate aa dingin a hoih penpen hong geelsak khin hi. Ahi zongin amaute in Topa in damtakin a makaihnate a nial uh hi. Tua hi-in Pasian in hamsatna tuihualpi tawh amaute a thuhilh hi. Tu-in amaute khialhnate panin eite in bang thu manpha mu i hiam?
SUNDAY | January 17
Genkholhna Tangtung (Isa. 7:14–16)
Isa.7:14–16 in Immanuel in Ahaz tungah
gimna tawh kizomin a kipia lamlahna (sign) khat hi. Naupang Immanuel in annek
ding leh nek loh ding a khentel theihma-in tua kumpi nihte gam kinusiacip ding
hi” (Isa. 7: 16). Hih kumpite in Syria kumpi leh khanglam Israel kumpi pulaak hi(Isa. 7: 1,2, 4-9), Pasian kamciam
bangin amaute vangliatna in a sawt lo-in
a beimang ding hi.
Bang hangin Isaiah in naupang in bawngnawi khal leh khuaizu ne ding hi,” ci-in pulaak hi ding hiam? Isa. 7:15.
_______________________________________________________________
Judah gam sung anpiangte Assyriante’n susia
khin uh hi ( Isa. 7: 23- 25). Thuciam Lui pulaak Immanuel a kipan mi khempeuh
in teenna mun kip nei lo a zin kawikawi mite an a ne ding uh hi (Isa. 7: 14,
15,21). Amaute in gilkialin a om uh hangin nuntak khop nading nek ding an nei
veve uh hi.
Syria leh khanglam Israel tungah genkholhnate bang hunin tangtung hiam? 2 Kum. 15:29, 30; 2 Kum. 16:7–9; 1 Khang.5:6, 26.
Isaiah genkholhna in 734 B.C kimpawl hi
ding hi. Ahaz kumpipa piak golhguk sumpite tawh kisai-in Tiglath-pileser III in thuman lo-in nasepna
khempeuh susia hi. Amah in khanglam kumpite kipawlna zo thei ding a, gam mite
salin kai ding a, Judah gam khempeuh Assyria ukna nuai-ah a koih hi ( 734 – 733
BC). Israel mi a cianlaite Kumpi Pekah a kithah khit ciangin a cianlai Israelte
in suahtakna ngah uh a, Hoshea in
gallelin huhna pia hi. 733 leh 732 kum ciangin Tiglath-pileser in Syria khuapi Damascus do-in zo hi. Tua khit
ciangin Assyrian ukna nuai-ah Syria a koih hi. Tua hi-in Isaiah in a
genkholhkhit kum 2 hun sungin 732 BC kumin Syria leh Israel in gallel uh hi.
Hih kumpi nihte in Ahaz tawh kido-na bei hi.
Shalmaneser V in 727 kumin Tiglath-pileser III a zawh khit a sawt lo-in Israel Kumpi Hoshea in Assyria kumpi langpanin ama thuneihna bei suak hi. Assyrian kumpi in BC 722 kumin Samaria khuapi uk a, Israelte tul tampite Mesopotamia leh Media gamah salin kai hi. Israelte in hih gamah namdangte tawh teengkhawm uh a, minam khat ahihna uh mangthangsak uh hi (Isa. 7: 8). Hih gamte sungah a teen zawh uh kum 65 khit ciangin Ephraim in a mangthang minam hong suak hi. Pasian in Judahte lang khat a om a galte uh thuak ding genkhol a, ahi zong Ahaz in Assyria muan belin nei ahih manin gim thuak hi.
Khanglam gamte-ah a teeng mite dinmunah
a om dingin kingaihsun inla, kimlepaam thupiangte hangin upna khahsuah baih lo
ding hiam? Tuhunin zong upna khahsuah ding ol mahmah hi lo hiam? Zinglethai-ah
gimna hong tun ciangin upna kip dingin tu-in bangci bangin kigingkhol ding na
hiam? 1 Pet. 1:13–25.
MONDAY | January 18
A Kimu Khol Ngah Ding Thamante (Isa. 7:17–25)
Isa. 7: 17- 25 sung na sim ciangin
amaute gam sung a thupiang ding Topa in bang hilhkhol hiam? Bang hangin tua
thute a pian ciangin lamdangsak ding kisam lo hiam?
_______________________________________________________________
_______________________________________________________________
A lampial Israelte in Jehovah kiang zuan
kik dingin kamsangte in sam tawntung uh hi. Kamsangte in mawhna kisik ding thu
hilh tawntung uh hi; mawhna kisikin amaute nunzia a kikhel uh ciangin Pasian
vangliatna kilangh semsem hi. Ellen G. White, Prophets and Kings, p. 325.
Tua hi-in Ahaz in upna tawh kalsuan ding
sangin launa tawh kalsuan hi; ahizongin
Pasian kiang pan hong pai amaute lungdam nading thu in Syria leh Israel
in guallel ding uh hi. A dahhuai thu in Assyria leh amah a panpih a lawmte in
Syria leh Israel mite galte sangin a lauhuai zaw gal tuak ding uh hi. Pasian
piak hotkhiatna nial ahih manin Ahaz in gallel ding hi.Ahaz in ama dinmun tu-in
a kiphawk hangin a lauhuai zaw dinmun manawh ahihlam kitel ding hi. Kumpite
muan ding sangin Topa muan ding hoih zaw hi ( Late 118:9). Ahaz in Tiglath-pileser III va pawmleh,
khanglam gamte lungkim ding a, Judah zahtak ding hiam? Assyrian in minthanna leh vangliatna tawh
lungkim hun nei ngei lo hi, cih amau laigelhnate ah kipulaak hi.
2 Kum.16:10–18 leh 2Khang. 28:20–25 sim
in. Ahaz tungah bang thu piang hiam? Thuman guipi bang hong hilh hiam? Bang
hangin tua bangin a gamtat in a lamdang thu hi lo hiam?
________________________________________________________________
________________________________________________________________
2Khang. 28:20–23 sungah Ahaz in Topa tungah kinga lo-in mite tungah a kingakna hangin a thuak gimnate gen hi. Mihing in a kimu thei nate, a kilawng thei nate muanlesuanin a neih pen a mihing hihna khat hi. Ahi zongin hih leitung nate khempeuh in a kip tawntung ding khat zong om lo hi; tawmno sungin a beimang ding ahi uh hi.
2Kor. 4:18 sim inla, bang hong hilh hiam?
Koi bangin nang le kei in tua thu nuntakpih ding i hiam? Tua thute a nuntakpih
takpi hi lehang bang kilamdanna a kimu ding hiam?
TUESDAY | January 19
Min in bang pulaak hiam? Isa. 8:1–10.
Isaiah tapa nihna tawh bawlung kimawl
dingin ngaihsun in. Maher-shalal-hash baz ci-in a min tawh samin kimawl ding hi
lecin bawlung lot ding zekai ding hi. A min lawh ding sau bek tham lo-in a min
khiatna in sau zaw-lai hi. “ A kisusia, a kibuluhte kiang a manlangin zuan”
ahih keileh “siatna in nawhsa takin hong tung, siatna kinawh” cih khiatna nei hi. A min khiatna in zawhna thu
pulaak hi-in ahi zongin kua in kua tungah zawhna hi ding hiam? Isa. 8:4.
Isaiah 8:1–10 in Isa. 7 sunga thupuak hong
phawksak kik hi. Naupang a picin ma-in Syria khuapi leh Khanglam Israel
khuapite in Assyrian uknuai-ah om ding uh hi. Tua banah Pasian sungah khamuanna
Jerusalem khuapi sungah a luang Shiloah luitui kipulaak hi; Judah in tua
khamuanna nial ahih manin Assyria ukcipna thuak hi. Euphrates Gunpi tuikhang in
Assyria vangliatna limcing hi. Ahaz in Assyria tungah huhna ngen hi. Tua hi-in
Isaiah tate in Judah tatzia leh khanglam Israel gamtatzia limcing uh hi.
“Thakhat in siatna galte in manlang” hi taleh a cianlai mite in a gam uh hong
zuan kik ding uh hi. Bang hangin lametna omlai hi ding hiam? Bang hang hiam
cihleh Assyria in Immanuel leitang dimkik ding a ( Isa. 8:8), amaute in “
Pasian in ei tawh hong omkhawm hi” cih kamciam tawh nungta ding uh hi(Isa.
8:10). Hih thu in Isaiah gen khempeuh a
thubulpi hong hilh hi. Pasian in Judah galte tungah thukhen ding a, galte
ukcipna, gimna leh galtai-na panin Topa tungah a citak Ama mite, Topa in a gam
uhah a ciahpih kik ding hi; Topa in amaute gam a puahpha kik ding hi.
Bang hangin Isaiah in a tate min leh a
zi, kamsangnu tawh kizopzia limtak pulaak hi ding hiam? Isa. 8:1-3.
______________________________________________________________ _____________________________________________________________
Tua tapa a suah hun in a thupi limcinna khat hong suak hi. Limcinna tawh a kipia tua tapa min Immanuel mah bangin, amah a kipaai a kipan a suah hun dong, Assyria in Syria leh Israel a zawh hun in, naupang khangto-in picing a suahma hun sawttan sauvei lo ding hi. Hih mun ah a nu leh a pa in masuan lianpi nei hi (Isa. 8:4). A nu in naupaai ma-in tapa naungek min ding Isaiah in puak khin hi. Naungek hong suakin amin in a mipihte tuahkhak ding thute genkholhna hong suak hi.
Topa mite in khialhna khat khit khat sungah
nungta uh hi mah taleh Topa in amaute honkhia nuam veve hi. Thaneemin khialhna
tawh kidim hi taleng, koi bangin nisimin hih thu nuntakpih ding i hiam?
WEDNESDAY | January
20
America President sem dingin a thugen masak
penpenna-ah Franklin D. Roosevelt Lungkiatpi Hun (The Great Depression) a
thupiangte gen in gam mite lungkia –sak mahmah hi. “Eite
in i kihtak ding khat om a tua in kihtakna mah hi pah hi” ci hi. U.S.
Capitol, Washington, D.C. (March 4, 1933).
A lungkia mite tungah Isaiah thupuak in:
“Pasian a kihta eite in kihtak ding bangmah dang i nei kei hi,” ci hi. Mite
kihtak neih bangin kihtakna nei ding ihi kei hi; Pasian bek mah i kihta ding hi
(Isa. 8:12, 13).Hih in Lai Siangtho sungah a thupi mahmah khat hi. Gentehna-in Mang.14:6–12, vantungmi thumte
thupuak in leitung mun khempeuhah thupuak ding hi: Pasian kihta unla Ama
vangliatna phat un. Mang. 13 sung a sapi kihtak ding hi lo-in Pasian bek mah a
kihta ding ihi hi.
Pasian “kihta” cih thu koi bangin na
theitel hiam? A khiatna in bang hi ding hiam? Pasian it ding thupiak siksanin
Pasian kihta ding cih thu in koi bang hi ding hiam? (Matt. 22:37)?
___________________________________________________________
________________________________________________________________
Pasian kihtakna mantakin Amah in vantung
leitungah a lian pen hi; Ama tungah kuamah om lo hi, ci-in a siangtho
theihtelna hi. Amah itna i nei ahi a, i nei kei zongin, Pasian kihtakna in
kihtakna a om khempeuh tungah zawhna hi.
Amah in nang aa ding nungta ahih manin Ama phalna om lo-in bangmah in
nang a hong sukha kei ding hi. Nangmah in Pasian langpan na hih manin Amah in
na langah a pang hi zaw hi. Ama kiang pan na taikhia thei a, ahi zongin Ama mai
pan buk nading a om kei hi.
Pasian kihta cih thu in 1 John 4:18 tawh kilehbulh ahi hiam? “Itna sungah kihtakna a om kei hi. A kicing itna in kihtakna a hemkhia hi. Bang hang hiam cihleh kihtakna in gim thuakna tawh kipawl hi. Kihtakna nei mi in itna kicing a nei kei hi.” Kihtakna a tuamtuam om hi. Thuneihna lianpi nei mi khat tawh kilawmta-in amah tawh na nuamna na dahna pulaak ngam hi lecin, na tungah siatna hong bawl lo ding hi, ci-in na lawm tungah kihtakna na nei kei hi. Ahi zongin amah tawh na kizopna-ah lawmta na hihna uh zahtakna khat na nei hi.
Khristian ihih mah bangin leitung nate a
it ding ihi kei hi (1 John 2:15). Leitung mite kihtak thu le nate eite in i
kihtak loh ding a om ding hiam? Om ahihleh tuate in bang hi ding hiam? Bang
hangin kihlo ding ihi hiam? Tua khitteh leitung mite in a kihtak lo uh eite in
i kihtak ding bangte hi ding hiam? Matt. 10:28; Jer. 10:2, 3.
THURSDAY | January 21
Pumpi Bek
Nungta-in A Si Nuntakna Dah Maipuak
(Isa. 8:16–22).
Isa. 8: 16 – 22 sim in. Bang thu pulaak
hiam? Kumpi Ahaz tawh bang kizopna nei hiam? Tomkimcingin pulaak in.
__________________________________________________________________ __________________________________________________________________
Ahaz in pagan/dawi biakna sungah a kip
mahmah kumpi khat hi (2 Kum.16:3, 4, 10–15; 2 Khang. 28:2–4, 23–25), hih dawi
biakna sungah thuman thutak tawh biakna kihel lo hi (Thkikna 32: 17). Amaute in
dawite tungah meihal biakna pia uh hi (1Kor. 10:20). Tuhun aisanna, dawi-ai
tuamtuamte in Near Eastern gam a
biaknate tawh kibang hi. Tanglai mite laibu in hih thu pulaak hi. Tuni dongin taanglai dawi biaknate a zui mi
tampi om hi. Topa tungah kinga lo-in
dawi tuamtuamte tungah a kinga mite thuaknate Ahaz in a thuak hi (Isa. 8: 21,
22; 2Khang. 28: 22, 23). Gam mite in hehna tawh kidim uh a, a kumpipa uh hamsia
uh hi (Isa. 8:21). Hih bang gimnate in Ahaz vauhilhkholhna hi napi Ahaz in
dawibiakna sungah a mite makaih veve hi. Ahaz a sih ciangin amah kizahtak lo
ahih manin kumpi kivui bangin kivui lo hi. A mite in Israel kumpite hanah vui
lo uh hi (2Khang. 28:27).
Dawi Aisanna tawh kipawl bang thute kigelh
hiam? Siam. 20:27; Thkna. 18:9–14.
________________________________________________________________
_________________________________________________________________
Dawi aisanna panin kihepkhiatna in Topa tungah cihtakna hi. 1Khang. 10: 13, 14 gen bangin Kumpi Saul in zui lo hi. “ Saul in ama thuman lohna hangin sihna thuak hi; amah in Topa tungah citak lo hi; amah in Topa thupiak a zui kei hi. Tua banah amah in Topa makaih ding ngen lo-in aisan theite kimakaihsak hi. Tua hangin Topa in Saul sihna thuaksakin ama kumpi gam in Jesse tapa David tungah kipia hi.
Na nuntakzia sittel in. Kimlepaam pan a
hong huzaap thei tuamtuamte ngaihsun in. Koi bangin a kilangkhia lo-in dawi
tawh kikop a nasepna, pumpi a sih hangin a si thei lo khat om hi, cih thu kizel
hiam? Tua bang vangliatna neite nangma khut sungah om lo hi taleh nang le na
innkuanpihte a hong huzaap zawh loh nadingin koi bangin kikem thei ding na
hiam?
FRIDAY | January 22
Sinbeh Ding: Read in The Great
Controversy, “Can Our Dead Speak to Us?”
pp. 551–562.
“Hebrewte
hunlai-in tuhun mah bangin dawi tawh kipawlin nasem om hi. Tua bang mite in a
sikhin mite tawh kiho theihna nei hi, ci-in kigen uh hi. Pumpi a sih khit
ciangin khua phawk theihna nei lo-in, tua bangin a si mite tawh kiho theihna
nei a kici mite in dawi tawh kipawlin nasemte ahi uh hi (Gam. 25: 1-3; Late
106: 28; 1 Kor. 10:20; Mang. 16:14.) Hih bangin dawi tawh kipawlin nasepna
khempeuh in Topa mai-ah kihhuai nasep ahi hi. Tua bangin nasemte in suang tawh
denlupna thuak uh hi (Siam. 19: 31; 20: 27). Aisanna zong tua bang mah hi.Dawi
tawh kipawlin tua bangin kiho theihnate in Dark Ages (Khuamial Hunpi) hunlai taangthu
bangin kigen hi. Ahi zongin dawi tawh kiho-na (spiritualism) in mi tul tampi
ukcip hi. Biakna sung banah khua sung ukna neite a kipan kumpi inn sung dongah
hong kizel hi. Taangtawng panin a hong kipan aisanna, dawi tawh kipawl
nasepnate in tu-in lampi tuamtuam tawh hong laangkhia kik hi.” Ellen G. White,
The Great Controversy, p. 556.
Kikup Ding Dotante
1. Koi bangin TV, Movie, laibu tuamtuamte leh
kimlepaamah dawi nasepnate kilang
hiam? Tua bang nasepnate in eite dal zawh ding hi lo banah mi tampi
in tua bang thute awlmawh lo uh hi taleh tua bang thute in lauhuai ahihna gen ding hi lo ahi hiam? Misite
omzia theihtelna in dawi nasepnate hong khemna hong zawhpih thei
ding hiam?
2. Isaiah
8:20 sim in. Nangma kam tawh gelhkhia in.
Na lawmte in koi bangin gelh hiam, kikum un. Topa in
bang thu hong hilh hiam?
3. Topa itna leh Topa kihtakna ngaihsun in. Koi bangin itna in kihtakna hong
nei theisak hiam? Ahih kei leh kihtakna in itna hong nei sak hiam? Na
lawmte tawh kikum in.
Tomkaihna: Isaiah gamtatna
leh ama innkuan khuasakzia tungtawnin Pasian in vauhilhkholhna leh lametna
pulaak hi. Topa in Ama nasep theihtelna tawh nasem hi, cih muanna in siatna
panin eite a hong kembit ding hi. Na sungah nungta dingin na phal nakleh Amah
in itna leh vangliatna nei-in hong makaih, hong hu hong dal ding a, kitangsapna
khempeuh a hong pia ding hi. Topa simloh vangliatna dang a muangte in kisiatna
thuak ding uh hi.
