Lesson 13 March 20–26 A Kibawl Thak Leitung

Tu kaal sung sim ding: Isa. 65:17–25; 66:1–19; 66:19–21;. 66:21; 66:22–24.

 

KAMNGAH: Tu-in vantung thakte leh leitung thak ka piangsak hi. A beisa thute kiciamteh nawn lo ding a, kaphawkha nawn lo ding hi” (Isaiah 65:17).

           Ni khat kum 12 pasalno khat in ni, kha le aksi thu kigelh laibu khat simin sangkah nuam lo hi. A nu in siavuan khat kiangah paipih hi,. Siavuanpa in “Billy,  bang hangin sangkah nuam lo na hiam, ci-in dong hi. Naupangno in “ Doctor aw, hih ka laibu simna sungah ni khat ciangin na khempeuh kangtum ding hi a, na khempeuh kisia khin ding hi, ci-in gen ahih maninm, sangkah thaman om lo hi; na khempeuh a mawkna suak ding hi,” ci-in dawngkik hi. A nu zong heh lua mahmah ahih manin, “Tuate nang lunghimawh ding hi lo hi,” ci hi. Doctor pa zong nuikawmin “ Billy aw, lunghimawh kei in. Hih genkholhnate a hong tun ciangin eite a nungta kuamah i om kei ding hi.” Mihing a si lo ding kuamah ki-om lo hi mah hi. Ahi zongin sihna bek ngakin a nungta i hi kei hi.  Na khempeuh kibawl pha thak ding a  tua  sungah a tawntungin a nuntakna a hong kipia hi. 

SUNDAY  |  March 21    

Vantung Thak leh Leitung Thak (Isa. 65:17–25)

 

     Isa. 65:17–25 sim in. Topa in a bawl thak ding bang kamciam  hiam?

__________________________________________________________________

_______________________________________________________________________

     Pasian in na khempeuh bawl thak dingin kamciam hi. Tu-in vantung thakte leh leitung thak a piangsak ding ka hi ta hi. A beisa thute kiciamteh nawn lo ding a, kiphawk nawn lo ding hi.  Hih genkholhna-ah Jerusalem in nuamna tawh kidim ding a, hih khuapi sungah a nungta mite a lungdam ding uh hi (Isa. 65:18).  Hih khuapi-ah khitui luanna om nawn lo ding hi (Isa. 65:19).  Mihing in kum 100 nungta zo ding tam lo hi (Isa. 65:20). I leitung nuntakna a bei hangin i nuntak sungin i sep i bawl khempeuh in mangthang lo ding hi. I sepna bang i tu le tate in luahto ding hi (Isa. 65:21–23). Topa in amaute sapma nangawnin a dawng ding hi (Isa. 65:24). 

     Banghangin a kicing zaw, a kibawl pha ding lei thak lamen i hiam?

______________________________________________________________

_______________________________________________________________________

     Tua hi-in Kamciam Gam sung nunzia ding hong ngaihsun kholsak thei hi. Leitungah kum tampi a nungtate zong si veve hi. Tua ahihleh na khempeuh kibawl thak ding, vantung thak leh leitung thak kibawl ding hi cih genkholhna koi munah hong tangtung ding hiam? Tuunote leh ngia honte kikhawl ding uh hi. Humpi in bawng bangin lopa ne ding hi. Ahi zongin gulpi in leivui ne ding hi. Tua munah siatna  om nawn lo ding hi. Kuaman in ka mual suangtho a niinsak nawn kei ding hi (Isa.  65:25).

     Sa ne ganhing khat in sa ne nawn lo dinmun a tun nading na khempeuh kibawlphat a kul  hi. Mawhna leh sihna omna Eden huan dinmun hong tung kik ding hi. Isa.65 sungah Pasian in a thak piansakna thu na gen a, Jerusalem kibawl thakna tawh kizomto ding a, “vantung thak” “ leitung thak”   in na khempeuh kibawlpha thak ding ahihna thu hong hilhkhol hi.   Hih thu leh Isa.11: 1-5  (Messiah in thuman tawh nasem ding)  enkak in. A tawpkhakna-ah Topa mual siangtho – leitungbuppi in kilemna tawh kidim ding hi. Hih limciinna thu (Isaiah 11) Isa.65 sungah kigen kik hi: “Gam-ui in tuuno tawh teengkhawm ding a, humpi  in bawng bangin lopa ne ding hi” (Isa. 11:6, 7). Topa mual siangtho i cih in Jerusalem a Zion Mual panin a hong kipan ding hi mah taleh limciinna leh gentehna tawh a hong hilh hi zaw-in, a taktakin a tawpna-ah Topa in a tatsa mite teen nadingin leitung thak a bawl ding kamciam a hong pia ahi hi.

 

     Gentehna-in kum 60, 70, 90 ahih keileh kum 100 hi lo-in kum tulza tampi nungta pial zongin mawhna bei-in tawntung nunna kingah ding hi lo hi.  Bang hangin tawntung nuntakna in mihingte kitangsap lian pen  hiam?

 

 MONDAY    |  March 22

Vantung “Sik Hup” (Isa. 66:1–19)

 

     Isa.66:1–19 sim in.  Isaiah hunlai thupiangte ngaihsun kawmin, Isaiah in bang thupuak nei hiam?

______________________________________________________________

_____________________________________________________________

     Kamsangte tungtawnin Pasian in thuhilhna, vauhilhkholhna a piak thu in: Pasian in a kiniamkhiat mite leh Amah Kammal a zahtak mite honkhia -in  puahpha ding hi (Isa. 66:2, 5). Isaiah 40:1 in a gen mah bangin Topa in a mite a hehnem ding hi (Isa. 66:13). Ahi zongin Topa in Amah a langpan mite a susia ding hi. Topa in kineihkhemna tawh biakpiaknate  nial hi (Isa. 66:3, 4 leh  Isa. 1:10–15 enkak in).  Topa tung a citak mite langpanin a mudah mite in siatna thuak ding uh hi (Isa. 66:5). Hih siatna thuak dingte lakah Jerusalem biakinn sungah dawi piakna a lutpih mite bangin (Ezek. 8:7 – 12) kihhuai-in a gamta mite kihel ding hi (Isa. 66:17).

     Isa.66:3 sim in. Bang thu hiam? Nuntakpih ding thuman bang hong hilh hiam? Tuhun biakpiakna leh Khristian nunna-ah kalsuanpih ding bang hong hilh hiam?

_______________________________________________________________

_________________________________________________________________

     Koi bangin Pasian in minam khempeuh Ama kiangah kaikhawm hiam? Isa. 66:18, 19.

_______________________________________________________________

______________________________________________________________

     Pasian langpangte kisiat nungah (Isa. 66:14–17), Pasian in Ama vangliatna kilangsak hi; Ama vangliatna  hangin mite in Jerusalemah hong kikaikhawm uh hi (Isa. 2:2–4 tawh enkak in).  Topa in amaute ciaptehna khat pia a, a nungciangin Isaiah tungtawnin  tua ciaptehna kilangkhia hi. Topa in a mite teenna leitung thupha pia-in nopna leh cihtheihna  tawh a kidim uh hi (Isa. 55:12, 13).  Kisiatna a thuak khit uh ciangin Topa in Ama vangliatna tawh amaute puahpha hi. Tuicin khitteh sakhi tuihup tungtawnin Topa in Noah tungah maipha a piak bangin, Topa in Jerusalem mite tungah Ama vangliatna tawh amaute bawlpha kik hi (Pian. 9: 13- 17)

      Isa.66:5 sim in. Topa Kammal mai-ah lingin lau cih a khiatna in bang hi ding hiam? Bang hangin Topa in Ama Kammal mai-ah  lingin lau ding hong deih hi ding hiam? Tua bangin na hih keileh koi bang lungsim puak nei hi ding na hiam?

 

 TUESDAY   |  March 23

Gammial Nasemte Leh Biakpiakna Makaite  (Isa. 3 66:19–21)

     Kisiatna pan a suaktak mite in Topa biakpiak nadingin namdangte hong paipih uh hi, cih a khiatna in bang hi ding hiam?  Isa. 66:19, 20.

__________________________________________________________________

________________________________________________________________

     Pasian in kisiatna pan a suakta mite  Amah a thei lo mite tungah Ama vangliatna pulaak dingin leitung mun tuamtuamah a sawlkhia hi (Isa. 66:19, 12 ). Hih in Thuciam Lui hong hilh khuamial nasepna hi. Namdangte in Hebrew mite vazuan ding uh hi banah amaute mah namdangte lakah va kuankhia ding uh a, a nungta Pasian thu va puak ding uh hi. Thuciam Thak in hih thu limtakin hong hilh hi.  Jewte in saltanna pan a suahtak khit uh leh Khrih nasep kipanma kikaal sungin  hotkhiatna thu puak kawikawi uh hi a, (Matt. 23:15), Khristian masate hun ciangin hih thupuak in manlang takin mun khempeuh kizel hi (Kol. 1: 23).

          Israelte in lo panin khaigahte tawh Topa biakpiak nadingin biakbukah hong paipih uh hi. Amaute biakpiaknate  in nam tuamtuam leh mun tuamtuam panin a kikaikhawm biakpiakna hong suak hi. (Isa. 66:20). Khaigah tawh biakpiakna in sisan lo tawh biakpiakna hi-in, tua in hingtangin biakpiakna limcing hi (Rom. 7:12 tawh enkak in). Levi mite in biakpiakna-ah a kipiak uh ciangin Topa nasem dingin a kipia khia ahi uh hi (Gam. 8:11).

     Topa in note lak panin mi kimkhat in siampite leh Levi mi dingin ka hong teeltuam hi, cih a kamciam in bang a thupitna nei hiam? (Isa. 66:21)?

_________________________________________________________________

____________________________________________________________________

     “Amaute” cih kammal in namdangte lak panin na sanggamte uh cih a pulaak kammal hi. Hih mite in Gentile mi hi-in, Pasian in biakpiakna-ah makai dingin siampite leh Levite mite tawh nasem khawm dingin Gentile zong teel hi. Hih in kikhelna lianpi khat hi. Pasian in a beisa hunin Aaron suanlekhakte bekin biakna makai dingin  thupia hi.  Gentile khat in Aaron ahi a, Levi suanlekhak khat suak thei hi bek lo-in amau sep bangbang a sem dingin Pasian in sawl hi. Hih in Jewte lakah a kiphal lo thu hi.

      1 Peter 2:9, 10 sim in. Peter in kua tungah a gelh hiam? Peter in bang thupuak nei hiam? Tuhun  nang le kei, “a siangtho minam” tungah bang thupuak om hiam?Amaute sangin eite in a hoih zaw-in i kalsuan hiam? (Pai. 19:6)?

 

 WEDNESDAY   |  March 24    

Upna Sungah Kipawlkhopna (Isa. 66:21)

 

     Israelte in “siampi nam, a siangtho minam hi” (Pai.19:6). Amaute in biakna makai dingin a tuam vilvelin teeltuam mite hi. Ahi zongin hun hong pai toto-in Gentile kimkhat zong biakna makai hong suak uh hi (Isa. 66:21).

Koi bangin Gentile mi khat biakna makai-in a omteh upna sungah kilamdanna piang hiam? Matt. 28:19,Sawl.26:20, Gal. 3:28, Kol. 3:11, 1 Tim. 3:16.

_________________________________________________________________

________________________________________________________________

     Pasian bawlthakna sungah Gentile-te in Pasian mite sungah kihel banah Jewte tawh kibangin siampi sem ding uh a, upna sungah kipawlkhawm ding uh hi. Tua hi-in Jew leh Gentile kideidanna in man nei lo hi. Isaiah genkholhna in bang hunin tangtung hiam?

_________________________________________________________________

________________________________________________________________

     Gentile-te lakah missionary sem Paul in hih bangin pulaak hi:” Khrih Jesuh sungah Jew mi, Greek mi a om kei hi…..note khempeuh in Khrih Jesuh sungah khat na hi uh hi. Khrih tawh a kipawl mi in Abraham suanlekhak sungah a lut hi-in ama tungah kipia kamciam a luah thei ding hi” (Gal. 3:28, 29). Kamciam gamh luah suakin siampi hihna in a ngah mi in tungnung ngahna hi lo-in, Jew tungah kipia thupuak bangin khuamial sung pan khuavakah a nungta mite tungah a kipia gamh luah ahi hi (1 Pet. 2:9 leh Isa. 66:19 enkak in).

     Gentile-te in dinmun sangah a kikoih hangin Jewte in Pasian tungah lungkim lo-in a kibang thaman piakna hangin thuman lo hi, a cih nading om lo hi. Tua bang mahin Gentile khat in zong Jew mite sanggam bawl ding a, a kibangin thaman pia ding hi.

     ( Matt. 20:1–16).  Pasian in Ama thupuak gen dingin Jew mite tungah kipia masa hi (Rom. 3:2); amaute tungtawnin Pasian khuavak a tang ding hi.  Paul in Gentilte tungah hih bangin gelh hi: “ A kiciing oliv kung a hiangte kisatkhia in gamlak oliv hiangte tawh kipeh hi. No Gentailte pen tua gamlak oliv hiangte tawh a kibang na hi uh a, Jewte hamphatnateng a ngahkhawm na hi uh hi. Tua ahih manin oliv hiang a kisatkhia tawh a kibang Jew mite simmawhbawl kha kei un. Note na kiphatsak theih nading uh a thu om lo hi. Note pen a hiang tawh a kibang lel na hi uh a, note in a zungpi a hingsak hi lo-in, a zungpi in note a hong hingsak ahi zaw hi” (Rom. 11: 17, 18).

      Singlamteh panin a taangkhia hotkhiatna lungdamna khuavakpi in bang hangin Pasian mai-ah biakna, minam, milian mineu in kihhuai hiam? Nang le nang kisittel in. Na minam, na thu zuihna kiliatsakna-in na nei hiam? Tua bang ahihleh kisik in.

 

THURSDAY  | March 25 

Na Min leh Na Suanlekhak In A Kip  Ding Hi (Isa. 66:22–24)

 

Isa.66:22 sim in. Bang thupuak kigen a, lametna bang hong guan hiam?

______________________________________________________________

_______________________________________________________________

    Isaiah sungah a lamdang mahmah kamciam khat in Isaiah 66:22 sung kigelh a, limtak sim in. Vantung thak leh leitung thak in i suanlekhak (seed) i minte bei lo-in kip tawntung veve ding hi. Hemkhia, susia, at khia, cihte om lo ding hi. Leitung thakah tawntung nunna a hong kipia ding hi, cih kamciam a hong kipia hi.  Tua leitung in mawhna, sihna gimna om lo leitung hi ding hi.  Tua hun ciangin i upna, thuzuihna khempeuh a kicinna hi ding hi.  Singlamteh tungah Khrih hong sihna hangin na khempeuh a kicinna hi ta ding hi.

    Bang hangin vantung thak leh leitung thakah kha thak leh Sabbathte kipulaak khawm hi ding hiam? Isaiah 66:23?

_______________________________________________________________

______________________________________________________________

    I tel zawh loh Lai Siangtho munte etzia tuamtuam om taleh, a kician khat in: Pasian in biakpiakna thukhunte a koihma-in Sabbath piangsak khin hi (Pian. 2:2, 3). Tua hi-in meihal biakpiaknate in Sabbath tawisang uh hi; a tuam din hi lo hi. Sabbath in a beisa a kipan tuni dong bek tham lo-in leitung thakah zong a kizompai suak ding hi. Lai Siangtho sungah ganhing biakpiaknate lo-in kha thak biakpiakna thupiakna om lo hi. Biakpiak ni leh kha thak a kituah hun om thei ding a, ahi zongin kaalsim Sabbath ni bangin tawlnga-in sianthosak ding kisam lo hi.  Ahi zongin leitung thakah kaalsim Sabbath ni a biakpiakna hi lo a dang biakpiakna om kha ding hi. (Mang. 22:2). Isa.66:23 in a hong hilhnop thu bulpi in Pasian mite in a tawntungin Amah a bia ding uh hi, cih thu hi.

Bang hangin Isaiah in a tawpna-ah hotkhiatna ngah mite in Pasian a langpangte kisiatna  mu ding uh hi cih thu pulaak hi ding hiam? (Isa. 66:24)

_______________________________________________________________

_____________________________________________________________________

    Isaiah in gentehna tungtawnin vauhilhna a pulaak in “ saltanna pan a ciah kik mi citak tawmno khat leh langpanna hangin kisiatna thuak dingte enkak theih dingin pulaak hi.  Tua “hell” meikuang in a tawntung ding hi lo hi; langpangte in beimang ding uh hi; mei tawh haltumna thuak ding uh hi. Migilote a beisiang khit ciangin Jerusalem thak a kibawl ding hi. Isaiah vauhilh thute in Mang. 13 sunga genkholhnate a tangtung hun ciangin a tangtungkhawm ding genkholhna hi; mawhneite kisiatna, Satan leh a mite in mei le kaat tawh beimang ding uh hi ( Mang. 20) Tua hun ciangin khitui luanna, natna cihte om nawn lo ding hi. Tua sungah nunna thak, tawntung nunna leh hotkhiatna ngah mite a  om hi ding uh hi. A masa na khempeuh in a beimang ding hi (Mang.21:1–4 leh Isa. 65:17–19 enkak in).

 

FRIDAY   |  March  26

Ngaihsutbeh Ding Ellen G. White, “The Controversy  Ended,” in The Great Controversy, pp. 662–678.

     Pasian hong kilah khiatna leh Khrih hong kilahkhiatna in vanglian semsem dinga  a thupitna a kilangh semsem ding hi.  Theihna khangtoto ahih mah bangin itna, zahtakna leh lungdamna zong hong khang semsem ding hi. Pasian theihtelna tam semsem hileh Ama zia le tong a ithuai-na i mu tel semsem ding hi.  Jesuh in Satan langpanna zo-in  Ama hong hotkhiatna kicing mawhnei mi in amuh ciangin nuamna leh Amah biaknopna lungsim tawh kidim hi. Amaute in kham guasemte tawi-in  mi tul sawm tul sawm leh a tul a tul in aw kituakin Topa hotkhiatna hangin Ama min a phatkhawm uh hi. Vantung ahi a leitungah ahi zongin nuntakna nei khempeuh in Pasian min a phat uh hi. Kumpi tokhom tungah om Tuuno in a tawntungin minphatna, pahtawina leh vangliatna, hatna nei tawtung ta hen” Mang. 5:13.

     “Kido na a bei hi. Mawhna leh mawhna bawl mi kuamah om nawn lohi.  Vantung leitung na khempeuh in a siangtho hi. Na khempeuh in kilemna tawh kidim uh hi. Nuntakna kipatna, na khempeuh bawlin a nei Amah in ciangtan nei lo hi. Ama kiang panin nopna, khuavak in mun khempeuh a tuamcip hi. Aneu pen atom a kipan a gol pen dongin nuntakna nei ahi a, nuntakna nei lo ahi a, na khempeuh in hoihna, nuamna tawh kidim a, na khempeuh in Pasian in ki-itna hi, ci-in a pulaak ding hi. Ellen G. White, The Great Controversy, p. 678.

 

 Kikup Ding Dotnate

 1.   Bang hangin vanthak leh leitung thakah tawntung nuntakna kamciam in Khristian thu-upna ah thu bulpi hiam? Tua kamciam om keileh eite upna in a kimanna a om ding hiam?

 2   Peter 3:10–14 sim in. Koi bangin Isaiah 66 sung thute pulaak hiam?

 

Tomkaihna: Isaiah in na khempeuhte lametna thu a pulaak hi. Pasian in Ama mite thuhilhin puahpha bek tham lo-in a gamgi uh liansakin minam khempeuh zong A mite tawh a teengkhawmsak hi. Na khempeuhte tawpkhakna a hong tun ciangin A mite in hotkhiatna ngahin, hih leitung in a thakin kibawl kik ding hi. Tua munah a mite in Topa sungah khamuang takin a om ding uh hi.