Lesson 11 March 6–12 Itna Gal Kido

Sabbath Nitak

Tu Kaal Sung Sim Ding: Isa. 55:1–7;  55:6–13; 58:1–12;  58:13, 14.

 

KAMNGAH: “Gilkial mite an pia-in kisapna a nei mite tungah a kisapnate na piak uhleh na kimkot uha khuamial pen khuavak hong suak ding a, na lungzinna uh nitaang hong bang ding hi” (Isaiah 58:10).

     Lincoln, Nebraska –ah Jewish cantor (biakpiakna makai) khat leh a zi, phone tawh kihopih a, lauhuai kam hoih lo tuamtuam za den uh hi. A sawt lo-in tua bangin a hopih pen mi gilo minthang Ku Klux ahihlam theikhia uh hi.  Amah ahihlam a theih uh ciangin police tungah pulaak thei hi napi, pulaak lo-in lampi dang khat geel uh hi.  Hih migilopa pen khebai khat ahihlam thei uh hi. A innah va pai-in aksa va puak uh hi. Hih mi gilopa in hehna, muhdahnate beimangin itna tawh hong kidim hi.  Hih nupate ama kiang va hawh zelzel uh a, a sawt ciangin kilawmta thei uh hi. Hih mi gilopa in Jew biakna zui dingin khentat hi.

     “Kei deih antanna hih bang ahi hi: gitlohna khaute phelin, hakkol savun khaute phel a,   a kinengniam mite khahkhia-in thuman lohna hakkol khempeuh suktan ding ahi hi. Na an uh a gilkialte tawh nekmaw unla, inn nei lo a zawngte na inn sung uhah paipihin, tangguakin  aom mite puan silhsakin, na mipihte uh kiang panin bu lo ding hi lo na hi uh hiam? (Isa. 58:6, 7). Nupate in amau tungah a gilopa thupha bawlin, tua gilopa in  kikhelin mi hoih khat suak ahih manin gitlohna nusia-in thuman tawh nungta hi.Kamsangpa Isaiah in eite nuntakpih ding thu guipite hong hilh hi.

 

SUNDAY |  March 7    

Manpiak kul lo-in lei un (Isa. 55:1–7)

     “A dangtak mi peuhmah tui phualah hong pai un. An neilote aw, hong pai unla hong ne un! Hong pai un; a man ding bangmah piak kul lo-in leenggah tui na duh zahzah uh hong ne un” (Isa. 55:1). Hih in a kilehbulh thu bang pulaak hiam?

__________________________________________________________________

________________________________________________________________

     Na khutah nek ding an tawi inla, inn nei lo, nek ding nei lote zakin, “ Sum nei lote hong pai unla, an nek ding hong lei un” ci-in a kiko dingin kingaihsun in. Sum nei lo, koi bangin van lei ding uh hiam? Isaiah mah bangin manpiak kul lo, sum lo-in hong lei un, cih thu ngaihsun in (Isa. 55:1). Isaiah thupuak in a khawngkhongin a hong kipia mawhmaisakna a sang dingin hong sam hi (Isa. 55:7). Ahi zongin “ sum tawh lei” cih kammal in mihing kitangsap, mihing in manpha a sakte Pasian in hong pia ding hi, cih a hong theisak kammal hi. I ngah nadingin i piak ding kisam hi. Pasian in Amah tawh i kizopna-ah a khawngkhongin mawhmai-na hong guan hi. Pasian in a khawnkhongin a hong piak hangin manpia lo-in a hong pia mawk ahi kei hi. Ama Sila in a hong thuakna hangin eite in manpiak kul lo-in mawhmai-na i ngah hi. Pasian in man ngen lo-in a hong piak nadingin Amah mah a hong kipia hi.

     Eite a hong kitatkhiat nadingin man bangzah kipia hiam? 1 Pet. 1:18,8 19.Koi bangin Isaiah in tatkhiatna a pulaak thu Thuciam Thak in pulaak hiam? Eph. 2:8 tawh enkak in.

________________________________________________________________

___________________________________________________________________________

     Isaiah in hotkhiat lungdamna thu pulaak. Hih thu mah Thuciam Thak in zong pulaak hi. Gamtatna bulphuhin thuciam bawl lo hi. Hih thuciam lui sangin thuciam thak in vanglian zaw hi; hehpihna  tawh hotkhatna kingah hi.  Pasian in Adam leh Eve tungah Honpa a na kamciam bangin (Pian. 3:15), hotkhiat ngahna lampi in khat bek in hehpihna tungtawnin upna tawh hotkhiatna a hong kipia hi (Eph. 2:8); “ Pasian hong piakkhong in Khrih sungah tawntung nunna hi” (Rom. 6:23).

     Gilgamesh tangthu sungah tawntung nunna a zongkhia khat om hi.Tuhunin zong mi tampi in  tawntung nunna lampi zong ciat uh a, amau hoihna bulphuh ahih manin, a zon uh hangin a mawkna suak hi. Tua hangin singlamteh tungah Jesuh hong sihna leh Ama hong hotkhiatna thu i tel ding kisam hi.

         Hotkhiatna in a khawnkhongin hong kipia hi; mihing in a thalawh theih hi lo hi. Mihing hoihna, gamtat pha gamtat hoihna in hotkhiatna sung hong tunpih thei lo hi. Ahi zongin a hong kihotkhiat nadingin na khempeuh kipiakhia hi. Hih in bang pulaak hiam? Matt. 10:39, Luke 9:23, 14:26, Phil. 3:8.

 

MONDAY  |    March 8

Pasian Ngaihsutna leh Ama Lampite (Isa. 55:6–13)

      Bang hangin Pasian in Ama ngaihsutna leh Ama lampite in leitung sangin sang zaw hi, ci hi ding hiam? (Isa. 55:8, 9)?  Koi bangin a khiatna na thei hiam?

_______________________________________________________________

______________________________________________________________________

      Pasian in leitung vantung na khempeuh leh mihing ngaihsut zawh loh khempeuh piangsak hi, cih pen uplah ding hi lo hi.  Mihing in Pasian nasepna i tel zo kei hi. Ciangtan nei lo Pasian mai-ah Ama huhna ngah dingin mihing in kiniamkhiat ding kisam hi; Ama liatna in hong kiniamkhiatsak hi (Isa. 57:15.)

      Isaiah 55:6–9 sim in. Mihing ngaihsutna bang lo-in bangci bangin Topa  in Ama ngaihsutna leh Ama lampite pulaak hiam? Mihing theihzawh loh Topa ngaihsutna leh Ama lampi in bang hong hilh hiam?

________________________________________________________________

___________________________________________________________________

      Na khempeuh lak panin a lian mahmah thu thuk hotkhiatna thu in kuama telzawh ding hi lo hi (Eph. 6:19). Leitung vantung leh na khempeuh a Piangsakpa in mihingin hong nungta-in gimna leh thuakna tawh kidimin hong nungta a, eite sihtang dingin, mawhna hangin Amah mah a hong si hi.  Amah in eite hong hehpih ahih manin Ama sihna hangin eite khempeuh in mawhmai-na i ngah hi. Hih thuman in Pasian piaksak mihing khempeuh a lungdam nading uh ahi hi.  “Vantungmi khempeuh in hih hotkhiatna thu theihnopna lungsim nei uh hi. A khang a khanga tatsa mi khempeuh in Pasian hong hotkhiatna thu a tawntungin la-in sasa ding uh hi; a tawntungin hih hotkhiatna thu sin ding uh hi. Tu-in zong hotkhiatna thu i sin ding thu manpha hi lo hiam? Hotkhiatna thu in ciangtan nei lo-in tangzai hi.  Khrih in mihingin  a hong pianna, Ama sihna leh mawhneite leh Pasian kikaalah palaai a nasepna thu, tawntung tawntungin i sin ding thu manpha ahi hi. Hotkhiatna vantung ento-in Pasian in lamdang ahihna i mu zaw semsem ding hi.” Ellen G. White, My Life Today, p. 3 360.

  Na bawl khak siatnate ngaihsun in: mi tungah na khialhna, mi lungsim a nasak kampau gamtatnate, gitloh kampaunate,  nangma hangin a lungkia mite ngaihsun in.  Bang bang ahi zongin Jesuh tungtawnin hih mawhnate khempeuh mawhmai-na na ngah thei ding a, tu-in Pasian mai-ah  kicinna leh a siangtho nuntakna na nei thei hi.

 

TUESDAY     |   March 9

Antanpih Lawmte (Isa. 58:1–8)

 

     Isaiah 58:3 in antanna bang pulaak hiam?

________________________________________________________________

________________________________________________________________________ 

     Isaiah pulaak antan in Mawhsutpi Ni-a antanna hi ding hi. Hih ni-a antanna pen Pasian sawl antanna, hih bek om hi (Siam.16:29, 31;  23:27–32).  Hih antanna mah Isaiah 58:3 in pulaak kik a, “ nomau kiniamkhiat tawm un” cih thupiak tawh tonkhawm hi.  Tua khit ciangin Siampi Laibu sunga a sawl thute kipulaak kik hi: kiniamkhiatna, antanna a kipan pumpi silesa deihna nialna hi (Late 35:13; Dan. 10:2, 3, 12 tawh enkak in.

     Mawhsutpi Ni-in pengkul ging bangin ngaihtak mantakin gamtat ding kizasak hi. Mawhsutpi Ni madeuh 10 a sap hunin tuuki tum a zaksakna  phawksakna nei uh hi (Siam. 23:24). Tua banah kum nga ciangin khat vei, Mawhsutpi Ni ciangin, suahtakna Jubilee kum kipatna tangko uh hi (Siam. 25:9, 10 leh Isa. 27:13 enkak in).

     Isa. 58:3–7 sim in. Topa in amaute antanna-ah a lungkimlohna bang thu zasak hiam?Amaute antanna-ah bang khialhna om hiam?

__________________________________________________________________     ______________________________________________________________

     Antanna tungtawnin amaute in Topa maipha ngah dingin lamen ciat uh hi. Amaute in siatna tawh kidim uh hi. Mawhsutpi Ni hong tunteh silesa deihnate nial uh a, Topa tungah lungdamkohna leh siampi lianpenpa in siangtho pen munah a va lut ciangin a mawhna uh pulaakin Topa mawhmaisakna ngen ciat uh hi. Mawhsutpi Ni-in amaute in mawhmai-na ngahin biakinn kisiansuah hi (Siam. 16 leh Siam. 14  enkak in).  Amaute in tua thukhen ni-a suahtakna hangin Topa tungah  lungdamin Ama tungah a nuamna pulaak uh hi. Tua bangin amaute lungdamkohna in Pasian maipha a ngah nading uh leh amaute gamtatna-ah Topa thukimpihna ngah dingin kikaikhawm ahi kei uh hi. Amaute mawhna in tua biakbuk niinsak hi. Amaute mawhna niin hangin sisan tawh sawpsianthona kisam uh hi. Hih thute in bang hong hilh hiam cihleh biakna tawh nuntakna leh Khrih nungzui taktak nuntakna in kibang lo ahihna hong hilh hi.

      Koi bangin hihte geel kilamdanna kimu thei hiam?  Koi bangin mimal khat ciat in koi dinmunah om i kitheitel hiam?

 

WEDNESDAY    |  March 10

Antanna In A Do Thute (Isa. 58:1–12)

     Ni sawm a cin khit Mawhsutpi Ni ciangin peengkul kitum hi. Tua in Topa in amaute Kumpi hi;  kiniamkhiatin Kumpipa tungah cihtakna nei dingin mipite zasak kikna hi. Amaute in Topa a langpanna uh a kisik theih nadingun kamsangpa in pengkul ging bangin ngaihtakin tangko hi (Isa. 58:1).

     Isa.58:6–12 sim in.  Koi bangin Pasian in silesa deihna a nial taktak gamtatna hi, ci-in pulaak hiam? A taktakin anngawlna leh cimawh gentheite huh ding, hunpiakna cihte, koi zaw hamsa hiam? Tua bang gamtatnate in bang thuguipi bulphuh hiam? Koi bangin tua bang gamtatnate  in biakna mantaktak nawlkhin hiam?

_________________________________________________________________

_____________________________________________________________

     Mi khempeuh in biakna zui mi hi thei hi; biakna zui-in a hun tawh kizui-in biakpiakna nei uh hi. Ahi zongin biakpiakna bek Topa hong kalh hi lo hi. Jesuh nunzia en in. Ama hunlai –a biakpiakna limtak zui mi khat hi taleh, sawltakte in  tua biakpiaknate sangin Jesuh in mi a hehpihna, cinate a damsakna, gilkialte an a piakna, mawhmaisakna thute pulaaak zaw uh hi.

     Topa in leitungah a thuman a hilh a pulaak ding mi ahi a, pawlpi ahi zongin hong zong hi.  Jesuh sunga thuman sim loh bang thu dang deihhuai om ding hiam? Nek ding leh nek loh ding thukhamte  maw, ahih keileh gilkialte anpiakna maw, ahih keileh Sabbath ni tawlngakna maw, ahih keileh kipiakkhiatna tawh huhna kisam mite huh ding hiam?

     Matthew 25:40 leh James 1:27 sim in. Eima thu bang pulaak uh hiam?

______________________________________________________________     _______________________________________________________________

         Isaiah 58 sung a kipulaak thuphate ngaihsun in. Pasian in cimawh gentheite tung a sep ding thute Isaiah tungtawnin pulaak hi.  Topa in bang thu pulaak hiam? Pasian hong sawl bangin sem hi lehang i tungah nalamdang hong piang ding hiam? Ahih keileh eima deihna nialin, huaiham lo-in mite aa ding i piakkhiat ciangin Pasian in thupha hong pia hi zaw ding hiam? Na ngaihsutna na lawmte tungah pulaak in.

 

THURSDAY  |      March 11

A Hong Kipia Hun Khat (Isa. 58:13, 14)

     Bang hangin Isaiah in Sabbath thu pulaak hi ding hiam? Isa. 58:13, 14? Bangci bangin Mawhsutpi Ni tawh kizopna om hiam?

__________________________________________________________________     _________________________________________________________________

     Kumsial a kibawl Mawhsutpi Ni in Sabbath ni-in nei uh hi. Hih pawi Sabbath in kaalsim Sabbath tawh kibang ahih manin nasep kiphal lo hi ( Siam. 23:27–32). Tua ahih manin Sabbath ni mah bangin hih Mawhsutpi Ni zong nitum khat pan nitum khat sung hi (Siam. 23:32). Seventh-day Adventist mi masate in tua bang mahin pulaak uh hi. Hih tawh kibangin Isaiah 58:13, 14 en lehang Mawhsutpi Ni Sabbath thupuak in kaalsim Sabbath thupuak tawh a kibang thupuak hi, cih kimu hi.

     Isa.58:13 sim in. Sabbath ni in bangci bang ni hi ding hiam? Koi  bangin Isaiah hong hilh bangin  Sabbath  zang ding i hiam? Sabbath in a limciin na ngaihsut ciangin bang hangin Isaiah pulaak bangin Sabbath zang ding kisam hiam?

_____________________________________________________________________     ____________________________________________________________________

 

     Isaiah 58 in silesa nialna, mi hehpihna leh Sabbath thu pulaak hi.  Koi bangin hih thu thum in kizopna nei hiam? Amasa-in hih thu thum in Pasian, Ama deihna leh Ama tungah mihing kinga i hihna mitsuan ding hong hilh hi.  Nihna-ah hih thu thum tawh nungta hi lehang Pasian a kilangkhia sak siantho-na nei ihi ding hi (Siam. 19:2). Pasian in Khrih tungtawnin hong kilangkhia-in Amah mah hong kiniamsakin (Phi. 2:8), a nuntakna a bei dongin hehpihna hong lak hi (John 3:16); Amah mah in na khempeuh a bawlkhit ciangin Sabbath ni-in nasepna pan a tawlnga hi (Pian. 2:2,3 Pai. 20:11).

      Isa. 58 sunga thu bulpi thum - angsung nialna, mi hehpihna leh Sabbath kizopzia ngaihsun in.  Nasepna pan Sababth suahtakna in tha thak hong guan hi (Pai. 23:12; Mk. 2: 27).  Tua bang gamtatpha in Sabbath tawh kipawl hi, ci-in Jesuh in hong lak hi (Mark 3:1–5, John 5:1–17); midangte huhna in nuamna a piansak mah bangin (Isa. 58: 10, 11) mantakin Sabbath tawlngakna in nuamna hong ngahsak hi (Isa. 58:14). Hih thupha-te tawh na kidim nadingin na kikhel ding bang a om hiam?

 

FRIDAY  | March 12

Ngaihsutbeh Ding: “Angsung nial lo-in kuamah in hoihna taktak nei lo hi. Kiniamkhiatna, angsung nialna, mi huhnate in Khrih hong piak nasep a hong zawhpih ding hi. I sung panin kiphatsakna leh leitung mitsuanna khempeuh hepkhiat ding kisam hi. I sepna khempeuhah Khrih nunzia angsung zonna hemkhia ding kisam hi.  I inn le a sung a om nate tungah lai gelh tawh kibangin “cimawh gentheite hong pai un,” cih phawk in. I puankoihna singkuangte, biizu tuamtuamte tungah Pasian khut in laigelh tawh kibangin “ Guaktangin a om mi puansilh ding pia un” cih phawk in. in Pasian khut in a gelh bangin mite simtheih suak hen. Anbuk, annek sabuai tungah nektheihte na muh ciangin “ Gilkialte annek ding pia in” cih phawk in. Isaiah 58:7. Ellen G. White, The Ministry of Healing, p. 206.

 

Kikup Ding Dotnate

1.   Isaiah in ama hunlai mite tungah a dot thute ngaihsun kik in. Bang hangin gilvahna hi lo nate lei-na in sum zangin kimanna nei lo-in nasem na hi uh hiam? (Isa. 55:2).  Koi bangin tu-in zong tua bangin nungta i hiam? Banghangin tua bangin nungta i hiam?

2.    Isaiah hunlai Mawhsutpi Ni aa dingin angsung nialna, mi hehpihna leh     Sabbath in thupi mahmah hi. Hihte in hun nunung a Mawhsutpi Ni aa        dingin thupi hi lo hiam? (Dan. 8:14). Tuan i ciangin Pasian Jubilee                  peengkul ging ding a, Khrih hong pai ciangin tawntung suahtakna hong      tung ding hi lo hiam? 1Kor. 15:52 leh Siam. 25:9, 10 enkak in. Na lawmte        tawh kikum in.

3.  Na lawmte tawh Sabbath tawlngakna thu kikum un. Isaiah in Sabbathni-in eima ut bangin gamta lo, kampau lo leh nasem lo ding ci hi; ahi zongin Sabbath pen nuamsa ding a cih ciangin bang a genna hi ding hiam? Isa.58:13. Koi bangin Isa. 58 siksanin, nangma deihna nialin              nopsakna tawh kidim ding na hiam?

 

Tomkaihna: Isaiah 55 leh 58 sungah kamsangpa in a mite in amau ngaihsutnate nusia-in Pasian va zuan dingin thuumna nei hi. Mihing in eima nopsak ding i lunggulhna sangin Pasian in a hong deihsakna lian zaw hi.  Amah in mawhmaisakin maisakna ngah mi in hehpihna nei-in, Sabbath leh Mawhsutpi Ni tawh kituakin eite in angsung nialin, hehpihna nei a, Sabbath nuamsa ding hong hilh hi. Pasian hong piakkhong mawhmai-na a ngah mi a lungsim kikhel hi.