JANUARY 2, 2021

 Jesuh in Pasian a masak ciangin……..

 Pasian i masak ding pen a hamsa hi.  I nuntakna-ah Pasian i masak zawh nadingin Abraham tung panin bang thute etteh ding om hiam?  Abraham in a neihsa khempeuh nusia-in sehnel gam sung zinkhia dingin a kipatin kum 80 bang uham khin hi.  Abraham in ama nungtakna-ah Pasian masak ahih manin Pasian sapna nial lo-in Ama sapna bangin paikhia hi.  Ahi zongin kum tawlkhat khit ciangin Abraham in ama nuntakna a hutnopna hangin zuau gen kha hi. Bang hangin Abram in a lau luatna hangin Pasian a masak khawl hi ding hiam? Tua bang hamsatnate tawh i kipelh thei kei hi.

Jesuh nungzui dingin na khat peuhpeuh na nusiat a om hiam? Tua bangin nusiat nei tampi i om ding hi, Ahi zongin tua bangin nisim i nuntakna-ah ngei-na bangin ngaihsunin i om takteh, Pasian masak ding sangin na dangdang, thu dangdangte i masak kha zel hi. Ahih keileh Pasian a nusia mi tampi om hi. Lamet bangin a hong pian loh ciangin Pasian tungah lametna bei kha zel hi.

Ni kum sungin na ngimna na tangtun hiam? Na geelna bangin a tangtun loh hun om ding hi. I nuntakna-ah silesa leh lau-na tawh kalsuan kha zel hi. Abram in Pasian to ngamin Pasian in Ama kamciamte tangtungsak dingin khalkhia ngam hi. Pasian in Abram leh ama suan le khak tungah gamh luah ding kamciam hi. Ahi zongin Piancil 15 pulaak bangin Abram in maitang kimu bang phialin Pasian to ngamin, “ Topa Pasian aw, suan le khak nei lo-in ka om laitakin suam le khak nei dingin na hong kamciam hi napi, hih ka nasem Damascus mi  Eliezer in ka gamh luah hi ding hiam, ci-in Topa tungah kamciam om bangin nasem dingin pulaak hi.

Khat vei ciangin Pasian va hopih ding hamsa-in kingaihsun hi. Vantung Pa tungah pulaak ding, gen ding na nei na hihleh Amah tawh kiho lo-in na om kei ding hi. Na lungkia hiam? Na lungsimah a om khempeuh Amah ko in. Topa in hong ompih ding Ama kamciam om taleh tasam kisa hiam? Abram bangin Topa to ngam in. Tua hi-in Pasian in Abram a puanbuk nusia-in paikhia dingin samkhia hi. Abram in ama ciangtan hihna panin ciangtan nei lo Pasian sungah nungta dingin pulaak hi.  Pasian in Abram tungah “keima thupha a sang dingin na puanbuk in neu lua hi. Pasian in Abram tungah Pasian ahihna leh Abram in mihing ahihna theihsak kik kik hi.

          Abram in na khempeuhah Pasian masak ahih manin Abram panin Abraham ci-in min laihsak hi. Tua bangin Pasian a masakna khat in Topa tungah sawmah khat piakna-ah citakna kimu thei hi.

Abraham in Pasian masak hi. Amah bangin eite in i nuntakna-ah Pasian i masak tawntung ding kisam hi.  Na ngahna khempeuh lak pan sawmah khat khenkhia masa in.