Hannah In Pasian A Masak Manin
Na khempeuhah Pasian masak pen hamsa hi. Hannah tungtawnin i hihna khempeuhah Pasian masak ding etteh theih ding om hi.
Hannah in nalamdang mu kha hi. Pasian
in Hannah thungetna dawngin tapa khat a pia hi. Naupaai lam a kitheih ciangin
nuam mahmah ding hi. Naupaai madeuhin Jerusalem biakbukah va pai-in a lungsim
khempeuh Topa tungah sungkhia hi. Ama nget bangin Pasian in tapa khat a piak
leh Pasian nasem dingin Topa ka ap kik ding hi, ci-in kamciam pia hi. Tu-in
amah in ta nei-in a nunzia kilamdang mahmah hi. A tapa min dingin Samuel a
phuak hi. A khitna in Pasian in hong za hi, cih khiatna nei hi.
Hannah in a tano Samuel tawi-in Pasian
thu hilhhilh hi; a beisa Pasian nasepnate pulaak kik kik hi. Samuel in a lamdang
takin a hong piangkhia hi; a lungsim khempeuh tawh a ta it hi. Ahi zongin a
sawt lo-in ama kamciam bangin biakbukah a tapa in Pasian nasem dingin a piak
ding hun hong tungta hi. Pasian in Hannah tungah tanu tapa tampi pia hi taleh,
Samuel pen a ta masa hi-in Pasian tungah pia masa hi. Naupang Samuel in
bangzahin a nu ngai-in lungleng ding hiam? Ahizongin Hannah in hih bangin
pulaak hi: “1 Samuel
2:1, 2: “ Topa tungah ka lungdam a,
Topa hangin ka kipak hi. Nong huhna hangin ka galte ka nuihsan hi. Topa bangin
a siangtho kuamah dang om lo a, amah simloh kuamah dang om lo a, i Pasian tawh
a kibang hong hu dang om lo hi.”
Samuel
in Israel mite lakah kamsang lianpen hong suak hi. Pasian mipa ahihna tawh
kumpi dingin Saul leh David sathau va hilh hi. A nu in Pasian masak hi keileh
hih bang thu piang lo ding hi. Pasian i masakna hangin tate tungah huzaap
lianpi om hi lo hiam? A nu le a pa in Pasian masakna uh hangin tate in
leitungah Pasian aa dingin teci lian a suahna uh kimu thei hi.
Hannah
in Pasian masak hi. Amah i etteh ding hi lo hiam?
