Esther in Pasian A Masak Manin
Na khempeuhah Pasian masak ding hamsa hi. Esther in Pasian a masak, i etteh ding om hi lo hiam?
Persia kumpipa zi ding kiteelna-ah Esther
zong va kihel ding khentat hi. Ahi zongin a lungsimah buai-na tampi hong lut
hi. A mipihte in saltangin om uh a, a
mailam uh khuamial tawh kibang hi. Pasian in amaute mangngilh hi phial ding
tawh kibang hi. Persia ukna nuai-ah om uh a, Pasian in Ama thupiakte zui dingin
sawl hi.
Esther in numei melhoih mahmah khat hi.
Ama melhoihna hangin Persia numei khempeuh tungah pahtawi-na ngah thei ding
dinmun hong tung hi.
Esther a melhoihin lungsim hoih tawh
kidim hi. A gilo kumpi khat in zong
Esther hoihna mu thei hi. Xerxes in a zi dingin numei dangte khempeuh lakah
Esther tel hi. Tu-in kumpinu suakta ahih manin kumpi inn sungah nopsakna tawh
kidimin, hun khatlai-a a ngaihsut thute-in tu-in tangtung ta hi. Nektawm
zonnate-ah Pasian i masak ding hamsa hi. Ahi zongin nopsakna leh hauhna in zong Pasian tawh hong
kigamla-sak thei hi. Neih le lamh hauhna, vangliatna tawh kidim mi khat in
bangci bangin a hihna khempeuhah Pasian a masak thei ding hiam? Esther phawk
in.
Kumpi Xerxes in a lawmte khemna thuak
hi. Hebrew khempeuh sihna thuak dingin thupia mawk hi. Hih sihna pan a suahtak
theih nadingun kumpipa tung pan hehpihna ngen dingin Esther kipaisak hi. “
Numei ahi a, pasal ahi zongin sap lohpi-in mi khat peuhpeuh kumpi kumpipa omna
inn sungah a va lut leh upadi khat bek om a, tua pen, thah ding ahi hi; kumpipa
in ama lamah a kham kumpi ciangkhut a na zan leh tua mipa suakta bek ding
ahihna thu kumpipa nasemte leh ama ukna gam mi khempeuh in a theih ciat uh ahi
hi. Tu-in kumpipa kiangah a pai dingin hong kisap loh zawh ni sawmthum bang pha
ta hi,” a ci hi. Esther 4:11.
Ahi zongin Esther in “Jew khempeuh
Shusah munah kikaikhawm dingin zasak a, tua munah annek lo, tui dawn lo-in sun
le za, ni thum sung a om uh hi. Kei leh ka nasemte in zong tua bangin antangin
ka om ding uh hi. Kumpipa sapna om lo-in
amah tawh kimu dingin ka va pai ding a, kumpi thukhun a palsat hi ding ahih
manin ka sihleh ka sih ci-in laulo-in kumpipa tawh kimu dingin a va pai hi. A
mipihte antangin thungen dingin a vaikhak khit ciangin kumpipa sapna om lo-in
kumpi tawh kimu dingin a va pai hi. Tua
bangin a pai-na ah Pasian masak ahihna kimu hi. Ka sihleh ka sih ci-in va pai
hi. Amah bangin eite in zong Pasian masak ding hi lo i hiam?
