Daniel in Pasian Masak Manin
Na khempeuhah Pasian masak ding hamsa hi. I nuntakna-ah Pasian i masak theih nadingin Daniel tung pan i etteh ding om hi lo hiam?
Daniel
in khangno khat hi-in Babylon, leitung uk kumpi khut nuai-ah saltangin om hi.
Kumpi Nebuchadnezzar galdo-in a zawh mite lak pan a pil penpen a siam penpente
teengkhia-in ama nasem dingin a gamah a ciahpih hi. Tua bangin salin a kaihte
tungah Babylon biakna, pilna leh theihna tuamtuamte a hilh uh hi. Tua bangin a
hilhna uh tungtawnin ama ukna gam zai semsem dingin ngaihsun hi. Daniel bang
mah in khangno tulsawm val bangin salin a kai hi. Hih bangin gam tuamtuam pan a
pil, a siam khempeuhte lak pan a pil a siam penpente teelkhia-in kumpi inn
sungah nasem dingin a koih hi.
Kumpi inn sungah a omte lakah Daniel,
Shadrach, Meshach leh Abednego zong a kihel uh hi.
Daniel leh a lawmte in amasa-in annek
tuidawn tawh sittelna a thuak uh hi. Pasian a masakna uh hangin amau nopsakna
ding tampi tanlawh uh hi; a tawpkhakna-ah nuntakna bei lawh zah dong tung uh
hi. Ahi zongin hih khangnote in bangbang piang taleh Pasian tungah a lungsim
khempeuh uh ap uh hi. Kumpipa thupiak zui dingin thagum hatna tawh
kisawlin sum piakna tawh kizol taleh
amaute in a nial uh hi. Amaute in annekna-ah citak uh a, Pasian in thupha
pia-in Babylon sangnaupang khempeuhte tungah a pil, a siam pen pahtawi-na ngah
uh hi. A nung ciangin Daniel tungah Babylon mipil khempeuhte ukna kipia hi. A
lawmte in Babylon khuapi uk lianpite-in kikoih hi. Hih bangin pahtawi-na,
minphatna a ngahtheihna uh ahangin, bangbang thuak ding hi taleh, amaute in na
khempeuhah Pasian masak uh hi. A taktakin amaute in meikhuk sungah kihaltum
thuak ding zahdongin Pasian a masakna uh nusiat ding ngaihsun lo uh hi. Daniel
3:17 “Mei phualpi sung panin a hong
honkhia thei pasian a om leh ka biak ka Pasian uh hi ding a, na khutsung panin
hong honkhia ding hi.”
Daniel in uham khin, teekta ahih mah
taleh zingsangtungin thunget a khawl ding sangin humpi kikhumna sungah khiatna
a thuak ding khentat zaw hi. Ahi zongin Pasian in
Daniel honkhia-in Ama min phat dingin
Babylon ukpi dinmun a ngah kik hi.
Daniel in Pasian masak tawntung hi.
Eite in zong Pasian i masak ding hong hilh hi lo hiam?
