David in Pasian a Masak Manin
Na khempeuhah Pasian masak ding cih pen hamsa hi. David tung panin Pasian masakzia etteh ding om hi lo hiam?
Kumpi
David pen Israel mite khangthu sungah
kumpi minthang mahmah khatin kiciamteh hi. David in Pasian a masak ciangin na
lianpi piang hi. A mipihte lau-in lingin a om uh ciangin David in ama kidal
nadingin Pasian masak hi. Suang tawm khat a khutah tawi-in, Pasian min suangin
Goliath do dingin kuankhia hi. Mite muhna-ah haigamtat tawh kibang hi. Ahi
zongin David in Pasian masak ahih manin Pasian in a galte khut sung panin
honkhia hi. Kumpi dingin David sathau
kinilh khin, kihtakhuai Goliath zo khin, kumpi inn sungah omin kumpi tanute
zi-in nei hi. Tua bangin David in gualzawhna khat khit khat a ngah khit hangin
Saul in thah dingin delh tawntung hi. Saul in ama ukna sungah mi gilo penpenin
David ngaihsun a, Goliath sih amu galkapte in tu-in David mat le thah dingin
nungzuih uh hi.
Bangbang
piang taleh lamet bei taleh David in na khempeuhah Pasian masak hi.
Saul giahphualah ihmu-in om va mu a,
David in Saul that nuam hileh ama khut sung hi. A gilo kumpi suamlumin kumpi
tokhom aman luah thei hi. Ahi zongin David in tua bangin sem lo hi. Ama khut
tawh thukkik lo-in Pasian masak zaw ahih manin Saul kiang pan kihemkhia hi.
David in Pasian masak tawntung kha lo
hi. Bathsheba tawh mawhin a pasal thahsak hi. Pasian masak lo-in David in ama
deihna a masak zawk manin tua bang mawhna tawh kidim hi. David in ama mawhna
thaman a thuak ding hi; a mawhna kisikin Pasian masak kik hi. A nuntakna a
beikuan ciangin amah in inn hoih mahmah sungah teengin Pasian biakbuk in
kisia-in om amuh ciangin biakbuk puahpha dingin ngaihsun hi. Ama kumpi inn sangin
Topa inn a hoih zaw-in lamh ding Topa tungah kamciam pia hi.
David in Pasian masak hi. Amah i etteh
ding ahi hi.
