December 25, 2021
Tuma kum 2000 lai-in Pasian in na dangdangte sangin nangmah in a tawntung na nuntak theih nading masak zaw ahih manin, Ama tapa neihsun a hong pia hi. Jesuh a hong suahna in Amah na theih loh hangin Pasian in nang hong it masa hi,cih hong hilh hi.
Hotkhiatna
tangthu in Pasian na itna tangthu hi lo-in, muh hoih zaw-ah na om nadingin
Pasian hong sepna thu ahi hi.
Pasian in nang le kei hong it takpi hi,
cih up hamsa na sa hiam? Hotkhiatna thu in na suahma nangawnin Pasian hong itna
thu hi. Hotkhiatna thu in na khempeuhte sangin Pasian in Nangmah a hong masakna
thu hi. Hotkhiatna thu in nangmah in tawntung nunna na ngah nadingin vantung
leitung a uk Pa in nangma thuak ding khempeuh hong tuakna hi; hih thu in up
ngamhuai lo bang liang hi. Hotkhiatna thu in Pa tangthu hi. “ Pasian a um mi
khempeuh in kisia lo-in tawntung nuntakna a ngah nadingun tapa khat bek a
neihsun a hong pia dongin leitung mite a hong it Pa tangthu hi”(John 3:16).
Jesuh in pawlpi in mo tawh genteh hi.
Pasian in pawlpi tungah a piak nasep kimatun lo napi, pawlpi in Jesuh mo ahihna
kiam lo a, Jesuh in pawlpi a it bangin eite in zong pawlpi a it dingin hong
sawl hi. Pawlpi tungah i lungsim puak, pawlpi tawh kizopna kidop kul hi. Jesuh
in bangzahin a pawlpi it cih pen i phawk ding kisam hi. Jesuh in pawlpi
kitangsapna khempeuh hong sik tawntung ding hi, cih i muan ding kisam hi. Koi
bangin Jesuh in pawlpi kisapna huh hiam cihleh Pasian in thupha hong pia-in na
ngah thuphate khempeuh tawh Pasian na masakna tungtawnin pawlpi kisapnate na
huh thei hi.
Hih munah thu nih kimu thei hi: Pawlpi
in kitangsapna nei ahihleh bang hang hi ding hiam cihleh pawlpi tungah piakkhiatna nei lo, nangmah bek
in kem cih kilangh hi.
Nihna-ah Jesuh in pawlpi tungah a citak
mite tatsat lo-in thupha a piakna kimu
hi.Nang le kei in pawlpi ihihna i phawk ding kisam hi. Eite in Khrih pumpi ihi
hi. Tua hi-in na khempeuh a hoih penpenin i zat ciangin Khrih pumpi aa ding
nasem ihi hi. Khrih in nangma tungtawnin mite tungah nasem ding hi.
Tuma
kum 2000 lai-in Jesuh hong suahna in, vantung leitung na khempeuhte tungah, na
khempeuh sangin Pasian in nangmah hong masak penpen hi,cih pulaak hi. Tu-in Amah na masak ding hong thuum hi. Na
lametna sangin thupha a hong pia nuam zaw Pasian hi.
I maingat kum thak sungah na khempeuh
sangin Topa leh Ama gam masak in.
