Joseph Bates in Pasian A masak Manin
Joseph Bates in na khempeuh sangin Pasian a masak manin mite in hai muh uh hi. Ahi zongin Joseph Bates in Pasian a masak ding khiam lo hi. Ama bangin eite in zong Pasian i masak ding kisam hi lo hiam?
Joseph Bate in tembaw nasem pension
khat hi. William Miller thugen Khrih hong pai baih ding cih a zak ciangin thu
um pah a, na khempeuhah Pasian masak pah hi. A hun, tha le ngal, sum le paai
sit lo-in Khrih hong pai baih ding hi, cih thu puak kawikawi hi.
Tua bangin a om laitakin Bates tapa in
a pa thugen nialin inn panin paikhia-in tembaw nasem dingin kitawi hi. Bate in
a upna nusia lo-in tua bangin thugen a, ama up bangin hong piang lo hi. 1843 kum
hong tung petmah a, Jesuh hong kum lo
hi. William Miller leh Joseph Bate gen bangin Jesuh hong pai lo a, mi
tampi in lungkia uh hi. A neih khempeuh uh Jesuh hong kum kik ding hi, thugen
nadingin zeek khin ahih manun bangmah nei nawn lo uh hi.
Bates leh thu-um mi kimkhat in Lai
Siangtho kantel pha uh a, October 22, 1844 kumin Jesuh hong kum ding hi lo-in
vantung biakbuk siangtho bel munah lutin siampi nasep kipan hi zaw hi, ci-in
tangko kik uh hi.
Hamsatna tuamtuam phukha uh hi. Bates
in ni khat nek ding nei lo hi. Pasian tungah thungenin, nangma tungah hong
citak mite na ompih ding hi, cih na
kamciam koihah om hiam ci-in Pasian to hi. Bang mah kilamdang lo hi. Ahi zongin
tua ni mahin lai-ip khat ngah a, tua sungah amau nekkhop lei nading sum om mu
hi.
Bates in a lawmte tawh Lai Siangtho
thusinna nei khawm uh a, ni sagih Sabbath thuman hong mukhia uh hi. Bates in
James leh Ellen White tawh kipawlin a sawt lo-in
Seventh-day
Adventist Pawlpi hong dinkhia zo hi. Tu-in SDA pawlpi in leitung kizel hi.
Bates
in Pasian a masak manin mite nuihsan taleh Pasian a masak ding nusia lo
hi. Jesuh in eite a hong hotkhiat nadingin na khempeuh nusia hi. Ama hong itna
in Pasian i masak ding hongkai hi.
