Samson in Pasian a Masak loh Manin
Pasian i masak tawntung ding hamsa hi. Pasian a masak kha lo Samson nunzia in zuih ding leh pelh ding a hong hilh om hi lo hiam?
A sam met ngei lo ding hi.
A khangno a kipan Samson in hatna tawh
kidimin kuamah in zo ngei lo hi. A gol zawk deuh ciangin Topa in Philistien
numei khat kiangah paipih hi. Samson in
tua nungak amuh ciangin Timnah khua-ah a nu le a pa tawh va pai uh hi. Timnah a
tun madeuhin lampi-ah humpi khat tawh kituak uh hi. Humpi in Samson ngik ahih
manin Samson tungah Kha Siangtho hong tung a, Samson in a khut guak tawh tua
humpi balneen gawp hi.
Tawl khat khit ciangin tua nungak
kiangah va pai kik a, humpi guh a nusiatna mun a va etleh tua sungah khuaikaai
mu hi. A khut tawh tua khuaikaaite sawkin khuaizu a ne hi. (Thukhennte 14:5–9).
Samson in a sia leh a pha kikaalah
nungta hi. Pasian in limtakin hilh khinzo hi. khamtheih bangmah ne lo ding, ganhing
si ahi a, mihing si ahi zongin lawng lo ding ci-in thupia khin hi. Samson in Pasian thupiak bangin nungta lo hi.
A nunglamteh a sam met hi; Pasian sapna nial hi. Pasian a nial dingin a
nuntakna nei ihi kei hi. Pasian i masak loh ciangin a kithei kawmlo khatin
siatna sungah i tumsuksuk hi. Ei le ei, ei tha tawh kalsuan zo kisa-in siatna lampi zui ihihlam kiphawk kha lo hi.
Pasian in nisimin amah i masak ding hong sam tawntung hi. Tua hileh Samson
bangin siatna sung i tung kei ding hi.
Samson in siatna sung tungin a khanlawh
ciangin Pasian phawk a, siatna sung pan Pasian in a hotkhiat ding a nget
ciangin Pasian in Samson honkhia hi. Samson thungetna khempeuh Pasian in a
piakloh om lo hi. Pasian in Samson
hehpih a, nang le kei zong a hong hehpih hi. A beisa hun-in sawmah khat,
sumpite tungah na cihtak loh hangin tu-in na citak thei hi.
Samson in Pasian masak kha lo hi. Tua
hangin amah leh a mipihte in gimna lianpi thuak uh hi. Pasian hong itna in Amah leh A gam zong masa
dingin hong sawl hi. Samson in eite lampial loh nadingin hong hilhkholhna hi.
