Adam Leh Eve in Pasian A Masak lohmanin
I nuntakna-ah Pasian i masak ding hamsa hi. Pasian a masak lo Cain tungtawnin bang thu pelh ding leh zuih ding kimu thei hiam?
Adam
leh Eve in Eden Huan sungpan hawlkhiat a thuak khit uhteh Cain piang hi. Amaute
in hamsatna tampi nawk uh hi. Adam in khua-ul luangin hamsapi-in nasem hi. A
tate uh hong gol ciangin a pa nasep huh uh hi. Cain in lokho-in, Abel in
tuucing hi. Cain leh Abel in a nu le a pa gen Eden huan thute limtak ngai uh
hi. Amaute mawhna hangin tuuno kigawhna thu, amaute zumsel nadingin tuuvun a
silhnate uh leh mawhmai a ngah theihna thute limtak ngaihsun sun uh hi. Cain leh
Abel in Pasian biakhawm uh hi. A golzawk
deuh uh ciangin amaute nasepna sung pan a hoih penpen tawh biakpiakna nei uh
hi. Abel in
Tuu thau penpen biakpiak nadingin pia
a, Cain in ahihleh a khawhsa khaigahte tawh biakna pia hi. Pasian in Abel
biakpiakna sang hi. Ahizongin Cain biakpiakna sang zo lo hi. Cain in Pasian
tung bek hi lo, ama nasepna tungah heh hi. A sanggampa Abel tungah a hehna
pulaak hi.
Nawlkhinna pen mihingte in i deih het
lo khat ho; thuak hamsa kisa ciat hi.
Mite hong nawlkhin ding ki-ut lo hi. Mite nawlkhin i thuak loh nadingin
i sep theih bangin kikalsuan hi. Nasep khat peuh i ngah nadingin sangkahna,
training khat peuh kahin, tua pen nasep ngetna ah a hong nial loh nadingun
deihna hi. Hun, sum, puansilh niikteen thupi ngaihsut ciat hi hangh. Mite hong
nawlkhin khak ding kipatau hi. Bang hangin hanciamin i sep hangin nawlkhinna tawh kipelh kuamah om lo hi.
Cain in Pasian thupiak nial hi; Pasian
deih biakpiakna pia dingin nial hi. Cain in kiniamkhiat hi leh a sanggampa tawh
kikumkhawm ding a, sisan tawh biakpiakna nei thei ding uh hi. Ahi zongin Cain
in tua bangin ngaihsun lo hi. Ama ngaihsutna-ah a khawhsa lak pank a hoih
penpen tawh biakpiak pia ka hih nungsang, Pasian in ka biakna hong sang veve
ding hi, ci-in ngaihsun kha hi ding hi. Khat veivei ciangin eima hoihsak leh
eima thu siksanin Pasian i bia zel hi. Hih pen khialhna lianpi khat hi. Pasian pen Pasian hi; Ama cih bangbang a nial
zo dingin eite in Pasian ihi kei hi.
Sawmah khat leh sumpi tawh kisai-in i theih dingin hong kihilh khin zo
a, a hong kihilh bangin kalsuan ding kisam hi.
Nawlkhinna a thuak khit ciangin Cain in
Pasian tawh kiho-na ahi a, a sanggampa ahi a a nu le pa tungah muhdahna lungsim
nei hi. Hehna, thangpaihna in Cain ukcip hi.
Pasian in Cain huh ding ngaihsun hi.
Ahi zongin Cain in Pasian nial khin ahih manin Pasian in zong Cain biakna nial
hi. Mawhna in Cain ukcip hi; ama hehna
leh thangpaihna, gitlohna ki-uksak hi.
Cain in mithat masa pen hong suak hi.
Cain in Pasian a masak ding nial hi.
Pasian masak kha lo ahih manin amah bek hi lo a kimlepaam in siatna thuak hi.
Pasian hong itna in Ama leh A gam i masak tawntung ding hi, hong sawl hi. Cain
nunzia tungtawnin tuni-in eite tungah vauhilhkholhna hong tung hi. Cain bangin i nuntak ding hi lo hi.
