APRIL 10, 2021

           Adam leh Eve in Pasian Masak Lohmanin

          Na khempeuhah Pasian i masak ding hamsa hi. Zia-etna lianpi a thuak laitakun, Pasian a masak lohna uh hangin Adam leh Eve tungtawnin i theih ding om hi lo hiam?

           Adam leh Eve in  na khempeuh nei uh hi. A teenna inn in hoihna khempeuh tawh kidim hi. A nasep un mannei mahmah hi. A nihun ki-it mahmah uh hi. An lim pen ne uh hi. Zingsang nisuah a kipan  nitak nitum dong nopna tawh kidim uh hi. Eite lungnopna bang hi lo-in, gimna kihel lo Pasian nopna – Shalom tawh kidim uh hi. Na khempeuh in kilem kituak diamdiamin om ciat uh hi.

Adam leh Eve in a thupi pen leh a manpha pen thei uh hi. Na khempeuh tungah Pasian om ahihna thei uh hi. Pasal leh numei kituakin nasem khawm uh a, leitung nate tungah ukna nei uh hi. Pasian makaihna sungah a om laisiah na khempeuh in nopna tawh kidim hi.

 Ahi zongin ni khat Eve leh Adam in Pasian thupiak nial ding kipan uh hi. Nek loh ding singgah ne-in pasiante suak dingin ngaihsun uh hi. Shalom kisia-in sihna hong tung hi.    

Mi khat in guihtheih khat zangin tua lo-in om zo keng, a cihleh tua in shalom susia-in, angsung zonna, huaihamna a tawpna ah sihna hong tun hi. Khamtheih na khempeuh, nate lunggulhna in tua bang siatnate sung hong tunpih hi. Mi khat tungah kinga-in Pasian dinmunah i koih ciangin, tua in lungkhamna, lungkiatna leh sihna dong hong tun hi.

Adam leh Eve tungtawnin i phawk ding thu in mihing in mihing hi den ding a, Pasian in Pasian hi tawntung ding h. Hih pen a kikhel ngei lo ding thuman hi. Lai Siangtho i sim ciangin “ Pasian in gen hi, ci-in thei napi-in Adam le Eve bangin eima hoihsak khat tungah i ngak ciangin siatna hong piang hi; sihna dong hong tunpih hi.

Pasian in sawmah khat leh sumpite Ama kiang tunpih ding hong hilh hi. Pasian pen Pasian hi; eite in Pasian ihi kei hi. Ahi zongin Adam leh Eve bangin eima pasian ding i bawl tawm zelin Pasian tawh kituak lo-in i gamta zel hi. Pasian in suahtakna hong pia-in ahi zongin i gamtatna bangin a gah a at kik ding ihi hi. Adam le Eve in Eden nusia uh a, Pasian kamciam hotkhiatna ngah ding lamen uh hi.

Tu-in Jesuh tungtawnin tua hotkhiatna sungah khamuanna i nei hi. Ahi zongin Adam leh Eve bangin zia-etna i tuak a, Pasian i masak nadingin silesa deihna nial kul hi.

Adam leh Eve in Pasian masak ding nial uh a, amau bek tham lo-in na khempeuh in siatna thuak hi.  Pasian in Ama gam zong masa dingin hong sawl hi. Adam le Eve thuakna in eite hong vauhilhna suak hi.