LESSON 9 Nov 21–27

 

LESSON 9    November 21–27

                                                 PAWLPI LEH PILSINNA

 Tu Kaal Sung Sim Ding: Luke 10:30–37; Matt. 5:14–10; Luke 4:18–23; Jer.

  29:13; Matt. 7:7; 1 Thess. 2:6–8.

KAMNGAH: “Khrih sawltakte ka hihna uh hangin phatna ka ngah ding uh a kilawm hinapi-in note leh midangte a kuamah peuh hong phat ding a zong ka hi kei uh hi. Note kiangah ka hong omlai-un nupite in a tate uh itna tawh a bawl bangin note ka hong bawl uh hi. Note hong it mahmah ka hih manun Pasian kiang panin a hong pai Lungdamna Thu bek hong gen lo-in kote nuntakna mahmah zong note adingin a pia ngamin ka om uh hi. Tua ahih manin kote hong muhna-ah note a manpha mahmah na hi uh hi”(1 Thessalonians 2:6–8.

Thu-um mi masate hunlai-in upna citak mite in Pasian biakhawm dingin synagogue, inn leh biakinn cihte ah kikaikhawm uh hi. Pasian lunggulhna leh amaute nuntakna sungah Pasian deihna a kicin nadingin tua bangin Lai Siangtho thu sinkhawm, Pasian bia-khawm uh hi.

Sawltakte hunlai-in biakinn in Pasian theihtelna leh Ama deihna a theih nadingun thugil thutak kikupkhopna-in zang uh hi. I theihloh thu khat dot ding hamsa kisa zel hi. Ahizongin dotna in theihtelna hong guan hi. Tua banah tangthute tungtawnin in mihing in Pasian tawh a kizopzia kisittelna-in nei thei hi. Jesuh in Nungzui sawmlenihte leh a nungzuite a hilhna-ah gentehna leh tangthu tuamtuam tawh hilh hi. Tua hi-in biakinn in pilna kingahna mun, thu kikupkhopna mun hi. Laihilhsiate in sangnaupangte tungah “dotna khat peuhpeuh hai vai thudot kici thei lo hi,” ci-in thudongin a kihilh bangun Pasian hehpihna leh Amah theihtelna sungah khantoh nadingin biakinn in khatlekhat maingal tak leh thu hoih deihna tawh thu kikupna, kidotna mun ding ahi hi.

SUNDAY            November 22

 KHRISTIAN PILSINNA MANTAK

Tangthu khatah rabbi khat in a laihilhna inn sungah ihmut suak sangnaupang khat thu dong hi. “Sangnaupang aw, mi khat in zingsang hun leh nitak khuamial hun bangci theihtheih hiam? ci-in dong hi. Sangnaupang khat in a khut lamto-in “rabbi aw, thei-kung leh olive kung kikhentheih hun hi lo hiam,” ci-in dawng hi. “ Hi lo hi.” A dang khat in dawng leuleu in “ Rabbi aw, keel leh tuu kikhentheih hun hi, ci-in dawng hi. Tua bangin sangnaupangte dawngna a zak khitteh tua rabbi in “Sangnaupangte aw, na muh ngei loh mi khat pen na sanggampa, sanggamnu bangin na muh hun in zan khuamial bei-in khuavak kipan hi, ci-in dawngkik hi. Tua bangin na muh mateng bangzah-in khuavak taleh khuamial sungah om lai na hi hi, ci hi.

Luke 10:30–37 sim in. Jesuh in hih tangthu deihna bang pulaak hiam? Khristian pilsinna-ah nangma mapan theih bang om hiam?

Seventh-day Adventists thu-um khat ihihna tawh Khristian tampite muh khakloh thuman tampi i mu hi. Misite omzia, Sabbath, 1844 thukhenna, Satan leh Khrih kido-na, cihte i thei hi. Hih thuman thute theih ding thupi mahmah hi. Ahi zongin mi hehpih thei lo, mi nengniam, simmawh, thuman lo-in nasem lehang, thuman theihna in bang phatuam ding hiam?

Khristian pilsinna mantak in mihing siatna, hoihlohnate tungah zawhna a hong pia ding hi. Pilna in Khrih in mi a it bangin itna hong nei sak hi. Bang hang hiam cihleh Khrih in amaute mawhna pua-in, sihna thuakin man kiseh thei lo tawh a hong lei hi. Singlamteh mai-ah Pasian in mimal khat manpha a sak mah bangin eite in zong manpha-sa a itna i nei ding hi. Khristian pilsinna in hih thu limtak hong hilh a, tua hi keileh Khristian hihna in khiatna nei lo-in a minpua peekmah ihi ding hi.

Khristian thuzuihna tawh kituak lo kimlepaam pan hi taleh ngei-na hoih lo tuamtuam a om hiam? Na zawh ding tua bang hoih lo a om hiam?

 

MONDAY              November 23

KHUAVAK HI DINGIN SAPNA NGAH

Leitung hunpai zia ngiahsun lehang leitung in a hoih lamsangh a sialam manawh semsem hi. I mimalin nisimin hamsatna i nawkkha den hi. Natna, sihna, nupa kikhenna, innkuan sung kisiatna cihte a kipan siatna in hong tuamcip hi. Siatna in hong vukcip phial taleh leitungah thuman om nawn lo bang phialin kisia khin taleh Jesuh hong hopihna aw kiza thei veve hi: “Note pen mite aa dingin khuavak tawh na kibang uh hi. Mual dawnah a om khua kiseelcip thei lo hi. Mei a vak khit ciangin kuamah in lawh khuhlo hi. Meivakna mun sangah koihzaw a, innsung khempeuh a taangsak hi. Midangte in na gamtatna hoihte uh a muh ciangin vantungah a om na Pa uh min a phat theih nadingun mite mai-ah na gamtat hoihna uh khuvak bangin na kilangsak un” (Matt. 5:14–16). Hih in Khristian khat ihihna tawh nuntakzia ding bang hong hilh hiam? Midangte in Pasian amuhzia uh tungah bang huzaap i nei hiam?

_____________________________________________________________

_____________________________________________________________

Suun nisa mah nungah Galilee Gunpi gei-ah Jesuh in mihonpi tungah a pulaak tua thute mipi in koi bangin a theitel ding hiam? Jesuh thuhilh a za mipi in khuavak leh khuamial a thei lo om lo hi. Mi a tamzaw in khuavak sangin khuamial kihta zaw hi. Amaute in Roman ukna, galkap nuai-ah omin, tuhun bangin telephone, computer, internet cihte a zat loh uh hangin eite mah bangin nungta thei veve uh hi. Tuhun leitung in dipkuathuai zaw hi. Romante mun tuamtuamah kizel uh a, buai-na piangsakte Roman singlamteh tungah guaktanin kithahna thuak uh hi. Ahi zongin Jesuh in a nungzuite khuavak bangin a nungta dingin hilh hi. Mi hehpih ding, lungsim siangtho ding, kilemna nei dingin hilh hi. Khristian pilsinna-ah sangnaupangte in leitung khuavak hi dingin hilh kisam hi. Midangte tungah Pasian hoihna kilangh sak lungsim kisam hi.

Bangci lampi tawh mite tungah Pasian leh Ama hoihna kilangsak thei ding i hiam?

 

TUESDAY          November 24

NUNGZUITE ETTEHIN NUNGTA

 Pawlpi in Khristian pilsinna thupi ngaihsut ahihleh Jesuh tawh mapatkhop a kul masa pen hi. Jesuh in nungzui ding mi hong sam hi. Amah tawh nungta khawmin Ama nasem dingin pantahin hilh hi. Ama nungzui khempeuh in mi tawh kilawmtatna nei-in mi it ding, hehpih dingin Jesuh in hun hoih hun pha pia hi. Jesuh in amaute khatlekhat sanggampa sanggamnu bangin kingaihsut uh hileh hih leitung in bangci bang dinmun hi ding cih nisim a nuntakna tawh hilh hi.

Luke 4:18–23 sim in. Ama nungzuite khempeuh adingin Khrih in bang pulaak hiam?

__________________________________________________________________

 ________________________________________________________ 

Nungzuite in amau a makaih Jesuh khut nuai-ah kum thum sung bang thusinna a neihna sung uhah Ama tatzia in Nazareth khua-a a gen masak Pasian gam ki-ukna sung a nunzia ding a hilh bangin nungta uh hi. Mawhmai-sakna, hehpihna, itna cihte in hamsatna, kipiakna, lawhsapna cihte tawh tonkhawm hi. Ama nungzui dingin kisinna in a baih hi lo hi. Ni khat ni nih sung nungzui hi lo hi-in nuntak hun sung khempeuh nungzui hi ding kisam hi.

“Honpa in nungzuite tungah a thupiak in Amah a um mi khempeuh tungah thupiak ahi hi. Kha Siangtho tawh kidim mite tungah Pasian in muanna tawh a piak nasep ahi hi. Khrih nundan a nei mi khempeuh in midangte in zong hotkhiatna a ngah nadingun hotkhiatna thu pulaak ding sawlna ngah uh hi. Hotkhiatna nasem dingin pawlpi kikoih hi. Hih a siangtho na a sem dingin a khentat mi in Khrih tawh nasem khawm mi ahi hi.”Ellen G. White, The Desire of Ages, p. 822.

Jesuh nungzui ihih mah bangin biakpiakna, thu-um mite tawh kilawmtatna khempeuh in Khrih bulphuh hi. Jesuh mah in nungzuihna a pankhia hi. Mi tampi in rabbi thuhilhte zui uh hi taleh Jesuh bek mah in Ama nungzui dingin numei pasal mi khempeuh sam hi. Thupiakte khempeuh sangin Jesuh tawh nungta khawm ding thupi zaw ahihna rabbi-te in tel zo lo uh hi.

Jesuh nungzuite in mi khempeuh thupi ngaihsut ding bek hi lo-in amaute in koi-ah khangto thei ding, bangci bang dinmun, nuntak khuasakna uh a khangto thei dingin panpih, makaih ding cihte kisam hi. Tua hi-in Khristian pilsinna khempeuh in leitung nuntak nading bek ngimna nei hi lo-in Khrih hong thupiak bangin Amah bangin cimawh genthei mite huhin hotkhiatna thu a pulaak ding hi.

 

WEDNESDAY           November 25 

THUMAN KANTEL

Nate thu theihna (physics) nei mi minthang Albert Einstein in “A thupi mahmah khat in theihnopna tawh thu dongdong ding” ci hi. Thutheihnopna lungsim in mihing pianpih hi; theihnopna in a hong piang tawm hi. Nate pianzia, omziate in lamdangin, tua thute theihnopna lungsim in thudot ding tampi hong khangsak hi. Nisimin hun tawmvei sung beek nate pianzia ngaihsutna in kicing hi. Theihnopna lungsim si-sak kei in.”

Mihing telzawh loh thu tampi tawh kidim leitungah a nungta ihi hi. Leitung pilna in kimlepaam nate lamdanzia hong hilh uh hi. A kimu thei nate lamdangin thuthuk vive tawh kidim ahihleh vantung thute in lamdang zaw sem ding hi lo hiam?

A nuai-a Lai Siangtho munte in thuman zonna leh thuman theihna bang pulaak uh hiam? Jer. 29:13; Matt. 7:7; Sawl. 17:26, 27; Late 25:5; John 16:13; John 17:17.

 

________________________________________________________________

________________________________________________________________

Ei mah bangin Lai Siangtho sungah numei pasal tampi in a tuahkhak uh thu theihnopna lungsim, a lametna uh, a lau-nate uhleh a lungdamna uh thute banah thuman a kantelna, a tel zawh loh thu uh thu thukpite a theihnnopna uh kigelh hi.

“Amah in na khempeuh amau hun ciat tawh a kituak dingin a bawl hi. Amah in mailam thu theihnopna lungsim eite tungah hong guan a, ahi zongin ama sepnate a cing a theihzawhna ding hong guan lo hi” (Than.. 3:11). Solomon in a cihnopna hi ding hiam? Hebrew ‘olam’ a khiatna in ‘tawntung thu’ ahih keileh a beisa hunte leh mailam hunte” cihna hi. Tua hi-in Pasian in mihing lungsim ah a hunbeisa leh mailam hun, a bei ngei lo ding hun, ngaihsut theihna hong guan hi. Mihing ihihna tawh kizui-in nuntakna leh thu tuamtuam tawh kisai-in “ a thupi thute” ngaihsut theihna, dot theihna i nei hi.

Hih munah Lai Siangtho in mun bulpi pen hi. Ei kua i hiam? Bang hangin nungta i hiam? Koi bangin nungta ding i hiam? Misi bangci om hiam? Bang hangin siatna leh gimna om hiam, cihte in tangtawng pek pan a khang a khangin mihingte thudot hi. Hih bangin mi tampi theihnop thu thei-in midangte zong a hawmsawn thei mi ihihkhak pen hamphatna lianpi hi. Khristian pilsinna-ah Lai Siangtho hong hilh bangin a kihilh lo hileh, tua pilna in bang pilna hi ding hiam?

Bang hangin hih bang dotnate dawnkik nadingin Lai Siangtho mah thupi pen hiam?

 

THURSDAY                November 26

MI AA DING I HUNTE PIA

1 Thess. 2:6–8 sim in. Sanginnte, biakinnte dinmun ding leh bang thu kilanghsak ding hi, ci-in Paul in hong hilh hiam?

Tuhun in kimlepaam sia lua mahmah hun ahih manin Lai Siangtho in a hilh bangin pawlpi thu i thei zo kei hi. Matthew 18:20 sungah “ Note khat le nih in keima min tawh na omkhawm uh ciangin tua lai-ah kei ka hong om ding hi,” ci hi. “Thuciam Thak hong hilh pawlpi dinmun ding leh khua sung dinmun ding a kipatkhiatna mun in thu-um innkuan hi, ci hi. Thu-um mi tawmnote in tua bangin thungenkhawm, lasa khawm, Nekkhawm nei khawm-in Jesuh thute kikum khawm uh hi. Tua bangin kituahkhopna mun in biakna sang, pawlpi tawh kisai pilsinna mun hong suak hi. Pawl sung mi thakte tungah Jesuh thute leh Lai Siangtho thuman hilhna mun hong suak hi. Paul gelh mah bangin Romans 12:2, “Leitung mite gamtat bangin gamta kei unla, na lungsim uh kikhelin Pasian kipuahphasak un. Tua hileh a hoih nate bang hi a, bangte in amah lungkimsakin bangte a kicing hiam ci-in thei-in Pasian deihna na phawk thei ding uh hi.” Tua bangin amaute kipawl khopna mun in hotkhiatna bangin a nuntak theihna mun, etteh ding hong suak hi. Tua bang munah amaute in phatna lasa khawmin, lungkia lo-in thungetkhopna, khat le kihehpih kipanpih a pian theihna a hang thute thei tel uh hi. Mi khat in Pasian hoihna pulaak i zak ciangin ei mahmah in zong Pasian hoihna muhthakna i nei hi. Mi khat in ama thuak hamsatna, zia-etna-ah zawhna ngah thu i zak ciangin i nutnakna-ah Pasian thupha phawktheihna i nei hi. Tua bang ciangin mite ading phattuamna a piangsak nunna, Topa mi zat khat a suah ding lunggulhna om hi.

Paul in Pasian hong hotkhiatna in singlamteh vangliatna, hankhuk pan Topa thawhkikna, Ama hong pai kik ding kamciamte hong hilh hi. Hih thute sangin thu hoih zaw bang mah om lo hi. Paul in singlamteh vangliatna thu a tangko-na ah na khempeuh nusia hi. A nuntakna bangmah sit nei lo-in Jesuh thu genin, a nuntakna in cihtakna tawh kidim hi. Tua bangin Paul in nasem hi taleh khat le khat kipawlkhopna leh biakpiakkhopna tungtawnin hotkhiatna thu sungah nuntak bucing kingah hi, ci-in Paul in hilh hi. Lai Siangtho hong hilh hehpihna thupuak, i genkhiat thute i nuntakna in a pulaak hiam, cih pen mite’n hong en uh hi. Na nunzia limtak kisittel pha in. Koi bang teci na hi hiam?

 

FRIDAY         November 27

Ngaihsutbeh Ding: “Khrih in leitung ukna nei mite lametna bangin kalsuan lo hi. Mualtung Thuhilhna-ah a man pilna nasepna khempeuh puahpha dingin hong pai hi. Leitung in Jesuh zia le tong mantakin theitel a, Ama thuman theitel dingin thuhilh hi. Ahi zongin a khial mite in lametna neilai ahih manun Jesuh in amau mawhna maitang kawk pah lo hi. Jesuh in mawhna hangin leitung mite gimthuakna mu hi; hong hehpih hi. Ahi zongin tua gimna khempeuh a bei nading mite lamet bangin hong hilh lo hi. Ama hilh thute in leitung mite hoihsak thu sangin hoih zaw hi. Mite lametna nusia lo-in, amau khentel theih dingin Pasian Gam thu leh a omzia thute hilh zaw hi. Ama nungzui mi honpite tungah a hilh thute in eite zong hong hilh hi-in a thupi-na neu zaw tuan lo hi. Tuni tuhun ah zong Ama hilh Pasian gam thukhunpite sinin theih ding kisam hi.” Ellen G. White, The 18 Desire of Ages, p. 299.

 

KIKUP DING DOTNATE

1.      Robert Louis Stevenson in Edinburgh, Scotland gamah 1850 kum-in suak hi. Nitak khat amah a kem nu in lupna bawlsak man nailo a ngak kawm-in kongkhak pan amuh thu khat hih bangin pulaak hi. Meivak tawi mi khat in mun khat pan mun khatah pai kawikawi-a meivak tawh kimawl mawl hi. “Hia mipa en dih ve, naupangvai lua,” ci-in hopih hi. Na kimlepaamah khuavak tangsak ding leh itna nei dingin Pasian in bang hong sawl hiam? Masuan ding a thei lo na hihleh na lawmte tawh kikum inla, Topa nasepna-ah na kihel zawhna om ding hi.

2.    Hotkhiatna thu genna-ah pawlpi in Pasian tawh nasem khawm ding a, Jesuh kammalteleh ama sepzia mitsuan in. Pasian in mihingin a hong pianna in Pasian in mi tawh hong nungta khawm mi lakah om, hong dahpih, hong gimpih, hong nuampih dingin hong pai hi. Tua bang mahin kimlepaam mite tawh dahkhawm, nuamkhawm thuakkhawm ding hong deih hi lo hiam? Koi bangin tua bangin na nungta ding hiam? Tua bangin khangnote in a nungta dingin koi bangin na pantah ding hiam?

3.    Seventh-day Adventists pawlpi tungah hong kipia thuman thutak mi tungah hawmsawn dingin ngaihsun in. Koi bangin pawlpi in hong huh thei ding hiam? Thu hamsa, telhak thute a kitel nadingin koi bangin pawlpi in thu kikupna mun hoih, hong huh thei ding hiam? Mite in a telloh uh thute dong nuam dingin koi bangin lampi honsak ding na hiam?

4.    Na kimepaam a om kideidanna tuamtuamte ngaihsun in. Koi bangin pawlpi in tua bang thuman lote pelh-in Lai Siangtho hong hilh ding hiam?