LESSON 3 Oct 10–16

LESSON 3      Oct  10–16

THUKHAM IN LAIHILHSIA BANGIN

 

Tu Kaal Sung Sim Ding; Thkna.. 6:5; 31:9–27;Rom. 3:19–23; Mang.12:17; 14:12; Mark 6:25–27; Heb.5:8.

KAMNGAH: “Note Topa Pasian,na lungsim khempeuh uh, na nuntakna khempeuh uh leh na thahatna khempeuh uh tawh na it ding uh hi” (Thuhilhkina 6:5)

Paul in Galatii pawlpi tungah thukham zuihna tawh Pasian dikna ngahsawm ding ahih lohna vauhilhkholhna hih bangin gen hi: “Tua ahihleh Thukham leh Pasian thuciamte a kilehngat ahi uhi hiam? Hi het lo hi. Mihingte tungah hong kipia Thukham in nuntakna taktak hong pia thei hileh tua Thukham zuihna hangin mi khempeuh in Pasian tawh kipawl theihna ngah ding uh hi.”Gal. 3:21. Thukham in nuntak theihna hong pia thukham om ahihleh tua thukham in Pasian thukham simloh thukham dang hi lo ding hi. Ahi zongin Paul hilh bel thu in, Pasian Thukham in zong nuntakna hong thei lo hi, cih thu hi. Bang hang? “Mawhna khut nuai-ah leitung mi khempeuh om hi; Ahi zongin Khrih a um mite tungah a upna hangun Pasian kamciam a kipiak theih nading thu a om hi.” Gal. 3: 22.

Thukham in nuntakna hong pia thei lo ahihleh tua thukham in bang dingin hong kipia hi ding hiam? Hehpihna kitangsap ihihna a hong lak ding, a hong theisak dingin thukham a hong kipia hi zaw hi. Tua ahihleh thukham in mawhna hong lak, hong mu-sak ahih manin thukham in siatna bek pulaak hi lo ding hiam? Tua bang hi lo hi. Thukham in nuntakna kingah theihna lampi hong lak hi; Khrih hong mu-sak hi. Tua hi -in pilsinna mantak in hehpihna lampi, upna thu leh Khrih thumang dingin a hong makaih hi. Tu kaal sung thusin ding in Khristian pilsinna-ah Pasian thukham dinmun i pulaak ding hi. Thukham in nuntakna hong pia thei lo hi. Ahi zongin upna, hehpihna, Pasian hong itna hong hilh hong mu-sak hi.

 

SUNDAY                     October 11

PASIAN IT DING LEH KIHTA DING

Thuhilhkikna Bu sungah Moses in khangthakte kipatma Israelte in Kamciam Gam a luahma, a nunung pen a thuhilhna kimu thei hi. Moses in Israelte adingin limtak hilhkholhna leh thuhilhcianna nei hi.

Thkna. 31:9–13 sim in. Topa kihta ding cih thupiak a khiatna in bang hi ding hiam?

Pasian in Israelte tung pan ngetna khat nei-in a thukham a piak ahi hi. Amaute in Pasian thupiak a mangngilh loh nadingun Pasian in amaute makaih hi. Hih munah Pasian in a lungduai pilna tawh kidim Laihilhsiam Pa hi. Pasian in a hilhsa thute mah hilh kikkikin, a kamsangte leh ama nasemte in zong tua thute mah pulaak kikkik uh hi. Thuciam Lui sung a thute in Pasian in nuntakna lampi zui dingin a mite a hong hilh thu sim loh thudang om lo hi. Khangsawnte in Pasian thupiakte siksanin pilsinna nei ding uh a thupi-na Moses in limtak hilh hi. Tua bangin pilsinna-ah thunih pulaak hi. Amasa-in a tate un thukham za ding uh hi. Zakna tungtawnin Pasian kihtakna nei ding uh hi (Thkkna 31:13).

Amasa-in thuhilhna za-in, tua khitteh Pasian kihtakna thei ding uh hi. Thukham a theihna uh in lau-na piangsak pah ding cihna hi lo hi. Topa kihtakna theihkul sinkul hi. Moses genna-ah kihtakna leh lau-na in pilna ngah nading lampi hi-in, tua kizopna hang a gah hi pah lo hi. Na Topa Pasian na lungsim khempeuh uh tawh, na hatna khempeuh uh leh na nuntakna khempeuh uh tawh na it ding uh hi, cih thupiak ngaihsun lehang “Topa kihta” un cih thupiak in bang hi ding hiam? (Thkna. 6:5). Naupangno khat leh a pa kizopna tawh kigenteh thei hi. Pa in ta tungah a itna lakin, limtak kemin don hi. A gen bangin sem a, thutang hi. A pa sawl mang lo-in, a khialhleh a khialhna bangin thuak hi. Topa itin, nhi ah ciangin a ta in gamtatna bangin thuak hi. Pa itin i kihtak bangin Pasian zong itin Amah kihtakna in itna tawh a kilangneih hi lo hi. Pasian theitel semsem hi lehang Amah i it semsem ding hi; bang hang hiam cihleh Amah in hoihna tawh kidim hi. Tua kawmmahin Topa thei semsem hi lehang Amah i kihta semsem ding hi. Bang hang hiam cihleh Ama siantho-na, a dikna i muhtel tektek ciangin mihing in mawhna tawh kidim ihihna kiphawkin, ngah dingin a kilawm lopi mah hehpihna i ngah manin suksiatna tawh a kipelh thei ihihlam i phawk ding hi.

 

MONDAY                   October 12

NA LANGAH TECI

Moses in a sawt lo-in si ding cih a theih ciangin a nusiat ding a mipihte mailam thu ding lunghimawhna tampi nei hi. A nusiat khit nungah a mipihte in Kamciam Canaan Gam luah ding uh hi, cih mukhol hi. Kum tampi sung a ngak uh khapsa gam sung a teenna uh panin zong Topa langpang ding uh hi, cih mukhol hi.

Thkna.31:14–27 sim in. A sihma-in Moses in bang kigingkhol hiam? Bang himawhna lianpi nei hiam? Koi bangin a lunghimawhnate pulaak hiam?

Moses thu vaikhak in laihilhsia khat in ama khit laihilhsia dingte a makaihzia tawh kibang hi. Laihilhsia khat in a sangnaupangte gamtat zia le tong theitel mahmah hi. Ama om lohkalin phengphi kei unteh, cih lungmuangsa-in nusia ngam lo hi. Moses zong tua bang mahin thuciam singkuang a pua Levi mite in, thuciam singkuang gei-ah teci hi dingin Thukham Laibu koih dingun vaikhak hi. Moses in ama khit a makai sem dingte tungah a thu-in gen ziau lo hi. A gen thute teci nei dingin koih hi. Moses in Thukham Laibu pen mihing bangin kampau thei, lungsim a khel thei vangliatna nei tawh kibangin pulaak hi.

Thukham in amaute langah teci a om cih thu ngaihsun in. Koi bangin hih thu Thuciam Thak in pulaak hiam? Rom. 3: 19 – 23. Koi bangin thukham in hehpihna kisam ihihlam hong theisak hiam?

 _________________________________________________________

 ________________________________________________________

Thuhilhkikna 31 sungah Topa in Moses tungah a pulaak thute Moses in la-in sak dinga a gelh hi. Moses in a mipih Israel mite tua la a hilh kul hi. “Thukham in Israel mite langah teci-in om hi. Pasian in zong Israel mite a thuhilhna ahi hi. Tua la a sak uh ciangin mi khempeuh in Topa vangliatna mu uh hi. Mimal khat ciat in tua la a sak uh ciangin amau le amau kisittel pah uh hi; Topa gen thute zong thei pah uh hi.

Pasian hong ompihna tawh a thupiak nuntakpih hi mah lehang, bangci bangin thukham in i langah pangin mawhnei mi ihihna pulaak hiam? Thukham in i langah teci pang ahihna thu in hotkhiat kisam ihihna bang pulaak hiam?

 

TUESDAY     October 13

NOTE NADAUPAI NADING UH

Lai Siangtho thu khempeuh in Pasian thukham thei-in zuihna hangin thupha-te hong hilh hi.

Joshua 1:7, 8 sim in. Topa in Joshua tungah bang thu gen hiam?

Koi bangin tuni tuhun-in tua thu guipite nuntakpih i hiam?

Joshua in Canaan sung a lut ding ciangin Topa in hih bangin thu pia hi:

“Thahat inla hang inla, ka nasem Moses in nang hong piak thukhamte khempeuh tawh kizui-in na gamtat ding limtakin ngaihsun in. Na pai-na peuhah hoihtakin na lamzan theih nadingin tuate khat zong pelh kei in,”ci hi (Joshua 1:7).

Thupiak bangin nuntakna gah matut lawhcinnate in tuhun leitung lawhcinna tawh kibang lo hi. Tuhun mi lawhcing ci-in a kiciamtehte in midangte sep loh a sem theite, kuama ngaihsut loh a ngaihsun theite, amah leh amah a khua-sa theite hi. Masuan khat peuhah lawhcin nading midangte sangin siam zawk kisam hi; mite’n lauhuai dinmun hi, cih taleh lau lo-in mainawt ngam ding zong kisam hi. Ahi zongin Pasian mai-ah lawhcin na in leitung mite lawhcing, ci-in a ciaptehna uh tawh kibang lo hi.

Mang.12:17; 14:12; Romans 1:5; 16:26; James 2:10–12 sim in. Tuhun aa dingin Pasian thukham nuntakpihna tawh kisai bang hong hilh uh hiam? Thukham zuihna hangin a hong kihonkhia hi lo hi. Tua hi mah taleh bang hangin thukham hong sawl bangin nuntak ding thupi hiam?

Khristiante in Thuciam Lui, Thuciam Thak leh Pasian thukham a zui dingin sapna ngah mite ihi hi. Thukham palsatna in mawhna hi-in mawhna in gimna, natna, tawntung sihna hong tunpih hi. Pasian thukham a palsatna hangin amah mah in gimna amu lo, a thuak lo kua om ding hiam? Nidang Israelte in hehpihna kisam uh hi mah taleh, Pasian thukham a zuihna uh tungtawnin lawhcinna a ngah bangun tu-in zong tua mah hi lo hiam? Tua hi-in Khristian pilsinna-ah Pasian hong hehpihna muanna leh upna tawh nuntakna-ah Pasian thukham zuihna in a kisam mahmah thu guipi khat hi lo hiam?

Mawhna thaman na tuahkhak thute ngaihsun in. Nang khialh bangin midangte in zong a khialh khak loh nadingun na phutkhak thute panin midangte bang thu hawmsawn ding na hiam?

 

WEDNESDAY           October 14

THUKHAM A ZUITE THUAKNALEH HAMSATNATE

Pasian deih bang zuihna hangin hamphatna tuamtuamte Pasian thupha ngah mite nunzia tungtawnin kimu thei hi. Joshua in Pasian thupiak limtak zui-in Israel mite hoihtakin makaih hi. Topa in Israelte tungah ka thukham na zuih uhleh na daupai ding uh hi, ci-in gen kikkik hi.

2Khang. 31:20, 21 sim in. Bang hangin Hezekiah in daupai-in tuahpha hi ding hiam?

________________________________________________________________

_____________________________________________________________

Bangbang pilsinna hi taleh thukhun zui-a thumanna in thupi hi. Ahi zongin khangnote in thudot hau thei uh hi. Itna nei-in, thumangin, cihtak mite in banghang gimna, hamsatna thuak veve uh hiam, ci uh hi. Bang hang cih pen gen hamsa hi. Koi bangin tua bang dotnana dawng ding hiam? A lungkim ngah dingun i dawng thei kei hi. Mawhna, siatna lakah a nungta ihih manin gimna, natna tawh a kipelh thei kuamah om lo hi.

Koi bangin a nuai-a Lai Siangtho munte i theihzawh loh thute hong huh thei hiam? Mark 6:25–27; Job 1, 2; 2 Cor. 11:23–29.

 ___________________________________________________________

______________________________________________________________

Mi hoih, thukham thukhun palsat lo mi khempeuh in daupai pahpah lo uh hi; leitung mahmah ah zong mi nuamsa hi pah pah lo hi. Thukham in thupi-in man nei hi, ci-in a kipulaak ciangin dawnna hamsa thudot om ahih manin, ‘daupai-na, “lawhcinna” i cih in bang hi ding hiam, cih tel kul hi. Late gelh pa in “Gitlohna inn sungah ka teen sangin ka Pasian inn kongcing pa ka hi nuam zaw hi,” (Late 84: 10), ci-in a genteh bang a ci nuam hi ding hiam? Tu-in zong leitung mite muhna-ah Pasian tungah a citak, Ama thukham a zui mite in lawhcing, daupai khin pah lo uh hi. I khangnote tungah i gen thu pen a hi lo thu gen tawh kibang hi.

Hebrews 11:13–16 sim in. Koi bangin thuman citak mi hi napi-in gim a thuaknate uh telthei ding i hiam?

 

THURSDAY                October 15

JESUH, EITE ETTEH DING

Pasian Tapa, Jesuh Khrih in mihingin hong nungta hi; genbaang lo-in thukham zui-in, Pa deihna bangin nungta hi. Eite aitangin a hong si dingin nungta hi bek lo-in eite etteh dingin a hong nungta hi.

Luke 2:51, 52; Phil. 2:8; Heb. 5:8; John 8:28, 29 sim in. Koi bangin Khrih in limtakin thukham zui hiam?

John pulaak thu in “Ama sungah ka om hi, a ci mi peuhmah in Ama gamtat bangin gamta ding hi”(1 John 2:6). Leitungah Khrih nunzia leh a nasep ngaihsun lehang Pa Pasian in Jesuh thumanna hangin a lungdamna kimu hi. Jesuh in genkholhnate tangtungsak hi; a nuntakna khempeuh in Pasian thukham tawisang hi. Israel mite a thuhilh teci dingin Pasian in Ama thukham gelh dingin Moses a sawl bangin, Khrih in sawltakte, nungzuite, mawhnei mite leh a mi siangthote aa dingin Pasian mahmah a hong kilang hi. Tu-in ahihleh zuih ding leh pelh ding thupiak hi ziau lo-in, Khrih in mihing si le sa-in hong nuntak eite etteh ding hi. Laihilhsia khat in a sangnaupangte etteh dingin Jesuh in Pa thu a manzia simloh a hilh ding ettehhuai zaw a dang om lo hi.

 

“Upna nei hi lehang Pasian thukhamte zuih ding panin hong suakta sak hi. zuih a kul hi lo hi, ci-in thuhilh mi in upna mantak nei hi lo-in ama upmawh hoihsak thu a gen ahi hi. “ Note in upna tawh hotkhiatna na ngah uh hi.” Ahi zongin zuihna om lo upna in a si upna hi (Ephesians 2:8; James 2:17). Jesuh mahmah in hih leitungah mihingin a hong pianma-in “ Nangma deih bang hihna-ah nuam ka sa hi, ka Pasian aw. Nangma thukham ka lung sungah om hi,” ci hi (Late 40:8) Jesuh in van a kahtohma-in zong tua mah pulaak kik hi: “Ka Pa hong thupiakte zui-in ama itna sungah ka om mah bangin note in zong ka thupiakte na hong zuih uhleh ka itna sungah a om na hi ding uh hi,” ci hi (John 15: 10). Tua tawh kizom-in Lai Siangtho in “Eite in Ama thukham i zuih ciangin Amah a thei taktak ihihna hong kilangh hi……. Pasian tawh ka

kipawl hi, a ci mi khempeuh, Jesuh Khrih a gamtat bangin a gamtat ding ahi hi,” (1 John 2:3–6.” Ellen G. White, Steps to Christ, p. 61.

A beisa hun sangin Khrih nungzui mi hoih zaw leh midangte a hilhsiam zaw, etteh thamcing zaw, na suah nadingin bang na kisam hiam? Bang hangin i gen thute sangin i gamtat a gin ngaih zaw hiam?

 

FRIDAY        October 16

Ngaihsutbeh Ding: “Itna in piansakna, hotkhiatna phungpi hi. Pilna mantak bulpi zong itna mah hi. Hih thu in nuntak lam hong lak dingin Pasian in a thukham hong piak panin kimu thei hi. A masa pen leh a thupi pen thukham in “Na Topa Pasian na lungsim khempeuh, na hatna khempeuh leh na nuntakna khempeuh tawh na it ding hi” (Lk. 10:27). Theihna khempeuh a nei, ciangtan a nei lo Pasian pen lungsim khempeuh, nuntakna khempeuh, hatna khempeuh tawh itna in a sang penpen khantohna hi. Pumpi khantohna, lungsim khantohna, nuntak khantohna-ah i sungah Pasian lim le meel a hong bawlkik hi.

A masa thukham bangin a nihna thukham in : Nang na ki-it bangin midangte zong na it ding hi,” Matthew 22:39. Itna thukham in pumpi, lungsim, ngaihsutna, nuntakna khempeuh in Topa aa ding leh mite aa dingin a nungta dingin hong sawl hi. Tua bangin nuntakna in mite aa ding thupha suak banah ei mahmah in zong thupha lian penpen a ngah ihi hi. Angsung khuala hepkhiatna in khantohna mantak a piangsak hi.

Angsung huaihamna nusia-in nasem hi lehang pumpi, lungsim leh nuntak buppi khangto ding hi. Pasian zia le tong sungah a thuk lut zaw semsem ihi ding hi. Vantung tawh a kituak dinmun a tung ihi ding hi. Bang hang hiam cihleh vantung in i sungah a hong teeng hi.” Ellen G. White, 2 Education, p. 16.

 

KIKUP DING DOTNATE

1.       Nidang Israelte bangin eite in zong Pasian i it ding leh zahtak ding kisam hi (Matt. 22:37; Mang. 14:7). Koi bangin itna leh zahtakna tonkhawm thei hi, cih thu na lawmte tawh kikum in. Bang hangin hih thu nih in a tonkhawm ding kisam hiam?

2.     Thukhun neihna leh dinmun-sang neihna in bang kilamdang hiam? Nangma phutkhak tawh kizui-in Advenist pawlpi in gamtat hoih ding thupi takin ngaihsun hiam, ahih keileh thukhunte in pawlpi kipumkhatsak hiam? Lai Siangtho in mimal nunzia, innkuan, pawlpi aA ding dinmun sang ding a hong hilh hiam?

3.     Bangci bangin Pasian thukham limtak nuntakpihna leh thukham zuihna in hotkhiat ngahna bulpi hi lo hi, cih thu khinkhai siam ding na hiam?

4.     Late 119 a vekin sim in. Thumanna, suahtakna, thukham, thupiak, thukhun, sawlna cih kammalte bangzah vei kigelh hiam ciamteh in. Hih kammalte tungtawnin Late 119 gelh pa in bang hong hilh nuam hi ding hiam?