LESSON 12 December 12- 18

 

LESSON 12   December 12- 18

A Nungta Pasian Tawh Kikholhna leh Ama zia le tong Neina

 

Sabbath Nitak

Kaal Sung Sim Ding: Pian.1, 2; Pai. 16:14–13 29; Isa. 58:1–14; Matt. 12:1– 13; Luke 13:10–17. 

KAMNGAH: “Tua ciangin Jesuh in, Sabbath ni, mihingte phattuam nadingin a kibawl hi a, mihing pen Sabbath ni a phattuam nadingin akibawl hi lo hi. Tua ahih ciangin Mihing Tapa pen Sabbath ni nangawn a ukpa ahi hi,” ci-in a thugen a khum hi. Mark 2: 27, 28.

Jodie in a sangkahna-ah amah bek Seventh-day Adventist hi. Sabbath ni ciangin a lawmte tawh kibangin sangvai tuamtuamte-ah va kihel thei lo ahih manin a lawmte in a upna thu thei khia uh hi. Ni khat a lawmte khat Galyle tawh kiho uh hi. Galye pasal in kha 6 val bang a zinkhia ding ahih manin, Jodie in Friday ni a tunsimin bangmah sem lo ahihteh ci-in giahpih dingin zawn hi. Kha khat sung bang anne khawm, lasa, la ngai-khawm, upna thute kikum khawm uh hi. A kaal nga-na hong tun ciangin Gayle in khua sung a vakna-ah khutbulh nai en a, a sawt lo-in nitum ding, Sabbath lut ta ding cih thei hi. A upna in Pasian tawh kizopna sungah nuamsa semsem hi. Sabbath in Pasian tawh kizopna kip hong guan hi. Mimal hong picingsak hi. Sababth in tawlngak ni bek hi lo-in pilna ngah theihna ni khat hi, cih i phawk ding kisam hi.

SUNDAY           December 13

PASIAN VANGLIATNA PHAWK HU 

Bang hangin Pasian in Piancil 1 leh 2 sungah a kizomin piansakna thu hong hilh hi ding hiam, cih na ngaihsun ngei hiam? Pialcil 1 sungah Piansak Nipi Kaal sung a thupiangteng kigelh a, ni 6 sung a kipiangsak nuntakna nei khempeuh, kimlepaam nate leh mihing kipiaksakna thu kigelh hi. Piancil 2 sungah zong piansakna thu mah kigelh hi; ahi zongin ni 6 ni-a piansakna thu siksanin kigelh hi. Piancil 2 in Adam kipiansakna thu siksanin piansakna thute pulaak hi. Piansak na khempeuh in Adam adingin kipiangsak ahihna, Eve, huan, lui tuite, ganhingte in Adam aa dingin kipiangsak hi. Piansakna in thu thukpi hi. Piangsakpa vangliatna, a siamna kilangh hi. Hoihna tawh kidim Pasian ahihna kimu thei hi. Pasian in mihingte leh a piansak na khempeuh tawh kizopna nei nuam Pasian hi; piansak nate it a mihing khat le khat ki-it ding hong deih Pasian hi.

Pian.1, 2 sim in. Koi bangin Sabbath kipatcil in (Pian. 2:1-3) Piancil thu leh mihing kipiansakna tawh kizopna nei hiam? Koi bangin Sabbath ni-a Pasian thupha leh Sabbbath ni siangtho-sak cih thu na tel hiam?

_______________________________________________________________

________________________________________________________________

Sabbath kipatcil ni-a Adam le Eve dingin kingaihsun in. Tua in na zi, na pasal tawh ni masa pen, Sababth masa pen, Pasian tawh kimuh masak pen ni, pilsin kipat masa pen ni hi. Piangsakpa na theih kipatcil, nate hoihna na muhtung hi ding hi. Na gei-ah saai, uiphuk a kipan meel tuamtuam nei ganhing namkim na muh masakcilna hi ding hi. Sangawng saau, lawi a kipan a tuamtuam na muhcilna hi. A tuamtuam nate hangin lamdangsa-in na om ding hi. Na kim na paam panin awging tuamtuam na za ding hi. Hihte khempeuh banah itna, vaipuak nasep na neihlam zong na kiphawk ding hi. Nang hong Piangsakpa tawh na kizopcilna ahih mah bangin piansak nate tawh zong kizopna kipan pan na hi ding hi. Adam leh Eve aa dingin Sabbath masa pen in lawpna vive tawh kidim hi. Piangsakpa leh piansaknate hangin lungdamna tawh kidim dingin Pasian in hun hoih a piak ahi hi. Amuh, azak uh na khempeuh lamdangsakna tawh kidim uh hi.

Adam leh Eve in Sababth masa hun sung-a a ngah uh pilna thute gelhkhia in. Kibatlohna tampi om taleh, tuni tuhunah a kizangsuak thei dingte pulaak in. Koi bangin tua thute in Sabbath nopna hong pia hiam?

 

MONDAY                             December 14

MUHKHIATKIKNAHUN

Egypt panin Israelte paikhiatpih dingin Moses a kisawl ciangin mihonpi in Pasian tanu tapa ahihlam uh mangngilh uh hi. Amaute in Pasian cih in kua hi-a, bang hangin amah kibia a, Ama kamciamte a phawk kik ding uh kisam hi. Sababth in hih thute theihkikna guan hi. Sabbath in Pasian tawh a tuam vilvelin kizopna nei minam ahihna uh namdangte thei uh hi. Pasian in manna a piakna tungtawnin Israelte pilna guan hi.

Pai. 16:14–29 sungah Israelte thusin bang thute kimu thei hiam?

__________________________________________________________

__________________________________________________________

Pasian in Israel mite nisimin lamdangtakin manna pia hi. Amaute in nisim a kitangsapna zah sangin tam ngah zaw hileh Pasian mangngilh ding uh ahih manin Pasian in nisim khamkhop ding nisimin pia hi; nisimin nalamdang mu uh hi. Nisimin Pasian kepna mu uh hi. Ahi zongin Sababth ni a tunteh nidang bang lo-in tuamdeuh hi. Friday a tunsialin nalamdang nih vei mu kha uh hi. Pasian in Friday ni-in nidang a manna a piak zahnih pia-in Sabbath hun sung tawntung manna muat lo hi. Hih nalamdangin Pasian in amaute a Honkhia-pa ahihna tecipang hi.

Israelte in kum 40 sung manna ne uh hi (Pai. 16:35). Pasian in sehnel gam sungah Israelte a ompihna amaute in a phawk tawntung nadingun biakbuk sungah manna lawhta dim khat (omer/2.2 liter) koih dingin Moses thupia hi (Pai. 16:32, 33). A tuam vilvelin amaute in Sabbath ni-a Pasian thupha piak a phawkna ding uh ahi hi. Tua banah Pasian in Israelte tungah a tuam vilvelin Sabbath a phawksak hun om hi. Sabbath in Israelte pen Pasian sungah mi thak hihna, Amah tawh kizopna thak, Ama mi ahihna muhthakna guan hi. Amaute in Sababth ni phawkin siangtho-sak a, tua tungtawnin amau a Piangsakpa zia le tong thei-in, Ama kamciam mitsuanin nungta uh hi.

Sabbath ni a niing mahmah khangno khat tawh kiho dingin kingaihsun in. Amah pen a nu le pa sawlna hang leh Lai Siangtho thupiakna hang bekin Sabbath tawlnga hi. Hih khangno in Sabbath ni nop a sak theih nadingin bangci huh ding na hiam?

 

TUESDAY                December 15

MASAK ZAWK DING THUTE SIN DING HUN

Israelte thuak khak nopna ahi a, gimna ahi zongin hihte khempeuh in Sabbath tawh kizopna nei hi. Sabbath ni thupi ngaihsut lo-in, siangtho-sak lo-in a om uhteh Pasian a nawlkhinna uh a kinlohna uh hi kilangh hi(Jer. 17:19–27). Sabbath siangtho-sakin Pasian deihna bangin a tawlngak uhteh Pasian tawh kizopna hoih nei uh hi. Isaiah in Israel leh Sabbath kikaal a omzia uh a pulaak thu Isaiah gen sim in.

Isaiah 58:1–14 sim in. Pasian in Israelte tungah a gen thu tuni tuhun ei adingin zong bang hong gen hiam?

Israelte in biakna pia-in, antang uh a, Pasian thuzui mahin kingaihsun uh hi. Ahi zongin amaute nunzia in Pasian thupiak tawh kituak lo hi; Topa tungah citak lo uh hi. Pasian in amaute tung pan a lamet nunzia Isaiah 58 sungah kigelh hi. Bang hangin Pasian in Isaiah tungtawnin Israelte a thuhilhna-ah Sabbath thu pulaak kik hi ding hiam? Isa. 58:13, 14.

Isaiah in a thuhilhna-ah “note ut thu bangin gamta lo-in,” “note ut bangin kampau mot pau lo’ dingin vauhilh hi. Cihnopna-ah Sabbath ni in ngei-na khat bangin biakna piak ni hi lo hi; eima ut thu bangin om a, Pasian mai-ah a kilawm lo gamtatna khempeuh hepkhiat ding hi. Ahi zongin Sabbath ni pen nopsak ni, nuam ni, deihhuai ni hi ding hi. Sabbath ni nopsakna i cih in Pasian zia le tong theihtelna leh Ama deihna bangin kalsuanna panin midangte tungah Pasian zia le tong kilangsak hi. Sabbath hun zatzia ding a thu-in theihna in kicing lo hi. Tua theihna in nunzia hong khel hi. Sababth in tua dingin hun hoih hi. Sabbath in na dang tuamtuamte sangin Pasian masak zawk ni hoih, hun pha hi.

Sabbath nuam na-sa hiam? Nuamsa lo na ahihleh bang kikhel ding na hiam? Sabbath ni siangtho sak ding na kisin hiam? Na lawmte tawh kikum in. Na hih theihzahin Sabbath thuman bangin nungta in.

  

WEDNESDAY        December 16

A KILEEKKIM NUN NADING HUN

Jesuh in Pasian thukham zahtakin tawisang hi (Matt. 5:17, 18). Ahi zongin biakna makaite tungah thukham hilhcianna tampi nei hi. Sabbath thupiak tawh kisai thu mah lim hilhpi pen hi. Jew makaite in amau biakinn (synagoues) panin Torah/ Thukham kihilh lo uh hi lo hi. Laithei-te leh Pharisee-te in zong thukham in bang gen hiam cih a thei lo uh hi lo hi. Ahi zongin amaute thuhilhna sangin a thukzaw-in Jesuh in Sabbath ni-in a Nungzuite thuhilh hi.

Matthew 12:1–13; Luke 13:10–17 sim in. Jesuh in tua thupiangte tawh thuhilhna bang nei a, tuhun adingin bang hong hilh hiam?

Jesuh in Sabbath ni-in mite a damsakna hangin mawhna tawh kisai thu kinialna lianpi piang hi. Tua bangin Jesuh in nalamdang a bawlna hangin biakna makaite in Jesuh leh a Pa kizopna, Jesuh thuneihna leh Sabbath thupiak tel zo lo uh hi. Jesuh in Sabbath tungah alungpuak Mark 2: 27, 28 sungah kimu thei hi. “Sabbath in mihingte adingin kibawl hi a, mihing in Sabbath ni adingin kipiangsak hi lo hi. Tua hi-in Mihing Tapa in Sabbath tungah ukna nei hi,” ci hi. Jesuh in Sabbath ni pen vangik puak bangin ngaihsut ding deih lo hi. Sabbath ni in Pasian zia le tong theih nading, Ama bawlsa nate manphatna muh nadingin mihingte aa dingin a kipiangsak hi zaw hi.

Biakna makaite in Jesuh gamtatnate a thudot uh ciangin Jesuh in a nungzuite, Jew makaite leh mihonpi in Lai Siangtho leh amau thu up thute leh Pasian deihna a kantel dingin hilh hi. Thukhun thupiak limtak zuih ding thupi mah hi. Ahi zongin tua thukhun thupiakte in bang ngimna nei hiam cih ngaihsun lo-in gumzuih, pumzuih hoih lo hi. Thukhun thupiakte in ngimna nei uh hi; tua ngimna in Pasian zia le tong theihtel nading hi. Ama zia le tong anei mi in Ama nungzuihna-ah cihtakna nei-in eite aa dingin Topa dikna bulphun a ama thupiak bangin nuntakna-ah lungdamna tawh kidim hi.

Koi bangin Sabbath ni-in na tawlnga hiam? Topa theihtelna, Amah na muan ni-in na nei hiam? Ahih keileh thupiak zuihna ciang lelbekin na ngaihsun hiam? Tua bang ahihleh koi bangin Pasian deihna bangin Sabbath hun na zang ding hiam?

 

THURSDAY       December 17

MITE AA DING HUN PIAK NI

Jesuh in a nungzuite etteh dingin Sabbath nisialin Jew biakinnah (synagogue) pai hi. Hankhuk sung pan a thawh khit ciangin zong nungzuite in Sabbath Ni a tunsimin kikhopna innah va pai uh hi. Synagogue in Jesuh thawhkikna thu leh Sabbath tawh kisai thu kidotna leh dawnna, thusinna mun phualpi hong suak hi. Jesuh in Thuciam Lui genkholhna bangin Hebrew mi Messiah ahihna tangtung hi. Jesuh thu pulaak nadingin Synagogue sim loh mun hoih zaw dang om lo hi. Nungzuite in Jew mite leh Pasian kihta mi kimkhatte tungah Jesuh thu hilh uh hi (Sawl. 13:16, 26)

A nuai-a Lai Siangtho munte en inla, koi bangin Jesuh nungzuite in khua sung mun tuamtuamah tecipang uh hiam? Koi munte-ah thugen uh a, kua mite tungah thu hilh uh hiam, bang thu gen uh hiam, thugenna hangin a gah bang kimu hiam? Sawl. 13:14–45; 16:13, 14; 17:1–5; 18:4.

______________________________________________________________

______________________________________________________________

Sawltakte tecipanna in mimal tecipanna hi-in Lai Siangtho thumah pulaak uh hi. Paul in Israel mite khangthu a genbehna-ah “ i pa-te” ci-in Zeisu hun dongin Pasian tawh kizopna kip a nei tinten, tua mite in Egypt gam a Moses a kipan Thukhente, kumpite leh David khangdong a mite pulaak hi (Sawl. 13:17). Paul leh a dang sawltakte in zong amau tuahkhak thute leh amau theih thute in Lai Siangtho ukna sungah om ahihna gen hi. Amaute in theihhuai theite genin, kikum, kinialna tuamtuam nei uh hi. A tuahkhak uh thute pulaakin, Lai Siangtho hilhin tua bangin a nasepna uh in vanglian hi. Biakna makaite in tua bangin sawltakte in Jew leh Gentile mite lakah nasepnate amuh uh ciangin hazaatna lungsim nei uh hi.

Seventh-day Adventist Pawlpi in a dinkhiat a kipan tudongin thuhilhna, thugenna, mimal tuah thute pulaakna, Lai Siangtho hilhna cihte tawh nasem hi. Sababth school leh Sabbath suun, AY a kipan biakpiakna tuamtuamte in biakpiakna tawh kisai pilsinna vive hi. Pilna ngah theihna tuamtuamte in Sabbath ni-a biakpiaknate a huh hi a, Sabbat ni biakpiakna khempeuh in pilna thu bulpi vive hi.

 

FRIDAY      December 18

Ngaihsutbeh Ding: Ellen G. White, “The Sabbath,” pp. 3 281–289, in The Desire of Ages sim in.

“Jewte in namdangte lak pan a kimu thei-in kilamdanna a laak dingin Sabbath simloh a dang bangmah amaute tungah kipia lo hi. Sabbath siangtho takin a zangte in Pasian bia taktak mite hi, cih ciamtehna dingin kikoih hi. Sabbath in milim biakna panin kihepkhiatna leh a nungta Pasian tawh kizopna pulaak hi. Sabbath siangtho takin zat nadingin mihing in a siangtho ding kisam hi. Upna tawh amaute in Khrih dikna ngah thei uh hi. Israelte tungah Sabbath thukham a kipiakin “Sabbath ni a siangtho-a zat ding phawk in,” cih thupiak tawh kitonkhawmin Topa thupiak in “Kei ka siantho mah bangin note in zong na siangtho ding uh hi,” ci hi (Pai. 20:8; 22:31). Tua hileh Sabbath in Pasian bia mi taktak hihna lak hi.” Ellen G. White, The Desire of Ages, p. 283.

“Tua ahih ciangin Sabbath in a hong siangtho-sak Khrih vangliatna limla hi. ……Khrih tungtawnin Israel Pasian tawh kipawl theihna a

hong pia Sabbath in a hong siansak vangliatna limla hi.” The Desire of Ages, pp. 1 288, 289.

 

KIKUP DING DOTNATE

1.      Seventh-day Adventist thu-umte in Sabbath zatzia tawh kisai kikum kinial mun hi. Sabbath zatzia ding tawh kisai pilna hong pia thei thute kaikhawm inla, na lawmte tawh kikum un. Pasian zia le tong i telzawk nadingin Sabbath ni-in bang sem bang bawl ding cihte kikum un.

2.    A tungdeuh a Ellen G. White laigelh ngaihsun in. Sabbath ni-in nasep tawlngakna bek in midangte lak pan kilamdanna hi pah lo hi. Khrih dikna nei mi leh siantho-na ngah khin mi tatzia in koi bang hi dingin na ngaihsun hiam? Hih in Sabbath i zatzia tawh bang kisawhkhakna nei hiam?

3.    Koi bangin Sabbath hun sung nuam nasa zaw ding hiam? Sabbath ni-in Pasian tawh na kizopna a picing zaw dingin a hong huh ding thu thum gelhkhia in. Hih thumte na zat pah hi ding hi.