Lai
Siangtho thusinna-ah thum vei bawlsiatna
INDIA
| November 21
Alka
Mattu, 36
Pastor Samson in Amritsar khuapi-ah
teeng Alka leh midang 14 tungah Mangmuhna Bu thusinna nei hi. Pastor Samson in
innsung mun a nawl khatah dingin, a khutah Lai Siangtho tawi-in, thungaite sual
tungah tu uh hi. Tua ciangin Tanglai Gulpi, Satan leh Dawimangpa in leitungah
kihawlkhia hi. Amah in ama vantungmite tawh leitung mite a khem hi (Mang.
12:7). Alka teekpa Shashipal in a tutna
sual tung pan dingto-in pastor pa hopih hi: “ Bang hangin Jesuh thu hilh hilh
na hi hiam? ci-in hehsa-in a mai engega hi. “ Kei pen leitungah a vanglian pen
ka hi hi,” ci hi. Tua bang thu a zak ciangin Pastor Samson in hih mipa sungah dawi in nasem hi, cih mu hi.
Tua leh 1John 4:4 sungah “ Note sungah a om pa in leitungah a om pa sangin
vanglian zaw hi,” cih phawk vat hi. “ Lau kei in” ci-in tua innkuante tungah
gen hi. “ Khukdinin thungen ni” ci-in thungen uh hi.
Shashipal in khukdin ding nialin awng
thapaai hi. Pastor Samson in Shashipa lu tungah a khutnga-in a maitang mah en
gige-in thungen hi. “ Nang, dawi aw,
singlamteh tungah Jesuh hong sihna hangin nang in na guallel khin hi. Kei ka
hihleh Jesuh sisan tawh ka sawpsiang khin hi. Nangmah in ka tungah vangliatna
na nei nawn kei hi. Keitungah vangliatna na neih nawn loh mah bangin ka lawm
tungah zong vangliatna na nei nawn kei hi. Hih munah Jesuh om hi. Dawi vangliatna susia dingin Kha Siangtho a
hong pai hi. Jesuh leh Ama sisan suangin dawi aw, taikhia in. Ama sung pan
paikhia in.” Tua bangin pastor Samson in thu a nget ciangin Shashipal khuk liing gawp a, damdamin hong
paukhia hi. “ Jesuh aw, ka lungdam hi, “
ci-in pulaak khia a, dawi pai khia hi.
Pastor
Samson in “ Jesuh aw, na tungah ka lungdam hi; nang mah in na hoih hi,” ci-in
pulaak hi.
Kaal khat khit ciangin Pastor Samson
in Mangmuhna Bu thusinna neihpih kik hi. Amaute in Tuuno sisan tawh zawhna a
ngah uh hi. Tua bangin a pulaak ciangin Alka tapa kum 16 a pha John in humpi
bangin hawk bua bua hi. Tua khit ciangin
laa bangin haam leuleu hi; ui bangin haam, gul bangin ngik leu leu hi. “ Pastor
in hih munah hong pai-in thungen ding ka deih kei hi. Ka innah Jesuh thu pulaak
kei in”ci-in pulaak hi.
Pastor Samson in a beisa hun a dawi
nasepnate tu kaal sungin zong hong piang kik hi, ci-in a piang thute phawk kik
hi. Tua hi-in “ Lau kei in. Kiptakin upna sungah nungta-in thungen ni” ci hi. A
innkuanun antangin bang mah ne lo, tui zong dawn lo-in suun tawntung tua bangin
om cip uh hi. Ni thum sung tua bangin om uh hi. Ni thum khitteh Friday ni hong
tungin pastor in Lai Siangtho
thusinpihna nei dingin Alka innah va hawh kik hi. Khukdinin thu nget uh amuh ciangin John in
nuihsan hi. Nidangin a om ngei bang
lo-in bawkbak, haam gawp cihte om nawn lo-in, pastor khut la-in ama lu tungah
koih a, “ pastor aw, thu hong ngetsak
in. Ka tha bei lua hi. Ka lunggim hi. Ka lungtang na hi” ci-in thungen dingin
sawl hi.
Pastor Samson in zong thungetsak pah
a, John in nidang bang nawn lo-in cidam hi.
Tua banah a kaal kik ciangin pastor Samson in Pasian galvante tawh kidim
ding cih thu Ephesians 6:10-18 sung limtak sm hi. Tua bangin Lai Siangtho a
simna tungtawnin Alka pasal Surinder in John lamah hong naih phei-in “ na sung
a dawite tu-in keima sungah hong lut khin uh hi, ci in pulaak hi. Pastor Samson
in amaute innkuan tawh thungen khawm dingin pulaak hi. Thu a nget khit uh
ciangin Late 23, leh 91 sim dingin sawl hi. Hih in dawi gilote pansan nunung pen hi,
ci-in a innkuanun Pasian min phatna nei
dingin kihanthawn uh hi. “ Innkuan sungah Jesuh hong om leh innkuan nuam cih la
sa uh a, nuamsa mahmah uh hi. Dawi in
nusia-in cikmahin pai kik nawn lo hi. Alka leh a innkuanpite in kum tampi sung
dawi biakna sungah om uh a, tua biakna
sungah hong khangkhia ahi uh hi. Amaute
in Jesuh hong itna leh a dikna thu sintoto uh hi.“ Ka nu le ka innpihte in
Jesuh Honpa in a san zawh nadingun thu ngetna hong hel un,’ ci hi.
Tu quarter Sabbath School 13na sumpi
in, Alka le a innkuanpihte kikhopna biakinn, Amritsa khuapi-ah kipuak ding a,
biakinn lam nading hi.
MUC in Tuikhal sanginn aa dingin kipuak
ding hi.
