LESSON 9 AUGUST 22–28
ZAWHNA NGAH DING CIH LUNGSIMPUAK
SABBATH NITAK
TU KAAL SUNG SIM DING: John 4:27–30, 39–42; Matt. 11 15:21–28; 2 Thess. 1:1–4; Rom. 15:7; Eph. 4:32; 1 Pet. 12 3:15.
KAMNGAH: “Na lungsim sung uhah Khrih zahtak bawl unla, Amah Topa-in nei un. Note lametna thu a hong dong a om khakleh hoihtakin a genthei dingin kiging tawntung unla, ahi zongin lungnemna leh zahtakna lim tawh gen un.” 1 Peter 3:15.
Jesuh nunzia kantel
semsem lehang a nunzia in lamdang ahihna, mi mawhte a hong itna, mite a muanna
i mu semsem ding hi. Jesuh in Ama hunlai-a biakna makaite maitang zahlo-in
thuhilh hi taleh, lamet bei mite, mawhna vangik pua-te, a kisik mite Ama ang-ah
pom hi. Tua bang mite hehpih hi.
Bangzah-in siatna lianpi tawh nungta mi hi taleh, tua bang mite mah it hi.
Amaute mawhna lianpi sangin Jesuh tung pan mawhmaisakna in lian zaw hi. Ama
itna in ciangtan nei lo hi.
Jesuh in kiphatsak,
kiliansak ngei lo hi. Amah in mimal khat ciat tungah Pasian limlemeel mu thei
a, mawhna suksiat khempeuh bawl pha ding leh honkhia dingin a hong pai hi. Ama
itna in a batzawh loh ding mi kuamah om lo hi. Ama hehpih itna in a hotkhiat
zawh loh ding mi mawh kuamah om lo hi. Ama kiang a va zuan mi khempeuh Amah in
it-in, limtak kem hi. Vantung Gam sung mi ding mite kaikhawm hi. Bang hang hiam
cihleh mite’n Amah a um thei dingin Jesuh in mite muanna nei hi. Jesuh kiang a
om mite nunzia in kikhel hi. Bang hang hiam cihleh Jesuh in amaute lungsim
takpi tawh it hi. Ama lametna a om bangin amaute in zong nungta uh hi.Jesuh in
mite tungah a lungsim puakzia siksanin eite nuntak khuasak zia ding thu guipi
pawl khat tu kaal sungin i gen ding hi.
SUNDAY August 23
Hotkhiatna A Sangthei Mite
John 4:27–30, 39–42
sim in. Koi bangin Jesuh in Samaritan
numei a kihopihna pan-in lamet loh munte leh mite in hotkhiatna thu sang-in um
thei uh hi, cih hong lak hiam?
____________________________________________________________________________________________________________________________
Nungzuite in hotkhiatna
thu gen ding mun hoih khat a ngaihsut nunung uh in Samaria gam hi. Samaritan
mite leh Jew mite kikal-ah biakpiakna leh thu upna tawh kisai buai-na kum tampi
cingkhin hi. Samaritan mite in Jerusalem biakinn lamna-ah huh ding leh amau
tawh biakna nei khawm dingin Jew mite in phal lo hi. Bang hangin kihuhsak nuam
lo uh hiam cihleh Samaritan mite in namdangte tawh kiteeng mite hi-in, Jew mi
taktak hi lo uh hi. Hih thu hangin Samaritan mite in Gerizim Mual tungah
biakinn khat lam uh hi.
Nungzuite in hotkhiatna
khaici kituh hangin khaici khangkhia zo lo dingin a ngaihsut uh Samaritan a
nusiatsa uh hi. Nungzuite in hotkhiatna thu a um ding mi a muh loh uh hangin
Jesuh in mukhia hi. Jesuh leh Samaritan kiho-na thu John in hih bangin pulaak
masa hi: “Jesuh in tua thu a phawk ciangin Judea gam panin paikhia-in Galilee
gamah a paikik hi. Tua a paina-ah Samaria gam a nawk ding kisam hi.” Jesuh in
Samaritan gamah pai ding kisamsa hi. Bang hang hiam cihleh kuama lamet loh mi
kimkhat in hotkhiatna thu pom dingin kiging a om uh ahihlam Kha Siangtho in va
sawl ahihna theitel hi.
I mit in Kha Siangtho
sathau nilh hi leh, midangte in piang thei kenteh ci-in a ngaihsutna munte-ah a
piantheih nading lampi i mu ding hi. Midangte in gamkeu-na mun hi, ci-in a
ngaihsutna munte panin a manpha khaici mangthang tampi at ding om i mu ding hi.
Sawl. 8:4, 5, 14 sim
in. Jesuh in Samaria gamah a nasepna
panin a gah bang kimu hiam?
_____________________________________________________________________________________________________________________________
Nungzuite in Samaritan mite’n thuman thutak Pasian Kammal a zak
theihna ding lampi mu lo uh hi. Amau muhloh lampi Jesuh in mu khia hi. Kha
Siangtho in Samaritan numei lungsimah nasem ahihlam Jesuh in mu hi. Samaritan
numei kikhelna in ama teenna khuapi huzaap hi. I sepnate tu le tu-in a gah i mu pahpah kei hi. Ahi zongin a kituh khaici
in hun khat ciangin hong po ding a, Pasian minthan nadingin a gah at hun hong
tung ding hi. Eite gamtat kampau in mite tungah a sia ahi a, a pha a hi zongin
koi bangin huzaap cih i thei kei hi. Tua hi-in i sep i bawl, kampaute kidop
ding thupi hi lo hiam?
MONDAY August 24
HUN Leh MUN ZUI-IN NGAIHSUTSIAMNA
Midangte i huzap zawhna
in i lungsim puak tungah kinga hi. Khialhna zong, kamguh pau-na, mite galbawlna
cihte in mi tawh hong kipawlkhawm sak thei lo hi. Thuman i gen hangin i kampau
in mite tawh hong khen thei hi. A langkhat pan kamhoih, lungsim hoih cihte in
mi tawh hong kipawlsak thei, hong kikhawlsak thei hi. Jesuh in hih thugil hih
bangin pulaak hi: “Nasemte in a tote nasepna bangmah thei lo ahih manin note
pen nasemte ka hong ci nawn kei ding hi. Ka Pa tung pan ka zak thu khempeuh
note kiangah hong gen khin ka hih manin note, lawm ka hong ci zaw ding hi.”
Lawmta hihna-ah khatlekhat thaneemnate kithuaksiam-in nopna hamsatnate
kithuakpih kipuakpih hi.
Matthew 15:21–28;
Mark 14:6–9 sim in. A kibang lo numei nih dinmun kipulaak hi. Jesuh in khat
tungah kamneem a, khat tungah kamkhauh pau tawh kibang hi. Jesuh in amaute
tungah hehpihna leh muanna tawh kampau ahihlam koi bangin na mu thei hiam?
____________________________________________________________________________________________________________________________
Matt. 15 sung a numei in
Canaan numei khat hi. Jesuh in Canaan numei in upna sungah khangto-in om ding a
deihna tawh numei ngetna nial masa phot hi. A tawpkhakna-ah Jesuh in Canaan
numei ngetna pia veve hi. Judea gam a biakna makaite in Canaan numei bangin
upna nei a lohna thu Jesuh in pulaak hi. Mite zak dingin Jesuh in, “Numei aw,
na upna in lian hi,” ci hi (Matt. 15:28). Jesuh pahtaak bangin kuamah in tua
bangin pahtaakna pulaak ngei lo uh hi. Canaan numei in bangzahin lungsim
kikhelin lungdamna tawh kidim hiam?
Jesuh khe paknamtui a vanilh in Jew numei khat hi. Tua numei in hun khatlai-in numei gina hi lo hi. Paktat numei, siatna tawh kidim numei khat hi mahta leh, mawhmai-na ngah-in, a kikhel numei, mi thak khat hi. Midangte in a siatnate a pulaak uh ciangin, a gamtat hoihnate hih bangin Jesuh in pulaak hi: “ Hih thu limtakin phawk un. Lungdaman thu a kihoilhna leitung mun khempeuhah hih nu thu kiphawkin kie tungah hong sepnate kigengen ding hi,” a ci hi (Mark 14:9).
A tung a numei nihte
thu ngaihsun lehang lawhcinna tawh kisai lungsim puak bang hong hilh uh hiam?
Khrih ading teci hihna bek tham lo-in nisim nuntak khuasakna khempeuhah bangci
bang lungsim puak kisam hi, cih hong hilh hiam?
TUESDAY August 25
ITNA TAWH THUMAN GEN
Khrih kiangah mi tunpih nadingin kilawmtatna in kicing lo hi. Kikholhpih lawmlegual tampi i nei kha ding hi. Amau tawh kizopna hoih na nei kha mah ding hi. Ahi zongin amaute tungah Khrih hong hotkhiatna, i nuntakna a hong khelna cihte pulaak ngei kei lecin i kikholhnate in tawntung nunna dingin man nei lo hi. Mi tawh kikholhna nuam mahmah taleh, tua sangin a manpha zaw-in a kikhawlkhawm dingin Pasian in hong sawl hi. Mi tawh kikholhna bek in amaute Khrih kiang tunpih zo lo ding taleh kikholh theihlohna in Khrih kiang panin kigamlatna suaksak hi.Sawltak Paul in zong itna tawh thuman gen ding hong hilh hi (Eph. 4:15). Khatlekhat kilawmtatna in kithutuahna, khat ngaihsut thukimpihna, kilungdampih kipahtawi cihte in lungsim hoih tungah kinga hi. A hoih lo thute sangin a hoih thu-te zonkhiat ding thupi mahmah hi.
2Thessa.
1:1–4 sim in. Bang thute hangin Paul in Thessalonia pawlpite tungah a lungkimna pulaak hiam?
__________________________________________________________________________________________________________
Mi kimkhat in amau leh amau mi hoih-in a kingaihsut nadingun midangte hoihlohna muhkhiat nuamsa mahmah uh hi. Sawltak Paul in ahihleh tua bang hi lo hi. Pawlpi mite sung pan a hoih thute muhkhia ding hanciam hi. Ahi zongin a khialte thuman hilh-in amau khialhna thukimpih lo hi. Ama ngimna bulpi in pawlpi kilamhtoh nading ahi hi. Tua dingin mite nasep hoihte pulaak zaw hi. Ellen G. White in zong thu hoih tawh kilawmtat a thupi-na hih bangin pulaak hi: “Pasian mai-ah kiniamkhiat a, khatlekhat tungah thu hoih kibawl-in itna, hehpihna nei hi lehang thuman thutak sungah a hong kikhel mi khat a omna mun-ah tu-in mi za tampi om khin ding hi.’’ Testimonies for the 19 Church, vol. 9, p. 189.
A tunga i pulaak Ellen
G White gen thute ngaihsun in. Pawl
sungah lungsim takpi tawh khatlekhat ki-it, kihehpih, kilainat cihte in mimal
khat ciat adingin bang khiatna nei hiam? Tua bang pawlpi dinmun in koi bang hi
ding hiam? Nang le nang kisittel inla
koi munah na kipuahphat ding omlai hiam?
WEDNESDAY August 26
KIPAWLKHOP THEIHNA PHUNGPI
Romans 15:7; Ephesians
4:32 sim in. Bang thu bulphuh-in khatlekhat kisansiamna om thei hiam? Tua bang
lungsim guipi in bang hi ding hiam?
_______________________________________________________________
_____________________________________________________________
Paul in Roman leh Ephesus pawlpite khatlekhat kisansiamna thu
bulpi pulaak hi. Khrih in i mawhna hong maisak-in ama tanu tapa dingin hong
sangkhin ahih manin khatlekhat mawhna kimaisakin kipawl khawm dingin hong hilh
hi. Khrih in ama mi dingin eite a hong san siksan-in, kicinna om kei taleh eite
in zong khatlekhat kisansiam ding kisam hi. Hih thu ngaihsun in. Na nunzia
kisittel in. Kipuahphat ding hamsa na nei hiam? Midangte’n hong theih khak ding
siatna na vomkha hiam? Om hi taleh, nangmah hong honkhia Khrih in na khempeuh
thei hi. Amah na upna tawh Khrih in a hong sang hi. Tua bangin a hong san in
nangma hoihna hang hi lo-in Ama hoihna hang hi zaw hi. Tua ahih manin midangte
tungah koi bang lungsim puak neih ding kisam hiam?
Hih thu tawh kisai-in mi
kimkhat in a telhak thu om hi. Mi khat
in bangbang khialhna nei taleh ama hihna bangbang tawh nungta khawm i cih
ciangin amah in Pasian limlemeel suun-in mihing a kipiangsak ahihna thu siksan
i hi hi. Khrih in eite adingin hong si hi. “Mimawh ihih laitak, Ama gal ihih
laitak mahin ei adingin hong si hi. Tua hi-in midangte mawhna maisakin i
sanggam bangin i pom ding kisam hi. Midangte mawhna i maisakna, i pom theihna
in Khrih in eite a hong itna siksan i hi hi (Rom. 5:6–10).
Tua bangin khatlekhat i
kipom i kisan khit ciangin Lai Siangtho thuman thutakte itna tawh kihilh ding
kisam hi. Thuman i kihilh keileh itna a nei lo i hi ding hi. Itna sikna-in
lawmta hihna-ah tawntung nunna thute, nunzia a hong khel thute kikum-a
kihawmsawn ding hi. Ut bangin om taleng
phamawh lo, Jesuh in dik hongsa veve hi, cih pen Jesuh zia hi lo hi. Ama
zia pen a beisa hun-in bangbang siatna tawh kidim hi mah lecin, na mawhna
khempeuh kong maisak ding a, na nunzia a hong khel dingin vangliatna ka hong
pia ding hi, cih hi. Amah bangin kiniamkhiat-a itna tawh thuman hilh lehang
mite lungsim su-kha ding a, nunzia kikhel ding uh hi.
Koi bangin mi khat a khialhna nial-in ahi zongin a mi pampaih tuan lo ding i hiam? Koi bangin a mi nial hi lo-in a khialhna nial, kimuhmawh bawl lo-in mawhna pen mawhna mah ci-in gen ding na hiam?
THURSDAY August 27 ITNA TAWH THUMAN PULAAK
Jesuh in itna siksanin
thuman pulaak hi. Thuman pulaak keileh itna nei lo hi ding hi. Itna in mite ading a hoih pen deihsakna nei
hi. Itna leh thuman in kilangneih lo hi. Kiniamkhiatna leh deihsakna tawh
thuman genna in itna thu mah pulaak hi. Jesuh in “Keimah in Lampi ka hi hi;
Thuman thutak ka hi hi; Nuntakna ka hi hi, ci hi (John 14:6) Jesuh bek in
hotkhiatna lampi hi. (Sawl. 4: 12). Ama hehpihna in eite hong honkhia ahih
manin eite in Ama thuman thei-in Amah bangin i nungta thei hi. Itna kihel lo
thuman zuihna in gamtat hoihna tawh Pasian maipha ngahsawmna hi; Pasian
thuzuihna picing hi lo hi. Thuman kihel lo itna in nuntakna thu gui nei lo,
cilesa zui-in ahih manin nuntak manneihna nei lo hi. Itna tawh thuman i gen ciangin Khristian thu
zuihna lampi mantak a pulaak hi hang a, kalsuan nading lampi a hong laktel,
ngimna kician nuntakna leh thuman tawh kidim nunna sungah a kalsuan i hi hi.
1 Peter 3:15; 2
Timothy 4:2; Titus 3:4, 5 sim in. Koi bangin kiniamkhiatna tawh thuman thutak
pulaakna leh thuman pomtheih siamna in tonkhom hi, ci-in hong hilh uh hiam?
_____________________________________________________________________________________________________________________________
Thuciam Thak laigelhte in thuman tungah itna thu a tungnung zaw-in
pulaak lo uh hi. Thuman leh itna, hehpihna leh thukham, cihtakna leh lai-natna
cihte in lawngkhat-in tonkhawm uh hi. “ Mi khat peuh in na upna thu a hong dot
ciangin kiniamna tawh na dawnkik theih nadingun kigingkhol un,” ci-in Peter in
hong hilh hi (1 Pet. 3:15). Cihnopna-ah bang thu-te um a, bang hangin um thei
cihte i tel ding kisam hi. Tua bangin i gen ciangin upna thu a hong dong mi in
a up nadingin a hong dot thu khempeuh dawng kik thei dingin thu khempeuh thei
ding cihna lo hi. Peter gennop thu in lungneem tak leh kiniamkhiatna tawh na
upna thu a gencian thei dingin hong hilh hi zaw hi.
Paul in amah tawh
nasemkhawm khangno Timothy tungah “ Hunhoih hunsia khen tuan lo-in Pasian thu
hilh ding na kin ngaihsut nading, lungduai-na tawh mite lungsim zo-in mite
taii-in hanthawn-in na hilh nadingin thu a hong pia ka hi hi,” ci hi (2 Tim.
4:2). Tua bang mahin Titus zong phawksak
kik hi. “ Eite in na hoih i sepzawhna hangin hong honkhia hi lo-in eite tungah
suahtakna leh nuntakna thak a hong pia Kha Siangtho in a hong sawpsiangna
hangin a hong hehpihna tawh a hong honkhia hi, ci hi (Titus 3:5). Tua bang
mahin eite in zong itna, hehpihna leh kiniamkhiatna tawh thuman a tangko dingin
hong kisawl hi. Itna siksanin hun nunungah Khrih thei lo-in leitung in a kisiat
loh nadingin, Ama thute a pulaak dingin i Topa in Amah tawh nasemkhawm dingin
hong sam hi.
FRIDAY August 28
Ngaihsutbeh ding: Khrih sungah tuucingpa dikna,
nulepa itna leh tehpih omlo Honpa hehpihna kimu hi. A lamdang takin a thuphate
hong pia hi. Thupia-in thupha hong pia hi bek lo-in, thupha deihna lungsim
nei-a, thupha i ngah takpi ding a hong deih hi. Tua ahih manin ama nasemte in
kam a genzawhloh a THUPHA a hong piak hong hilh tawntung uh hi. A lamdang Khrih
hong itna in lungsimkhauh zo thei a, tua itna a dal zo bangmah om lo hi. “ Ka
mite hehnem un, hehnem un, na Pasian un ci hi. Jerusalem aw, mualsang dawnah
kahto-in lungdamna thu kiko in. Zion aw,
nakpi takin awng inla, lungdamna thu taangko in. Nakpi takin kiko inla, lau kei
in. Judah gam khuapite tungah, “ Na Pasian
uh hong pai ta hi,” ci-in gen ta un.
Topa Pasian hong pai a, vangliatna
tawh hong uk ding hi. Ama sep thamante hong pua a, a gualzawhna thamante hong
masuan hi. Amah in tuucingpa bangin ama tuuhonte an vak ding a, am tuuhonte
kaikhawmin a ang sungah pua ding a, no ngeklai a neite dam takin a paipih ding
hi” Isaiah 40:1, 9–11.”—Ellen G. 16 White, The Desire of Ages, pp. 826, 827.
KIKUPD DING DOTNATE
1. Mi kimkhat in midangte
hoihlohna khat pulaakna tungtawnin amah leh amah mi hoih khatin a kingaihsun uh hi. Koi
bangin tua banglungsim puak
pelh ding na hiam?
