LESSON 8 AUGUST 15–21 JESUH BANGIN NASEM

LESSON 8 AUGUST 15–21

JESUH BANGIN NASEM

 

SABBATH NITAK

Tu Kaal Sung Sim Ding: Matt. 5:13, 14; Phil. 2:15; Mark 12 12:34; Eph. 4:15; Matt. 4:23–25; Matt. 25:31–46.

KAMNGAH: “Mihonpite amuh ciangin a cing nei lo tuuhon bangin gimna ngahin lungkhamin om uh ahih manin hehpihhuai a sa hi” (Matthew 9:36).

    Jesuh in mite ading lunghimawhna nei tawntung hi. Ama kitangsapna sangin mite kitangsapna masak zaw tawntung hi. Amahin mite adingin nungta hi. A nasepna khempeuh in hehpih itna tawh kidim hi. Ama kim a om mite pumpi, lungsim ngaihsut kitnagsapna khempeuh pia ahih manin Ama hilh bangbang za-in a ngai mite in Ama gen bangbang telthei pomthei pah uh hi. Phak natna damsakin, mittaw-te khuamu sakin gilkialte an pia-in, kisapna nei-te huh-in, cimawh gentheite panpih ahih manin amaute lungsim lawngkha-in a nunzia uh kikhel hi. Jesuh in mite kitangsapna thei-in huh ahih manin amaute in zong Jesuh thugen bangbang pomsiam thei uh hi. Khrih nasepzia bek in hotkhiatna nasep hong zawhpih ding hi. Jesuh in mite lakah nungta-in amau hoih zawk nading deihna takpi tawh thupha bawl hi. Tua khit ciangin ka nung hong zui in, ci-in sam hi. Ellen G. White, 15 The Ministry of Healing, p. 143.

    Hotkhiatna thu gen ding a kitangsap mah bangin mite kitangsapna huh ding kisam hi. Khrih bangin a nungta mite gen thute leh a sep a bawl uh na khempeuh in Jesuh adingin teci hihna-ah muibun hi.

 

SUNDAY   August 16                                                                                          MITE TUNGAH JESUH A LUNGSIM PUAK

     Jesuh in mite sung pan hoihna muh ding hanciam hi. Amah in mite hoihna pulaak khia tawntung hi. Ama hunlai-a biakna makaite in Jesuh a mawhsakna uh a hang in Jesuh in mi ginalote tawh anne khawm, tuidawn khawm uh hi( Luke 15:2). Tua bangin gamtat hoih lo mite tawh kikhawlkhawm ahih manin biakna makaite in deih lo uh hi. Biakna makaite ngaihsutna-ah biakna cih pen mi hoih lo tawh kigamla-in mi hoihte tawh kipawlkhopna hi ding hi, ci-in ngaihsun uh hi. Jesuh in “midikte sam dingin hong pai ka hi kei a, mimawhte sam dingin hong pai ka hi hi,” ci-in a pulaak ciangin amaute in lamdangsa uh hi (Matt. 9:13).

     Pharisaie, Sadducess cihte in mi ginalote kiang panin kihemkhia uh hi. Amaute ngaihsutna-ah mawhna in a hong sukkhak loh nadingin hanciam theih zahin hanciam ding hi, ci uh hi. Mawh nei lo hi mah taleh Jesuh in mimawhte lakah nungta-in mi mawhte kiang pan kihemkhia lo hi.  Amah in leitung khuavak hi (John 8:12).

     Matthew 5:13, 14 sim in. Nungzui hihna a hong hilh nadingin Jesuh in bang thugentehna nih zang hiam? Bang hangin tua gentehnate pulaak hi ding hiam? John 1:9, John 12:46, Phil. 2:15.

_____________________________________________________________________________________________________________________________

     Nidang hunlai-in ci in na manpha mahmah khatin kiciamteh hi. Roman galkap sungah van lei-na dingin kizang hi. Ci in hauhna limcing hi. An limsak banah an a siat loh nadingin zong a kizang van khat hi. Jesuh in Ama nungzuite limcing dingin ci a pulaakna-ah leitung liatna, sum le paai hauhna in hauhna taktak hi lo hi, cih hilhtel hi. Leitung hauhna taktak in Pasian gam adingin mite nunzia a kilamdangsak dingin a kipia khia nuntakna hi. Angsung huaihamna nusia-in a nungta mite in kimlepaam a namtui-sak, ci bangin a al mite hi.

     Jesuh pulaak thugentehna a dang khat in (Matthew 5:14) leitung khuavak hi.  Khuavak in khuamial pelh lo hi.  Khuavak in khuamial lakah taang hi. Khuamial panin tuam om lo hi. Khuamial phu-tan a, khuamial pen khuavaksak hi. Jesuh nungzuite in zong leitung khuamialna phukhia-in kimlepaam, khua neu khuapite-ah Pasian vangliatna tawh khuavaksak dingte hi

     Jesuh kammalte siksanin (John 17:15–18) koi bangin leitungah nungta-in leitung tawh kipawl lo cih thu theitel ding i hiam? Leitung mite tawh kipawl lo cih thu leh leitung mite pelh cih thu in a kibang ding hiam? Jesuh in a nungzuite adingin a thungetna-ah leitungah nungta-in leitung tawh kipawl lo cih thu in bang pulaak hiam?  Koi bangin leitungah nungta-in leitung tawh kipawl lo-in nungta i hiam?

 

MONDAY      August 17                                                                                  JESUH IN MI TAWH A KIKHOLHZIA

     Jesuh in mi tawh a kikholh ciangin a ngimna bulpi in amaute hoih nading hi. Khat veivei ciangin hamsatna tuamtuam a tuah ciangin hehpihna lungsim tawh mainawt hi. Jesuh tawh a kikhawl mi khempeuh in Ama kampan a pusuak khia hehpihna kammalte lamdangsa uh hi. ( (Luke 4:22); Ama kam panin “hehpihna leh thuman hong pusuak khia hi, ci-in John in pulaak hi (John 1:17). Migitna takin mi tawh kikhawl hi.  Ama kampau in hehpihna tawh kidim-in lmite lungsim sukha hi.

     Matthew 8:5–10; Mark 12:34 sim in. Jesuh in Roman galkap mangpa tung leh Jew laithei pa tungah lametna bang kampau hiam?

________________________________________________________________________________________________________________________

     Jesuh in Roman galkap mangpa tungah a gen thu in kuama ngaihsut khak ngei loh thu hi. Roman galkap mangpa upzia Israel lakah kimu lo hi. Jesuh in Jew laithei pa tungah, “Nang in Pasian gam tawh na kigamla kei hi, ”ci hi. Jesuh in mite sung pan a hoihnate uh pulaak khia tawntung hi. Tua bangin mite hoihna i pulaak ciangin hotkhiatna thu kigente a hong ngai thei dingun lampi hong honsak hi. Na kim na paam-ah om mite sung pan thu hoihte pulaak in. Amaute na pahtaakna theisak in.

     Isaiah 42:3; Kol. 4:5, 6; leh Ephesians 4:15 enkak in. Mi tawh kizopna leh amaute tungah i upna i pulaakna tawh kisai bang thu guipi hong hilh uh hiam?

_______________________________________________________________________________________________________________________

     I kampau in hehpihna leh thapiakna kammal tawh a kidim ciangin tua kammalte in mi tungah huzaap lianpi nei hi. Isaiah genkholh bangin Jesuh in ngongtat lo-in migi hi. Jesuh in itna leh hehpihna tawh kidim tawntung a, mite nasak ngei lo hi. Amah a zuan upna neu mite thaguan hi; Amah a zuan mite nolhkhia ngei lo hi; nunghei ngei lo hi.

          Bang hangin thu khat peuh i genzia in thupi mahmah hiam? Khat veivei ciangin i genkhiat a thu sangin i genzia in thupi hiam? “Thuman pen thuman hi: mite’n um ta leh um kei taleh” cih thu koi bangin na mu hiam?

TUESDAY       August 18

JESUH DAMSAK NASEP: Khen Masa

      Thuhilhna, thugenna in manpha mahmah hi taleh, i Topa in hotkhiatna thu a hilhnate-ah tuate sangin muibun zaw-in nasem hi. Nisim-in kisapna tuamtuam nei mite tawh i kisawhkha tawntung hi. Tua bang mite lakah pumpi kitangsapna, ngaihsut kitangsampte, upna thuman kitangsamte leh nopna kitangsam mi om tawntung hi. Tua bang kisapna tuamtuamte in kicinna a ngah nadingun Jesuh in eite tungtawnin na hong semnuam hi. A dahte tawh dahkhawm-in, lungleng khuangai-te tawh khawlkhawm a, a lungdamte tawh lungdam khawm-in amau lametna, ngaihsutnate kikuppih, holim khawm ding kisam hi. Jesuh in mite kitangsapna huh ahih manin amaute kitangsap lian penpen tawntung nuntakna thu hilh thei hi. Amau hanciamna tawh bangmah tangtun zo nawn lo-in lamet bei mite tungah tua bangin Jesuh in na hoih sem hi. Mite hamsatna in a tuamtek hi. Amaute hamsatna in zatep ngawl ding, cidam nading pumpi gihna khiam ding ahih keileh cidam zawk nading annek tuidawn ding cihte hi kha thei hi. Lungkham mi, inn nei lo, nek ding nei lo, dam lo-in zatui zaha kibawl zo lo cihte huh a panpih ding kisam hi. Zi nei ding pasal nei dingte thukuppih cihte leh innkuan buai-na nei-te huh cihna zong kihel hi.

      Leitung nuntak khuasakna dingin kisapna tuamtuamte sangin a thupi penpen in Pasian tawh mimal kizopna nei a, tawntung nuntakna mitsuan a nuntak ding a thupi pen ahi hi. A kisia leitungah Pasian tawh kizopna in eite kitangsap lianpen ahi hi.

      Pumzaw natna nei Matthew 9:1–7 leh siluang natna nei Mark 5:25–34 sim in. Natna damna leh Pasian tawh kizom a nuntak tawntungna thu kizopzia bang hong hilh hiam?

_____________________________________________________________________________________________________________________________

      Jesuh in cina-te a damsak ciangin pumpi taksa natna damsak banah lungsim ngaihsutnate zong damsak hi. Mawhna hangin gim thuaknate panin suakta-in kicinna guan hi. Khrih adingin upna cidamna kihel lo taksa damna bek in kicing lo hi. Pasian hong itna in pumpi lungsim cidam ding tha hong guan a, tua bangin damna in upna thu ah zong nunna bucing tawh a nungta dingin hong deih hi. Jesuh tung pan damna ngahte in a leitung nuntakna uh bei veve a, pumpi damna sangin tawntung nuntakna sungah damna in thupi zaw ahihna hong hilh hi.

      Na pawlpi in kimlepaam mite kitangsapna huhin panpihna a nei hiam? Koi bangin vaihawm hiam? Koi bangin pawlpi in mite nunzia kilamdangsak dingin nasem hiam?

WEDNESDAY August 19

JESUH CIDAMSAK NASEP: Khennihna

     Matthew 4:23–25; 9:35 sim in. Jesuh in bang thu thum tawh nasem hiam? Koi bangin Jesuh in mite kitangsapna huh-in panpih  hiam? Bangci-in mi nunzia huzaap hiam?

____________________________________________________________________________________________________________________________

     Jesuh in a nasepna-ah thuhilhna, thugenna leh damsakna tawh nasem hi. Tawntung thuman thute hilh-in, nuntak manneihna, nuntak ngimna a bulpi thute pulaak hi.Jesuh in Tuute in a nungta maimai bek hi lo-in nuntakna cingtaak a neihtheih nadingun a hong pai ka hi hi,” ci hi (John 1:10, NKJV). Ama nasep in a kicing vantung hehpihna pulaak hi. Tua hehpihna sungah tu le a tawntungin i nuntak nadingin Jesuh in hih leitungah hong nungta hi.

     Mark 1:32–39 sim in. Jesuh in tatsat lo-in a dam lote damsakin dawilut mite damsak hi. Tua bangin thungetna a neih khit ciangin mi honpite in damna ngah nuamin hong pai uh a, Jesuh in ahihleh khuapi dang khatah paisan hi.  Bang hangin Jesuh in amaute damsak lo hi ding hiam? Mark 1:38, 39 ah en in.

_____________________________________________________________________________________________________________________________

     Jesuh in mi honpite a damsak khit ciangin Amah kiang hong pai mi honpite nusia-in mundangah  aikhia hi. Hih mi honpi in damna ngah nuam uh hi. Jesuh in hih leitungah a hong pai-na thu in hotkhiat lungdamna thu gen ding a hong pai ahihna pulaak hi. Jesuh in nalamdang bawl mi khat bangin ngaihsut ding hi lo hi.  Amah in leitung mite a hong honkhia dingin hong pai Pasian Tapa hi. Jesuh in pumpi damna ngah ding bekin mite damsak hi lo hi. Cinate a damsak ciangin a damsak mite in khawnkhong-in hong kipia tawntung nuntakna a ngah nading uh ngimna tawh a damsak ahi hi. Jesuh in hih leitungah a hong pai-na thu zong tua mah hi. “Mihing Tapa in a mangthang mite zong ding leh honkhia dingin a hong pai ahi hi” (Luke 19:10). Natna khat a damsak ciangin mite in Pasian zia le tong a muh theih nading uh ahi hi. Pasian zia le tong in gimna pan tawldamna pia-in tawntung nuntakna amuh theih nading uh lampi honsak hi.

          Cimawh zawngkhal-in natna satna tawh a kidim mi khat in Jesuh hong piak nuntakna buncing a nei thei ding hiam? Jesuh in pumpi damna sangin a thupi zaw damna khat pulaak hi lo hiam? Koi bangin pumpi, lungsim damna panin thuman muh theihna-ah kalsuanpih ding na hiam?

 

THURSDAY      August 20

JESUH IN THUPI A SAK THUTE

     Jesuh in Jerusalem kisiat ding a genkholhna-ah (Matt. 24)Ama hong pai madeuh in zong tua bang thute mah hong piang kik ding ahihna thugentehna thu thum (Matt. 25) tawh hong hilhkhol hi. Tua thugentehnate in Jesuh hong pai kik ding a lamen mite nunzia in a picing ahi dingin hong hilhkhol hi. Nungak sawmte in Kha Siangtho tawh a kidim nunna mantak hong hilh hi. Talent thugentehna in Topa hong piak siamnate limtakin zangsiam ding hong hilh hi. Tuu leh keel thugentehna in Khristian biakna mantakin a nuntakpih Pasian mite in a tasam mite huh uh ahihna thu hong hilh phapha hi.

     Matthew 25:31–46 sim in. Koi bangin Jesuh in Khristian biakna mantak pulaak hiam? Bnag munte ah mite huh thei ding na hiam?

_______________________________________________________________

_____________________________________________________________    

Bangci bangin Jesuh in Khristian upna mantak pulaak hiam? Matt. 25: 31- 46 sunga nasepnate khat khit khat gelh in. Mite kitangsapnate huh ding a hong hilh thugentehna hi mah taleh tua sangin a thu thuk zaw a hong hilhnop om hi lo hiam?  Pumpi taksa anduh dangtakna sangin a lian zaw thu hong hilh hi ( John 6: 35; 4: 13, 14). Eite in Khrih sungah i nuntak mateng tawntung i teen nading inn lunggulhna tawh a kidim den i hi hi. Ama dikna in a hong tuam mateng eite in guaktangin i om hi (Eph. 2: 12, 13, 19; Mang. 3:18; 19: 7, 8). Thuciam Lui kamsangte in mihing in lamet nei lo-in nungta ihihna pulaak uh hi (Isa. 1:5; Jer. 30: 12- 15). Mawhna in lian lua mahmah hi taleh kamsangte in tua mawhna a dam nading zatui hong hilh uh hi (Jer. 30:17). Jesuh in natna bangin mawhna khempeuh a beisian nading Amah bek hi.

     Tuu leh keel thugentehna in kimlepaam-ah a om mite kitangsapna a huh a panpih dingin hong hilh hi. Leitung nuntak khuasakna tuamtuam kitangsapnate sangin a thupi zaw om hi. Amah tawh nasem khawm a tawntung nunna thu mite a theisak ding i hi hi. Angsung huaihamna tawh kidimin kimlepaam mite kitangsap pumpi, lungsim, upna tawh kisai a kitangsapte nawlkhinna in tawntung siatna hong tunpih ding hi.

     Tuu leh keel thugentehna in mite ading a kipia nunna, tua dingin Topa in a hong sawlna thu leh tua bangin a nungta mite in tawntung nunna sung lut ding ahihna hong hilh hi. Tua hi lo-a angsung huaihamna tawh kidim-a ama ading bekin a nungta mi in Pasian thukhenna thuak ding hi, cih hong hilh hi.

 

FRIDAY     August 21

Ngaihsutbeh Ding: “Mi tampi in Pasian upna nei lo uh hi. Midangte zong muan-in nei lo uh hi. Ahi zongin mi hehpih thei-in mi huh thei uh hi. Tua bangin mi a huhna uh hangun Pasian hi taleh mihing hi taleh kuama tungah muanna nei lo uh hi. Mi hehpih theihna, mi huhna cihte manpha-sa uh hi. Tua bangin mi hehpih thei, mi a huhnate uh hangin kuamah in pahtawi-na minphatna pia kei ta leh, cinate koi-in kem a, gilkialte an pia-in, guaktang om mite puansilh pia-in a dah mite hehneem a sepna khempeuh in lungsim lawngkha-in Topa hong itna theihna-in nei ding uh hi. Lungdam theihna hong khang ding hi. Upna hong khauh ding hi.  Pasian in amaute kem ahihlam mu ding uh a, Topa kammal zaktheihna-in nei ding hi.” Ellen G. White, The Ministry of Healing, p. 145.

     Jesuh in deihsakna tawh mite ading a nasepna in mite lungsim kongkhak kihonna suak a, kideidanna hemkhia-in Ama gen hotkhiatna thu a za mite in um thei uh hi. Pawlpi in kitamte itna tawh a huh Khrih pumpi hi. Kimlepaamte ah Khrih min tawh kilamdanna a piangsak dingin Khrih in eite hong sawl hi. Leitung in a hong siatsak loh nadingin kidopsiam kul hi. Bang hang hiam cihleh leitung in pawlpi siasak thei hi. Kua-kua ci lo-in mi khempeuh tungah hotkhiatna thu pulaak-in Topa in a hong zang dingin ei mahmah kipia-in nunzia kipuahpha a Topa deihna bangin a nungta dingin makaih ding hong sawl hi.

 

KIKUP DING DOTNATE

 1. Bang hangin, Khrih in a nasepna khempeuhah mi hehpihna tawh kidimin         kideidanna, kilangneihnate hemkhia-in, a hilh thu-te mite sungah a lut              nading, kongkhak honsak thei hi ding hiam? Eite in zong i nasepna-ah              Jesuh bangin hehpihna siksan-in sem hi lehang, bangzahin i nasep                     in muibun zaw ding hiam?

 2. Thuman thutak hi napi ahi zongin tua thuman na pulaak khial kha ngei              hiam? Thuman na gen hangin lungsim ngaihsutna hoih lo tawh na pulaak         hiam?Tuabang mah na khialh kik loh nadingin, heh laitak  bangmah pau lo       cihte a kipan, bang kipuahphatna na nei hiam?

 3. Damna ngahte a kipan sihna pan a kitho-kiksak mite zong si kik uh hi.              Hih thu in i kimlepaam mite tungah hotkhiatna thu gen tanghtangh ding            kisam ahihlam hong hilh hi lo hiam?

4. Tu laitak nangma sep loh thu khat, koi bangin na pawlpi in kimlepaam ah         sem hiam?

5. Mite kitangsapnate huhna tungtawnin koi bangin thuman na hilh hiam?