LESSON 3 JULY 11–17 JESUH MIT TAWH MITE MUHNA

LESSON 3     JULY 11–17

JESUH MIT TAWH MITE MUHNA

 

Sabbath Nitak

Tu Kaal Sung Sim Ding: Mk 8:22–26; 12: 28 – 34; John 4:3–34; 1:40, 41; Luke 23:39–43;

KAMNGAH: “Jesuh in, “Hong pai unla kei hong zui un. Mi a mante kong suaksak ding hi,” a ci hi (Matthew 4:19).

     Jesuh in kha mangthang honkhiat nasemte etteh ding makaipi hi. Mi tawh a na sepzia etteh a, eite in zong hotkhiat nasepzia i thei thei ding hi. Jerusalem lamdungte a mihonpite tungah, leivui dim Judea munte, suangken mualtung Galilee gam suangken mualtung munte-ah Jesuh in vantung ki-ukna thu a genna tungtawnin a mangthang mite tungah Ama hong hotkhiatna thu a hilhzia lampi tuamtuamte in hotkhiat nasepzia ding eite etteh ding ahi hi.

     Jesuh in pasal leh numei khempeuh Ama gam sung lut dingin deih hi. Amah in mimal khat ciat vantung itna mit tawh hong en hi. Jesuh in Peter pen ngongtat, kampau kidawp thei lo mi khatin mu lo-in nasep lawhcing hotkhiatna thugen mi khatin mu hi. Jesuh in James leh John cihte a lungtom mi-in mu lo-in, mite ading deihsakna lianpi leh lawpna vantung hehpihna thu hilh mi-in mu hi. Mary Maglalence, Samaritan numei leh siluang natna nei numei nu in itna mantak leh Khrih sungah nuntakna a lunggulhnate uh Jesuh in mu hi. Jesuh in Thomas pen uplahna nei mi-in mu lo-in theihtel nopna lungsim a nei mi khatin mu hi. Jesuh in kuamah deidan lo-in Jew mi hi taleh Gentile mi hi taleh, numei, pasal, singlamteh tungah kikhai guta pa, centurion a kipan dawilut mihai cihte tungah Pasian in thu theihtelna guan-in hotkhiatna thu sang thei dingin mu hi.

 

SUNDAY        July 12

A NIH VEI LAWNNA

     Lai Siangtho in Jesuh in khat vei thupiakna tawh a piang zo lo nalamdang khat bek mah kiciamteh hi. Bethsaida khua-a mittaw pa khuamuh theihna hi. Hih nalamdang in tuni dongin eite thu hong hilh hi. Mi khat in hotkhiatna thu a up nadingin ei mimal khat ciat hong zang thei hi, cih hong hilh hi.  “Amaute Bethsaida a tun uh ciangin mi pawlkhat in mittaw khat va paipih uh a, Jesuh in a lawn nadingin a thum uh hi” (Mark 8:22). Hih sungah kammal thupi nih “paipih’ cih kammal leh “thuum” kigelh hi. Mittaw pa in amah leh amah-in lampai thei lo hi.  A lawmte in ama kitangsap mu-in, amah in a um kei zongin a lawmte upna hangin Jesuh kiangah hong paipih uh hi. Jesuh in hih mittaw pa khua musak thei dingin amaute in um uh hi

     Thuciam Thak sungah Jesuh bawl nalamdang tampi kigelh hi. Tuanalamdangte a lang phial in a lawmte ahih keileh a innkuanpihte in Jesuh kiangah va paipihin damna ngah mite hi. Amaute in upna nei-in Jesuh kiang cinate a paipih uh ciangin cinate in damna ngah uh hi; tua bangin kipai pih lo hi leh tampi in damna ngah lo ding uh hi. 

     Mark 8:22 sungah a thupi kammal a dang khat in “thuum” cih kammal hi. “Ngen,” kantel” “hanthawn” cih khiatna nei hi. Awtol, heh pau hi lo –in aw neem, thu-dam takin ngetna hi.  A lawmte in hih mittaw pa khuamuh nadingin thudam takin Jesuh kiangah ngen uh hi. Jesuh in hih mipa damsak thei ding hi, ci-in a dam ding deihsak uh hi. Tua cina in Jesuh in a natna damsak ding upna nei khol lo kha thei hi; ahi zongin a lawmte in Jesuh in damsak ding hi, cih upna nei uh hi.  Khat veivei ciangin eima upna siksanin Jesuh kiangah i lawmte i va paipih ding a kisap hun om hi.

     Mark 8:22–26 sim in. Bang hangin Jesuh in thakhatin tua mittaw khuamuhsak pah lo hi ding hiam?  Hih thu in tuhun a Jesuh ading teci hihna-ah eite bang thu hong hilh hiam? Eite’n zong mi dangte i telmuh loh om thei ding hi lo hiam? Pasian gam sung mi dingin mu lo-in a suk-hoi, a to- hoi mi khat-in i mu hiam? Bang in mite tel muh ding panin hong dal hiam?

____________________________________________________________________________________________________________________________

     Hih thupiang in Pasian in lampi tuamtuam zangin eite tawh kizopna hong nei hi, cih thu banah a dang bang thu hong hilhlai hiam?  Pumpi taksa damna leh a cidam upna in bangci bangin a mangthang mi hotkhiatna-ah hong huh thei hiam?

 

MONDAY         July 13

MI TAWH KIKHOLHZIA DING A HONG HILH THU

 

     Mimal khat ciat in Pasian mai-ah mi manpha hi. Hih thu a hong hilh nadingin Jesuh in mite a muhzia tungtawnin kithei thei hi. Jesuh in mite a muh bangin eite in zong i muh ding, Amah etteh ding kisam hi. Jesuh muhzia in tuamdang hi. Amaute siatna en lo-in Pasian tanu tapa ahi thei  dingin amaute mu hi.  Jesuh in mi tawh a kizopna-ah zahtakna, itna tawh hopih hi; amaute nuntakna in manpha ahihna pulaak hi. Nungzuite in khat veivei ciangin Jesuh in mite tawh a kizopzia lamdangsa uh hi. A diakdiakin-ah Samaritan numei nu tawh a kiho, a nungzuite in tel zo lo uh hi.

     Nidang mite nuntak khuasak zia a kankhiatte in Jew leh Samaritan kikal a kizopzia uh hih bangin pulaak uh hi: “ Judahte leh Samaritante a kizop lohna uh hun masa-lai pek a kipan hi. 2Kum. 17 sungah kigelh mah  bangin Assyria kumpipa in  722 BC kumin Judah gam do-in, Samaria mite in sila a om saklam Judah gam-ah teng uh hi.  Samaria-te Yahweh leh milim tuamtuam bia khawm uh hi.” The Archaeological Study Bible (Zondervan Publishing, 2005), p.  1727.  Milim biakna tuamtuam banah Jerusalem biakinnpi langdo-in Gerizim Mual tungah biakpiakna inn golpi khat nei uh hi. Samaritante tawh kilamdanna tuamtuam om taleh Jesuh in Samaritan khua nawk-in Galilee a manawh a pai-na thu a nungzuite in tel zo lo uh hi. Samaritan mite langmuh lo-in itna, mawhmai-sakna leh lawm bangin Samaritan numei hopih hi.

     John 4:3–34 sim in. Bangci bangin Jesuh in Samaritan numei hopih hiam? Amah in Jesuh bangci dawn kik hiam? Koi bangin Nungzuite in Jesuh leh Samaritan numei kiho ngaihsun uh  hiam? Bangci bangin Jesuh in nungzuite muhzia picingsak hiam?

 _____________________________________________________________________________________________________________________________

     Jesuh in a nungzuite leh eite a hong hilh nop a kiptawntung thu in “ Khrih lungsim a nei mite in vantung itna mit tawh mi khempeuh en ding uh hi.” Ellen G. White, The Signs of the Times, June 20, 1 1892.   

Na kimlepaam mite in nangma neumuh, nawlkhin, simmawh thuak a om hiam? Bang hangin tua bang lungsim kikhel ding kisam hiam? Koi bangin na kikhel ding hiam?

 

TUESDAY         July 14  

NA OMNA MUN PAN KIPAN IN

     Mi khat in hih bangin a gen man mahmah hi: “Kipatkhiatna ding mun in nangma omna mun hi; bang hang hiam cihleh kipat nading mun dang om lo hi,” ci hi. Jesuh in a nasepna-ah hih thu mah siksan hi( Sawl. 1:8).” Ahi zongin note in Kha Siangtho vangliatna na ngah ding uh a, Jerusalem, Judea, Samaria leh leitung mun khempeuh ah ka tecite na hi ding uh hi,” ci hi.      

     Nungzuite tungah Jesuh hilh thu in telkhialh theih hi lo hi: na omna-ah kipan in. Mun hoih zaw ngaihsun-in, hamphatna lampi zonzon sangin, Pasian in a hong koihna mun-ah Ama teci hi  in; na gei-a mite adingin teci hoih-in om in. Amaute tungah teci hi dingin vantung mit tawh a piang thei thu ngaihsun in.

     Nangma kisap penpen in leitung pilna sang pen hi lo hi; thugensiamna, kivakna tuamtuam zong hi pah lo hi. Mi tawh nasepna-ah tua bang pilna, siamnate in kisam mah hi. Pilna, siamnate lampi mantakin kizang thei hileh na lianpi sem thei hi mah taleh, a tawpkhakna-ah a thupi penpen in Pasian na itna leh a mangthang mite veii-na hi. Khrih ading teci khatin na om nopleh Topa in lampi hong honsak ding hi.

     John 1:40, 41; 6:5–11; 12:20–26 sim in. Khrih ading teci hihna-ah Andrews dinmun bang pulaak hiam?

_________________________________________________________________________________________________________________________

     Andrew tuahkhak thute in thu tampi hong hilh hi. Ama innkuan panin nasep kipan hi. Amasa-in a sanggampa Peter tungah hilh masa hi. A neulai-in Jesuh thei ngei khin a, Jesuh in nalamdang a bawlna dingah kisam nate piakhia hi.  Andrew in Greek-te tawh kizop zia ding thei hi; amaute tawh kinial lo zaw-in, amaute kitangsap thei ahih manin, Jesuh kiangah va paipih hi.

     A mangthang mite hotkhiat nasepna-ah mimal kizopna nei-in mi khat ciat kitangsap theihtelna in muibun mahmah hi. Jesuh a thei nai lo na lawm, a kinaipih mahmah mite ngaihsun in. Hehpihna nei, amau ading awlmawhna nei mi khatin a hong mu ding uh hiam? Amau lunggulh lungnopna, nuntak manphatna nang tung pan a mu ding uh hiam? Na nunzia in mite theih dingin hotkhiatna thu a pulaak hiam? Pa Pasian adingin Jesuh thu na hopsawnna tungtawnin eite in mite i lawmbawl hi. Hun nunung thupiangte kigenna tungtawnin amaute in i Khristian lawmpih, Seventh-day Adventist thu-uppih mite hong suak uh hi.

     Bang hangin i innkuanpihte leh sanggam tanaute Khrih kiang tunpih ding hamsa hiam? Khrih kiangah na innkuanpihte, na lawmte na tunpih  a om hiam?Tua bang nasepna-ah na lawhcing hiam? Bangci bangin na lawhcin theihna na lawmte hawmsawn in.

 

WEDNESDAY        July 15                                                                               

A LUNGKHAUHTE TUNGAH

 A lungkhauh mite tawh kizop zia etteh hoih pen ding Jesuh hi. A kampau leh a gamtat in tua bang mite tawh kikholhsiam hi. Jesuh in amaute lungkhamna puakpih-in, amaute dotna tuamtuamte lungduai takin dawngkik-in vantung thuman thute hilh hi. Jesuh in tua bangin a lungkhauh mite lungsim tawng thei-in, hotkhiatna thu sang thei ding dinmunah om ahihlam uh zong a thei hi. Jesuh in ama hotkhiat zawh loh ding mi mawhlua kuamah om lo hi. Hotkhiatna ngah zo lo dingin mawh dim lua, a niamkiat lua mi a om kei hi. Amaute in Khrih sungah hotkhiatna ngah thei ding uh hi.”  Ellen G. White, The Desire of Ages, p. 258.

          Midangte i muhzia leh Jesuh in amuh zia kilamdang mahmah hi.  Jesuh in mi khat ciat sungah Pasian lim le meel mu hi. Thuman mu telthei dingin Jesuh in amaute ngaihsutna sangkhaan a, tampi mah in Jesuh lametna bangin nungta uh hi.

 

     Matthew 4:18, 19; Mark 12:28–34; Luke 23:39–43 sim in. Khrih in Peter leh John tungah a nget thu, a min kithei lo laithei pa a dot thu leh singlamteh tunga guta pa tungah, a kibang bang thu na mu hiam? Khrih in hih mi thumte tawh a kizopzia limtak ngaihsun in.  Bang thu na mu khia hiam?

_________________________________________________________________

__________________________________________________________________

     Jesuh in koi koi-ah a pai zongin a muh  mi khempeuh in hotkhiatna thu a um thei ding vive mi-in mu hi.  Mite muhna-ah ahi thei lo ding a  bat hangin Ama muhna panin Pasian gam mi ahi thei dingin mu hi. Hih bangin muhtheihna pen pawl sung a hong lut dinga i lamet mite (church growth eyes) kici hi. A khiatna in Khrih muh bang mahin i muh mi khat peuh in Pasian gam mi dingin genpih lehang hong sang thei inteh, hotkhiatna thu um thei unteh, ci-in i lamet mite hi.  Tua banah i gen thu a za mite’n a hong gen loh uh hangun amau kitangsapnate theihna zong kisam hi; a hong gen loh uh hangin amau kisap va theihpihna tungtawnin lampi kihong thei hi. Amau lunggulh thute, a hong pulaak khiat ngam loh uh thute pilvang takin theihpihna in i gen thute a hong pom nadingun lampi hoih khat hi. Tua bang lampi na theih nadingin Kha Siangtho makaihna ngen in. Tua bangin Topa ading nasepna-ah mite lunggulh thute, amau kitangsapte a mu thei, a za thei dingin Topa makaihna, Topa nihvei lawnna na ngah nadingin ngen in. 

     Mite kisap a mu thei ding mit, mite lunggulh a za thei ding bil, Khrih thu na theihte, Amah na itna thute mite tungah a hawmsawn dingin Topa tung pan ngen in. Tua hileh a tawntungin na omna peuhah Topa ading teci-in nuam nasa ding hi; a mannei nuntakna thak sungah a nungta na hi ding hi. Lungkimna na ngah ding a, cihmah hun-in na theih ngeiloh nuamna na nei ding hi. A mangthang mite ading nasemte bekin tua bang nuamna nei uh hi.

 

THURSDAY        July 16

PASIAN HONG LAMLAHNA MU THEI 

     Sawltak Bu in a lamdang mahmah Pasian ompihna tungtawnin nungzuite sepzia vive pulaak hi. A pat pan a tawp dong i sim ciangin pawl sung pawl pua pan bawlsiatna, hamsatna om taleh, pawlpi masate sepzia, pawlpi khanzia in Pasian in pawlpi a makaih kimu hi. Paul in a tuahkhak thute hih bangin pulaak hi: “ Khrih hangin lungdamna thu a hilh dingin Troas khua ka tun ciangin tua lai-ah nasep theih nadingin Topa in lampi hong honsakna thu ka mu hi. Ahi zongin tua lai-ah i sanggampa Titus na om lo ahih manin ka lungsim om thei nawn lo hi. Tua ahih manin tua lai-a om mite nusia-in Masedonia gamah ka paisuak hi. Europe gam sung khempeuh in hotkhiatna thu tawh a kidim nadingin tua bangin Topa in nasem hi. Paul in hotkhiat nasep nading hun hoih a ngah khat pen khahsuah lo hi. Tuni-in thugen ding phalna a ngah hangin a zingteh tua phalna kidok kik thei cih mukhol ahih manin Masedonia gam zuanin zinkhia vingveng hi.

     Thuciam Thak pulaak Pasian in hotkhiatna kizel dingin lampi a hong Pasian hi. I up thute mite tungah i hopsawn theih nading lampi hong honsak Pasian hi. Sawltak Bu sung khempeuh in Pasian lamlahna vive tawh nasepna kimu thei hi. Khuapi sungah nasepna, mun tuamtuam, gam tuamtuamah, a diakdiakin mimal lungsim sungah hotkhiatna thu kizelh zia-te in lamdang mahmah hi.

     Sawl. 8:26–38 sim in. Bangci bangin Phillip in a lungsim khempeuh tawh Pasian makaihna a zuihna leh a hun hoih ngahte zangsiam hiam?

__________________________________________________________________________________________________________________________

     “Vantungmi in thuman khuavak a zong mi kiangah Phillip va puak hi. Lungsim kipuahpha nuam a, mukpau kampau siantho-na deih-in Kha Siangtho makaih ding ngakin a om mite, vantungmite in tu-in amaute pai-na lampi-ah makaih uh hi. Mihing kihel lo-in vantungmi in hotkhiat nasem thei uh hi napi, tua dingin Pasian in geel lo ahih manin, vantungmi in Phillip makaih-in Ethipia mipa kiangah va paipih hi. Pasian vaihawmna-ah mihing in mihingte tungah hotkhiatna thu hilh ding hi. Ellen 21 G. White, The Acts of the Apostles, p. 109. Eite in zong vantung thuman mu nuam, za nuam thei nuam hi lehang vantungmite in a hong makaih ding uh hi.

Phillip leh Ethiopia tawh kisai-in Lai Siangtho in bangzah-in a thu bulpi hiam? Tua bang mahin Lai Siangtho hilhcianna nei mite adingin zong bangzahin thupi hiam? Tua thu in bang hong hilh hiam?

 

FRIDAY        July 17

Ngaihsutbeh Ding: Ellen G. White, “The Gospel in Samaria,” pp. 103–111, in The Acts of the Apostles.

     I kim le paam a mi tampi in tawntung thute mu nuam uh hi. Jesuh in hih bangin pulaak hi: “Anlak ding tampi om a, ahi zongin a la ding mi tawm hi (Matt. 9:37).  Anlak ding thu buaipih uh hi lo hi. Pasian sawl bangin Jesuh in anlak ding tampi a muh laitakin a nungzuite in amaute nasep langpannate mu uh hi. English) Koi bangin Khrih in tua buai-na veengsak hiam? “Tua ahih manin anla dingin a hong sawl dingin an nei Topa tungah ngen un,” ci hi (Matt. 9:38) Bang hangin ngen lo-in om ding i hiam? Topa aw, nangma Gam a tangzai nadingin keimah hong zang in. Kote na hong makaihna hong mu-sak thei in. Nisim-in ka pai nading lampi hong hilh in.  Ka kim ka paam a mite kitangsapna phawk theihna hong guan in. Nisim ka nuntakna-ah mite ading lametna a guan, tha a guan thei hong hi sak in. Mite tungah nangma itna leh na thuman a hawmsawn thei dingin hong zang  in,” ci-in thungen in. Hih bangin Topa tungah thungen lecin, Pasian in a lamdang takin na nuntakna hong zang ding hi.

KIKUP DING DOTNATE

1. Hotkhiat nasepna-ah Khrih kiang mite tunpih ding pen hamsa hi. Bang        hang hiam cihleh Pasian bek in mihing lungsim khel thei hi.Ahizongin Pasian in Ama pilna tawh tua nasep a sem dingin nang le kei hong zang hi.  Mi khat ngah nading hun tampi kisam  hi; lungduai kisam, hanciam kul hi; tung lampan hong pai itna neih ding kisam hi. Khrih ading a muibun teci hihna dingin angsung zonna a si-sak dingin bang khentatna na nei ding hiam?

2. Topa a thei lo koi bang mi tawh kizopna na nei hiam? Khrih ading teci hihna-ah amaute ading sep na nei hiam? A semsem na hi hiam? Sepding kilawm bang a om hiam?

3. Tarsus khua mi Paul ngaihsun in. Paul kikhel ding kuama ngaihsut khak  loh uh hi mah taleh, a lamdang takin hong kikhel hi. Paul a kikhelzia tu-in i thei hi. Tua hi-in a puatham, a kimu thei nate  tawh thukhen pahpahna in kikhialh kha thei ahihlam hong hilh hi.

4. Saul ngaihsun-in Matthew 7:6 in bang pulaak hi ding hiam?  A siangtho nate ui pia kei un; vokpi mai-ah suangmanpha koih kei un. Tuancilgawp ding leh niinsak ding simloh amau adingin kimanna bang mah om lo hi.