LESSON 2 JULY 4–10 A DEIHHUAI TECI Mimal Teci Vangliatna

LESSON 2     JULY 4–10

A DEIHHUAI TECI Mimal Teci Vangliatna

 

Sabbath Nitak

Tu Kaal Sung Sim Ding: Mark 5:15–20, Mark 16:1–11; Sawl.  4:1–20, 1 John 1:1–3, Gal. 2:20; Sawl. 26:1–32.

KAMNGAH: Tua ahih manin kote in ka muhsa uhleh ka zaksa uh thute gen lo-in ka om thei kei ding uh hi,” ci-in a dawng uh hi” (Sawltak 4:20).

          Mimal tuah khak thute mah i pulaak in muibun mahmah hi.  Khrih hong itna in lawpna hong guanin, Ama hehpihna in a hong khel ciangin Ama thu pulaak lo-in i om thei kei ding hi. Mi khat in a pulaak Khrih thu i pulaak sawnna leh ei mahmah in Jesuh tawh kizopna nei-in i pulaak thu in mi tungah huzaap a neihdan uh kibang lo hi.  Mimal in i tuah khak thute i pulaak ciangin a hong nial ding uh hamsa hi. Lai Siangtho thu thukpipi-te i pulaakte ciangin hong nial nuam uh hi. Ahi zongin “ni dangin lamet bei-in ka om a, tu-in lametna ka nei hi,” “mawhna tawh kidim-in ka nungta ngei a, tu-in mawhmai-na hangin lungnop kicinna tawh ka nungta hi,” “ a beisa-in ka nuntakna  in manneihna ka nei kei a, tu-in ka nuntakna  in mannei ahihlam ka phawk hi,” ci-in mimal phutkhak thute mite tungah na pulaak ciangin a um lo mi in zong hotkhiatna thu hong sang thei uh hi.

          Damascus lampi-ah Paul kikhel bangin mi kimkhat in tha khat thu-in kikhel uh hi. Ahi zongin mi a tam zaw-in damdam-in Jesuh theihtelna sungah kalsuan-in tatsat lo-in Amah a phawk mi, a lamdang Ama hong hehpihna hangin lungdam tawntung-in, a khawngkhong-in a hong piak Ama tatna hangin lungdamna lianpi tawh nungta uh hi. Khrih in i  nunzia lamdang takin hong puahpha hi.  Leitung in tua bangin Jesuh ading teci hoih mi kisam-in, tua bang mi mu nuam hi.

SUNDAY          July 5                                                                                    

UPNGAM HUAI LO TECIPANGTE 

 

     Mark 5:15–20 sim in. Bang hangin Jesuh in tua mipa tungah a gei-a mite tungah sawl lo-in Decapolis khua-ah a innkuanpihte tungah a piang thute pulaak dingin sawl zaw hi ding hiam?

__________________________________________________________

_____________________________________________________________

     Decapolis in deca leh polis cih laimmal nih kigawm hi. Deca a khiatna in sawm cihna hi-in polic in khuapi cihna hi.  Decapolis khuapi in kum zalom khat hunlai-a Galiliee Tuipi dungsuk a om khuapi sawm kigawm khuapi khat hi. Hih khuapite in ngei-na kibang, kampau kibang uh hi. Decapolis huam sungah dawivei mi tampi om hi.  Dawi vei mipa in ngonghtat, gamh-tat hi; ahi zongin damna deih hi.  Tua hangin Jesuh in mipa sung panin amah a bawlsia dawi hawlkhia hi.

     Tua dawite in vokte sungah a lut dingin Jesuh in a thupiak bangin lut uh a, vokte in keenbaang-ah tuksuk-in tuipi sung kidenna uh hi. Tua khua mite in hih thupiang amuh uhteh lamdangsa uh hi.  “Amaute Jesuh kiang a tun uh ciangin dawi tampite a lutna pa, tua lai-ah tu-in puansilha, a lungsim pil a om amuh uh ciangin a lau uh hi, Mark 5:15. Tua mipa in pumpi, lungsim, ngiahsutna, a khuaphawk theihna, a upna in cidam hi. Hotkhiatna thu laigil in mawhna suksiat khempeuh in, Khrih in a hong piansak bangin, kicinna tawh a kidim-in hong bawlpha hi.

     Damna ngah dawi lut mipa in ama damna a pulaak nading mun in Decapolis sangin a hoih zaw mun dang om ding hiam? Hih tawh kisai Ellen G. White in hih bangin pulaak hi: “Khrih ading teci hoih hihna-ah eima theih thute gen a, i muh, i zak thute, i tuahkhak thute mah i gen ding thupi hi. Jesuh khe khap kaal khat khit kaal khat a zui hi lehang, tua lampi i zuihna-ah Ama hong makaihna i pulaak ding om hamtang hi. Ama kamciam muanna nei leh nei lo a hong sittelna, Ama kamcian i ngahna, Amah in thuman ahihna i pulaak ding om hi. Khrih hong hehpihna i pulaak ding om tawntung hi.  A mangthang leitung adingin tua bangin Ama teci ahi ding Topa in a hong sam hi. The Desire of Ages, p. 340.

     Mite muhna-ah mi banglo mite hi mah taleh, Pasian in tua bang mi gina lote mah bawlpha-in amaute  in leitung kilamdangsak uh hi. Nangma pianzia, na kikhelna thu in koi bang hiam? Bang thu in upna hong neisak thei hiam? Bangci bangin nangma kikhelna in a kikhel lo mi khat khel ding hiam?

 

MONDAY          July 6                                                                                                SIHNA PAN A THOKIK KHRIH TANGKO

 

     Sunday ni zingtung khat, Mary nihte in kinawhtak-in Khrih kivui-na han zuan uh hi. Amau deih khat ngen dingin a va pai uh hi lo hi. Misi in amaute bang pia thei ding hiam? Amuh nunung pen uh Jesuh pumpi in si tawh kidim, liamna tawh kidim, a mitkha uhah tuate mang lo hi. Tu-in amau sep ding a sem dingin a va pai uh hi zaw hi. Dahna tawh kidim-in Jesuh siluang sathau zut dingin va pai uh hi. Khuamial bangin lamet bei-na vangik in amaute tuamcip hi. A mai-lam hun un bangci ding cih thei lo uh hi; lamet ding a  om mel  lo tawh kibang uh hi. Han va tung uh a, Jesuh luang mu lo uh hi. Matthew in thawhkikna thu hih bangin pulaak hi. “Vantungmite in numeite kiangah, “ Lau kei un, a kikilhlum Jesuh a zong na hihlam uh ka thei  hi. Amah hih lai-ah om lo hi; a gensa bang tektekin tho kik zo hi” (Matt. 28:5, 6). Tu-in Mary-te lawmta in nuamna tawh kidim pah uh hi. Thawhkikna tua zingsang tungin dahna mialpi in a tuamcip amau maitang, tu-in nuamna khuavak nitang tawh kidim uh hi. Amau dahna khuamial in beimang hi. Nuamna tawh kidim uh hi. Kahna munah lungdam lasakna awging kiza hi.

     Mark 16:1–11 sim in. Jesuh in sihna pan thokik zo hi, ci-in Mary in a theih ciangin bang thu pulaak hiam?

______________________________________________________

_________________________________________________________________

     Mary in sihna pan a hingkik Khrih a muh khitteh  amuh Lungdamna thu pulaak dingin nawksa takin tai hi. Mary in daicip thei lo hi. Khrih in nungta hi. Amah in a kivui-na han-ah om nawn lo hi; hih thu leitung in a theih ding kisam hi. Sihna pan a thokik Jesuh tawh i kimuh khit ciangin  hih thu manlangtakin mite i hopsawn ding kisam hi.  Hotkhiat lungdamna thu in mite tungah i pulaak ding thu hi.

     A lamdang mahmah khat in, Jesuh in a thuak ding sihna leh sihna pan a thawhkik ding nungzuite hilhkhol hi napi, Mary in tua bangin Jesuh thawhkikna thu a va gen ciangin nungzuite in um lo uh hi. “Jesuh nungta-a amah in mu khin zo cih thu amaute in a zak uh ciangin a um kei uh hi” (Mark 16:11). Tua hi-in Nungzuipite in amau muh-ah thupiang um lo uh hileh, mite in i pulaak thu a up loh uh pen lamdangsak ding hi lo hi.

 

     Midangte in na pulaak thute a up loh uh a nunung pen in bang hun hiam? Koi bangin na dawng kik hiam? Tua thu hangins bang thu theihbehna na nei hiam? 

TUESDAY          July 7

A KIKHEL NUNTAKNA IN NATE KILAMGDANGSAK

     “Amaute in Peter leh John a hanna mu uh a, lai siam lo mi mawkmawk ahihlam uh thei uh ahi ciangin lamdangsa-in hih mite Jesuh tawh a om khawm uh hi, cih a phawk uh hi” (Sawl.4:13). Thuciam Thak pawlpi pung mahmah hi. Pentecost ni-in mi 3000 kituiphum hi. Tua khit a sawt lo-in tul tampi kibehlap hi (Sawl. 4:4). A sawt lo-in gam-uk makaite in thei uh hi. Thu-um mite in Khrih tawh nungtakhawm uh hi. A nunzia uh kikhel hi. Khrih hehpihna in amaute nunzia kilamdangsak hi. Amau in Khrih pulaak lo-in om thei lo uh hi.

     Sawl. 4:1–20 sim in. Bang thu piang om hiam? Gam-uk makaite in Peter leh Johnte in thuhilh nawn lo dingin a khaam uhteh bang piang hiam? Peter leh John in bangci kalsuan uh hiam?

________________________________________________________________________________________________________________________

     Thu-um mite in Khrih sungah nuntakna thak tawh a nungta mite hi. Amau tuahkhak thute mah mite tungah pulaaksawn uh hi. Peter in kampau a kikem zo lo ngabeng khat hi; Pasian hehpihna in a nunzia khel hi. James leh John in lungtom uh hi. Amau zong Pasian hehpihna in khel hi. Thomas in a lungkhauh mi khat hi; amah zong Pasian hehpihna in khel hi. Thu-um mi masa-te in amau tuahkhak thute mah mite tungah pulaak uh hi; amaute in vantung hehpihna thu gen lo-in om thei lo uh hi.  Ellen G. White in hih bangin pulaak hi: “ I sungah Khrih a hong teen ciangin Ama sungah na ngah thumanpha, mite tungah gensawn lo-in na om thei kei ding hi; Ama hong hotkhiatna thu leh a hong siangtho-sak Ama thuman genkhia lo-in a om thei kei ding hi” Step to Christ, 78.

     Sawl. 4: 16 ah gam makaite gen thu bang kigelh hiam? Amaute in nalamdang mu uh hi; khebai mipa in lampai thei hi. Tua bangin a lamdang thu mu uh hi taleh amaute in a nun zia uh kikhel ding ngaihsun lo uh hi. Hotkhiatna thu a up sangsik-un langpan uh hi. Peter leh John in nungkik tuan lo uh hi.

     Bangci bangin Khrih theihtelna leh Ama thu gensawnna in kizopna nei hiam? Bang hangin Khrih ading teci hihna-ah mimal mahmah in Amah theihtelna thupi hiam?

WEDNESDAY       July 8

I TUAHKHAK THUTE  PULAAK

           Sawltak Paul in Kumpi Agrippa mai-ah kolbulhsa-in kipaipih hi (Sawl. 26). Paul in ama phutkhak thute kumpi tungah pulaak hi; Jesuh nungzui-te a bawlsiatnate banah, a kikhel khit ciangin ama nuntakna in Jesuh ading  nuntak ahihna thu leh sihna pan thawhkikna kamciam thute pulaak hi (Sawl. 26:8).

Paul in Damascus manawh-in a pai-na-ah kikhel hi; tua lai-ah Topa  in, “ Tu-in tho inla, na khe-in ding in.  Nang ka nasem ding leh kei tawh kisai na muhsateng leh kong lah lai dingte ah teci ding a hong seh dingin na kiangah kong kilak hi,” ci-in Paul hopih hi (Sawl. 26:16)

          Mite tungah i upna thu i pulaak in vanglian mahmah hi.  Khrih in a beisa hun a eite ading a sepna, tu-in a sep thute leh mailam hunah a sep dingte pulaakna in mannei hi. Teci panna in eima thu a pulaak hi lo-in Topa thu a pulaak i hi zaw hi. Amah in eite mawhna a hong maisak Pasian, eite natna khempeuh a hong damsak Pasian, hehpihna tawh a hong tuam, na hoih na pha-te tawh a hong lungkimsak Topa hi’ ci-in a pulaak i hi hi (Late 103:3–5). Khrih ading tecipang cih in i tuahkhak a  lamdang Ama hehpihna a pulaak i  hi hi.

          1 John 1:1–3 leh Galatians 2:20 enkak in. A kibang thu a pulak uh in bang thu hiam? Koi bangin John in Paul bangin tuakkha hiam?

_____________________________________________________________________________________________________________________________

          John leh Paul a nunzia uh kibang lo hi. Tua hi mah taleh a nihun Jesuh tawh a kimu mite hi. Amau thuak khak thu in Jesuh tawh khat vei kimu-a beimang pah hi lo hi; a kizom paisuak, nisim-in Ama itna sungah nuamsa-in Ama thuman khuavak sungah kalsuan toto uh hi. Kikhelna in a beisa thupiang khat vei tawh a maimang ding hiam? Ellen G. White in hih tawh kisai a pulaak in: “ Amaute thu zuihzia in kikhel kikkik a kul lo-in khat vei kikhelna tawh kibang hi mah taleh eite in nisim-in kikhelna a kisam mite i hi hi.”Manuscript Releases, vol. 4, p. 46.

          A beisa hun-in bang bang i tuah thu om taleh, kikhelna lianpi nei-in muibun khin taleh, bang hangin nisim-in, Topa hoihna, dikna leh thuman mu dingin, Amah tawh kizopna in thupi hi ding hiam? Na lawmte tawh kikum in.

 

THURSDAY              July 9

MIMAL TECIPANNA IN HUZAAP NEI

     Agrippa mai-a ding Paul ngaihsun in. Maccabees leh Herod khanggui pan Jew kumpi a nunung pen Aggripa mai-ah sawltak Paul pulaak thu ngaihsun in.  Agrippa in Rome mi ahih hangin Jew upna zui kumpi khat hi. (The SDA Bible 8 Commentary, vol. 6, p. 436). Tua laitakin sawltak Paul a teek kuanlam hi ta hi; mun khat  khit mun khatah pai-in hotkhiatna thu gen-in a zinna pan gim khin, tawl khin hi mah taleh, sia le pha, thu hoih leh gitlohna kikaal-ah, a nuntakna in Pasian tung pan itna tawh kidim-in, Ama hoihna hangin, Paul a mai suah  in khuavak bangin taang hi. A nuntakna-ah bang bang piangin bawlsiatna, gimna thuak taleh, Paul in Pasian in hoih hi, ci-in pulaak  veve hi.

     Agrippa in ama nopsak nading bekin nungta hi; mi muangmawh tawntung hi; lungtangpha hi; ama hoihsak sim loh thudang kin nei lo hi.Ahi zongin Paul in upna tawh kidim mi hi; thuman adingin a nuntakna pia hi; thuman dikna thu hu-in dal hi. Hih mi nihte kibatlohna kitel mahmah hi. Paul in thusitna a thuakna-ah Agrippa tungah thugen a ngah nading kumpipa tung pan ngen masa hi.

     Sawl. 26:1–32 sim in. Bangci bangin Paul  in Agrippa tungah Khrih ading thugen hiam? A gen thute panin bang thu na mu thei hiam?

_________________________________________________________________________________________________________________________

    A lungkhauh mi kamneem in zo thei hi. Hih munah Paul in Agrippa tungah, “Jew mite ngeinate leh amaute kinialna thute thei mahmah na hih manin ka nuam phadiak hi,” ci-in limphat mahmah hi (Sawl. 26:3). Tua khit ciangin Paul in ama kikhelna thu-te pulaak hi.

     Paul a kikhelzia Sawltak 26:12–18 sung sim in.  Paul in ama kikhelzia Agrippa tungah a pulaak manin a piang thute Sawltak 26:26–28 sim in. Bang hangin Agrippa in tua bangin Paul dawngkik hi ding hiam? Bang thu hangin Paul teci panna in Agrippa lungsim sukha-sak hi ding hiam?

_____________________________________________________________________________________________________________________________

     Jesuh in Paul nunzia a khel thu Paul in kumpipa tungah a pulaak takteh, a pulaak thute in kumpipa tungah huzaap lianpi nei hi. A kikhel nunzia sangin a muibun zaw tecipanna dang om lo hi. A kikhel takpi nunna in lamdangtakin mi tungah huzaap lianpi nei hi. Hehpihna thu in a khel nunna in Pasian a bia lo kumpipa nangawn lok zo hi. Paul bangin gen ding thu i nei kei zongin, Jesuh a theihtelna nuntakna leh Ama sisan in a hong hotkhiatna thute mite tungah pulaak ding i nei hi.

FRIDAY              July 10

Ngaihsutbeh Ding: Ellen G. White, “  ‘Almost Thou 3 Persuadest Me,’ “pp. 433–438, in The Acts of the Apostles sim  in.

     Khristian nuntak a thu guipi pen in Jesuh tawh kizopna kip hi; tua kizopna in a bucing nunna hi; tua thu mite tungah a pulaak khia nuntakna hi.  Upna thu guipite a thupi mah bangin i nunzia in hehpihna in a hong khel kul a, itna in a bawl thak ding zong pel lo a phamawh thu ahi hi. Hih bangin Ellen G. White in hong hilhcian hi: “Leitung pilna, thu theihna in mihing lungsim, angsung khualna, leitung lungsim hong zo-sak thei lo ahihna Honpa in theitel hi. Honpa nungzui mi khempeuh in vantung hoihna tawh kidim ding kisam hi.  Jesuh in lampi, thuman leh nuntakna ahihna theitel-in, itna leh hehpihna tawh hotkhiatna thu gen in muibun hi,” The Acts of the Apostles, p. 31. Tua banah “Upna thu guipite in lungsim a khel zawhlohna munah a lamdang Khrih hong itna in amaute lungsim khel zo hi” Desire of Ages, 826.

     Mi kimkhat in Pasian Kammal sung a thuman amuhte uh midangte in zong um dingin hanciam uh hi. Tua bangin Pasian Kammal gensawn ding a thupi hi mah taleh Topa ading teci hoih hihna in tua-te sangin tangzai zaw hi. Jesuh in a khawnkhongin a hong piak tawntung nunna sungah i neih lametna, mawhmai-na, kisuanna bei-in lungdamna, hatna cihte in muibun zaw hi.

 

KIKUP DING DOTNATE

1. Bang hangin Khrih ading mimal phutkhak thute in huzaap lianpi nei hi ding hiam? Bangci bangin midangte nun zia, teci ahihna uh in nang a   hong huzaap hiam?

2. Wednesday ni-a dotna na lawmte tawh kikum in. Bang hangin nisim Topa tawh tonkhopna in Ama ading teci hihna banah mimal upna adingin thupi hiam?

3. A muibun Khrih ading teci hihna in thupi mah hi. Tua zah khat mahin bang hangin i nuntakna mahmah in teci ahi ding thupi hiam? 

4. Na tuah khak thute hawmsawn in. Khrih in nang ading a sepkhit thute leh tuni-in nang adingin bang khiatna nei cih thute pulaak in. Khrih in na nuntakna-ah bang hong kilamdangsak hiam?