LESSON 12 September 12–18
A MANPHA HOP SAWNHUAI THUPUAK
Sabbath Nitak
Tu Kaal Sung Sim Ding: 2 Pet. 1:12, 16–21; Mang. 19:11–18; 14:14–20; Thuhilhsia. 12:13, 14; Mang. 14:6–12.
KAMNGAH: Leitungah a teeng mite a kipan gam khempeuh, nam khempeuh, pau khempeuh, pawl khempeuhte kiangah tawntung Lungdamna Thu hilh dingin vantungmi a khat khat in vankim lai-ah a leeng ka mu hi. Tua vantungmi in Pasian kihta unla a vangliatna phat un. Bang hang hiam cihleh a thukhen ding hun a tungzo hi. Vantung, leitung, tuipi leh cikte a piangsakpa na bia un,” ci-in nakpi-in kiko-in a gen hi” (Mangmuhna 14:6, 7).
Khrih sihna in mi
khempeuh ading sihna hi. Koi mun koi muhah om mi hi taleh, bang hun bang hun a
nungta hi taleh leitungbup adingin Khrih hong si hi. Tua hi-in hotkhiatna thu in mi nam khempeuh,
pau nam khempeuh tungah hotkhiat thu a kigen ding ahi hi. Hotkhiatna in minam
khempeuh hong kituahsak hi. Jesuh nunna,
a sihna leh sihna pan a thawh kikna in hell vangliatna leh khuamial ukna nei
khempeuh tungah zawhna nei hi. Hotkhiatna thu in Jesuh mah hi. Jesuh in eite
adingin hong si hi. Tu-in eite adingin nungta hi. Mawhna sung pan hong honkhia
dingin hong pai khin a, mawhna vangliatna pan a hong honkhia dingin khat vei
hong pai kik ding hi. Jesuh in Ama ngah ding a kilawm khempeuh eite in i ngah
theih nadingin eima thuak ding a kilawm khempeuh Amah mah in a hong thuak hi.
Ama sungah diktansakna i ngah a, a hong siantho-sak khit ciangin ni khat niteh
Amah tawh a mangkhawm ding ihi hi.
Lai Siangtho in Jesuh hong pai masak leh a hong paikik ding limtakin hong hilh hi. Tankhia dingin khat vei hong pai khin a, ciangtan nei lo man tawh a hong leisa eite in amah tawh tungtawn inn-ah a nungta khawm dingin a hong pai kik ding hi. Mangmuhna Bu in Jesuh leitungah a hong pai kik ding mi khempeuh kigingkhol dingin hong hilh hi. Tuhun mite in hih thu a zak ding kisam hi. Mangmuhna Bu in kum zalom 21 sung a dingin kisam mahmah ahihna thu tu kaal sungin i kikum ding hi. Hun nunung a pawlpi adingin Jesuh thupuak i kantel pha ding hi.
SUNDAY September 13
TUHUN ADING PETER THUPUAK
Mawhna hong kipat a
kipan khang khat khit khang khat ah Pasian in kamsangte tungtawnin Ama
hotkhiatna thu pulaak hi. Pasian in pulaak kholh lo-in bangmah sem lo bawl lo
hi (Isa. 46: 9, 10). Pasian in a kamsangte tungtawnin a hong tung ding thukhenna
thute pulaak khol hi (Amos 3:7). Tuiciin a tunma-in Pasian in Noah tungtawnin
leitung mite tungah hilhkholhna thu pia hi. Kialpi a tunma-in kum sagih sung a
kigingkhol dingin Pasian in Egypt gamah
Joseph mapai kholsak hi. Jew kamsangte in Babylon galkapte in Jerusalem
a suksiat ding hilhkhol uh hi. Jesuh a hong pai nadingin Tuiphum John in mawh
kisikna thu hilhkhol hi.
2 Peter 1:12 sim in.
Pasian in Peter hunlai mite tungah ama
tungtawnin bang thu gen hiam?
_______________________________________________________________________________________________________________
2Peter 1:16–21 sim in.
Peter leh nungzuite pulaak “Tuhun thuman”in bang hong hilh hiam?
Mihingte a hong tatkhiat nadingin kum zalom khat hunlai-in Khrih in mihingin
hong nungta hi. Singlamteh tungah Khrih hong sihna Pa Pasian itna kilangsak hi.
Mawhna thaman in sihna hi taleh mi khempeuh in Khrih sungah tawntung nunna i
ngah thei hi. Tua hotkhiatna thu upna tawh ngah thei dingin deihtel theihna
hong kipia hi (Rom. 3: 23; 6: 23; Eph. 2:8). Khrih sungah hotkhiatna thu in a
tawntung adingin hong kipia ahi hi. Hun khat pan hun khat, khang khat khit
khang khat, a tawntung adingin tuhun thuman hi tawntung hi.
Lai Siangtho a nunung
pen Mangmuhna Bu sungah Jesuh in Ama hong hotkhiatna leh a hong pai kikma-in
mite in a kigingkhol dingin hiilhkhohna thugen hi. Mihing bulphuh pupa
ngei-nate leh angsung huaihamna tawh kidim biaknate kilangkhia-sak hi.
Mangmuhna buppi in Jesuh leh mite ading a sepkhiat thute hong hilh hi.
Jesuh in Pa Pasian zia
le tong limtakin pulaak hi. Amah in leitung kumpite tungah ukna nei hi. Amah in
eite a hong it pa, i mawhna khempeuh panin a hong siapsiang pa, a Pa leh Ama
Pasian adingin kumpi leh siampi-in a hong bawl hi (Mang. 1: 1-6). Mangmuhna Bu
in Jesuh thute leh hun nunung a Ama mite in a sawt lo-in a hong pai nadingin a
kigingkhol dingin thupuak ahi hi.
Mangmuhna Bu na
ngaihsut ciangin bang thu na ngaihsun hiam? Jesuh ngaihsun kha lo-in sapi
tuamtuamte leh limciinnate ultungsak zaw na hiam? Banghangin Jesuh in a piang
ding thute hong hilh khol hi ding hiam? Bangci bangin mihingte a hong itna
kilangh hiam?
MONDAY September
14
MANGMUHNA MITSUAN HUN NUNUNG THUTE
Lungdamna Thubu-te in
Khrih hong pai masakna thu hong hilh uh hi. A suahna, a nunzia leh a nasepte, a
sihna leh sihna pan a hinkikna thute pulaak hi. Lungdamna Thubu-te in Khrih
Nihvei-na a hong pai kik ding thu a pulaak uh hangin a ngimna bulpi uh in tua
thu hi lo hi. Mangmuhna Bu in ahihleh mawhna om a kipan siatna khempeuh a
beisiang ding hun sung thute pulaak hi. Genkholhna khempeuh mungtup in
vangliatna tawh Khrih a hong pai-na thu pulaak hi.
Mang. 1:7; 11:15; 14:14–20; 19:11–18 sim in. Bang thute pulaak
ciat uh hiam?
______________________________________________________________________________________________________________
Mangmuhna Bu a pat pan a tawp dong thute in Jesuh hong pai masakna
mungtup thute hong hilh uh hi. “A kithat Tuuno in kumpite Kumpi, topate Topa-in
hong pai kik ding hi (Mang. 5:12; 19:16). Ama mite a bawlsia, a nengcip galte
khempeuh beimang ding hi (Mang. 17:14). Mawhna, siatna sung panin vanglian inn
ah hong tunpih ding hi. Satan in Khrih a langdo hun a bei-na hi ding hi. Leitung in kibawl thak ding hi. Tatkhiat mi khempeuh
in Topa tawh nungta khawm tawntung hun hi ta ding hi (Mang. 21:1–4).
“Jesuh in kei ka hong pai
baih ta ding hi. Hih hilhkholhna sung a kigelh thute a zui mi in thupha ngah mi
ahi hi,” ci hi (Mang. 22:7, 12, 17, 20). Tua hi-in mi khempeuh in itna tawh
Jesuh kiang zuan a, Ama hehpih pom-in Ama thuman zui-in, a sawt lo-in a hong
pai kik ading kigingkhol ding hong deih hi. Mangmuhna Bu a tawpkhakna-ah Jesuh
hong sapna kimu hi.
“Kha Siangtho leh Monu
in “hong pai in,” ci-in hong sam hi. Tua
sapna aw a za mi in Topa tungah “hong pai ta in,” ci-in pulaak ding kisam hi
(Mang. 22: 17). Tawntung nunna a zong mi khempeuh in Topa va zuan dingin hong
sam hi. Hotkhiatna a sang mite in ama kiang zuan dingin hong sam-in, Ama hong
pai kik ding lamen a ngakin midangte zong Ama Topa zuan dingin a sam dingin
hong sawl hi. Leitung in a sawt lo-in a
hong pai ding Topa dawn dingin kiginkholhtheih nadingin eite in kuankhia-in Ama
thupuak tangko dingin Topa in hong sawl hi. Jesuh tawh nasemkhawm a nuamsa
sangin a lian zaw thupha om lo hi. Hun nunung-ah Jesuh tawh mapangkhawm-in
hotkhiatna thugenna sangin a lungkimhuai zaw nasep dang om lo hi.
Khrih in a sawt lo-in hong pai ding hiam? Jesuh in a sawt lo-in hong pai ding hi, ci-in John in a gen kum 2000 val khin hi. Ahi zongin misi-te omzia tawh kisai thu siksan hi lehang, misi in bangmah theihna nei nawn lo-in, mimal khat ciat in sihna tawh kinai tawntung-in nungta ihih mah bangin, Jesuh hong kum kik ding tawh a kinai tawntung ihi hi. Hih thu in a sawt lo-in Jesuh hong pai kik ding hi, cih theihtelna hong guan hiam?
TUESDAY September
15
HUN NUNUNG ADING MANGMUHNA THUPUAK
Mangmuhna 14 sungah
Mangmuhna Bu thupuak bulpi kipulaak hi.
Hih thupuak in hun beikuan-a a nungta mite adingin thupi mahmah hi. Tua
thupuak in hun nunung a mite adingin Pasian thupuak hi. Hih hun beikuan a thupuak in Pasian mite
ading leh minam khempeuh adingin a thupi thupuak hi.
Mang. 14:14–20 sim
in. Topa hong pai kikna bang tawh
kigenteh-in kipulaak hiam?
_______________________________________________________________________________________________________________
Lai Siangtho in Khrih hong pai kikna ding anlak tawh genteh hi(
Matt.13: 37 -43). Mang. 14 sungah anlak ding ankung in hotkhiat ngah mi siangthote
limcing hi. Lenggahkung min in migilote kisiatna limcing hi. Mang. 14:6–12 in
hun nunungah Pasian mite in a tawpkhakna anla dingin kigingkhol dingin hong
hilh hi.
Mang. 14:6, 7 sim in.
Bang thu laingek nih pulaak uh hiam? Koi bangin Seventh-day Adventist thu-um
mi, nang le kei in bangci mite hi, cih hong theitelsak hiam?
________________________________________________________________________________________________________________
A masa vantungmi thupuak in kum zalom 21 sung-a a nungta mite in
nuntakna mungtup thu bulpi a lungngai dingin hong sam hi. Tua thupuak in Pasian
hehpihna in mi khempeuh hong piak mawhmai-na thu hong hilh hi. Mawhna pan
suahtakna leh zawhna tha hong guan hi. Hih in mihing khempeuh tungah a hong kipia
manneihna hi; bang hang hiam cihleh Khrih in eite hong bawl-in mawhna sung pan
hong honkhia hi. Ni khat ni ciangin a nunung pen Pasian thukhenna hong tung
ding a thuman lohna khempeuh beimang ding hi, cih hong hilhkhol hi. Hih thu in
a lungdamhuai mahmah thu hi; bang hang
hiam cihleh siatna khempeuh in a sawt lo-in beimang ding hi.
“Seventh-day Adventist thu-um mite in leitung mite adingin khuavak leh khua-hun vil dingin a tuam diakin hong kikoih ihi hi. A kisia leitung adingin patau-koh hilhkholhna pia dingin masuan a hong ki-ap hi. Pasian Kammal in khuavak bangin amaute makaih hi. Amaute tungah zahtaak huai pen leh siangtho pen nasep kipia hi. Tua nasep in vantungmi khatna, nihna leh thumna thupuak genkhiat ding hi. Hih thupuak sangin a thupi zaw thupuak dang om lo hi. Hih thupuak simloh thudang khat mitsuan lo ding uh hi.” Ellen. G. White, Evangelism, pp. 119, 120. Koi bangin hih thupuak pawlpi hi taleh mimal in hi taleh a thupi bel-in koih ding hiam?
WEDNESDAY September
16
KICING ZAW-IN PASIAN THUPUAK THEIHCIANNA
Hun nunung adingin
Mangmuhna Bu thupuak in mihing khempeuh a hong tankia Jesuh hehpihna thu hi
(Mang. 14:6) Tua thupuak in i nuntakna khempeuhah Pasian kihtakna, zahtakna
tawh a nungta ding ihi hi. Tua in Pasian thukhenna siksanin a thupiakte
nuntakpih cihna hi (Mang. 14:7). “Pasian
kihta un” cih a khiatna in i ngaihsutzia tawh kisai hi. Pasian a lungkimsak
nunzia a nei ding, ngaihsutna khempeuhah Amah i masak ding hong kisawl hi. Pasian deihna bangin a nungta dingin a
thumang mi hong makaih hi (Pau. 3:7; Sawl. 9:31, 1 Pet. 2:17). Vantungmi khatna
thupuak in Pasian a minthangsak dingin hong sawl hi. Pasian zahtakna in i
nuntakna i sep i bawl khempeuh huam hi.
Thuhilhsia 12:13, 14;
1Kor. 6:19, 20 sim in. Koi bangin hih munte in Pasian kihta-in Ama minthangsak
ding cih thu hong theitelsak hiam?
_______________________________________________________________________________________________________________
Silesa deihna zui tuhun
mite in amau gamtatna tawh kituakin a gah at ding uh hi; i vawh bangbangin a at
kik ding ihi hi. I gamtatna bangin thu hong kikhen ding hi. Pasian zahtakna, a
thupiakte nuntakpihna leh Pasian thukhenna in a tonkhawm ahi hi; a tuamtuak hi
lo hi. A thupiakte i nuntakpihna in Jesuh
tawh kizopna gah ahi hi. Jesuh dikna bek
in Pasian thukhenna pan-in hong suakta-sakin Ama sungah bit takin i om thei
hi. Jesuh dikna bek mah in Ama min a
thangsak dingin hong nungta-sak hi.
Mang. 14:7; 4:11;
Pian. 2:1–3; Pai. 20:8–11 sim in. Pasian biakna mantakin bang thu siksan hiam?
Koi bangin Sabbath in biakna man hong hilh hiam?
_______________________________________________________________________________________________________________
Satan in Sababth langdo hi. Bang hang hiam cihleh biakpiakna ah
Sabbath in thu bul mahmah hi, cih Satan in thei hi. Khrih in Piangsak Pa hi,
cih Sababth in pulaak hi. Sababth in mi khempeuh in leitung leh vantung
Piangsak Pa bia ding hong sawl hi (Mang. 14:7).
Sabbath in nate in ama thu-in hong piangkhia tawm hi, nial hi. Sabbath
in eite hong piangsakin mihing manphatna hong pia Jesuh mah biak ding hong
theisak hi.
Pasian in eite hong
Piangsak Pa ahih manin Amah bek mah biaktaakcing ahihna hong hilh Sabbath
bangzahin thupi ahihna ngaihsun in. A tawpna-ah eite hong Piangsak Pa phawk
nadingin, i hun neih seh sagih-ah seh khat Topa biakpiakna-in nei ding thupiak
sangin a thupi zaw thupiak dang bang om hiam?
THURSDAY September
17
A NUNUNG PEN PASIAN HONG THUUMNA
Mang.14:8; 17:3–6; 18:1–4 sim in. Biakna tawh kipawl Babylon thu
bang hong hilh uh hiam?
____________________________________________________________________________________________________________
Mangmuhna Bu sungah “Babylon” in mihing gamtatna, pupa ngei-nate
bulphuh-in upna man lo, biakna man lote limcing hi. Tua bang biaknate in Jesuh
leh a siantho-na sangin mihing gamtat hoihna thupi-sak zaw hi. Pasian thupiakte
tungah mihing thupiakte dinmun sangsak zaw hi. Babylon in sing leh suang
biakna, ni biakna, pumpi a sih hangin a si lo kha om hi, cih upnate bulphuh hi.
Hih bang biakna man lote in tanglai Babylon biakna panin a simtham-in tuhun
biakna sungah hong lut hi. A kisia tuhun leitung adingin Pasian thupuak in
Jesuh leh Ama siantho-na hi. Tua thupuak in “A lian mahmah Babylon kisia hi.
Babylon panin hong paikhia un,” cih sapna in mun khempeuh kizel hi (Mang. 18:2,
4). Pasian in Khrih leh Ama siantho-na, a hong hilh thute a lamsang dingin
Seventh-day Adventist Pawlpi khangkhia-sak hi. Jesuh in “Lampi, Thuman leh
Nuntakna hi,” ci-in pulaak ding kisam hi (John 14: 6). Hih in Babylon khialhna kilanghkhia-sak a,
Jesuh thumanna pulaak hi.
Mang. 14:7, 9–11 sim in.
Biakna-ah a kibang lo mitsuan thu nih bang pulaak hiam?
________________________________________________________
________________________________________________________
Mangmuhna14 in a kibanglo biakna nih, Piangsak Pa biakna leh sapi biakna, pulaak hi. Hih biakna nihte in Pasian biak ni ding tawh kizopna nei uh hi. Piangsak Pa biakna in a man Sabbath siksan-in, sapi biakna in Sabbath aitangin a man lo Sabbath tungah kinga hi. Sabbath in eite hong Piangsak Pa, hong Honpa, hong kum ding Kumpi sungah tawldamna, khamuanna leh bitna limcing hi. A man lo Sabbath in mihing leh ama ngaihsutna, mihing bawltawm thupiak bulphuh hi.
Mang. 14:12 sim in. A
thu ma-a a kigente siksan-in bang thu hong hilh hiam? Koi bangin thukham leh
hehpihna in kipulaak hiam? Hotkhiatna-ah thukham leh hehpihna in a kikhenkhia
thei lo ahihna thu hong hilh hi lo hiam?
FRIDAY September 18
Ngaihsutbeh Ding: “Pasian in leitung khuavak
dingin tanglai Israel mite a sap mah bangin tu-in Ama pawlpi hong sam hi.
Vantungmi khatna, nihna leh thumna thupuak in Pasian mite leh leitung mite hong
kilamdangsak hi. Hih thupuak in leitung mite lak pan hong samkhia-in Amah tawh
a nungta khawm dingin hong sam hi. Topa thupiakte tangko ding leh tuhun ading
genkholhna thupuakte a hilhsawn dingin a hong sam hi. Tanglai Israel mite a
sawl bangin tu-in zong a hong sawl hi. Vantungmi thumte in Pasian thupuak
khuavak a sang mite in leitung sak leh khang, mun tuamtuamah hilhkholhna
thupuak a gen mite limcing uh hi. Khrih in a nungzuite tungah hih bangin hong
vaikhak hi: “Note in leitung adingin khuavak na hi uh hi” (Matthew 5:14).Jesuh
a sang mi khempeuh tungah Calvary singlamteh in hih bangin gen hi: “ Mihing
khat a manphatna ngaihsun un. Mun khempeuhah pai unla mi khempeuh tungah
hotkhiatna thu hilh un” (Mark 16: 15). Hih nasep a zekai sak ding bangmah phal
kei un. Hotkhiatna thu hilh in a thupi penpen nasep hi. Tawntung a kimang ding
thu hi. Jesuh in a mangthang mite hong it-in a hong tatkhiat nadingin Ama nunna
a hong piakna thu in Ama nungzui khempeuh tha hong guan hi.”
“Khrih tungah a ki-ap mi
khempeuh Amah in lungdam takin hong sang hi. Leitung in a lamdang Pasian
mihing-in a hong pianna, itna thu a theih nadingin Khrih in mihing-in hong
piang hi. Tua itna in leitung mun khempeuh a zelh nadingin vantung itna pulaak
in. Gen in. La-in sa in.” Ellen G.
White, 10 Counsels for the Church, pp. 58, 59.
KIKUP DING DOTNATE
