LESSON 11 SEPTEMBER 5–11 JESUH THU MI TUNGAH HAWMSAWN

LESSON 11 SEPTEMBER 5–11

JESUH THU MI TUNGAH HAWMSAWN

 

SABBATH NITAK

Tu Kaal Sung Sim Ding: Eph. 2:1–10; 1 John 4:7–11;Mark 9 5:1–20; Heb. 10:19–22; Gal. 2:20; 1Kor. 1:30.

 

KAMNGAH: Pasian Tapa a um mite in nuntak tawntungna a nei a hih lamtak uh na theih nadingun hih lai a hong gelh ka hi hi.”1John 5: 13.

      I gensa bangin a kikhel nunna sangin a muibun zaw thugenna om lo hi. Mi tampi in na up thu tuamtuamte nial kha ding uh hi. Lai Siangtho tawh kisai na pomzia hong nial kha ding uh hi. Ahi zongin Jesuh na kithuahna,nang ading a hong sepsak thute Amah tawh na nuntakkhopna thute na pulaak ciangin a nial kuamah om khol lo ding hi. Teci pang i cih  ciangin Jesuh thu hawmsawn cihna hi. Teci pang i cih in Jesuh in nang adingin kua hi-a, Ama sep thute pulaak cihna hi. Nangma up thute in thuman hi-in midangte up thute in thuman lo hi, ci-in ngaihsutna tawh mi tungah thu na genleh langpanna na thuak hamtang ding hi. Jesuh hong hehpihna in na nunzia hong khel-in, na sung a om nangma nuntakpih Ama hong itna, Ama thumante mite in a muh uh ciangin na gen na pulaak thute, um mawk hi lo-in i nuntakpih thute i gensawn ciangin i teci in muibun hi. I zuih thuman in i nunzia a hong khel man in i pulaak thute in midangte adingin kilamdanna piangsak hi. 

     Khrih siksan-in thu-upna, Ama nunzia kilangsak thuhilhna bulpi-in nei-in Lai Siangtho I pulaak ciangin mite in i gen thute hong sang thei ding uh hi.

 

SUNDAY       September 6

JESUH: EITE TECI PANNA SIKSAN

 

     Khristian thu-um mi khat ciatin Jesuh in i nunna a hong khelzia, ei ading a sepna khempeuh pulaak ding i nei ciat hi.

Ephesians 2:1–10 sim in. Khrih i theihma i nunzia bang pulaak hiam? Khrih i san i pom a kipan i nunzia bang pulaak hiam?

     A. Khrih i theihma nunzia (Eph. 2:1–3).

________________________________________________________

     B. Khrih i theih khit nunzia (Eph. 2:4–10).

_______________________________________________________

 

     Khrih i theihma leh Khrih i theih khit bangzahin kilamdang hiam? Eite in Khrih i theihma-in mawhna leh siatna sungah a nungta mi, silesa deihna zui-in, pumpi deihna bangin a nungta mi, Pasian hehna nuai-a a nungta mi i hi hi. A tom-in gen lehang, Khrih nei lo mi in lametna nei lo, ngimna nei lo a mangthang ding mi hi. Nuamsa ding tawh i kibat hangin lungnopna taktak tawh a kigamla i hi hi. Tu-in Khrih sungah i nungta hi. Khrih kiang I va zuat ciangin na khempeuh hong kilamdang hi; Khrih sungah nunna taktak a nei i hi hi.

     Eite tungah Topa hong hehpihna, hong itna lian ahih manin a khawngkhong-in a hong honkhia hi. Vantung vangliatna sungah Amah tawh nungta khawm dingin eite hong domto hi. Khrih sungah a kiciangtan thei lo Ama hong hehpihna lian eite tungah a hong lak hi. Khrih sungah nuntakna in a kibawl thak hi-in kalsuanna thak tawh a nungta ihi hi. John gen bangin “Amah in nunna hi-in tua nunna in mite adingin khuavak hi (John 1:4).

     Ephesians 2:10 sim in. Khristian kalsuanna-ah gamtat hoih in dinmun bulpi bang nei hiam? Koi bangin thukham lo-in upna tawh hotkhiatna kingah hi, cih thu na theitel hiam? Rom. 3:28?

______________________________________________________________________________________________________________________________

     Koi bangin Khrih in na nunzia hong khel hiam? Nangma kikhelna thu in midangte kikhel nadingin na huh thei ding hiam

 

MONDAY       September 7

KIKHELNA PIANGSAK MIMAL NUNZIA

 

     Zebedee tate John leh James in “Vanging Tapate” ci-in min kiphuah uh hi (Mark 3:17). Jesuh mahmah in a minvawh ahi hi.  Jesuh leh a nungzuite in Samaria gam nawkin a khualzinna uhah John lungsim puak siksanin tua bangin min kiphuah ahi hi. Samaria mite in nungzuite zintun ding phal lo-in, langpanna a thuah uhteh John in heh lua mahmah ahih manin, Elijah hunlai bangin van pan-in mei kia sukin tua khua mite kaangtum mangkhin dingin Jesuh tungah ngen uh hi” (Luke 9:54). Jesuh in tua bang lungsim puak a nei a nungzuite thuhilh hi. Tua mun panin daitakin kikhemkhia uh hi. Jesuh in ngongtat ngei lo hi; itna tawh kidim tawntung hi.

     John in Jesuh tawh a kikholhkhopna tungtawnin, Jesuh itna in a lungtom itna nei lo, John in kikhel-in itna, hehpih theihna tawh kidim hi. John laikhak sungah itna cih kammal sawmli vei val kigelh hi. Itna tawh kisai kammal sawm nga val bang kigelh hi.

     1John 1:1–4; 3:1; 4:7–11; 5:1–5 sim in. John in Jesuh tawh a nuntakkhopna hangin ama kikhelzia bang pulaak hiam?

______________________________________________________________

_______________________________________________________________

     Ellen G. White in a kikhel ngei lo thu guipi khat pulaak hi: “Thatang zangin kisawlzawh thu na in vantung ki-ukna tawh kituak lo hi. Pasian in itna tawh thuzuihna bek deih hi. Itna in kisawl zawh thu hi lo hi. Thatang, zawhthawhna tawh itna kingah thei lo hi. Itna bek mah in itna ngah kik hi.” The Desire of Ages, p. 22. 21.

     Khrih tungah i ki-ap ciangin Ama hong itna in eite tungtawnin midangte in mu khia thei ding hi. A muibun penpen Khristian thu upna in a kikhel nuntak gamtatna hi. Tua bang i gen ciangin khialhna nei nawn lo mi i hi kei hi. Khat veivei ciangin i gamtat in itna leh hehpihna kilangh sak lo kha zel hi. Ahi zongin Khrih hong itna in eite sung pan hong phul khia ding hi a, i nuntakna in mite adingin thupha hi ding hi.

 

     Bangci bangin midangte tungah Khrih hong itna na kilangsak hiam? Tua in bang pulaak hiam?

 

TUESDAY        September 8

JESUH THU PULAAK

     Jesuh in a sawlkhiat masak pen in kua-te hiam? A kisawlkhia mi masate in nungzui sawmlenihte hi lo hi. Jesuh a zui tawntung mite hi lo uh hi. A kisawlkhia masa penpente in damna ngah dawilut mi nihte hi. Hih mi nihte in amau teenna khuanawl gamlak pan-in tua khua kimlepaamte-ah pai dingin sawlna ngah uh hi. Kha gilo vangliatna hangin tua mite in ngongtatna tawh kidimin suanghiamte tawh ama pumpi kiliamsak uh hi. Kha gilote in amau thuak gimnate hangin awging ngaih mahmah tawh kiko uh hi (Matt. 8:28, 29; Mark 5:1–5). Ahi zongin amaute in Jesuh amuh uh ciangin a nunzia khempeuh uh kihel hi; a nunzia uh a ngei bang nawn lo hi. Jesuh in amaute sung panin kha gilote paikhia dingin a thupiakna zui-in tua kha gilote in vokte sungah lut uh a, kendang zui-in tui sung kidenna uh hi (Matt. 8:32–34; Mark 5:13, 14).

     Matthew 8:28–34 sim in. Tua mite tungah bang thupiang hiam? Tua khua mite in damna ngah mi nihte amuh uh ciangin bang thu piang mu uh hiam?

_______________________________________________________________

_______________________________________________________________

    

Dawi lut mi nihte in Khrih vangliatna hangin a nunzia khempeuh uh kikhel hi. Tua thupiang en dingin a pai tua khua mite in, damna ngah dawi vei mi nihte in Jesuh khe phungah tu-in Topa pulaak thute ngai-a  om va mu uh hi. Matthhew in dawilut mi nihte damna pulaak hi. Mark in ahihleh nih ah khat in damna ngah gen hi. Lai Siangtho hong hilh thu guipi in Jesuh in pumpi, lungsim, ngaihsutna leh thu upna damsak hi.

     Mark 5:18–20 sim in. A kikhel dawilut mi nihtein Jesuh tawh kikhawlkhawm nuam uh hi. Ahi zongin Jesuh in bang dingin amaute sawlkhia hi ding hiam?

______________________________________________________________

_______________________________________________________________

    

“Amaute in Khrih thuhilh tawmvei sung bek ngai-man uh hi. Jesuh in thuhilhna saupi gen man lo hi. Nungzuite a kihilh bangin amaute nasepzia ding kihilh kha man lo hi. Ahih hangin amau tuah thute in Jesuh in Messiah hi, cih pulaak hi. A theih uh thute bek mah gen uh hi. Amaute in Jesuh vangliatna mu-in, za-in tuakkha uh hi. Amaute in amuh, a zak, a tuahkhak uh Jesuh vangliatnate gen uh hi. Khrih hehpihna hangin kikhelna a nei mi khat ciat in zong tua bangin Jesuh vangliatna a pulaak ding nei ciat uh hi.” Ellen G. White, The Desire of Ages, p. 340.  Tua mi nihte pulaak thute in Decapolis – Galilee Tuipi gei khua sawm khua mite tungah Jesuh thuhilh a sang thei dingin lampi honsak hi. Mimal teci hihna in vanglian mahmah hi, cih kilangh hi.

 

WEDNESDAY September 9

KHAMUANNA TAWH PULAAK

 

      1John 5:11–13; Hebrews 10:19–22; 1Kor. 15:1, 2 sim in. Koi bangin Lai Siangtho in tawntung khamuanna hong hilh-in, Khrih sungah  lungmuanna takpi nei ihihna hong hilh hiam?

_______________________________________________________________

______________________________________________________________   

Jesuh sungah hotkhiatna hangin lungmuanna nei lo hi lehang midangte tungah hotkhiatna thu hilh ding a piang thei lo thu hi. I nuntakpih loh thu khat mitungah i hawmsawn thei kei hi. Khristian tampi in hotkhiatna ngah leh ngah lo kitelcianna nei lo-in lunghiang-in nungta uh hi. Thuhilhsia khat in hih bangin thuhilh hi: “Ka nunzia ka ngaihsut ciangin hotkhiatna ngah dingin lametna ka nei kei hi. Jesuh ka et ciangin manthan nading lampi ka mu kei hi. Topa kammal in khang khat khit khang khat dongin thuman-in khial ngei lo hi. “ No, leimi khempeuhte aw kei hong zong unla, hotkhiatna ngah ta un. Keimah in Topa Pasian ka hi hi; Kei simloh kuamah om lo hi” (Isa. 45:22).

      I Topa Pasian in a khawnkhong-in a piak hotkhiatna sungah mimal khat ciat a lungdam thei dingin hong deih hi. A hong hehpihna hangin dikna sungah a nungta ding leh mawhna suksiatna tawh kipelh dingin hong deih hi. Paul gen mah bangin, “Tua hi-in upna tawh diktansakna ngah khin ihih manin i Topa Jesuh Khrih hangin Pasian tawh a kilem i hi hi”(Romas 5:1). Tua banah Khrih sungah a nungta mi in mawhna ukna nuai-ah nungta nawn lo hi (Rom. 8:1, 12).  Sawltak John in zong hih bangin genkik hi: “Tapa a nei mi in nunna a nei hi; Tapa a nei lo mi in nunna a nei kei hi” (1 John 5:12).

      Upna tawh Jesuh i pom tak ciangin Jesuh in Kha Siangtho tungtawnin i sungah hong teeng hi; tuni-in tua hong piakkhong tawntung nunna nangma neih hi. Tua bangin i gen ciangin Khrih i san khit a, Ama sungah hotkhiatna leh hehpihna i ngah nakleh cikmah hun-in mangthang thei nawn lo hi,cihna hi lo hi (2 Pet. 2:18–22, Heb. 3:6,Mang.. 3:5). Ama kiang pan-in a paikhia dingin deihtelna i nei thei hi. Ahi zongin Khrih hong hehpihna thei-a Ama hong tatkhiatna thu na sungah a hong lut khin ahihleh, ciangtan om lo itna tawh eite a hong it MIPA bekmah belh tawntung ding kisam hi. Jesuh sungah i ngah hehpihna thupha midangte tungah nisim-in a pulaak ding ihi hi.

      Jesuh sungah hotkhiatna hangin lungmuanna na nei hiam? Na lungmuanna in bang tungah kinga hiam? Bang hangin lungmuanna nei na hiam? Koi-ah na lungmuanna kimu thei hiam? Lungmuanna na neih keileh bang hang hi ding hiam? Koi bangin lungmuang ding na hiam?

  

THURSDAY   September 10                                                                              

A PULAAK HUAI THU MANPHA

“Tua ahih manin tuhuna ka nuntakna zia pen kei hang hi nawn lo-in ka sungah a hong om Khrih hang ahi hi. Tua hi a, keimah hong itin, keima adingin a nuntakna a hong pia Pasian Tapa ka muanna tawh tu laitakin a nungta ka hi hi” (Gal. 2:20).

     Khrih i san ciangin eima deihna i nial hi. Jesuh in i kipiak dingin a hong nget om hi. Amah i zuihna-ah kipiak ding a hong ngette  in a hamsa lua hi lo hi. “ Mi khat peuh in ka nung a hong zuih nopleh amah leh amah kinial henla, nisim-in a singlamteh pua-in ka nung hong zui hen,” ci hi ( Luke 9:23). Singlamteh tungah sihna in hamsiatna khat hi. Khrih hong nget bangin i zuih tak ciangin “mihing lui mawhna’ a si hi-in, eima deihna nial a zongsatna hoih lo khat nusia cih pen a baih het lo khat hi (Rom. 6:6). Ahi zongin tua bangin silesa deihna a sih takteh i ngah ding nopna in manpha zaw hi.

     Jesuh adingin i kipiakkhiatnate sangin Khrih in ei adingin a hong sep thute in midangte tungah huzaap lianpi nei zaw hi. Eima kipiakna hi lo-in Ama hong kipiakna bulphuh ding hi zaw hi. Khrih in eite nopsak ding a hoih pen nusia dingin a hong sawl ngei kei hi. Tua himah taleh Khrstian tangthu sungah Khrih adingin mi tampi in a nuntakna pia uh hi. Tua mite in hotkhiat ngah nading, Pasian maipha ngah nadingin tua bangin genthei takin a kipia khia uh hi lo hi. Tua bangin a kipiakna uh a hang in Khrih in amaute adingin a kipiakna leh Pasian sapna-na  a zuih uh hang hi zaw hi.

John 1:12; 10:10; 14:27; 1Kor.1:30 sim in. Eite teci in Khrih sepna khempeuh siksan hi. Khrih hong hehpihna hangin a hong piakkhong thupha-te pulaak in.

______________________________________________________________________________________________________________________   

Khrih in nang adingin a sepkhiat Lai Siangtho hong hilh ngaihsun in.  Khristian thuzui mi gina, a kipia mah mah thu-um mi khat na hi kha ding hi. Jesuh in na tungah hoihna, a hong piak lungnopna, lungdaihna, nuntak manneihnate ngaihsun in.  Hamsat dongtuah hun ciangin thuakzawhna a hong piak ngaihsun in.

     Khrih adingin bangbang kipiakna nei dingin a hong kisawl ngei hiam? Koi bangin na tuah thute in midangte ading thupha hi thei hiam?

FRIDAY     September 11

Ngaihsutbeh Ding: Mark 5:25–34 sim in.

     “Jesuh gei-a mihonpite in Ama vangliatna ngah thei ding ngaihsun kha lo uh hi. Ahi zongin natna hangin gim thuak tua numei in upna tawh Jesuh a valawn ciangin damna ngah hi. Ama natna panin Jesuh vangliatna in honkhia hi. Thuzuihna-ah zong a min pua, deihna takpi nei lo, a nungta upna lo-in thungetna leh thuzuihna in mannei lo hi. Jesuh in leitung Honpa hi, ci-in a thu bekin theihna leh min pua bekin Khrih thu upna in Ama sungah damna taktak ngahna hi lo hi.  Upna tawh hotkhiat ngahna in a thu bekin theihna hi lo hi. A thu-in theihna, Khrih thu ka um hi, cih in kicing lo hi. Jesuh in keima Honpa hi, cih upna nei-in Amah i pom ciangin Ama dikna hong pia hi. Leitung in Khrih a theihtel nadingin vantung in a geel lampi in Topa tungah mihing cihtakna hi. Pasian in a kamsangte tungtawnin a hong lahkhiat hehpihna thu-te i pulaak ding kisam hi.  Ahi zongin mimal mahmah-in i phutkhak Ama hehpihna i pulaak in a muibun penpen teci hi.  I tuahkhak Topa vangliatnate in Pasian adingin teci i hihna hi. Mimal khat ciat in kilamdanna kinei ciat hi. I tuahkhak,  phutkhak kibang lo hi. Pasian in tua bangin kibatlohna mah tawh Ama min a phat dingin a hong deih ahi hi. Vanglian Ama hong hehpihna hangin Topa minphatna in Khrih a suun nunzia tawh a tonkhop ciangin, tua in kuama nial zawh thuman teci hi.” Ellen G. 10 White, The Desire of Ages, p. 347. 

KIKUP DING DOTNATE

1. A muibun thuman pulaakna bang kihel hiam? Agrippa mai-ah Paul teci      panna Sawl. 26:1–23, sim in. Bang siksanin thuman pulaak hiam?

2. Banghangin Khrih in a hongsepsak thute mimal in a tuahkhak in muibun hiam? Ahi zongin tua bang tuahkhak nei lo hi lecin bangci bangin na         kalsuan ding hiam? Nangma tuahkhak thute tungtawnin midang khat in Jesuh nungzuihna-in a nei thei hi ding hiam?

3. Thu-um lo mite tungah na upna thu na pulaak ciangin bang thute pelh ding kisam hiam?

4. Khrih sungah lungmuanna thu ngaihsun kik in.  Bang hangin lungmuanna in Khristian thu zuihna-ah thupi hiam? Koi bangin hotkhiat lungmuanna      na nei hiam? Lamkhat panin koi bangin a tungtham bek-in thu zui mi na hih lohlam kitel ding na hiam?