Naupang
bangin Bokbak
GUINEA
| August 29
Oumou
Toure, 55
Oumou Toure in a pasal sih khit a ci na pha mahmah hi. A khuk bawk gawp-in na sa mahmah hi. Ihmu thei lo hi. Lampai thei lo hi. Kum tam khin ahih manin a inn sung tengah naupang bangin bokbak-in pai hi.
A pa neu khat in zato tuamtuamah paipih
kawikawi-in noptuamna ngah thei lo hi. A pa neu, a sanggam numei khat leh a
sanggam midang 12 tawh omkhawm uh hi. Kum 4 sung awntung tua bangin om hi.
Ni khat a sanggamnu in leengla khat tawh
kiho za hi. Tua leengla in Lai Siantho sim-in thungetna nei hi. Oumou in Khristian hi lo hi. Ahi zongin a
natna hangin thu kinget leh deih hi. Hamsapi-in bokbak-in tua leengla tawh kimu
dingin hanciam hi. Leengla kiangah va tungin, kei ading zong thu hong ngetsak
in, ci-in ngen hi. Tranqulle Fassinadouno in tua bangin thungetsak ding a zak
ciangin lamdangsa hi. Thungetsak lo hi. Ni 3 khit ciangin hong pai kik-in “ Pi
aw, thu hong ngetsak ning, ci-in gen hi. Oumou in lungdam mahmah hi. Tranqulle in
Lai Siangtho 1 John 4:4 sim hi: “Note in Pasian tate na hi uh hi. A gualzo mite
na hi uh hi. Bang hang hiam cihleh note sung-a a om Mipa in leitung mite sangin
lian zaw hi” a sim khit ciangin thungen hi.
“ Topa aw, na tanu nuntakna hangin lungdam
kong ko uh hi. Amah tawh kimu khawm dingin nong ompi manin ka lungdam hi. A
beisa ni 3 sung ama adingin antang-in thungen dingin nong ompihna hangin ka lungdam hi.Tu-in damna hong guan in.
Jesuh min tawh damna ngah ta in, ci-in
thungen hi.
Kum tampi sung limtak ihmu thei lo hi
taleh tua zan a kipan nuamtakin ihmu thei hi. A natna bawk hong kiam hi. A
zingsang ciangin Tranqulle hong vak kik-in thungen khawm uh hi. Oumou adingin kaal nih sung antangin thungen
uh hi. Ni khat Oumou in nang bang pawlpi ah om na hiam ci-in dong hi. Seventh-day
Adventist pawlpi mi ahihna thu gen hi. Tua mun panin SDA biakinn gamla lo hi.
Lampi thei lo ahih manin Sabbath ni kikhop ding ciangin Tranqulle in a cycle
tawh va dawn thei zel hi. Ni khat khit ni khat Oumou noptuam hi. Kha khat a cin
ciangin Oumou in lampai thei kik hi. Hih in a lamdangpi khat hi, ci-in pulaak
thei uh hi. A innkuanpihte a kipan a sanggamte lungdam mahmah uh hi. Ahi zongin
biakinn ah kikhawm ding ut lo uh hi. Oumou in pupa biakna simmawh hi, ci-in
ngaihsun uh hi. Oumou in Lai Siangtho khat leh a pu a pa-te zat lai siangtho
lak-in koi zaw zui ding na hi uh hiam, ci-in dong hi. A sanggamte in Oumou
tungah i biakna nusia-in Khristian upna na zuih leh inn pan na pai khiat kul
ding hi, ci uh hi.
Oumou in kum 4 sung tawntung a gimna, a
natna ngaihsun-in, tu-in damna a ngahna hangin
“ Khristian upna mah zui zaw ning, ci-in khentat hi.
A
paneu Amara in Oumou tungah heh mahmah hi. Khristian upna zui-in ,tu-in ko
tungah thu hilh hong kipan na hiam,
ci-in dong hi. Oumou khitui luang hi. Lai ka sim theih lohlam na thei hi, ci-in
dawng kik hi. Sangkah ngei lo, ahi zongin Pasian thu um mi khat in ka dam nadingin
thu hong ngetsak a, Pasian in hong damsak hi bek hi, ci-in dawng kik hi. Lai
Siangtho in nang le kei sangin vanglian zaw hi. A pa neu Amara heh lua mahmah
ahih manin Oumou vante hemkhia un, ci-in a innkuante sawl hi. Khristian innkuan
tawh omkhawm in, ci uh hi.
Oumou in om nading nei lo hi. A lawmte
khat khit khat innah giak kawikawi hi. Nuntak hamsa mahmah hi taleh Jesuh a
upna a nusia ding ngaihsun lo hi. Pawlpi mite in hehpih ahih manun tu-in
biakinn huang sungah omsak uh hi. Oumou in innkuan thak khat nei ahih manin
pawlpi mite tungah lungdam mahmah hi.
Tu quarter Sabbath 13na sumpi in Guinea gam a Kobaya Academy ah kipuak ding hi. Hih sangah Khristian hi lo naupang tampi in thuman thutak sin uh hi. MUC in Sawbua sanginn adingin kipuak ding hi.
