LESSON 2 | APRIL 4-10 LAI SIANGTHO KIPATNA LEH A PIANZIA

LESSON 2  APRIL 4-10       

LAI SIANGTHO KIPATNA LEH A PIANZIA

SABBATH NITAK

TU KAAL SUNG SIM DING:  2Pet. 1:19- 21; 2Tim. 3: 16, 17; Thkna. 18:18; Pai. 17:14; Jn. 1:14; Heb. 11: 3, 6.

KAMNGAH: “Note kiangah Pasian’thu ka hong gen uh ciangin no thu um mite sungah ama thu tawh kisai-in Pasian in na a hong sem ahih manin kote’ thugente pen Pasian’ thu taktak ahih mah bangin kote’thugenna na zak uh ciangin mihing’ thu bangin ngaihsun lo-in Pasian’thu taktak mah bangin hong sang na hih manun, hih thu hangin zong Pasian tungah ka lungdamna uh ka ko uh hi.’ 1Thess. 2: 13.

           Lai Siangtho kipatna leh a hong pian zia muhdan-te in mimal nuntakna hi taleh pawlpi kalsuanna ah huzaap lianpi nei hi. Pasian a hong kilahkhiatna zia, Kha Siangtho humop tawh kisai muh zia, pomdan cihte in Lai Siangtho i khiat zia tungah huzaap hi. Lai Siangtho in a hong hilh bang lianlian-in theihtelna i deihtakpi leh Lai Siangtho’ thuzuan zia a bulpite, zuih ding leh pelh ding thute siksan a Lai Siangtho sim ding kisam hi.  Nambat tawh kisai (mathematic) thute i sin ciangin nuntakna nei (biology), mihing nuntak khuasak zia (sociology) cihte thusin bangin kisin kikantel thei lo hi. Nate thusinna (physics) ah kizang thukhunte tawh leitung tangthu (history) kisin lo hi. Amau namciat in zuih ding thu nei ciat uh hi. Tua bang mahin vantung thu upna thute i kantelna-ah zong, ‘Pasian om lo hi,’ a ci mite’ ngaihsutna a zui hi lehang Siangtho thuman i thei ngei kei ding hi. Tua ahih manin Lai Siangtho a khiatna i gen ciangin Lai Siangtho bulpi, a hong kipatna in Pasian hi-in, Ama pulaak khiat thute, Lai Siangtho gelhte in a khialh khak loh nadingun Kha Siangtho in amaute makaih hi, cih siksan ding kisam hi. Lai Siangtho i tel nadingin leitung nate kantel zia leh muanmawhna lungsim tawh hi lo zaw-in upna siksan-a a thute kantel ding kisam hi. Lai Siangtho kipatna leh a hong pianzia cihte in Lai Siangtho a khiatna genna leh theihtelna hong huzaap hi, cih thute i kaal sungin i kikum ding hi.

SUNDAY       April 5

Pasian Hong Lahkhiat Lai Siangtho

          2Pet.1:19-21 sim in. Koi bangin Peter in Lai Siangtho bulpi a hong kipatkhiat zia a upna pulaak hiam?

________________________________________________________________

________________________________________________________________

          Lai Siangtho in laibu mawkmawk khat bang hi lo hi.Sawltak Peter pulaak bangin kamsangte Pasian tung pan a ngah uh thute, Kha Siangtho makaihna tawh a hong gelhkhiat uh ahi hi. Amau sung panin a hong piang khia thu hi lo hi. ‘Mihingte’n pil takin a phuahtawm tuanthute siksan hi lo-in” (2Pet. 1:16), kamsangte gelhkhiat thute in Pasian tung pan hong pai ahih manin thuman-in, muanhuai hi. “Mihing deihna pan hi lo-in Kha Siangtho makaihna tawh a gen uh hi (2Pet. 1:21). Pasian in a teltuam mi kimkhatte tungah Amah leh Amah kilaak-in Ama deihna a kitheitel nadingin Amah mah in na hong sem hi.

          Pasian in Ama awging tawh mi pawl khat hopih hi. Tua thu hangin Lai Siangtho in laibu khat tawh kibang lo hi; Pasian thuneihna nei hi. Tua hi-in a khiatna i pulaak ciangin zong Pasian makaihna kisam hi. Lai Siangtho gelh taktak in Pasian ahih manin a sung a laibute pen a siangtho Laibu kici hi (Rom. 1:2; 2Tim. 3:15).

          Lai Siangtho sung thute in nuntakpih ding hi.Tua thute in ‘thuhilhna, mawhna theihsakna, a khial mi thuman hilhna, thuman thutak hilhna hi-in, Pasian mite in na hoih khempeuh tawh a kidim zawh nadingun a hong kipia ahi hi” (2Tim. 3: 16, 17).     Pasian in a hong hilh THU i nuntakpih nadingin eite in Kha Siangtho huhna i kitangsam hi. Sawltak Peter gen bangin Pasian’Kammal a khiatna pulaakna-ah mihing deihna, ama hoihsak siksan ding hi lo hi.  Pasian hong hilh THU i tel nadingin Ama Kammal mah i kisam a, Kha Siangtho in Topa kammal a khiatna theihtelna hong guan ding hi.

          Pasian in Ama kamsangte hilhkhol lo-in bang mah sem lo hi (Amos 3:7). Lai Siangtho kammal in ‘Pasian lahkhiatna’ (revelation) cih kammal in khiatna tampi om hi. A kisincip khat kihong khia, a kimu lo khat kimu khia thei, cih khiatna nei hi. Tua ahih manin a kithei lo thu khat kithei khia, kilang khia cihna hi. Mihing in tua bangin Pasian lahkhiatna, pulaakna kisam hi. Bang hang hiam cihleh mihing in mimawh hi; mawhna in Pasian kiang pan hong khenkhia hi. Tua hi-in Ama thu i theih nadingin Amah mah i kimakaihsak kul hi.

          Lai Siangtho in Pasian kiang pan hong pai hi, cih kithei napi-in Lai Siangtho in a hong hilh thute nuntakpih zuih ding hamsa kisa hi.  Lai Siangtho kipatna muanlahna nei-in,  a um lo hi lehang  bang piang ding hiam?

MONDAY     APRIL 6

HUMOP NASEP ZIA

          Pasian in mihingte tungah a hong kilaak nadingin kammal hong zang hi.  Tua hi-in Pasian a hong kilaakkhiatna mihing in a ciapteh theih hong suak hi. I pulaaksa om bangin Lai Siangtho in Kha Siangtho in mihingte tungtawnin Pasian thuman a hong gelhkhiat thute hi. Tua ahih manin Piancilna pan Mangmuhna dong, a vekin kithu hual, pum khat hi, cih i thei hi. Pian. 3: 14, 15 leh Mang. 12:17 enkak in.

          2Pet. 1: 21;2Tim. 3:16; Thkna. 18:18 sim in.  Lai Siangtho in Kha Siangtho humopna tawh kigelh ahihna thu bang hong hilh uh hiam?

______________________________________________________________________________________________________________________

          Lai Siangtho sung a thute kimkhat in (Hebrew pawi tuamtuamte) tuhun adingin kisam nawn lo pawl khat om taleh, Lai Siangtho i sim ciangin i tha ngahna mun khat le mun khat a kibat loh hangin, Lai Siangtho sunga kigelh thu khempeuh in Kha Siangtho humopna tawh a kigelh ahi hi. I telzawh loh thute, tuhun adingin a kisam nawn lo-te zong Kha Siangtho’ humop hi. Lai Siangtho sung-a a kigelh khempeuh in vantung pan-a hong pai hi lo hi. Khat veivei ciangin Pasian in a hong hilh nop thu a hong gen nadingin, Lai Siangtho gelhte in mite’ gelhsa thu, a om khin thu limtak entel-in a zat kik ding uh Pasian in phal hi (Joshua 10:13; Lk. 1: 1-3).

          Tua bang hi taleh Lai Siangtho in Kha Siangtho’ humop ahi hi (2Tim. 3:16). Hih thu hang mahin Paul in Lai Siangtho sunga kigelh khempeuh in eite thu hong hilh-in, lametna i neih nading ahi hi, ci hi (Rom. 15: 4).

          Kamsangte, sawltakte in Lai Siangtho hong gelhkhia (writers) uh hi mah taleh a gelh taktak (author) in Pasian hi. Kamsangte, sawltakte in khat le khat a ngaihsutna uh kibang lo ahih manin amau laigelh zia-te uh zong kibang lo hi. Amaute hong gelhkhiat khempeuh in humopna tungtawnin Pasian’piak thuman hong gelh uh hi (2Tim. 3: 16). Mihingte kampau tawh vantung thuman thu hong gelh uh hi.” Ellen G. White, The Great Controversy, 7.

         

          Tuhun Lai Siangtho mipil tampi in Lai Siangtho sunga om thute Pasian kiang pan hong pai ahihlam nial uh hi. Piansakna, Paikhiatna leh Jesuh thawhkikna cihte nial uh hi. Tua bangin Lai Siangtho i nial loh ding thupi mahmah hi lo hiam? A tawpna-ah Pasian Kammal tungah mihing in thukhen ding a kilawm mah a hi diam?

TUESDAY      APRIL 7

LAIKUNG TAWH A KIGELH PASIAN KAMMAL

          “Tua ciangin TOPA in Moses tungah, “Hih thute tawh kizui-in nang le Israel tawh kikalah thukhun khat bawl khin ka hih manin hih thute gelh in,”a ci hi (Pai. 34: 27). Bang hangin Moses in mipi lotngahsak lo-in lai-in gelhkhia ding Topa in sawl hi ding hiam?

________________________________________________________________

________________________________________________________________

          Mihing kampau a piangsak Pasian in Ama thuman pulaak dingin mihingte mah teeltuam hi.  Tua mite in Pasian tung pan a ngah uh thute a pulaak uh ciangin a khial lo thuman tak leh muanhuai dingin, Kha Siangtho in amau ngaihsut theihna khempeuh makaih hi. Tua hi-in Lai Siangtho a gelh kamsangte, sawltakte in Pasian lahkhiat, Ama thuhilhnate lai-in gelhkhia hi.

          Hih a nuai-a Lai Siangtho in a kigelhkhia Pasian’ lahkhiat thute bang hong hilh hiam?

Pai. 17:14; 24:4 ___________________________________________

Josh. : 26 _____________________________________________________

Jer.30:______________________________________________________

Mang.1: 1, 19; 21: 5; 22: 18, 19 ____________________________________

          Bang hangin Pasian in Ama lahkhiat thute leh Ama humopna tawh a kipulaak thute lai-in gelhkhia dingin sawl hi ding hiam? A kimangngilh pah loh nading deihna hi. A kigelh kammalte in Pasian theihtelna hong guan-in, Ama deihna hong hilh hi. Mitmuh theih dingin ciaptehna in kam-a pulaak lotngah sangin muanhuai-in sawtpi kikem thei zaw hi. Kam-a gen sangin a kigelhkhiat ciangin mi tampi tungah kizel thei zaw hi. Kam tawh i gen thu khat i awging in ciangtan nei hi. Ahi zongin lai tawh i gelh ciangin, tua in mun khempeuh zelzo thei hi. Tham lo-in khang tampi dong-in kizel thei a, mi tampi adingin thupha hi thei hi. Laisim thei lo mite adingin mi khat in simsak thei hi.

WEDNESDAY      APRIL 8     

KHRIH LEH LAI SIANGTHO TONKHAWM

          Jn. 1:14; 2:22; 8:31, 32; 17: 17 sim in. Jesuh, THU in mihing a hong pianna leh Lai Siangtho, a KIGELH Pasian’ KAMMAL kikhen lo ahihna bang pulaak hiam?

_________________________________________________________

________________________________________________________________

         

Pasian kiang pan hong pai THU (Jesuh Khrih) in mihing-in hong pianna leh a KIGELH Pasian’ KAMMAL in a tonkhawm ahi hi. Kha Siangtho in Mary sungah naupaai-sakin Khrih in mihing-in a hong pian mah bangin, Lai Siangtho zong Kha Siangtho nasepna tawh mihing kammal tawh a hong piangkhia hi. Jesuh Khrih in mihing-in a hong pianna hangin, suah ni, suah mun nei hi. Ahi zongin a mihing hihna in Pasian ahihna beisak lo hi; Pasian ahihna in a mihing hihna melhemsak tuan lo hi. Hun leh mun ciangtan omlo-in, Amah in mi khempeuh adingin HONPA hi (Sawl. 4:12). Tua bang mahin Pasian’ Kammal, Lai Siangtho in a kigelh hun leh a kigelhna mun nei hi. Jesuh Khrih mah bangin Lai Siangtho in zong hun leh mun thuneihna nuai-ah omlo hi; mi khempeuh, hun khempeuh adingin a hong kipia ahi hi.

          Pasian in mihingte dinmun tawh kizui-in Amah leh Amah a hong kilaak hi. Jesuh a mihing hihna in kum tampi sung siatna, zawngkhalna khempeuh a hong thuak hi. Ahih hangin Jesuh in mawh lo hi. Tua tawh kizui-in Lai Siangtho in mihing kammal tawh kigelh ahi hi; khialna kihel lo kuama tel zawh loh vantungmite pau tawh a kigelh hi lo hi. Mihing kammal in ciangtan nei hi taleh, mihingte hong Bawl Pa, mihing kampau a Piangsak Pa in, mihingte tungah Ama deihna a hong hilhna-ah hong hilh khial lo hi; a hong hilh thute in muanhuai hi; kicing hi.

          Bang bang ahi zongin mihing ngaihsutna khempeuh in ciangtan nei hi. Jesuh Khrih leh Lai Siangtho in sa-khat (identical) hi lo hi. Lai Siangtho pen Pasian in mihing-a a hong pianna hi lo hi. Lai Siangtho in Pasian hi lo hi. Pasian in Jesuh Khrih sungah mihingin a hong piang hi (God in Jesus Christ became human). Lai Siangtho i it hi. Bang hang hiam cihleh Lai Siangtho in i biak Honpa pulaak hi.

          Lai Siangtho tawh kibang, a kikim ding laibu om lo hi. Lai Siangtho in Pasian leh mihing a kikhenkhia thei lo dingin a hong kigawmkhopna hi. Hih thu Ellen G. White in hih bangin gelh hi: “Lai Siangtho in, Pasian hong piak thuman thute mihing kampau tawh a hong kipulaakna ahi hi. Lai Siangtho in mihing leh Pasian kigawmkhopna hi. Tua bang kigawmkhopna in Khrih nunna sungah kimu thei hi. Khrih in Pasian Tapa hi; Mihing Tapa hi. Tua hi-in Lai Siangtho in thuman thutak ahih mah bangin Khrih in thuman thutak hi; THU in mihing-in hong piangin mihingte lakah a hong teeng hi (Jn. 1:14).” Ellen G. White, The Great Controversy, 8.

          Bang hangin Lai Siangtho in i upna bulpi hiam? Lai Siangtho lo-in i dinmun in koi-ah hi ding hiam?

  

THURSDAY         APRIL 9

UPNA SUNGAH LAI SIANGTHO THEIHTELNA

          Heb. 11: 3, 6 sim in. Bang hangin Pasian leh Ama kammal theihtelna-ah upna in  thu bulpi hiam?

________________________________________________________________

________________________________________________________________

         

Theihtelna mantak khempeuh in upna thu siksan hi. Naupang khat in a nu le a pa a up, a muanna tungtawnin ama theih ngeiloh thu-te theihtelna ngah hi. Tua bangin a nu, a pa tawh a muanhuai kizopna in naupang adingin itna leh ama mailam kalsuan nuntak gamtat zia ding a theihna hong suak hi. Tua hi-in itna leh muanna tawh kizopna tungtawnin thutheihna leh theihtelna hong khangkhia hi.

          Tua bang mahin tumging a siam mi khat in ama siamna (technical skills) bek hi lo-in, tumging a itna, la phuakte a itna, a vanzatte a itna tawh a siamna a zat ciangin zaknop-in, mipi deih khat hong suak thei hi. Tua hi-in Lai Siangtho a sim mi khat in um tak mel lo, muanmawhna tawh a sim ciangin thuman ahi bangin telthei nawn lo hi. Ahi zongin thuman itna leh upna tawh Lai Siangtho i sim ciangin Lai Siangtho hong hilh thute i tel thei hi. Sawltak Paul in “Upna lo tawh Pasian kilungkimsak zo lo hi” ci hi (Heb. 11:6). Tua ahih manin Lai Siangtho i sim ciangin laibu dang khat bangin sim lo-in Lai Siangtho hong kipatkhiatna phawk a, upna tawh i sim ding ahi hi. Seventh-day Adventist pawlpi in hih thu limtak i pom hi.

          “Lai Siangtho – Thuciam Lui leh Thuciam Thak in Kha Siangtho humopna tawh Pasian kammal a hong kigelhkhia ahi hi. Kha Siangtho humop, makaihna bangin Lai Siangtho gelhte in genkhia, gelhkhia uh hi. Hih a hong gelhkhiat KAMMAL sungah mihing in hotkhiatna thu a theihtel nadingin Pasian in a kisam thute a hong hilh ahi hi. Lai Siangtho in Pasian deihna hong lakkhia hi. Ama hong lah, a khial thei lo tua thute sangin a lian zaw, a man zaw, thunei zaw om lo hi. Lai Siangtho hong hilh thute in nuntak khua-sak zia ding hong hilh-in, gamtat zia le tong sittel nading, up leh zuih ding hong lak-in, a muanhuai Pasian nasepnate ciaptehna ahi hi (Late 119: 105; Pau. 30:5,6; Isa. 8:20; Jn. 17:17; 1Thess. 2: 13; 2Tim. 3:16, 17; Heb. 4:12; 2Pet. 1: 20, 21).

          Mi khat in upna lo-in Lai Siangtho a sim ciangin a sim thute a theihtel nadingin bang kisam hiam? Bang hangin upna in mittaw bangin upna hi lo hiam?  Upna hong nei sak thei thute in bang hi ding hiam? Bang hangin Lai Siangtho thuman theihtel nadingin upna kisam hiam?

 FRIDAY             APRIL 10

NGAIHSUTBEH DING: www.adventistbiblicalresearch.org ah kikoih Lai Siangtho sim ciangin zuih ding thute sim in.

          Lai Siangtho in upna adingin thupi hi. Ahi zongin i lungsim ngaihsutna khempeuh in Kha Siangtho in a hong makaih keileh Lai Siangtho i sim a mawkna hi ding hi; nuntakna adingin kimanna om lo ding hi. “Mihing in hotkhiatna ngah nadingin a kisam thute Pasian kammal in hong hilh hi. Lai Siangtho in khialhna nei lo, a kip tawntung Pasian deihna, a ngimna pulaak hi. A hong hilh thute siksan a nuntak ding ahi hi. Lai Siangtho in upna leh thuzuihna, gamtat khua-sakna khempeuh sittel nading ahi hi.

          Tua bangin Pasian in Ama kammal tungtawnin Ama ngimna khempeuh mite tungah a hong hilh khin hi mah taleh Kha Siangtho’ makaihna, a ompihna i kisam tawntung hi. Honpa in a hong khapsa om bang mahin Kha Siangtho in Lai Siangtho theihtehna hong guan-in, thuman lampi hong hilh hi. Lai Siangtho in Kha Siangtho’ humop tawh kigelh ahih manin Kha Siangtho in a pulaak thute leh Lai Siangtho gen thute in kitukalh ngei lo hi.” Ellen G. White, The Great Controversy, 8.

KIKUP DING DOTNATE

1.       Bang hangin Pasian in Amah mah hong kilaak-in, Ama deihna pulaak hi ding hiam? Bang hangin Pasian hong kilaakna kisam i hiam?

2.       Koi bangin Pasian in Amah mah hong kilaakkhia hiam? Pasian in ahong kilaakkhiat nadingin lampi tuamtuam zang hi; piansak nate, mangmatna (Dan.7:1), mangmuhna (Pian. 15:1); na lamdangte (1Kum. 18: 24, 25) leh Tapa Jesuh Khrih tungtawnin hong kilaak hi (Heb. 1: 1, 2).  Na nuntakna-ah Pasian in Amah leh amah a hong kilaak hiam? Na tuahkhak thute na lawmte gensawn in.

3.       Lai Siangtho thukan mipil tampi in Lai Siangtho hong hilh thu tampi, phuahtawm hi. Piansakna thu, Adam leh Eve, Paikhiatna, Daniel cih thute in mihing nunzia ding ahong hilh nadingin a kiphuak      tawm hi, ci uh hi. Mihing in ama ngaihsutna tawhPasian’ kammal a sittel ciangin tua bang thute hong piang hi. Tua bang ngaihsutna in lauhuai hi lo hiam?

4.      Lai Siangtho sungah Pasian in Ama ngaihsutnate lamdang takin hong hilh hi. Jesuh Khrihbek in hotkhiatna lampi hi, cih lungdamhuai thu kizelsak dingin nang le kei hong deih hi. Mite in na nunzia-ah Pasian nunzia a mu ding uh hiam? Na nun zia in Pasian a kilangsak hiam?