LESSON 13 JUNE 20 -26
PASIAN KAMMAL TAWH NUNGTA
SABBATH NITAK
TU KAAL SUNG SIM DING: Phil.2:12-
16; Lk. 4:4,8, 10- 12; Late 37: 7;46: 10; 62: 1, 2,5;Kol. 3: 16.
KAMNGAH: “Nomau kikhem tawmin thu zak bek tawh maisak kei unla, na
zak bangun zui-in semzaw un.” James 1: 22.
Lai Siangtho thu nungta nuntakpih kei
lehang, bang zahin Lai Siangtho thuthuk i kantel- a a khiatna i thei zongi, tua
in a mawkna suak hi. Sangkah pil
sinna-ah zong zakna, muhna bek in kicing lo a, sepkhiat a kul mah bangin, thu
zuihna ah zong i theih thute nuntakpih ding kisam hi. Tua bangin Pasian hong
thupiak bangin i nuntak ciangin vantung thupha kongkhak hong kihong ding hi, tua
hi keileh vantung thupha i ngah kei ding
hi. Vantung thupha in nunzia hong kikhelsakin, theihna leh theihtelna hong
khangsak hi. Pasian Kammal tawh nuntak nopna lungsim i neih keileh i sin Lai
Siangtho thute a nuntakpih nuam lo hi pah a, khantohna om thei lo hi. I teci-panna
in muibun zo lo ding hi.Bang hang hiam cihleh
i gen bangin i gamtat in zui lo hi.
Pasian Kammal tawh a nungta mi in
vantung pilna thu hi taleh vantung hehpihna sungah a khangto mi hi-in, mite
adingin etteh thamcing nunzia a lak i hi ding hi. Jesuh Khrih simloh tua bangin
i etteh ding mi dang kuamah om lo hi. Amah in i zuih ding lampi hong pia khin
hi. Amah in Pasian deih nunzia tawh hong nungta hi.
Pasian Kammal tawh nungta cih a
khiatna leh Lai Siangtho thuneihna nuai-ah nuntakna cih thute i kikum ding hi.
SUNDAY JUNE 21
A
NUNGTA PASIAN KAMMAL LEH KHA SIANGTHO
Thungetna leh lampi mantak tawh Lai
Siangtho sim-a kantel ding thupi mahmah hi. Tua zah khat mahin Lai Siangtho i
theih na bangin nuntakpih ding thupi zaw semsem hi. Lai Siangtho thuthuk
tuamtuam theih ding kisam, thupi mah hi. Ahi zongin i ngimna bulpi in thutheih
nading bek hi lo-in, Pasian Kammal in i nuntakna khempeuh hong makaih-in, i
nuntak zia khempeuh, i ngaihsutna khempeuh a hong puahphat ding deihna lianpi
pen hi zaw hi. Thuman thutak tawh nuntak ding lunggulhna in Lai Siangtho thuman
ukna nuai-ah a nungta mi in, Ama kammal kimakaihsak dingin Topa mai-ah
kiniamkhiat leh Ama tungah ki-ap mi ah hi. Tua bangin a nungta dingin hamsatna
tuamtuam nawktan ding kisam hi. Bang hang hiam cihleh i lungsim ngaihsutna leh
i nuntakna kua in hong uk ding hiam cih galdo den mite i hi hi. A tawpkhakna-ah
lampi nih bek om hi.
Phil. 2: 12-16 sim in. I nunzia
ding bang hong hilh hiam?
Pasian in Kha Siangtho tungtawnin i
sungah na hong sem hi. Kha Siangtho bekmah in vantung pilna leh Lai Siangtho
theihtelna hong guan hi. Mimawh mi ihih manin Pasian thuman tawh kituak lo,
silesa deihna zui-in i gamta kha zel hi (Eph. 4: 17, 18; Rom. 1:25). Kha Siangtho lo-in Pasian Kammal itna,
lametna, kha muanna i nei zo kei hi. Kha
Siangtho tungtawnin nunzia hoih i guanin, Topa a lungkimsak dingin i nunna hong
makaih hi (Phil. 2: 13, 17).
Kha Siangtho in thuman hong hilhsia
hi-in, Lai Siangtho theihtelna leh thuman thutak ah hong makaih hi. Kha
Siangtho in Topa Kammal sungah nopsakna hong guan hi. Kha Siangtho in thuman
thutak-ah i lungsim hong makaih-in, tua thuman thute a hong thak muhsak hi. Tua
bang ciangin i nuntakna in cihtakna leh itna tawh Pasian thupiakte nuntakpihna
tawh kidim ding hi. Kha Siangtho huhna lo-in kuamah in Lai Siangtho a telthei
kei ding hi. Ahi zongin kiniamkhiatna, Pasian hong huh ding utna lungsim tawh
Pasian Kammal i sim ciangin thuman teci a hong hilh dingin i kimkotah vantungte
in hong cing uh hi.” Ellen G. White, 1SM., 411. Tua hileh Pasian thu tawh kisai
Pasian thu tawh kituakin a khiatna i pulaak thei ding hi (1Kor. 2: 13,
14). Zingsang khat khit zingsang khat
lungdam kipakna tawh Pasian Kammal i zui thei ding hi.
Phil. 2: 16 “Nuntakna thute lenkip
in.” Hih in bang a khiatna hi ding hiam?
Koi bangin i lenkip hiam? Thuhilhkikna 4:4 in zong tua bang thu pulaak hiam?
Hih munah mihing masuan in bang hi ding hiam?
MONDAY JUNE
22
JESUH
TUNG PAN THUSINNA
Jesuh khekhap zuih ding sangin a hoih
zaw, a thupi zaw om lo hi. Amah in Lai Siangtho theihtel-in Pasian Kammal a
kigelh bangin nungta hi.
Lk. 4:4, 8, 10-12 sim in. Koi
bangin Jesuh in Satan zia-etna a zawh nadingin Lai Siangtho do hiam? Thu upna
leh zia-etna i tuah ciangin bangci bangin Lai Siangtho in i siksan muanhuai pen
hi hiam?
_________________________________________________________
Jesuh in Lai Siangtho theician
hi. Pasian Kammal tawh nungta hi; a
lungsim-in ciapteh hi. A thuhilhna-ah Lai Siangtho mah siksan-in thu hilh hi.
Lai Siangtho sim tawntung-in Pasian tawh tatsat lo kizopna nei ahih manin tua
bangin nungta ahi hi. Lai Siangtho thei lo hileh Dawi mangpa in olno takin
khemzo ding hi. Satan in Ama ngimna khat
a sep nadingin Lai Siangtho mah siksan-in hong khem hi. Satan bangin Lai Siangtho siksan ziau in
kicing lo hi. A khiatna leh bang deihna nei hiam cihte i theih ding zong kisam
hi. Tua bang ciang bekin Satan hong do-nate i zo thei ding hi.
Jesuh in a nungzuite thu a hilh
ciangin amaute lungsim a honsak nadingin “Lai Siangtho sungah kigelh hi” cih siksanin
thuhilh hi (Lk. 24: 45, 46; Matt. 11:10; Jn. 6:45). Lai Siangtho i simna mun
mun theihtel ding kisam hi. “Thukham
sungah bang kigelh hiam” “Bangci sim na hi uh hiam” (Lk. 10:26) cihte in Lai
Siangtho hong hilh bangin nungta-a, Lai Siangtho mah tawh i nunzia kisittel
ding, Jesuh in hong hilh hi.
Jn. 7: 38 gen bangin Jesuh, Pasian
Kammal in, mihingin hong piang hi. Hih in, Jesuh in a thuhilhnate khempeuh Lai
Siangtho mah siksanin thuhilh hi, cih hong hilh hi. Jesuh in a hong pai ding
Messiah hi, cih thu zong Lai Siangtho tungtawnin i thei hi. Lai Siangtho in
Jesuh thu bek mah hong hilh hi (Jn. 5: 39). Jesuh mahmah in Lai Siangtho bangin
kalsuan hi; a kigelh Pasian Kammal tungah ki-ap hi. Jesuh in tua bangin Lai
Siangtho mah bulphuh tangh tangh ahihleh eite in zong Lai Siangtho mah bulphuh
huai semsem lo hiam?
Zia-etna na thuak
ciangin Lai Siangtho tawh a zo mi na hi hiam? Zia-etna na tuah ciangin Lai
Siangtho sim ahihleh Lai Siangtho siksan-in nei-in a do na hiam? Tua bang
ciangin bang piang hiam? Bang thu na phawk hiam?
TUESDAY June
23
Jesuh
Leh Lai Siangtho
Jn.
5: 45- 47 sim in. Jesuh in Lai Siangtho
tawh a kizopna zia bang hong hilh hiam?
_________________________________________________________
________________________________________________________________
Mi
kimkhat in Jesuh in thu a hilh ciangin Lai Siangtho sung a kigelh thute tawh
kituak lo-in thu hilh hi. Jesuh thugente in Lai Siangtho sangin dinmun sang zaw
hi, ci uh hi. Thuciam Thak sungah ‘Lai Siangtho sungah kigelh note in na za zo
uh hi… ahi zongin note tungah ka hong gen thu in…. ci-in Thuciam Lui sunga
kigelh thute a langpan bangin ngaihsun uh hi (Matt.5: 21, 22, 23, 27, 28, 33, 34,
38, 39). Mi kimkhatte ngaihsut bangin Jesuh in Mual tung pan a thuhilhna-ah
Thuciam Lui langpang-in thuhilh hi lo hi.
Jesuh in bang hangin tua bangin
thuhilh hiam cihleh tua hunlai-a makai-te, siampite in amau deih siksanin Lai
Siangtho a khiatna gen uh a, Pasian thupiak hi lo napi amau ngeihna zui uh ahih
manin Jesuh in Lai Siangtho deihna a pulaak hi zaw hi. Galte muhdah ding ci-in
Pasian in sawl ngei lo hi (Matt. 5: 43).
Jesuh in Thuciam Lui hemkhia ngei lo
hi; Thuciam Lui thuneihna nial ngei lo hi. Thuciam Lui in Jesuh thuhilhna a
kipsak hi zaw hi. Jesuh in Thuciam Lui a hilhcian ciangin a bulpi in Pasian
ahihna pulaak tawntung hi.
Jesuh thuneihna tawh Lai Siangtho
manphatna neu ngaihsut khakna in khialhna lianpi hi. Tuabang mahin Jesuh paulap-in Lai Siangtho
sung a thu kimkhat in Kha Siangtho humopna kihel lo hi, cih pen khialhna lianpi
khat hi. Jesuh hunlai-in Thuciam Lui bek om hi taleh, eite etteh dingin Jesuh
in Lai Siangtho thuneihna pulaak hi. Thuciam Lui in zong Pasian Kammal ahihna
Jesuh in pulaakna sangin eite ading a hoih zaw dang om nawn lo hi. Lai Siangtho
thuneihna kiamsak ding sangsik-in Lai Siangtho in i nunzia ding a hong makaih
dingin muantaakcing, belhthamcing ahihna tawisang hi. A taktakin Jesuh in Mual
tung a thuhilhna-ah “Thukham leh kamsangte a beisak dingin ngaihsun kei
un. Beisak dingin ka hong pai kei a, a
kipsak dingin a hong pai ka hi hi,’ci hi (Matt. 5: 17). Tua banah “thupiakte
lak pan a neu pen palsatin, tua banga palsat ding midangte a hilh peuhpeuh
vantung gamah a neu pen kici ding hi. Ahi hangin hih thupiakte zui-a midangte a
hilh peuhpeuh vantung gamah a lian kici ding hi,’ ci hi (Matt. 5: 19).
Thuciam Lui siksanin tuhun dongin upna
thupi-te pulaak in. Gentehna-in piansakna tawh kisai thu (Pian. 1-2), mawhna
kipatna thu (Pian. 3) ngaihsun in. Thuciam Lui sung thute siksanin Thuciam Thak
in a kicing zaw-in a hong hilh thute ngaihsun in.
WEDNESDAY JUNE
24
GAMDAI
TAKIN PASIAN KAMMAL LUNGNGAIHNA
Tuhun i nuntakna in lunghimawhna,
nasep manlahna tawh kidim den hi. Khat veivei ciangin annek tuidawn ngah
nadingin hamsapi-in nasep kul hi. Nisim kitangsapte ngah zawh nading gimpi
tawlpi-in i zon hun om hi. Bang hang hiam cihleh mihing in kisapna tawh i kidim
den hi. Neih le lamh in lungnopna nuntak nopna hong pia dingin a lamen mi tampi
om hi. Ahi zongin Solomon in a hong hilh mah bangin (Thuhilhsia Bu) tua bangin
neih le lamh hauhnate in lungnopna hong guan zo lo hi.
Bang bang hi taleh nisim-in nasep
kitaklah, manlah i hi den hi. Tua bangin nasep kin, manlahna tuamtuamte hangin
Pasian ading hun i pia zo kei hi. Upna nei lo i hi kei a, ahi zongin thunget
hun, Lai Siangtho sim hun ding leh i nuntak a hong kem Topa thu lungngaih hun i
nei zo kei hi (Dan. 5: 23). Pasian tawh hun manpha khat zang dingin nisim
nasep, vai tuamtuamte in hong khaktan hi. Nasep manlah taleh i Honpa Jesuh tawh
kimuh hun sehkul hi. Topa hong hopihna
aw ngaih hun ding nei zo kei lehang, bangci bangin Kha Siangtho in hong makaih
ding hiam? Topa tawh kiho-na lungsim daihna tawh Lai Siangtho sim a, thunget in
i thu zuihna nuntakna nak hi.
Late 37: 7; 46:10; 62:1,2, 5 sim
in. Dai dide-in Topa tawh hunzatna tawh kisai bang hong hilh hiam? Bang hangin
tua bang hun zat in thupi hiam?
_______________________________________________________________
________________________________________________________________
I
it mite tawh tu-khawm, kiho khawm a hun zat nuam i sa hi. Hong nawngkai-sak
thei tuamtuam a om lohna mun khat tel inla, Pasian Kammal sim-in, tua na sim thute
lungngai dii-dee in. Nasep kitaaklah manlahna tawh kidim i hih manin tua bangin
Pasian Kammal lungngaihna hun a tuam vilvel-in geelkholh kul hi. Zingsangtung,
nasep kipan ma hileh hoih hi. Tua bangin nasep kipat ma-in Pasian tawh kizopna
in suun tawntung Ama ompihna tawh i kidim thei ding hi. Zingsangtungin Lai
Siangtho sim, thungetna in suun tawntung lungsim ngaihsutna pha tawh hong
kidimsak hi. Bang mah in hong nawngkai-sak loh ding hun khat la inla, Topa tawh
hun zangkhawm in.
Thungetna tungtawnin Topa tawh kizopna
sangin i nuntakna hong phuahpha thei ding dang om lo hi. Tua hileh na nunzia in
Jesuh suun zaw semsem ding hi.
Nangkia-in Topa
tawh hun zatkhopna a kin mi na hi hiam? Tua bangin na zat hun in koici bang
hiam? Koi bangin Topa theihtelna leh itna nei zaw semsem ding na hiam?
THURSDAY JUNE 25
LAI
SIANGTHO KAMLOT NGAHNA LEH LASAKNA
“Topa aw na tungah ka hong khialh khak
loh nadingin na thute ka lungsung ka koih hi” (Late 119:11).
Lai Siangtho lohngahna in thupha tampi
ngahna hi. Pasian kammal lotngahna tam semsem hileh nuntak kalsuanna khempeuhah
mazanna hong guan hi. Lai Siangtho
kamlotngahna in ngaihsutna, thu khat peuh khentatna leh gamtat luheekzia hong
huzaap hi; nisim-in nuntak khuasakzia khempeuh hong huzaap ding hi. Pasian
bia-in Ama tungah cihtakna hong nei thei-sak ding hi.
Lai Siangtho a mal, a mal a lotngahna
in Satan hong khemna leh Lai Siangtho a khiatna genkhialna panin hong huu ding
hi. Lai Siangtho lohngahna in i paipai-na mun, i omna peuhah Lai Siangtho om ta
keileh Topa kammal a ngaihsun sun thei i hi hi. Tua bangin kamlotngahnate in
zia-etna tuamtuamte leh Satan tungah zawhna hong pia thei hi. I hamsatna
tuamtuamte lungngaih ngaihna sangin i lungsimte Topa tungah lamsangto-in Ama
kammal lungngaih tawntungna in lungmanna panin Topa in a hong huh theihna lampi
a tul tampi-te hong musak thei hi.
Eph. 5:19; Kol. 3:
16 sim in. Koi bangin Lai Siangtho laimalte la-in sakna in Topa sungah hatna
leh kipna hong nei thei sak hiam?
_________________________________________________________
________________________________________________________________
Lai
Siangtho munte la-in sakna in Topa Kammal kamlohngah a theihna khat hi pah
hi.Olno takin kamlohna theihna hong suak hi. A zaknop dingin tua bangin Topa
Kammal la-a sakna in i lungsim panin mangkhia pak nawn lo hi. Tua bangin
kamlotngahna in lunghimawhna tuamtuamte hemkhia hi. Uhamte mah bangin naupangnote in zong Topa
Kammal la-in a sak uh ciangin Lai Siangtho lotngahna hi pah hi. Lasak, thugen
mi minthang tampi in Lai Siangtho tungtawnin a lasak, a thugenna uh in
Khristian biakna tawh mi tampi huzaap uh hi. Tua bang la tuamtuamte in i
lungsim ngaihsutnate Topa tawh hong kinai-sak thei hi. Lai Siangtho in i nunzia
hong huzaap, thupha hong pia thei hi.
“Music in vantungah zong a kizang
Pasian biakpiakna khat hi. Vantungmite lasakna tawh kihual-in eite in zong Topa
a phat ding i hi hi.” Ellen G. White, Patriachs and Prophets, 594.
FRIDAY JUNE 26
NGAIHSUTBEH DING: Ellen
G. White, “ The Privilege of Prayer,” 93 -104 in Steps to Christ.
Mihing mit in Khrih a hoihna, comeliness
(a ithuai-na) a mu telsiang zo ngei kei hi. Mihing nunna zia khempeuh in mawhna
a Puakhia Pa kiang pan mawhmai-na ngah lo
hi lehang, mihing in lamet bei, a cimawh mi ihihna Kha Siangtho in hong
thei-sak hi. Na khempeuh a kicinna Khrih bek in Ama hong hehpihna, tehpih om lo
Ama hong itna, Ama hoihna leh a vangliatna theitelna hong guan hi.” Ellen G. White, The Upward Look, 155.
“Satan in a hong zia-et ciangin na
lotngahsa Lai Siangtho munte genkhia in. Satan in leitung nate leh muhtheih,
zaktheih, nektheih a tuamtuamte a hong zia-et ciangin, “Lai Siangtho sungah
kigelh hi”ci-in Topa Kammal tawh tuate khempeuh tungah zawhna na ngah ding hi.”
The Advent Review and Sabbath Herald, 19 April,1884.
KIKUP DING DOTNATE
1. Koibangin thu upna leh thu zuihna-ah
deihtel theihna leh eima khentatna in nasem hiam? I nuntakna-ah i tuah khak
thute in i khut sungah om lo hi. Ahi zongin tawntung nuntakna sung lut dingin
mimal in i khentatna tungah kinga hi. Pasian in a hong piak deihtel theihna
limtakin na zang hiam? Thu zuihna-ah bangci bang khentatna nei hiam?
2. Sabbath ni in Pasian tawh a tuam vilvel
kikholhkhopna hun nuam ahihlam ngaihsun
in. Koi bangin Sabbath tawlngak in
Pasian ading hun pia manlo-in leitung vai tawh hun mawk bei ding panin hong dal
thei ding hiam? Bangci bangin
Sabbath tawlngak in thu zuihna-ah thupha na ngahna ni-in nei thei ding na hiam?
3. Nangmah kia-in thungetna leh Lai Siangtho
simna-in Pasian tawh na hun zatkhopna tawntungin na tuahkhak thute ngaihsun in.
Koi bangin tua in na upna hong huzaap hiam? Nangkia-in a tuam vilvel-in Lai
Siangtho simna, thungetna tungtawnin na ngah thupha-te ngaihsun in. Koi bangin na
ngah thupha-te midangte in zong ngah thei ding hiam?
4. Lai Siangtho bangmunte kamlohngah na nei
hiam? Banghangin tua-te deih na hiam? Kamlohngah tungtawnin thupha ngah na kisa
hiam?
