LESSON 12 JUNE 13 -19
A HAMSA LAI SIANGTHO KAMMALTE
SABBATH NITAK
TU KAAL SUNG SIM DING:
2Tim. 2:10-15;1Khang. 29: 17; James 4:6-10; Gal. 6: 9; Sawl. 17: 11
KAMNGAH: I sanggam Paul in Pasian piak pilna
zangin note kiangah lai a hong gelhnate sungah a gen mah bangin note khempeuh
in hotkhiatna na ngah theih nading uh hun hong piakna-in Topa hong zekai ahihna
thu na phawk un. Lai a hong gelhna sungah
a thugente tu-a-te mah a gennuam ahi hi. A laigelhna sungah a telhak thu tampi
om a, theihna kicing lo-in lungsim kip lo mi pawlkhatte in Lai Siangtho sung
thu a ut ut-un a kawi hei uh bangin Paul thugente zong a man lopi-in khia uh
ahih manin siatna a tuaklawh uh hi.” 2Pet. 3: 15, 16.
Paul laigelhte kimkhat in telhak hi,
ci-in Peter in pulaak hi. Tua bangin a telhak thute, thuman a thei lo mi
kimkhat in amau kisiatna dingin a ut bangin a khiatna gen uh hi (2Pet. 3: 15,
16). Peter in Paul laigelh khempeuh
telhak hi, ci lo hi; pawl khat bek telhak ahihna pulaak hi zaw hi.
Ei zong tua bang mah hi lo i hiam? Lai
Siangtho i sim ciangin a vekin i telkhin zo kei hi. I theihzawh loh thu om hi.
Tua bangin a theihhak thu-te, bang hang hi ding hiam cihte a kipan, Pasian
thuman citakin a zong mi in tua bang thu hamsa-te tawh bangci bangin mainawt
thei ding cih thute i kikum ding hi. Mihing in i telzawh ngei loh ding thu
haksa om ahihlam i phawk ding kisam hi. Ahi zongin Lai Siangtho hong hilh thu
tampi i thei thei hi. Tawmno khat theihzawh lohna hangin Lai Siangtho buppi in
Pasian Kammal thuneihna muanmawh ding hi lo hi.
SUNDAY JUNE
14
LAI SIANGTHO GEN KIBANG LO A HANG THUTE
2Tim. 2: 10-15 sim in. Paul in thuman thutak limtak kantel dingin
Timothy hanthawh hi. Eite zong bang thuman hong hilh hiam?
Lai Siangtho a kantel, thuman a thei
nuam mi khat in Lai Siangtho sungah theih hamsa, tel hamsa thu om hi, cih pen
nial lo hi. Hih thu hangin Lai Siangtho nawlkhin ding hi lo hi. I theihzawh loh
thu om mah hi, cih i theih ding kisam hi.
Ngaihsun taktak hi lehang mihing ngaihsutna, theihna in ciangtan nei hi;
Pasian thu hi ta keileh mihing in na khempeuh, thu khempeuh a thei zo ding hi
lo hi. Tua hi-in kicinna om lo, theihna ciangtan nei mihing in ciangtan omlo Pasian Kammal a theihtel zawh
loh a om ding mah ahi hi. Tua bangin mihing in a telzawh loh a om hangin Lai
Siangtho in thuman tak hi lo hi, cih nading om lo hi. Pasian humopna leh lamlahna tawh kigelh Lai
Siangtho a nial mi kimkhat in, tua bangin mihing in a telzawh loh thute
siksanin, Lai Siangtho in khial hi, ci uh hi. Tua bang mite in Lai Siangtho in
a gen mun khat le mun khat kitukalh hi; khialna nei hi, ci-in Lai Siangtho pen
laibu dang khat bangin ngaihsun uh hi. Tua bang ngaihsutna in Lai Siangtho
bulpi in Pasian ahih manin, Ama Kammal in a muanhuai-na, Lai Siangtho bup
kikhatna phawk kha lo uh hi. Tua bangin muanna a nei lo-te in Piancil Bu
(Piansakna thute) nial masak-in nei uh hi. Tua panin Lai Siangtho thu tampi
nial toto uh hi. Lai
Siangtho sung a kigelh thu khat le thu khat kitukalh om mah hi. Tua bangte in
laibu-teikhiatna pan a khial kha hi thei hi. Ellen G. White in hih bangin gelh
hi: “Mi kimkhat in laibu-teikhiatna-ah khialhna a om thei mah ding hi lo ahi
hiam, ci uh hi. Upna leh ngaihsutna picing nai lo-te in, tua bang khialhna
neu-no khat hangin, a lamdang Kha Siangtho humopna tawh kigelh Lai Siangtho
deihna taktak mu zo lo ahih manun, Pasian Kammal nial uh hi. Tua bangin Pasian
Kammal upkhialhna nei mi a om zongin, lungsim-mawl taleh Pasian kam pan a
pusuak vantung thuman thutak thute theitel veve uh hi. Laibu gelhna,
laibu-teikhiatna pan khialhnate in kitel kician takin Pasian hong hilh thuman
thutak susia lo hi.” Ellen G. White, 1SM., 16.
Bang hangin
kiniamkhiatna leh lungsim ki-apna tawh Lai Siangtho sim ding thupi hiam?
MONDAY JUNE
15
A TELHAK THUTE LUNGSIM SIANGTHO LEH LIMTAKIN SIM IN
Lai Siangtho nasim ciaing thu hamsa, a
telhak thu na tuak kha ngei hiam? Tua
bang a tuak kha ngei lo om lo ding hi. Tua bang thu hamsa, a telhak thute
bangci-in na mu hiam? Tua bang thute
tungah bangci lungsim puak nei ding kisam hiam?
1Khang. 29: 17; Pau. 2:7; 1Tim. 4:
16 sim in. A hamsa Lai Siangtho munte tawh kisai bang hong hilh hiam?
___________________________________________________________________
________________________________________________________________
Lungsim
man tak tawh tua bang thu hamsate i zo thei hi.
Lungsim takpi tawh Lai Siangtho a sim mi in tua bang thu hamsa, a telhak
thute kitheihmawh bawl lo uh hi; nial lo uh hi. Lungsim takpi nei mi in thu
hamsate limtak kantel a, mihing hoihsak thu tawh melh ziau lo hi. Tua hi-in Lai
Siangtho sim a kipan i nuntakna-ah Pasian zia le tong tawh kalsuan ding thupi
mahmah hi. Pasian in lungsim mantak leh thuman theihnopna lungsim paakta hi.
Lungsim mantak a nei mi in a telham, a
hamsa Lai Siangtho sung a thute ama hoihsak bangin pulaak lo hi; mite zaknop
thu bek pulaak lo hi. I telzawh loh thute telzawh dong ngak kul hi. Thuman
deih-in Lai Siangtho kantelna in khatlekhat kimuanna, a cidam kizopna piangsak
hi; tua muanna in khat le khat kizopna cidamsak hi. Tua in mihing zak nop
mawkmawk thu sangin tawntung kimang
ding thuman sung hong tun zaw hi.
Lai Siangtho sung thu hamsa-te upmawh thu siksanin a khiatna
pulaak sangin, a khiatna, a cihnopna ka theihzawh hi lo hi, cih ding hoih zaw
hi. Lai Siangtho a khiatna genkhialh
khak ding a kidawm mi in Pasian kammal a theitel nuam takpi ahih manin mihing
theihna in ciangtan nei-in a theihna kicing lo ahihteh, ci-in ama theih
bangbang a khial thei lo bangin pulaak pahpah lo hi. Tua bangin a kidawm mi in
ciapteh dingin a thupi khat ahih keileh cihtham lo ci lo-in limtak kantel hi.
Lai Siangtho leh Lai Siangtho tawh kisai thu khat, theih masak gen masak hi lo-in,
limtak ngaihsun kantel phot uh hi.
Lai Siangtho sung a thu hamsa
kimkhatte leh nangma theihtelna tawh a kituak lo thu-te tungah koi bang lungsim
puak nei-in, na ngaihsun hiam?
TUESDAY JUNE
16
KINIAMKHIATNA TAWH THEIH HAMSA-TE KANTEL
James 4: 6 -10; 2Khang. 7:14; Zeph.
3:12. Bang hangin Lai Siangtho thu hamsate i sim ciangin kiniamkhiatna thupi
hiam?
_________________________________________________________
_________________________________________________________________
Kiniamkhiatna, ei le ei kitheihtelna
in mihingte in amah sangin a lian zaw, a sang zaw khat tungah kinga hi, cih
pulaak ahi hi. Na khempeuh in mihing
khut sungah om lo ahihna phawk thei uh hi. Tua bang mite amau angsung thu
sangin thuman thutak manpha ngaihsut uh hi; thuman in amau ngaihsutna tungah
kinga lo ahihna mu-in, Pasian tungah kinga zaw ahihlam phawk uh hi. Amaute
theihtel thuman a lian penpen in thuman a theih uh in tawmno khat bek ahihlam a
kiphawkna uh ahi hi. Paul gen mah bangin amaute theih thuman in limlang a et
tawh kibang hi (1Kor.13:12).
Tua bangin kiniamkhiatna hangin
hamphatna in tampi hi. Kiniamkhiatna lungsim tawh thuman kantelna in theihna-ah
a khantohna hi. Bang hang hiam cihleh tua bangin a kiniamkhiat mi kithu hilh
ding ut a, thuman a theihna khang semsem hi. Tua bangin mi thuhilh a pom thei
mi in a khialh hi, cihna hi lo-in, lungsim kip nei lo-in a ngaihsutna khel
themthuum cihna hi lo hi. Lai Siangtho thuman ukna sungah ki-pumpiak cihna hi
zaw hi. Hih bang mi in ama theihna in kicing lo ahihlam a phawk manin Pasian
Kammal a theihna kibehlap toto hi. A kiphasak mi, ama theihna kicing a kisa mi
in ahihleh tua bang hi lo hi.
“Ama nuntakna a makaih dingin
kiniamkhiatna, hotkhiatna thuman theihtel nopna lungsim a nei mi in Lai
Siangtho hong hilh thute thei lo-in a om kei hi. Ahi zongin ama ngaihsutna tawh
kituak lo thu khat langpan ding ngaihsutna lungsim tawh Lai Siangtho a sim mi
in ahihleh ama kitheihsakna in hotkhiatna thuman tawh kigamla-sak hi. Thuman a
theih loh khak ding a lung himawh lo mi tungah Topa in ama thuman pulaak lo hi.
Thuman langpan-in theihnopna a nei lo mi tungah Pasian in zawhthawh thu-in hilh
lo hi. Bang hang hiam cihleh Satanin ama nungzui dingin mimal lungsim sungah
thuman langpan nading guan-in, Pasian ii a siangtho thukham in kimanna nei lo
hi, cih ngaihsut pia hi.
Nuntakna Kammal i sim ciangin lungsim
kiniamkhiat a, lungsim takpi leh Pasian zahtakna tawh i sim kul hi. Tua bang mi
bek in thuman khuavak mu ding hi.” The Advent Review and Sabbath Herald, Aug.
22, 1907.
Koi bangin kiniamkhiatna leh thuman
thutak tonkhawm hiam? Gentehna-in Sabbath in thuman hi, ci-in ei Seventh-day
Adventist in i up hi a, Sabbath a nial mi tampi in khial uh hi, cih ngaihsutna
koi bangin na ngaihsun hiam?
WEDNESDAY JUNE
17
KHENTATNA LEH LUNGDUAI-NA
Gal. 6: 9 sim in. Mi tungah thupha
bawl ciimtak lo ding a hong hilh bangin Lai Siangtho i telzawhlohte zong
ciimtak lo ding hong hilh hi. Tua bang ciangin lungsim kip leh lungduai-na in
bang hangin thupi hiam?
_________________________________________________________
________________________________________________________________
Zawhna taktak ngah nadingin kulhkalna
kisam tawntung hi. Baihtakin i ngah van le nate i thupi ngaihsut kei hi. Tua
bang mahin Lai Siangtho sung thu hamsate zong i tel mateng lungduai tak leh
lungkia lo-in kanbeh, zonbehna pan i theihtel thu in manpha-in a thupitna
kiphawk pha semsem hi. Lai Siangtho i sim thute kantelna-in i hun zatte in hun
manpha hi a, hun zangsiam i hi hi. I tel
zawh loh thute khat i tel nadingin i hun bei khempeuh in hun manpha hi zaw hi.
Hamsa takin i zon, i kankhiat thu in ei adingin manpha semsem hi.
Olno takin a kithei zo lo thu in
theihzawh ngei loh ding thu hi, cihna hilo hi. Hih thu i mangngilh kha zelzel
hi. Mi tampi in Lai Siangtho a sim thute uh tel zo lo-in, theihbat dinghi kei
ci-in nusia pahpah uh a, pawl khat in Lai Siangtho muan tham cing lo hi, ci
sawnsawn uh hi. I ngaihsutnate in kicing khin lo hi mah taleh hamsa lo-in i tel
pah thuman om hi. Sangnaupang khat in algebra (maths) a muhcil-in hamsa sa
mahmah-a a theih zawh nading hanciam taleh a theih zawh lohteh kuama theih zawh
ding hi lo hi, ci hileh, ahi mah ding hiam? Tua bang mahin Lai Siangtho i tel
zawh loh khat pen kuama theih zawh ding hi lo hi, cih pen khial hi.
Theih hamsa thu khat theih zawh nading
hanciam mahmah taleng i theih zawh loh thute tawl khat koih phot a, Pasian hong
piak i theihsa thuman tawh kalsuan ding kisam hi. Pasian hong lamlahna thuman i
theihna ciangciang tawh nungta hi lehang, i telzawh loh thu hamsa-te theihtelna
hong guan thei hi. Tua hi-in lungkia lo-in kulkalna tawh Lai Siangtho i kantel
ding kisam hi. A tawpna-ah lungduai-na pen hun nunung-a a nungta Pasian mite
nunzia ding hi (Mang. 14: 12).
Lai Siangtho tel hamsate theih zawh
mateng hanciam, kulhkal takin a kantel mite tung pan bang thu nuntakpih ding i
hiam?
THURSDAY JUNE 18
THU HAMSATE THUNGETNA LEH LAI SIANGTHO SIKSAN
Sawl.17:11; 8: 35;15: 15, 16 sim in. Sawltakte leh thu-um mi
masate in theihham thute bangci muh uh hiam? Bang hangin Lai Siangtho a khiatna
genna-ah Lai Siangtho mah siksan ding thupi hiam?
____________________________________________________________________
____________________________________________________________________
Lai Siangtho sung theihham thute
telzawh nadingin a hong huh thei a hoih pen in Lai Siangtho mah hi. Tua bang a
hamsa thute Lai Siangtho mun khat mun nih bek tungah kinga lo-in, Lai Siangtho
buppi mah siksan ding kisam hi. Lai Siangtho i tel nadingin Lai Siangtho mah
siksan ding kisam hi. A manpha suangkhuk to-te bangin Lai Siangtho thuman
telkan ding kisam hi.
Lai Siangtho na simna mun a khiatna na
theihzawh keileh a thu kibang kigenna a dang mun khat sim inla, enkak in. Lai Siangtho sung na theihsa thute siksan
lecin a hamsa thute na theitel ding hi. A hamsa Lai Siangtho munte hangin na
theih thuman thute thu hamsa suaksak kei in. Lai Siangtho pua lampan mihing
pilna, leitung nate thu theihna (science) cihte siksanin Lai Siangtho a khiatna
pulaak lo zaw-in, Lai Siangtho mah siksan-in Lai Siangtho a khiatna gen ding
kisam hi.
Khukdin-a thungetna tawh Lai Siangtho
thuman theihtelna i ngah ding hi. Thungetna tungtawnin Pasian in Ama thuman
khuavak hong musak ding hi. Lai Siangtho a humop, Lai Siangtho a gelhte a
makaih Kha Siangtho mah in a hamsa thute theihtelna hong guan hi. Thungetna in
i lungsim khempeuh Topa tung a sungkhia hi-a, a hamsa thuman thute theihtelna i
ngen thei hi. Ama kammal thuman a mu thei dingin i mite Topa in a hong honsak
ding Amah i ngen thei a, Ama thuman sungah a hong makaih dingin thu i ngen thei
hi. Tua bangin thunget in thupi hi. Pasian in a hong makaih nadingin i thu nget
hong dawng-in, Kha Siangtho tungtawnin eite hong makaih hi. Topa in Lai
Siangtho sung-a a hong lah thuman thutak tawh kituak lo thu peuhmah hong hilh
lo hi. Topa in Lai Siangtho tawh kituak
lo bangmah pulaak lo hi. Kamsangte leh sawltakte a humopna tungtawnin amaute
hong gelhkhiat uh Lai Siangtho sunga kigelh thu-te a kip zaw semsem dingin
Pasian in nasem hi.
Koi bangin thungetna in Pasian
kammal i tel zawk nading leh lungsim mantak neih nadingin hong huh thei hiam?
FRIDAY JUNE 19
NGAIHSUTBEH DING: Ellen G. White, “ What to do with Doubt” 105 -113 in Steps to
Christ sim in. Methods of Bible Study, www.adventistbiblical
research.org ah en in.
Lai Siangtho sungah ciangtan nei
mihing ngaihsutna in a theihbat zawh loh ding thuthuk tampi om hi. Tua bang
thute in mihing theihzawh ding hi lo hi. Tua hangin kiniamkhiat lungsim kisam
hi. Topa tungah ki-apna lungsim tawh Lai Siangtho sim ding kisam hi. Lai
Siangtho tungah a citak mi in ama ngaihsutna tawh kituak lo hi phial taleh, Lai
Siangtho cih bangbangin pulaak hi. Lai Siangtho tungah a citak mi in Lai
Siangtho kammalte zahtakin ama ut bangin gen lo hi. Mi kimkhat in amau deih
bangin Lai Siangtho kammal khek uh a, amau hoihsak bangin a khiatna gen uh hi.
Tua bangte in Lai Siangtho thuman pan lampialna hi.
“Pasian kammal i sim ciangin Pasian
zahtakna, thungetna a om keileh Pasian theihtel nopna, Ama deih bangin nuntak
nopna lungsim om lo ding a, lungsim in uplohna tawh kidim ding hi; Lai Siangtho
uplohna khang semsem ding hi. Galpa in tua bang lungsim ukcip ahih manin Lai
Siangtho a khiatna a pulaak in a man lo vive hong suak hi. Bang bangin leitung pilna nei uh hi taleh
kampau, gamtatnate in Pasian deihna tawh a kituah keileh Lai Siangtho a theihna
uh zong a man lopi hi pah a, tua bang mite thugen in muanngam thamcing lo hi.
Lai Siangtho sungah khialhna, a gen thu a kibang lo a kankan mi in Lai Siangtho
hong hilh thuman mu thei lo hi. Kitel takin hong kihilh hi mah taleh, ngimna
man keileh uplohna, muanmawhna khang semsem hi.” Ellen G. White, Steps to Christ,
110, 111.
KIKUP DING DOTNATE
1. Lai Siangtho sung thute theihtel
nadingin bang hangin kiniamkhiatna leh thungetna tawh Lai Siangtho sim ding,
bang hangin thupi mahmah hiam? Lai Siangtho i tel nadingin bangci lungsim puak zia-te kisam hiam?
2. Lai Siangtho sungah a hamsa, telhak
thute a om pen lamdang-in ngaihsut ding
kisam hiam? Tua thute bek tham lo piansak kimlepaam nate thu i telzawhloh tampi
om hi lo hiam? Gentehna-in tuni dongin tui tawh kisai i telzawh loh thu tampi
om hi.
3. Adventist thu-um mi khat ihihna tawh
koi bangin Lk. 23:43 mite na hilh ding hiam? Mi tampi in a khiatna a pulaak uh
tua ni mah-in Jesuh in guta pa tawh vantungah om takpi ding hiam? A khiatna mantak in bang hi ding hiam? Hih thu i tel nadingin Jn. 20:17;
Thuhilhsia 9:5; 1Kor. 15: 16- 20 cihte
in hong huh thei ding hi.
