Feb 22, 2020
Pasian
um lo Missionary
Jan Haugg, 30
Jan Haugg in kim le paam nate kemcing ding
simloh thudang thupi ngaihsut lo hi. Amah pen kum 18 cingkhin, sangkahlai
hi-in, German party khat tawh kim le paam nate tawh kisai nasepna khatah kihel
hi.
University a sangkahna-ah a lawmte tawh
kim le paam nate kepcingna tawh kisai video en khawm uh hi. Annek, khualzinna,
nasepna khempeuh ah kim le paam niinsak thei dingte khempeuh pelh hi. A
kimuhpih mite tungah zong hih thu gen kawikawi hi. Na khempeuh cilbawl ding
hilh hi. Jesuh thu a gen loh hangin amah pen missionary nasem khat hi. Kim le
paam nate kepcingna pen biakna bangin
ngaihsun hi.
Norway khuapi Oslo ah nasep hong kipan hi. Innsap man tamlua ahih
manin ama piak zawh ding mu lo zo hi.
Hun khatlai-a a kimel theih innkuan khat hong phawkin tua innkuante
email laikhakin huhna ngen hi. Hih innkuante vaihawmsakna tawh Jan in Oslo ah nasep hong kipan thei hi. A veng a omte in
Adventist thu-um mi vive hi. Jan in ahihleh Pasian om lo hi, a ci mi khat
hi. Hih Adventist thu-um mite in amau
biakna sungah lut ding hanciam uh a, ahi zongin amau biakna ka zuihpih ngei kei
ding hi,ci-in khentat hi.
Kha thum paikhin,bang mah kilamdanna om
lo hi. Jan in Adventist sangnaupangpihte tawh kikhawl nuamsa hi. Sang thukhun
pan pialin zu dawn a, a lawmte in it veve uh hi. Ama kisapnate huh ahih manun
Jan in a sangkahna nuamsa semsem hi.
Ni khat Adventist khangno 50 val bang
tawh Norway khanglamah khualzin dingin zawn uh hi.Jan in gam sung, mual tungte
muhnopsa-in kim le paam limtak kep ding a thupitna phawk semsem hi.
Khangno makai khat Joakim Hjortland in
Lai Siangtho thusinna nei dingin Jan zawn hi. Jan in Lai Siangtho sin ding pen
lunglut lo hi. Ahi zongin ut keng lah ci nuamsam lo hi. Tuni man keng in,
zingteh sin ni, ci hi. A zingciangin
Joakim in Jan tungah zanni a i gen,
Lai Siangtho thusinna nei ding i cih na phawk hiam, ci-in dong hi. Tua
ni-in Jan in Lai Siangtho thusin kipan thei hi.
Lai Siangtho up nadingin Pasian kammal
hi, cih upna kisam masa hi. Jan in Pasian um lo hi. Joakim in Daniel 2 sung a
thute genpih a, Babylon, Medo Persia, Greece leh Rome thute banah tuhun Europe
thupiangte Lai Siangtho genkholh bangin tangtung takpi ahihna thute zong hilh hi.
Olso khuapi ah Adventist thu-um mite in
zong tua bangin Lai Siangtho thusin pihna nei uh a, Jan in Khristian suak
dingin ka ngaihsun ngei kei a, ahi zongin Pasian pen om takpi hi, cih ka
ngaihsun thei hi, ci-in pulaak hi.
Tu-in Jan in kum 30 val khin a,
Bogenhofen Adventist Seminary ah pastor dingin Lai Siangtho sin hi. A sangkah a
zawh khit ciangin Germany Nisuahna lamah Pasian thu-um lo mite lakah Pasian
thugen dingin geelna nei hi. Kim le paam nate
thupitna a gen mite in mihing
hanciamna bek tawh lawhcing zo lo ding uh ahihna thei-in Jesuh Khrih makaihna
tawh lawhcinna ngah thei ding ahihlam mite theisak hi. Amaute in Jesuh lo-in
missionary nasemte hi. Jesuh lo-in tawntung nunna sung nungta lo ding uh hi.
Tu quarter leitungbup Sabbath 13na sumpi
in Germany gam Darmstadt khua-ah Marienhole Sang ah kipuak ding hi. Ei
conference in MUC huam sungah kisapna dung zui-in kizeek ding hi.
