LESSON 6 Feb 1-7 HAIGAMTATNA PAN KISIATNA

LESSON 6  Feb  1-7

HAIGAMTATNA PAN KISIATNA

Sabbath Nitak

Tu Kaal Sung Sim Ding: Dan. 5; Mang. 17: 4-6; 14: 8; Late 96: 5; Kol. 1: 15- 17; Rom. 1: 16 – 32; Thuhilhsia 8:11.

KAMNGAH: “Amah in hun le khuahunte kheel a, kumpite koihin lah a lakhia hi. Amah in mite tungah pilna leh theihna a pia hi.” Daniel 2: 21.

    Pasian Kammal in mihing kiliatsakna lamdang takin a  bei-na thu Daniel 5 sungah kipulaak hi. Nebuchadnezar in Pasian a theihtel nadingin hun sawtpi kisam hi. A tupa Belshazzar in tua bang hi lo hi. Belshazzar in biakbuk sung a nate siantho-na susia hi. Tua bangin a gamtat in Pasian mahmah a langdo-ahi hi. Tua hi-in Belshazzar in, Daniel 8 sung a ‘ki-neu’ in bangin mawhna hai dimletsak hi; Pasian biakbuk bulpi langpan hi. Pasian in Belshazzar vangliatna a lakkhiatna tawh hun nunung ciangin Amah a langpang mite tungah a bawlzia ding a hong hilhkholhna ahi hi. Daniel 5 sung thute in BC 539 a piang hi-in, Babylonte in Medo- Persia mite mai-ah gallel uh hi.  Hih in Daniel 2 sung a genkholhna a om bangin Babylon limcing kham tawh kibawl milim lutang hun bei-in  Medo Persia limcing ngun, kipat hun ahi hi. Pasian in  leitung kumpite tungah ukna nei ahihna kilang hi.  

Sunday                  Febuary 2

Belshazzar Pawibawl

     Dan. 5: 1-4; 1: 1, 2 sim in. Belshazzar in tua zahin siatna bang bawl hiam? Koi bangin a pawibawl in ama nunzia pulaak hiam? Ama gamtatzia leh Mang. 17: 4-6 sung enkhawm in. A kibang thu na mu hiam?

     ____________________________________________________________________     ____________________________________________________________________

     Kumpipa in Jerusalem biakbuk sunga vante zu dawn nadingin kizang dingin thupia hi. Hih vante in Nebuchadnezzar in Jerusalem panin lakhia-in, ama pasian biakna inn sungah koihin a zat uh vante hi. Nebuchadnezzar in  Pasian adingin kizang nate zahtakna tawmno khat bel nei hi. Ahi zongin Belshazzar in ahihleh Pasian adingin kizang vante zudawn nadingin siatna-ah zang ngam hi.

     Pasian adingin kizang hai-te tawh zudawnin, Belshazzar in kham le ngun pasiante, sumngo leh sik pasian, sing leh suang pasiante minphatna-in zang hi (Dan. 5:4). Hih thu-ah a kizang van nam guk om hi. Babylon mite in malgawm phazah sim nadingin, tuhun a kizang nambat 10 siksan lo-in,  nambat 60 siksan uh hi (sexagesimal system). Van kizang (Dan. 5:4) vekpi malpha zah ‘guk’ in Babylon biakna in a kicing biakna leh a pasiante limcing hi. Hihte in Nebuchadnezzar mangmat milimpi, tungman hi lo-in a lu pan a khe dongin kham leh na tuamtuam tawh kibawl tua milimpi pulaak kik hi. A mangmat sung a bangin a tawpna-ah a kikhukkhia suangtum, hun nunung a Babylon, a limciin leitung kumpite tungah Pasian in a thukhenna hong hilh hi (Dan. 2:44, 45).

     Mangmuhna Bu sungah genkholhna om bangin, Belshazzar pawi bawl in hun nunung a Babylon omzia ding limcingkhol hi. Belshazzar bangin hun nunung a numei Babylon in a khutah kham tawh kibawl hai tawi-in, minam khempeuh zukhamsak hi. A khiatna in tuhun Babylon in a man lo upna leh thuzuihna, biakpiakna man lo tawh leitung mite siatna sung makaih a, (Mang. 17: 4-6), a sawt lo-in tua Babylon in siatna thukhen thuak ding hi. Tua thukhenna ni hong tung takpi ding hi.

    

     Koi bangin kim le paam, mihing tatzia ngei-nate in Pasian kammal zahtak lo, simmawh hiam? Bangci bangin tua bang siatna sungah kihel lo dingin kidawm ding i hiam? Na lawmte tawh kikum in.

MONDAY                FEBUARY 3    

KUAMA THEIHLOH LENGLA

    Dan. 5: 5-8 sim in. Bang thu piang hiam? Bang hangin kumpipa in tua bangin cimawh hiam? Bangci bangin Daniel 2 tawh kibang thu kimu thei hiam? Bang hangin tua in thupi hiam? Late 96:5; Kol. 1: 15- 17.

_____________________________________________________________________

_____________________________________________________________________

    Nebuchadnezzar in a cihmawh ciangin a mipilte a kaihkhop bangin  (Dan. 2:2; 4:7) tu-in zong Belshazzar in a mipilte, Chaldeans, thuthuk tuamtuam a theite tungah kawm tunga kigelh lai a khiatna gen dingin thupia hi.  Babylon mipilte in zong a hanciam theih zah uh sit lo-in a khiatna a genthei a omleh pahtawi-na lianpi a piak ding a kamciamte in (1) kumpite silh a puangsan kumpi puan; nidangin kumpite in silh uh hi (Esther 8:15) (2). Mipi limciinna kham ngawng-awh (Pian. 41: 42). (3). Babylonah a lian pen thumna-ah kikoih ding hi. Hih kamciam thumna in nidang Babylon ki-ukzia hong hilh hi. Bang hang hiam cihleh tua hunin Belshazzar in gam uk lianpen nihna hi-in, a pa Nabonidus tawh gam uk mangpi semkhawm uh hi. Tua hi-in, Belshazzar in a pa leh ama khitah a lian pen thumna ding kamciam pia hi.  Tua bangin kumpipa in kamciam a piak hangin a theihnop thu a pulaak thei mipil khat beek om lo hi.

    A sia penpen in kumpipa in a theihnop thu a pulaak theite kiangah pai lo-in, a zonna mun khial hi. Tua kawm tungah kigelh a khiatna gen thei Babylon mipil kuamah om lo hi. Amau pau zat Aramaic tawh kigelh hi napi, tua kigelh lai a khiatna thei zo mahmah lo uh hi. Hih in Topa in Isaiah a piak thu hong phawksak hi: “Tua ahih ciangin en un, hih mite tungah a tumdang le a lamdang ahi a lamdang nate ka bawlkik ding hi. Amau’ mipilte’ pilna kisia ding a, amau’ thu mutheite’ thu muhtel theihna kiseel ding hi” (Isa. 29: 14). Hih thu a pulaak khitteh Paul in hih bangin ci hi: “Tua ahih manin tuhuna mipilte, miteite, le thusel a siamte, bangin kimang ahi hiam? Hih leitung pilna pen haina a suahsak khitna kilang khinzo hi. Pasian in ama pilna hong zang a, mihingte in amau’pilna tawh pasian a theih zawh loh nadingun a bawl hi. Tua ahih manin mite in, “ A haihuai thu,” ci-in a ngaihsut uh i thuhilhna a umte, Pasian in hotkhiatna a piazaw hi” (1Kor. 1: 20, 21). Thuman in thupi mahmah ahih manin mihing in thei kha lo-in a om loh nadingin Pasian in thuman hong kilang khia-sak hi.

    Leitung pahtawi-nate in a sawt lo-in beimang ding a, tua pahtawi-nate in bangmah man nei lo hi. Leitung tawh kipawl thu le la, na khempeuh in beimang ding ahih manin, bang hangin i sepna khempeuh in tawntung thute mitsuan ding thupi hiam?

Tuesday              Febuary 4

KUMPINU HONG LUT

     Dan. 5: 9-12 sim in. Kumpipa in thei khin ding a kilawm Daniel’ thu kumpinu in bang pulaak hiam? Kumpipa in Daniel a mangngilh in kumpipa nunzia bang kilangh hiam?     ____________________________________________________________________     _____________________________________________________________________

     Pawi bawlna innpi sung a om mite in patau lungmang khin uh hi. Bang hang hiam cihleh a lamdang khut in kawm tungah laigelh hi. Tua bang laitakin kumpinu hong lutin a cimawh kumpipa tungah, Nebuchadnezzar hunlai-in mangmat leh a khiatna a pulaak khia thei Daniel thu va pulaak hi. Belshazzar in ama mai-a kumpite thu ngaihsun hileh hamsatna a tuah ciangin huhna a ngah nading mun thei pah ding hi. Kumpinu hong lutin kumpipa tungah Daniel thu a va pulaak in kumpipa in cimawh taktak hi, cih kilang hi.

     Kawm tungah kigelh laimal a sim thei ding leh a khiatna pulaak thei ding a gam sungah mi khat bek om hi, ci-in kumpinu kampau in Belshazzar a thuhilhna hong suak hi. Kumpinu in Belshazzar tungah Daniel nunzia pulaak hi. Kamsang Daniel in Siangtho Pasian’Kha Siangtho nei ahih manin, khuavak, theihtelna, vantung pilna, lungsim hoih, thu theihna tawh kidim hi. Amah in pilna tawh kidimin mang khiatna, thu haksa-te leh thuthukte hilhcian theihna nei hi. Daniel in Nebuchadnezzar mipilte, khutlam theite, aisaan siamte, Chaldean tungah makai hi (Dan. 5: 11, 12).

     Hih munah bang hangin Belshazzar in Daniel phawk lo hi ding hiam, ci-in ngaihsut huai hi. Hih thu Lai Siangtho in hong hilh lo hi. Ahizongin  Belshazzar in kumpi a sep zawh kum thum  khit ciangin (Dan. 8: 1, 27), Daniel in kumpipa nasem nawn lo kha ding hi.  Bang hang hiam cihleh Daniel teekta hi kha ding hi. Tua hunin Daniel in kum 80 val khin ding hi. Kumpipa in uham khat sangin khangno khat gam makai dingin deih zaw hi ding hi. Kumpipa in Daniel a phawk nawn lohna a hang in, kumpipa in Daniel Pasian biakpih nuam lo hi kha ding hi. Bang bang hi taleh kumpipa in Daniel mangngilh pah cih pen lamdang hi.

     Rom. 1: 16- 32 sim in. Bangci bangin a beisa hun bek lo-in tu-in zong thuman zungpi pulaak hiam?

Wednesday                     Febuary 5              

KITAWIKHAI-IN LEEK ZO LO

    Dan. 5: 13- 28 sim in. Daniel in bang thu hangin kumpipa in a sawt lo-in sih ding hi, ci-in gen hi ding hiam?

______________________________________________________________________    _______________________________________________________________________

    Kumpipa in cimawh lua mahmah khin ahih manin a tawpna-ah Daniel thudong dingin ngaihsun hi. Ahi zongin thu bangin thu va dot ding pen a lungtung zo taktak lo hi. Hih in Belshazzar in Daniel tungah a lungsim puakzia sangin Daniel biak Pasian tungah a lungsim puak a pulaak hi zaw hi. Belshazzar in kawm tung a kigelh laimal leh a khiatna a gen theite letsong tampi pia dingin a khap hangin Daniel in tua letsongte nial hi. Tua bang hamphatnate a nial in Daniel nunzia manpha ahihlam kilang hi. Daniel in kumpipa letsongte in  man nei lo ahihna  thei hi.Daniel in Belshazzar khialhna thu thum pulaak hi:                                                                  (1)Belshazzar in Nebuchadnezzar thuak khak thute kitheihmawh bawl hi.  Tua hi keileh Nebuchadnezar bangin kisikin kiniamkhiat ding hi.   (2). Belshazzar in biakbuk a kizang hai-te tawh zudawnin, a pasian minphatna-in zang hi. Daniel in milim pasian in nate nam guk tawh kibawl ahihna pulaak khin hi. (3). Belshazzar in, nuntakna leh a hihna khempeuh a uk Pasian min a thansak ding kin lo hi (Dan. 5: 23).  Kumpipa khialhnate a pulaak khitteh Daniel in kawm tung a kigelh laimal a khiatna gen pan hi. Tua laimal in Aramaic pau, tatna (verb) kammal thum  kihel hi. A deihna bulpi taktak kumpipa leh a mipilte in a theih loh nading uh om lo hi. A khiatnate in MENE – kisim; TEKEL – kitawikhai, PERES – kikhenkham cihna hi.

    Medo-Persia galkapte in Babylon khuapi kongkhak dong tung khin uh a, kumpipa thudot mipilte in kawm tung a kigelh tua laimal ngaihsun thei ding uh hi. Ahi zong amaute in kumpipa tungah thu hoih lo bang mah pulaak ngam lo uh hi. Daniel bek in Belshazzar tungah tua lai kigelh a khiatna pulaak hi. MENE, Pasian in na kumpi gam hong simsak khin a, zo khin hi.TEKEL, hong kitawikhai hi ahi zongin na leek zo kei hi. PERES, na gam kikhenkham a, Medes leh  Persia mite khut sungah na tung khin hi (Dan. 5: 27, 28), ci-in hangtakin gen hi. Hih thu in nuam huai thu, lungdamhuai thu hi lo hi.

   

    Kumpipa tungah thakhatin thukhenna hong tung hi. Pasian thukhenna-ah koi bangin Pasian muang ding i hiam? Thuhilhsia 3: 17; 8:11; Matt. 12: 36; Rom. 14:12.

Thursday                  February 6

BABYLON KISIATNA

     Dan. 5: 29 – 31; Mang. 14; 8;  16:19; 18:2 sim in. Belshazar kisiatna in hun nunung Babylon kisiat ding bang hong hilhkhol hiam?

________________________________________________________________

________________________________________________________________

    

Belshazzar in khial hi taleh a gen bangin a sem mi hi. A zak thu in thu hoih lo hi napi, Daniel gen thute tawh a lungkimin letsong tampi pia hi. Daniel pulaak thute nial lo-in kumpipa in Daniel biak Pasian vangliatna phawk thei hi. Kumpipa tungah a pulaakma-in kumpipa khap letsongte nial a, ahi zongin kumpipa theihnop thu a gen khit ciangin, tua letsongte sang hi. Bang bang hiam cihleh tua letsongte a lak hangin a gen thute khel kik thei nawn lo hi. Tham lo-in tua letsongte in man nei lo hi. Bang hang hiam cihleh a sawt lo-in Babylon vangliatna a bei ding hi ta hi. Tua hi-a, thusiamna siksanin Daniel in kumpipa piak letsong sang hi. Babylon gam uk a lian pen thumna ahih zong nai tawmvei sung petmah hi ding hi, cih mu khol hi.

     Daniel genkholh bangin Babylon kisia takpi hi. Kumpipa in a gam makaite tawh zudawnin nuamsa-in a om laitakun, tha khatin galte in khuapi umcih uh a, kido man lo-in khuapi kisia hi. Tangthu-kan Herodotus in a genin-ah Persia-te in Euphrate Gunpi khaktanin mun dangh heikhia uh a, khuapi sung luh zo uh hi,ci hi. Tua zan mahin Belshazzar in thahna thuak hi. A pa, kumpi Nabonidus in khuapi nusia-in gam uk kumpi thak tungah amah mah va ki-ap hi. A minthang mahmah leitung kumpi, kham lutang Babylon limcing, in beimang hi.

     “Belshazzar in a nungta Pasian deihna bangin gamta-in, Amah theih theihna nei dingin hun hoih tampi kipia hi. A pu Nebuchadnezzar in mi lakah om thei lo-in gam sungah a nuntakna zong phawk hi. A vanglian Pasian in a kiliansak, a vangliatna kiphatsakpih kumpipa minthanna lakkhiatsak hi. A kumpi inn pan paikhia-in ganhingte lakah a nungta kumpipa  thuaknate zong za-in thei hi. Ahi zongin Belshazzar in silesa gualnopna tawh kidimin, ama deihna a zuihna hangin a mangngilh ngei loh ding thukhen thuhilhna thuak hi. Nebuchadnezzar kiliatsak bangin Belshazzar zong kiliansak a, gimna thukhen tawh kipelh lo hi.  A kisik nading hehpihna tawh hun hoih a kipia-te a mawkna-in beisak hi. Thuman a thei ding dinmunah kikoih hi napi-in tua hun hoihte kin lo-in mawk beisak hi.” Ellen G. White, Bible Echo, 2 April, 1898.

     Thuman theihtelna na neih nadingin hun hoih nei hi lo na hiam? Hih in bang hong hilh hiam? Theih ding thuman om khempeuh thei khin zo ing, ci-in i pulaak hun a om ding hiam?

Friday         February 7

Ngaihsutbeh Ding: Nidang kumpite in  pawi lianpipi a bawl uh ngei-na khat hi. Kumpite in a hauhna uh, a vangliatna uh, galte a kihtak lohzia cihte pulaak dingin tua bangin gualnopna pawi-te bawl zelzel uh hi. Tua bang pawite thu khempeuh i thei kei zongin, tua bangin Babylon kumpipa in pawi a bawl laitak hun sungin Medo-Persia galkapte in do uh hi. Mihing hihna tawh Babylon in a kihtak ding kuamah om lo hi.A kulh muanhuai mahmah hi. Kum tampi sung a khamkhop ding uh nek ding, dawn ding khol uh hi. Bang hang hiam cihleh Euphrates Gunpi in Babylon khuapi sung kantanin a luangkhia gunpi khat hi. Tua bangin a gal muanna tawh kidim ahih manin zukhamin, pawi bawl hun sungin galte in khuapi umcih uh phawk kha lo uh hi. Pawi bawlin lungdamna panin thaangtatna tawh kidim uh hi.

    Topa vangliatna leh mihing kiliatsakna enkak hi lehang mihing in bangmah manlo ahihna kimu hi. Pasian in Daniel tungtawnin kumpipa in thuman thutak theihtheih nading hun hoih tampi pia a, “ Na nuntakna leh na hihna khempeuh a hong uk Pasian na zahtak thei kei hi,” ci-in pulaak hi (Dan. 5: 23).

    “A beisa thupiangte khempeuh in tuni-in thu hong hilh hi. Pasian in gam khat leh mimal khat ciat adingin masuan khat ciat hong guan hi. Tu-in mi khempeuh in a khial thei lo Topa in a hong tawikhai hi. Mi khat ciat in i zuih ding lampi deihtel theihna hong kipia hi. Pasian in na khempeuh tungah ukna nei-in Ama deihna bangin na khempeuh in tangtung ding hi.” Ellen G. White, Prophets and Kings, 536.

Kikup Ding Dotnate

1.  Sunday ni-a dotna, kimlepaam, ngei-na cihte in Pasian thuman a kinlohna uh na lawmte tawh kikum in.  Koi bangin, bang lampi tawh thuman kinlohna zo ding i hiam?

2. Hotkhiatna thu in thuman i theihna hi lo-in, koi bangin i theih thuman nuntakpih ahih zawkna in bang hong hilh hiam? Dan. 5:22.

3. Dan. 5: 23 sim in. A thupi thuman bulpi bang hong hilh hiam? Pasian langpanna, Pasian in Piangsak Pa hi bek lo-in, hong KEMPA, nuntakna hong PIAPA hi lo hiam?

4. Kawm tungah kigelh laimal a sim theih loh hangin, Belshazzar in patau mahmah hi (Dan. 5:6). Kumpipa thuak thu in, mihing in mawhna, siatna tawh nungta ihihna hong hilh hi lo hiam?