LESSON 10 Feb 29 – Mar 6 MAWH KISIIKNA PAN KHA HEHNEPNA

LESSON 10  Feb 29 – Mar 6

MAWH KISIIKNA PAN KHA HEHNEPNA

Sabbath Nitak

Tu Kaal Sung Sim Ding:Dan. 9; Jer. 25: 11, 12, 29; 2Kum. 19: 15 – 19; Matt. 5: 16; James 5:16.

KAMNGAH: “ Topa aw, kong thungetna uh hong za inla, ka mawhna uh hong maisak in. Topa aw, hong ngai inla hong sem in. Mi khempeuh in Pasian na hihlam a hong theih nadingun hong zekai kei in. Hih khuapi leh hih mite na neihsa ahi hi,” ka ci hi (Daniel 9: 19).

    Lai Siangtho sungah a thupi mahmah thungetna khat in Daniel 9 sungah kimu thei hi. A lungkham hunin Daniel in a mai-ah om hamsatna khempeuh thungetna tawh nawktan zo hi. Kuamah in a theih zawh loh Pasian a thei lo kumpipa mangmat hangin Daniel leh a lawmte in a sawt lo-in thahna thuak ding uh hi ta hi. Hih thu hangin Daniel in Topa tungah thungen hi (Daniel 2). Pasian tungah thungen lo-in kumpipa tung bekah thungen ding thupiak om taleh, Daniel in nisim a neih ngei bangin Jerusalem mai-ngatin thungen veve hi (Dan.6).  Daniel thungetna (Dan. 9) i ngaihsut ciangin Daniel 8 sung a zingsang leh nitak 2300 genkholhna in Daniel tungah huzap lianpi nei hi, cih i phawk ding kisam hi.

    A huampi-in tua genkholhnate Daniel kihilh hi  mah taleh  amah a hilh vantungmi nihte kiko-na thu  Daniel in tel zo lo hi. “Ni 2300 khit ciangin biakbuk kisuansuah ding hi’ (Dan. 8:14).   Daniel 9 sungah, tu-in  tua genkholhna tawh kisai thu kamsangpa tungah kihilh beh hi. Hih hun sung mahin kamsangpa in lungsim khempeuh tawh a thunget Pasian in dawng hi.

Sunday           March 1

 PASIAN KAMMAL  THU BULPI

     Daniel 9: 1, 2 sim in.  Daniel in  Topa kammal (Lai Siangtho) limtak sim a, a sim thute telcian hi.  Daniel sim Lai Siangtho in bang hi ding hiam?

     _____________________________________________________________________     ______________________________________________________________

    

A thunget i ngaihsut ciangin Daniel in, Pasian in Moses leh kamsangte tungah a pulaak Ama thute limtak simtel hi,cih kilangh hi. Jeremiah laizial a simna panin  saltan hun sawttan ding in kum 70 sung hi ding hi, cih Daniel in mukhia hi (Jer. 25: 11, 12; 29:10).  Daniel in a nuntak hun in a thupi genkholhna bang hun sungah nungta ahihlam kitheitel hi.

     Daniel thunget hun in BC 539 sung hi. Hih kum pen Persia Empire in Babylon a zawh kum hi. Tua hi-in Nebuchadnezzar in Jerusalem do-in biakbuk a sukkhiat kum 70 khengval khin hi. Tua ahih manin Jeremiah genkholh bangin Pasian mite in a sawt lo-in a gam uah ciah kik ding uh hi.  Topa Kammal muang ahih manin Daniel in a mite tungah na lianpi khat piang ding hi, cih  thei hi. Pasian in a genkholh bangin Babylon-ah saltan hun bei ding hi ta ahih manin Jew mite in a gam uah ciah kik ding uh hi ta hi.

     Ama hunlai-a Lai Siangtho a simna tungtawnin Daniel in a mipihte mawhna in bang zahin lian cih mu tel hi. Bang hang hiam cihleh amaute in Pasian tawh a thuciam uh mangngilh uh hi. Pasian tawh a kizopna uh kisia hi. Tua hangin amaute in a pelh theih loh uh mi gamah saltang uh hi (Siam. 26: 14- 45). Tua hi-in  Pasian pulaak thute a kantelna tungtawnin Daniel in genkholhna hunte theitelin, a mipihte aitangin Pasian tungah thuumna nei hi.

     Leitung hun beikuan sungah a nungta ihih manin a beisa hunte sangin Lai Siangtho sim a, Pasian kammal bangin i nuntak ding kisam mahmah hi.  Lai Siangtho bek in tuhun in bang hun hiam cih hong hilh hi. Lai Siangtho in a sia leh a pha kido-na hong hilh a, leitung in siatna tawh beisiang ding a, Pasian in tawntung Ama Gam hong phut ding hi. Lai Siangtho simna-in hun tam zang semsem hi lehang tulaitak i dinmun, leitung kihei-dan cihte a kipan leitung in siatna tawh kidim hi taleh lametna tawh nuntak theihna hong hilh ding hi.

     Bangci bangin Lai Siangtho in leitung nate in a mawkna ahihlam hong theitelsak hiam?

Monday                    March 2

HEHPIHNA ZUAN DINGIN THUUMNA

     Dan. 9: 3-19 sim in. Daniel in bang siksanin hehpihna ngen hi ding hiam?

________________________________________________________     _____________________________________________________________________

    

Daniel thungetna panin theih ding thu pawl khat kimu hi. (1). Bang thu hangin a mipihte in gim thuakna uh hi ding hiam ci-in a muhkhiat theih nadingin Daniel in thungen hi lo hi. Daniel in a mipihte saltanna a hang theitel hi. A thungetna-ah Daniel mahmah in saltanna a hang pulaak hi. “Topa  kote Pasian thu mang lo-in  Ama nasem kamsangte tungtawn a hong piak thukhamte ka zuih loh uh hangin hong hehpihlai hi” (Dan. 9: 10), ci hi.

     A nunung pen Daniel’ mangmuhna tawh kisai Daniel 8 a nunung lamah nitak leh zingsang 2300 tawh kisai, amah mah in telzo lo hi (Dan. 8: 27).  A nihna-ah Pasian in a mite a hehpih ding ngetna, A mite in mawhin siatna tawh kidim uh hi taleh Pasian in amaute mawhna maisak dingin kiging tawntung hi.  Hih in hotkhiat lungdamna thu hi. Mihing in amah leh amah kihonkhia zo dingin hoihna bang mah nei lo hi. Hehpihna ngah ding kilawm lopi mah, mawhmai-na ngah ding kilawm lopi mah Topa tung panin hehpihna, mawhmai-na ngen uh hi. Hih in Pasian mai-ah mimal khat ciat i dinmun ding hi lo hiam?

     Dan. 9: 18, 19 sim in. Topa in Daniel thunget pia dingin Daniel in bang siksan hiam?

____________________________________________________________

________________________________________________________________

    

Pasian in Daniel thunget a piak theihna khat in Daniel in Pasian min zahtak hi; a min phat hi. Daniel in ama nopsak nading leh a mipihte nopsak nadingin thungen hi lo-in, Pasian min a than nadingin thungen hi (Dan. 9: 17 – 19).  Daniel in Pasian min ading bekin thungen ahih manin a thunget Pasian in pia hi.

     2Kum. 19: 15- 19 sim in.  Koi bang danin Hezekiah thunget in Daniel thunget tawh kibatna khat nei hiam? Matt. 5:16 in Pasian min i thansak theih dan ding bang lampi hong hilh hiam?

Tuesday                        March 3   

MI ADING THUNGET A MANPHATNA

     Dan. 9: 5-13 sim in. Daniel a kipan mawhna hangin Judah gamin gimna thuak hi.  Daniel in tam veipi “ ka mawh khin zo uh hi”  ci-in a pulaak in thupitna bang nei hiam?

________________________________________________________________

__________________________________________________________________

    

Lai Siangtho sungah mite adingin thungetsakte lakah Daniel in a mipihte adingin a thungetsak zong kihel hi. Tua bang thungette in Pasian lungsim sukha hi; tua bang ciangin amaute in gim thuak ding thukhenna tawh kipelhsakin, a galte khut sung panun suakta uh hi. Pasian in Jew khempeuh suksiat ding a sawmlaitakin  Moses in amaute adingin a thungetna hangin amaute in gimna tawh kipelh uh hi (Pai. 32: 7 – 14; Gam. 14: 10 – 25).  Gam sung khempeuhah nasia takin kialpi tungin a cihmawh laitakun,  Elijah thungetna Topa in dawng ahih manin, guahzu-in leitang in nek ding an pia kik hi (1Kum. 18).

     I lawmte a kipan mite adingin thu i nget ciangin Pasian in i thunget hong pia-in a kisam bangin na hong sem hi.  Khat veivei ciangin Pasian in i thunget hong pia pahpah lo hi. Ahi zongin Pasian in A mite kitangsapna mangngilh ngei lo hi, cih i phawk ding kisam hi (James 5: 16).

     Daniel in a mipihte leh Pasian kikaalah palaai-in om hi. Lai Siangtho a sinna tungtawnin kamsangpa in a mipihte in Pasian thukham palsatin mawhna tawh kidim uh a, Pasian vauhilh kholhna a thudonlohnate uh mu khia hi. Mawhna, siatna in a vukcip laitak mahun Daniel in  a mipihte dam nading, mawhmai-na a ngah dingun thungetsak hi. Daniel in mipihte bangin mawhna siatna tawh kidim a mawhmai-na kisam ahihlam amah leh amah kiphawk hi.Daniel nunzia in eite adingin Pa mai-ah a va ding Khrih, Palaai limcing hi (John 17). Ahizongin  Danial in Khrih tawh a kibat lohna tampi nei hi. Khrih in mimawh hi lo hi (Heb. 4: 15) Tua hi-in mawhmai ding thunget kisam lo hi; mawhmai nading biakpiakna a piak kul lo hi (Heb. 7: 26, 27). Ahi zongin Khrih in mawhnei mi khat bangin hong nungta hi. “Khrih tawh i kipawlna hangin eite zong Pasian tawh a kibangin midik i suahtheih nadingin mawhna a nei lo Khrih pen eite tang dingin Pasian in mawhnei mi a suaksak hi” (2Kor. 5: 21).

    

     Na hoihna, siantho-na, dikna, gamtat hoihna khempeuh gawmtuah inla, Pasian maipha leh hotkhiatna ngah nadingin Pasian vantungmite mai-ah a va puak hi lecin, Pasian in lehdo langpan gamtatna-in ciamteh ding hi.” Ellen G. White, Faith and Works, 24.  Hih in eite aitangin  mawh hong thuumsak Palaai i kitangsapna hong hilh hi lo hiam?

Wednesday                     March 4

MESSIAH NASEP

     A mipihte adingin Daniel in a thungetna sungah thu guipi nih kihel hi: a mipihte mawhna leh Jerusalem kisiatna pulaak hi. Pasian in kamsangpa thunget pia hi. Messiah nasepna tungtawnin minamte in hotkhiatna ngah a, biakbuk in kisiansuah ding hi. Pasian in Daniel thungetna bangin thakhatin sem pah hi. Messiah nasep in minam khempeuh in hotkhiatna ngah ding hi.

     Dan. 9: 21- 27 sim in.  Nipi kaal 70 sungin a kizo siang ding nasep in bang nasep hi ding hiam? Bang hangin tua nasep in Jesuh bek in sem thei ding hiam?

________________________________________________________________________     ______________________________________________________________________

    

(1). “Gamtat khialhna” Hebrew ‘pesha’ cih kammal in khentatna tawh thukham palsatna, mawhna hi, cih thei napi-in mawhna bangin ngaihsut lohnate a pulaak kammal hi (Pau. 28: 24).  “Pesha” kammal in lungkhuahna tawh Pasian langpanna a pulaak kammalin zong kizang hi (Eze. 2:3). Ahi zongin mihing in Pasian a langpannate Khrih sisan in maisakin, Kalvary pan hong luangkhia dikna hong kipia hi.

(2).  “Mawhna khempeuh a bei nading.” Dik hi, ci-in a hong pulaak ciangin      mawhna khempeuh mai hi. Mawhna hong om a kipan mihing in Pasian deihna cinh zo lo hi. Ahi zongin Messiah in mihing kicinlohna khempeuh hong lakkhiatsakin Ama kicinna hong pia hi.

(3). “Pasian tawh kilem kik nading.”  Paul gen bangin “Tapa sungah Pasian kicinna teng a om nading, singlamteh tunga luang sisan tungtawnin kilemna piangsakin, leitunga om nate hitaleh vantunga om nate hitaleh na khempeuh ama tungtawnin amah tawh a kilemkik-sakna in Pasian lungkimna ahi hi.” Kol. 1: 19, 20. Jesuh bek in mawhna sung pan hong honkhia hi.

(4). “Tawntung Thutang Hong Puak Ding.” Khrih in eite thuak ding khempeuh singlamteh tungah hong thuak khin hi. Tua hangin Pasian tawh kizopna thupha i ngah thei hi. Upna tawh Pasian tung pan hong pai dikna i ngah hi.

     (5). “Genkholhna leh Mangmuhnate Pulaak Nai Ken.” Khrih in amah leh amah a hong kipiak ciangin, Thuciam Lui sunga Ama hong sih nading enkholhna khempeuh tangtung hi. Mawhna hang Ama sihna in kicing hi.

     (6). “Sathau Kinilh A Siangtho Bel.”  Hih munah Siangtho Pen cih in nunna pulaak hi lo-in biakbuk (mun) pulaak hi. Tua hi-in vantung biakbukah      Khrih in palaai nasep a kipat thu pulaak hi (Heb. 8:1).

Thursday              March 5    

GENKHOLHNA TAWH KISAI NI LEH KUM

     Daniel in nitak leh zingsang 2300 khit ciang a mangmuh in a lungsim linglawngsak hi. Bang hang hiam cihleh tua a muh thute tel zo lo hi (Dan. 8: 27). Kum sawm khit ciangin Daniel huh dingin Gabriel hong pai kik hi (Dan. 9:23). A kilaak nunung bel mangmuhna in  Daniel tel zawh loh thute telsak hi. Kaal 70 khit ciangin Messiah in a nasep dingte sem khin zo ding hi, ci-in kilaak hi. Genkholhna ni khat in kum khat (year-day principle) tungtawnin genkholhna nipi kaal 70 in kum 490 sawt hi, cihna hi. A kipat ding hun in Jerusalem kipuahphat kik ding thupiak hun panin kipan ding hi (Dan. 9: 25).  BC 457 kumin Kumpi Artaxerxes in Jerusalem kipuah kik ding thupia hi.

     Ezra makaihna tawh Jewte in Jerusalem puah kik kipan uh hi (Ezra 7). Nipi kaal 70 “kiciangtan” “ kituam koih hi.” Hih in kum 490  sung tawntung a thupiangte in genkholhna kum 2300 sungah om hi (Dan. 8). Kum 2300 a kipat hun leh kum 490 a kipat hun in BC 457 hi. Genkholhna nipi kaal 70 in khen thum kisuah hi: nipi kaal 7, nipi kaal 62 leh a kaal sagihna hi.

     Genkholhna-ah nipi kaal 7 in kum 49 hi. Hih in Jerusalem kipuah kik ding a hun sawttan ding hi. Hih nipi kaal 7 khitteh nipi kaal 62 in kum 434 hi-in Kumpi Messiah hong pai hi (Dan. 9:25). Tua hi-in kumpi Artaxerxes thupiak khit zawh kum 483 in AD  27 hi-in, Jesuh Messiah tui kiphum hi; Kha Siangtho in sathaunilhin hotkhiat nasep kipan hi.

     Nipi a kaal sagih sungin a thupi mahmah thu piang khat om hi. (1) Messiah in a mipihte  pan kihemhia hi ( Dan. 9: 25). Hih in a mite adingin Khrih sihna thuak limcing hi. (2).  Messiah in mi tampi tawh thuciamna kaal khat sung nei hi. (Dan. 9:27). Hih in Khrih nasep leh sawltakte in Jew mite laka a nasep uh limcing hi. A nunung pen kaal in  AD 27 – 34 sung huam hi. ( 3). Hih a nunung pen nipi kaal laizangah meihal biakna leh piaknate khempeuh a bei pulaak hi  ( Dan.9: 27).  Jesuh in a kituiphum khit kum 3 a cin ciangin, Jesuh in meihal biakna leh piaknate a kul nawn lo dingin Amah mah hong si hi. Amah mah hong si ahih manin Ama hong sih ding  genkholhna leh limcingna khempeuh tangtung hi. Ama sihna in a kicing Thuciam Thak  ahih manin ganhing tawh biakpiaknate beisiang hi. Nipi kaal 70 in khen thum a kisuah a nunung pen kaal in AD 34 kumteh tangtung hi.

     Stephen in thahna a thuak takteh hotkhiatna thu in Jew mite bek hi lo-in Gentile mite  lakah kizel hi.

     Dan. 9: 24 – 27 sim in. Messiah hong pai ding kamciam lametnate lakah gal, gimna, gitlohna bei lo hi. Koi bangin  leitung in siatna tawh kidim hi taleh lametna tawh nungta ding na hiam?

Friday                  March 6                                                  

Ngaihsutbeh Ding: Daniel 9: 24 – 27 genkholh nipi kaal 70 leh  koi bangin Dan. 8: 14 in a genkholh ni 2300 -in kizopna nei hiam? Kum 2300 in BC 457 panin 1844 AD ciang huam hi. 1844 AD in vantung biakbuk siansuah kipan hi (Dan. 8: 14).  1844 leh Daniel 7, 8 in biakbuk kisiansuahna thu kipulaak hi. Daniel 7 in a gen thukhenna leh Danie 8 sung thukhenna in AD1844 kumin kipan hi, cih hong hilh hi. Kum 1260 sung upna hangin bawlsiatna thahna a bei ciangin biakbuk siansuah kipan hi. Ahizongin hih hun in Kumpi Jesuh a hong pai-ma leh Ama tawntung Gam hong phut ding lamenin i ngak hi.

KIKUP DING DOTNATE

1.  Lai Siangtho thuthuk a kan mi kimkhat in ni 2300 genkholhna leh            nipi kaal 70 genkholhna in khat bek hi, ci uh hi. Bang hang hi ding              hiam? Siksan ding a om diam?

2.  Daniel in mite ading a thungetsakna in mite ading thungen dingin hong hilh hi lo hiam?

3.  Khrih in eite ading a hong sihna eite lamet, tua bek mah i nei hi. Koi danin hih thu in hong kiniamkhiatsak hiam? A thu zaw-in mite it a, a mawhnate uh maisak ding hong hilh hi lo hiam?

4. Daniel in in a thungetna leh a lamet thu Lai Siangtho siksan hi. A tawpna-ah Judah gam in gal lel a, gam mite namdangte sila dingin kipaipih hi. A gam uh kisia-in a khuapi kisia hi. Tua bang hi taleh a gam uah ciah kik ding lametna nei uh hi.  Lai Siangtho sim leh                              Pasian kamciam simloh koi panin lametna nei ding uh hiam? Pasian kamciamte in lametna hong guan hi lo hiam?