Akhawllo, anungkiklo kalsuanna

To
Nimit: 1/6/2004

Khrist sungah kong it,

Mun tuamtuam khua tuamtuam a om, sanggam u le nau, nu le pate aw, ih Topa Jesu min tawh kong hopih hi. Topa Pasian hong hehpihna thupha in note khempeuh tungah hong tung kim ciat tahen.

Kei pumpi mahmah hong zin kawikawi nuam ka hihhang hong zin zolo kahih manin, lai tawh hong hopih hing. Tuhun laitakin ih pawlpi sungah ki khasiatna tuamtuam om cih, kam lengsawn ka naza zel uh a, ahi takpi ahihleh ci-in ka nadah mahmah uh hi. Zomite ih mibupin tawmkha ih hi-a, mi citawmte nam ih hi hi. Tua sungah SDAte pen tawmcik khat ih hi bek hi. Tua kawmkal ah tu-a bangin kilemlo in, pawl kikhen sawnsawn leng dahhuai mahmah ding hi. Bangbang hi taleh, Mission le Conference pen a kikhen ding hipeuhmah lo hi. Pumkhat ding hi.

 Pawl kikhen ih cih khawng pen , Laisiangtho sunga Pasian deihloh Pawl khenna ahih khak ding lauhuai ka sa mahmah hi. Zomite ki thutuak hileng, Conference zong ngahlah ding hi peuhmah lo hi. Ih pawlpi policy in zong Conference pen ih target lianpi ahi hi. Conference le Mission khen asawm zanzan makaite zong lamdang sakhuai mahmah hi. Makai kisikthei ( a kisikkik thei makai) nei hileng ih pawlpi sungah hibang piang lo ding hi. Itna nei makai , a piangthak taktak makai nei hileng, ih pawlpi sungah hibang piang lo ding hi.

Mission deih in, mission lungsim taktak nei leng, Conference la nuam ding hihang. Mission lungsim ih neih loh manin, Conference a deihlo ih hihlam kiphawk thei leng hoih mahmah ding hi. Mission a lunggulh a kituat teng pen, Mission lungsim nei lo teng , a mannek nuam teng, mi khuta gul man nuam teng hi, cih phawkhuai ka sa mahmah hi.

Pawlpimiten ih theih dinga ka deih mahmah thute in, ih pawlpi pen athu (Theory) in Conference dinkhuan ih ngah nailoh zenzen hangin, a taktak in ih kalsuan ziate le ih nasepnate ah, ih theihloh kalin Conference ading khin, Conference kalsuan dan-a kalsuan khinte hihang. Tua ahih manin, ih kalsuan dante enkik leng, Uupper Myanmar pen, Conference-a ading khin vive, ading zo vive-te hilel hihang. Gentehna in: Khua pawlpi khat ah, pawlpi Sang khat om ci ni. A diakdiak in Conference dinding ih lau pen sya guai zo kei leng cih hipi pen hi. Tua sangah sangsya sawm(10) a om lakah Mission hong piak pen 2 khawng hilel hi. Tua loteng khuatual pawlpite guaih hilel hi. Tua hi a, a tamzaw ei aa hikhin mawk lo hiam? Tua ahih leh bang ahiam ih kihtak ding. Ih theih loh kalin, Pasian in thupha hong pia a, Conference asimdin khin himawk lo ih hiam? Tua ahih leh bang khita lai ding ih hiam? Mi khemsa khawngin tata lai ding maw? A mi, hong it lo-a, ih sumpi bek hong deihngawhte pingpei in omom lai ding maw? Amau zong mi, ei zong mi mah hibuang lo ih hiam? Pasian hong piak thupha ahi, ih mimbem ih taangbemte, ih sumpite, mite zeekzeek sak lai ding maw? Ih gam ih lei, ih minam en puah kei leng kuan hong puahsak ding. En zuun kei leng kuan hong zuun sak ding?

A tunga ih gensa bang mahin, azenzen in, Conference ding-in Mission sya neih teng hong kilakkhiatsak a , sya ih cialthuah zo kei mah lehzong , Mission sunga ih nomlai a sya sawm in kaal khatin nai nih ta bang na asep leh, Conference a din ciangin, sya giat in, kaal khatin nai thum ta bang sem topah leng sya cialthuah akul ding hi peuhmah lo hi. Tua bang lungsim ih neihna in Conference lungsim ahi hi. Pasian naa nakpitaka sepnopna lungsim pen Conference lungsim hi. Conference lungsim aneite pen Pasian deih Mission lungsim taktak hizaw hi.

Tulai Mission lungsim kineisak, Mission bek acicite pen akineih, a kheem vive hilel hi. Late 118:8 ah, Mi ih muan sangin, Pasian belh ding hoih zaw hi,ci hi. Hi hi, ute naute , Mission ih muan sangin, Pasian muan ding hoih zaw hi. Mission ih cih pen mite bawltawm kipawlna hi. Conference in ih din khit ciangin, Mission a kiphua thei lua hi. Mission sungah om zaw loin, ei sungah Mission ih koih ding hizaw hi. Thu-ummi hon khat kipawlna pen Pawlpi hi a, pawlpi honkhat kipawlna pen Conference hi. Tua manin, SDA te kipawlna asangpen zong, GC (General Conference) na kicipah hi. Tua GC nuai-ah Mission a tuamtuam a kiphuan na hizaw hi. Tua ahih manin Mission sang-in Conference dinmun saang zaw tham pek hi. Mission sungah ih nitum laiteng, a khangcing thei lo naungek a bang ih hi hi. Khantoh sawm ni. Picin sawm ni. A tei thei lo naungekte a KHEMH kici hi. A cingtaak lo cihna hi. A khangkim thei lo cihna hi.

Tua ahih manin Khris sungah kong it ute naute aw, Conference le Mission hangin, pawlpi kikhen nang om lo hi.Upna kilamdanna om lo hi. Doctrine kibang pawlnih suak cih pen Dawi Mangpa nasepna hi. Ei hong it lo a, ih neihsa, ih sum ih paai le ih mun ih gam, ih leitang bek hong deihgawhte khemkhem, khimkhim, bumbum, menmen in om nawn kei ni. Zomite ki pumkhatin maa pangkhawm lo ding ih hiam? Min hong neumuh mahmah kawmkalah hibang thu hong piang lai leh miten bang hong ci muh ding, limtakin ngaihsun pha ni. Cihnopna-ah, pawlpi kikhen hetlo in, Conference lak sawm ni. Ih neihsa hi. A ding khinsa vive hihang. A thu bekin a sam lai hi. Bang kihta ding ih hiam? Topan hong piaksa, hong zawhpih khitsa hi lo maw? En tawpatpat lai ding maw? Zomite hihzah liangin hai lua kei ni. Dawi mangpa hong bumnate pan ih suahtak nadingin hanciamin, pailvangin, ki pumkhat ciat ni.

A tawpna-ah, kuakua pau taleh, kuakua-in vaihawm taleh, kuakua-in makaitaleh, Pasian hong piaksa Conference ma ban pen tawp loin, mainawt takin zom ding hihang. Pasian le mite kikalah mission peuh koih loin, Pasian tawh maa pangkhawm a, Mission ih sep ding hizaw hi. Mission peuh ki-uksakzaw loin, Mission naa sep ding hanciam ciat ni. Ahih theih leh kikhen loin, Conference laktum ni. Ahih theih mahmah kei lelah, Pasian deihna bang hive! Nungkin tuan buang lo e. Mi ih muan sangin Pasian belh ding hoihzaw hi, cingam buang hive hangh.

Tha ihlak theih nadingin:

1.       Mission om masa zaw ahia, pawlpi?

*Pawlpi adin khit cianga, Mission a kiphua tawmpan ahi veh!

2.     Conference a khiatna bang hipeuhmah ahia leh, hizaha a kigimneih nadingin?
* Comference pen thu-ummi, a ki piakhia(confer) ngam, a neihsa, a thagui a thatangte a kipiakhia ngamte kipawlna cih ding ahi veh! Tua man a, Satan in haza a, mite a gimneihsak liang hiveh aw!

3.      Ki piakhia (confer) cih pen bang hih dinga kipiakhia ahia leh?
* Ih ci veleh, Mission nasem dinga kipiakhia ahi kei ding maw! Tua lo adang bang hi ding. Tua man a, Thu-um mite kipawlna pen PAWLPI hi a, Mission nasem nuam pawlpite kipawlna pen CONFERENCE hi, ih ci ve!

4.     Tua ahih leh, Conference om kei leh Mission a om thei lo ding ahive maw!
* Hitham e. Tua man a Conference le Mission pen khentheih hi lo ih cihcih, tua hang ahi ve. Ko Mission pawl, amau Conference pawl, khawng ih kicih bel, a naak haihuai dan. Dawi mangpan hong meng lua kisa a, a mumang paupau liang ih hita veleh. Dahhuai saam ei maw!

 Tua ahih leh ken bel ka uupna bangin, Pasian na suakta takin sem nuam ki confer nuam kahih takteh, Mission na kasep theih nadingin COFERENCE mah tha pia ning ei maw. A hunlap a katheih khak nuam mahmah ing ei, Pasian thupha mah hi ei.

*Lung damhuai hi, hibang a lam maan, thuman thutak nong theih khak manin nuam mahmah hang. Kawl ten paunak khat nanei in,  Neih lohna sangin theih lohna haksa zaw a cih mah bangin, ih neih loh man hizaw lo a, ih theih loh mah a, a buaibuai hizaw hihangh. Pasian in thupha hong pia a, Conference dinmun donga ding zo dingin, hong tawisang napi, ih theih loh man a ih nialnial khak pen, Pasian muhna ah a dahhuai mahmah suak ding hi. Tu a kipan in Upper Myanmar teng ki thutuak in, ih ki pumkhat ding hanciam ciat ni. Ih Topa Pasian in,  Kuama hon zawh loh Kong kakhak a, kuama khak zawh loh Kong ka hong hi ci hi. Ih Topa hong honsaksa Kongpi, kuaman khak zo lo ding hi. Hell khua kongkhak ten zong khak zoloding hi. Topan minthannan tang tahen.

Khris sungah naseppih,

Evan. Cin Sian Pau (G)

P.O BOX (487)

GPO

Yangon Myanmar.

PS. Tu laitakin, Conference hong kipiak nop het loh zenzen hangin, mailam ah aana tawh hong ki laksak hum hong tung ding hi. Bang hanghiam cihleh, Conference pen pawlpi target pi khat ahih man hi. Ut leng ut kei leng na kisin phot un, hong cih ding hun hong tung pelmawh ding hi. Tua veve tubangin a baihsa in na om leng met zaw ding hihang. A telsiam dingin, Pa Pasian in thupha hong pia tahen.

Phawk ding:

Mundang gamdangte bangah, Mission le Conference dingkhawm lelin, ih ututna-ah kikhop hihtuak hi. Mission le Conference kigalbawl ding peuhmah hilo hi, cih phawksiam dingin ih biak Pasian in thupha hong pia tahen. Amen.