LESSON 4 Oct. 19 -25 Langpanna Thuak

LESSON 4  Oct. 19 -25

Langpanna Thuak

Sabbath Nitak

Tu Kaal Sung Sim Ding: Ezra 4: 1-5, 6- 24; 6: 1-13; 5: 1-5; 2Kor. 6: 14.

KAMNGAH: “Ahi zongin Judah upate in Pasian’ vilna sungah nasem hi uh a, Darias kiangah a thu va tungin ama tung panin thu a kingah kik hun dong a nasep zomna uh kikhaktan lo hi.” Ezra 5: 17.

          Ezra 3- 6   sungah thulu-pite in kum khat khit kum khat biakinnpi kilam kik a langpangte thu kigelh hi. Tua thulu-pite in a sung a om thute theihna hong guan ding hi. Ezra min kidawk masa penna mun in Ezra 7:1 hi.  Jerusalemah BC 457 kumin va tung a, na khempeuh kikhel mu hi. Khuapi kulh kipuah kik kizom paisuak lo hi. Kum 13 khitteh, BC 444 kumin, Artaxerxes sawlna tawh Nehemiah in Jerusalem va tung hi. Ama tun ciangin kulhpi-cian kizo siang hi. Langpanna hat mahmah taleh ni 52 sungin a kulhcian kizo hi (Neh. 6:15).

          Ezra leh Nehemiah sungah Pasian nasepna a langpan mite thu tampi kigelh hi. Tua hi-in biakinnpi leh Jerusalem lamh kikna hangin langpanna leh bawlsiatna a thuak uh lamdang hi lo hi. Tu-in zong leitung mun tuamtuamah Pasian nasepna langdo-in, bawlsiatna thuak mi tampi om hi. Hotkhiatna thu in Satan ukna kisiat ding pulaak ahih manin, Satan in hotkhiatna thugen ding deih lo-in khaktan tawntung hi. Koi bangin Ezra leh Nehemiah in Jew mite in langpanna nawktan uh pulaak hiam?

SUNDAY     Oct. 20

Langpan Kipatna

          Ezra 4: 1-5 sim in. Bang hangin saltang lo Judah gamah a cianlai Jewte in biakinnpi kilamh kik ding langpan uh hi ding hiam?       Mi huh nasep in thu hoih hi napi, bang hangin mi huh ding deih lo uh hi ding hiam? A galte uh hong pai-in nasep huh uh hi. Galte? Langpangte huh nial ahih manun tua bangin Israel mite in thukkik uh hi.

          Bang hangin a mipihte uh gal a nei hi ding hiam? 2Kum. 17: 24 – 41 sungah tua a galte un mundang pan hong pai-in Samaria gamah a teeng Khanglam Israel mite hi. Assyria kumpi pa in amaute adingin siampite paisakin, tua siampite in Pasian biakzia ding hilh kawi kawi uh hi. Ahi zongin amaute biakna in Canaan biakna tawh kigawmkhawm biakna hi.  Tua hi-in hih mite in amau biakna a hong lutpih khak ding uh a cianlai Israelte patau uh hi. Tua hi-in a hoih pen leh pil kampau tawh a dawn kikna uh, hong huh kei un, ci-in dawng kik uh hi.

          Tua bangin buai-na a pianna bulpite i phawk ding kisam hi. A pu, a pa-te un pagan biakna zui uh a, tua panin biakinnpi kisiatna banah saltanna dong hong tung hi. Biakinnpi thak ding a lamh uh ciangin zong a tawpkhakna-ah a kim a paam uh a om namdangte tawh kipawlin amau biakna zuihpih kha ding uh ahih manin tua bangin huhna nial uh hi.

Bang hangin tua bangin mi huh ding nial uh hi ding hiam? Ezra 4: 4, 5.  

          Khialhna hong tunpih thei mi hong huhna hi taleh siatna hi lo hi, ci-in nial lo-in  ngah ding bek ngaihsutna in  khial ahihna 2Kor. 6: 14 in hong hilh hi lo hiam?

MONDAY       Oct. 21

Kamsangte in Hanthawn

          Jew a langpangte in mundang pan hi lo-in a veng a paamah om mite mah hi. Jewte adingin amaute in lauhuai uh hi. Galte lau-na hangin biakinnpi a lamuh masawt thei lo hi (Ezra 4 -6).  I pulaaksa bangin Ezra 4: 6 – 6: 22 sung a kigelh thupiangte in a kum zui-a kigelh hi lo hi. Tua hi-in Ezra 4 i etma-in Ezra5 i en masa ding hi.

          Ezra 5: 1-5 sim in. Bang hangin Pasian in kamsang Haggai leh Zechariah Jewte kiangah sawl hiam? Amaute genkholh bangin bang thu piang hiam?       

          Jewte in galte kihtaakna hangin biakinnpi lamh uh dinkhawl uh hi. Ahi zongin Pasian in amaute Judah gamah pai-in biakinnpi a kipan khuapi lampha kik ding leh Ama geelnate a sem dingin sawl hi. Amaute lau-na tawh kidim ahih manun, lau lo-in a nasep uh mainawt thei dingin Pasian in na khat sem ding hi ta hi. Tua hi-in Pasian in Haggai leh Zechariah sawl hi. Mihingte langpanna in Pasian nasep khaktan zo lo hi. Jew minamte mah a langpangpi pen ahih uh hang, Pasian in amaute nusia lo hi.  Pasian in kamsangte tungtawnin amaute thapia-in nasep zom kik thei uh hi.

          Haggai 1 sim in. Jewte ading bang thu puak kigelh hiam? I nuntakpih ding bang thu na mu hiam?

          Pasian in kamsang Haggai leh Zechariah in hamsatna nawktan dingin khangkhia-sak hi. Pasian sawltak hih kamsangte nih in a mipihte thuak gimnate kipatna zungpi theisak hi. Jewte in amau nuntakna-ah Pasian masak lo ahih manun tua bangin gimna tung hi, ci-in kamsangte in hilh hi. Israelte in Pasian zahtakin a thu zui uh hileh, amau angsung hamphat nading ngaihsun lo-in biakinnpi lamkik ding masak uh hileh Pasian thupha sang ding uh a, amaute lakah Pasian teeng ding hi.” Ellen G. White, Prophets and Kings, 573, 574.

TUESDAY      Oct. 22                

Nasep Dinkhawl

Jerusalem kipuahphat nasep khawl dingin galte in bang sem uh hiam? Ezra 4: 6-24.

          “Tua khua-a teeng mite in” a masa-in Darius tungah tua khitteh Kumpi Xerxes (Ahasuerus) leh Artaxerxes tungah Jewte leh a nasep uh langpanna laikhak uh hi (Ezra 5, 6). Jerusalem kilamh kik nasep a khawl nadingun galte in ahih theihzahun hanciam uh hi. Judah gam gei-a om mite in Jerusalem puahkik kizo siang hi leh Judah tungah kumpite in ukzawhna nei nawn lo ding uh hi; bang hang hiam cihleh Jerusalem in a beisa hunin langpanna leh buai-na kipatna mun hi, ci uh hi. Kumpi Artaxerxes in langpangte laikhak a sim ciangin Jew langpanna thute um takpi-in, Jewte in suahtakna ngah nuam ahih manun tua bangin langdo uh hi, ci-in um hi. Tua hangin nasep khawl ding thupia hi. Galte in khuapi cing dingin kisawl hi. Tua bangin zawhthawh thu-in Pasian nasep kikhaktan hi.

          Ezra 4: 23, 24 sim in. Bang hangin Jewte in nasep khawl uh hiam? Pasian in khuapi kilamh kik ding deih ahihlam thei lo uh hiam? Bang thu piang hiam?

          Jewte in Jerusalem leh biakinnpi lamh kik dingin Pasian in a sapkhiat mite ahihlam uh kiphawk uh hi. Ahizongin langpanna lianlua in nasem zomngam lo uh hi.  “Pasian in hong phal nai lo hi; Pasian in khuapi lam kik ding hong deih hileh hong nawngkai-sak omlo ding hi; Pasian in saltanna pan i ciah kik hong awi lo hi, ci-in paulap nei uh hi. Pasian hong sapna bangin nasemin hi mah taleh hamsatna i tuahteh lunghemna, Pasian hong makaihna muanlahna om zel hi. Mihing in paikhial baih ahihna i theitel hi. Lau-na i neih ciangin bang mah kisem ngam lo hi. Pasian vangliatna mitsuan ding sangin a beisa hun a lungkiatnate, cimawhnate ngaihsun lehang lau-na tam semsem hi.

          Sepna khat peuhah hamsatna na tuah ciangin Pasian hong sapna ngahin sem nahihlam lunghianna na nei hiam? Tuiphum John ngaihsun in. Bang thu na phawk hiam?

WEDNESDAY        Oct. 23

Nehemiah in Nasep Kipan (444BC)

          Nehemiah 4 sim in. Nehemiah makaihna-ah Jewte in bang langpanin mainawt uh hiam? Bang hangin Pasian in eite adingin hong do-sak ding hi, ci-in khutzepin om mawkmawk lo-in amau le amau-in hanciam uh hiam?

          Nasep kipanin khawk kik zel uh hi. Jewte in thungen uh hi. Tua ciangin Nehemiah in zong galte langpannate nawktan dingin kigingin khuapi cing ding mi sehtuam hi. Khuapi cing dingin a sun, a zanin khat khit khat kikhel uh a, tua bangin galpang uh hi.Nehemiah in kulh kimtengah innkuan khat ciat in galvante tawh kigingkholsak hi. Tua banah Nehemiah in a nasemte khen nihta-in khenin khen khat in nasem uh a, a dang khen khat in galvil uh hi. Kulhpi-ciangte adingin annek tuidawn a kisam bangbang vaihawm uh hi. Amaute omna mun in lauhuai-na tawh kidim hi. Nasemte in a khut uhah teipi/ thal tawi uh a, khut lang khat tawh nasem uh hi. Nasemte in a khut khat uh tawh namsau tawi uh a, a khut lang khat uh tawh leisek/suang ciangto uh hi. Galte do dingin kiging tawntung uh hi. Amau sep theih bangbang sem uh a, tua val Pasian in sem hi.

          Nehemiah in Pasian’ kepna a muanna ettehhuai hi. Nehemiah in Pasian nalamdang bawl ding lamenin nuamtakin tu hitkhiat hi lo hi. A hihtheih zah sit lo-in nasem hi. “Tua ahih ciangin kulh nunglam a niam pen mun-awng tengah a innkuankuanin a namsau uh, a teipi uh leh a thal uh tawh mite pawl khat ka pangsak hi. Nate ka et dimdem khit ciangin dingin zaliante, uliante le mite khempeuh tungah, “Amaute kihta kei un. A lian mahmah a kihtakhuai TOPA phawk unla na sanggampate, na tapate, na tanute na zite le na inn uh a dingin do un,” ka ci hi (Ezra 4: 13, 14). Pasian ompihna pulaak lungmuanhuai mahmah khat hi.

          Langpanna hat lua mahmah ahih manin, Jewte in khuapi puahphat khawl kik thei uh hi. Ahi zongin tu-in lau-na in zo nawn lo-in, a galte uh a do-sak ding Pasian in kamciam mitsuan uh hi.  I upna leh Pasian min hangin langpanna, gimna i tuah ciangin, ahih keileh Pasian hong sawl na khat i sep ciangin, Pasian in ei adingin mapang hi, cih i phawk ding kisam hi. A tawpna-ah Jewte in amau nasepna-ah Topa ompihna leh Ama kihelna mu ahih manun, tua in amaute mainawt zo dingin tha guan hi.

          Banghangin Pasian deih na khat sem na hihlam kiphawk ding thupi hiam? Tua hi-in a thupi mahmah kidot dingin “ Koibangin Pasian deihna tawh kituakin nasem, nungta ka hihlam kithei thei ding ka hiam?

  

THURSDAY     Oct. 24

Na Lianpi Sem

          Neh. 6: 1-13 sim in. Banghangin Nehemiah in Jerusalem a puahkik pen nasep lian hi, ci hi ding hiam? (Neh. 6:3).  Bang thu in tua nasep khaktansawm hiam?

          Nehemiah 6 sungah Nehemiah hanciamnate kigelh hi. Sanballat leh Geshem in Nehemiah laikhak thithe uh a, thu kikupna khat nei ding cih paulapin nei-in a taktakin a nasep zomsuak thei lo dingin geel uh hi zaw hi.  Ahi zongin galte omna Ono zangkuam khatah kimuhkhopna nei uh a, a galte uh ngimna taktak kilang hi. Sanballat, Tobiah leh Geshem in Jerusalem kulh kician kizawhsiangma, kongkhakpite kikhakmateng hun hoih a ngahlam uh kiphawk uh hi. Jewte in Persia kumpipa kepna ngah uh hi. Tua ahih manin a galte un zo zo lo uh hi. Ahi zongin a makai pa uh suamlum thei le-uh Jew minamte a kipan a nasep uh beimang dingin ngaihsun uh hi. Nehemiah in bang mah dawng kei taleh tua mite in a ngimna uh a tangtun mateng hanciam mahmah uh hi. Tatsat lo-in a sepna khempeuhah langpanna bek tawh kidim ahih manin Nehemiah adingin lungzinhuai mahmah hi. Nehemiah in a sawtteh amaute tungah “ Na lian khat a sem ka hi hi,” ci-in dawng kik hi ( Ezra 6:3).

          Leitung muhna-ah Nehemiah in kumpipa haitawi pa hi. Hih nasep in mite sepnop, mite ut nasep khat hi. Kumpi huang sung a haitawi-te kumpipa thudot ngah mite hi. Tua manin a nasep in nasep thupi hi, cihna hiam?  Nehemiah in Pasian’lamlahna bangin a sepkhat peuhpeuh thupisa-in manpha-sa hi. Banghanghiam cihleh Jerusalem ah Pasian’ min sia hi.

          Pasian in biakbuk ding leh a sung a biakpiakzia ding limtak hilh khol hi. Siampi ding mite pantah hi. Mite in biakinnpi a zahtak nading uh, a siangtho mun hi, a cihtheih nadingun Pasian in siampite bek in biakpiakna mei hal thei dingin thupia hi. Eite in Pasian siantho-na i muh ding hamsa hi. Tua hi-in Israelte in a siangtho Pasian tawh om a zahtakna a ngah nadingun Pasian in  lampi bawlsak hi. Nehemiah in biakbuktual -ah mi khempeuh pai thei ding ahihlam thei hi. Ahizongin biakbuk sungah mi khempeuh lutsaklo hi.  Pasian makaihna tawh kituak lo-in Shemiah in a kampau leh a gamtat in kamsang zuau ahihlam pulaak hi. Tua banah Shemiah mahmah in a minam a zuak mipa ahihlam kilangh hi.

          Tu-in Moses biakbuk om nawn loh nungah koi bangin Pasian’ siantho-na phawk ding na hiam? Koibangin Pasian’ siantho-na in i mawhna hong phawksakin singlamteh tawh hong kinai-sak hiam?

FRIDAY Oct. 25

Simbeh Ding: Ellen G.White, “ The Buildes on the Wall,”  “A Rebuke Against Extortion” and “ Heathen Plots,” 635 – 660 in Prophets and Kings.

          “Nehemiah hunlai-a Jerusalem puahpha kik mite a lungkia-sak, a langdo mite in midang hi lo-in Pasian nasem mahin kinei, a mipih, a lawm, a gualte mah hi. Khristian thu-umte in hehna, galte bawlsiatna a thuah banah a lawm a gualte uh thusim lohna, kinlohna, ciampelna thuak uh hi.” Ellen G. White, Prophets and Kings, 644.

          “Nehemiah in Topa Pasian tungah a nasep citakin semin,  Pasian kinga-in muanna nei  hi. Tua in a galte guallelsak hi. Thadah, bangmah hanciam nuam lo mi in zia-etna sung puk baih ding hi. Ahi zongin ngimna nei-in a hanciam mi in zia-etna thaang tawh kipelh zaw ding hi. Upna tawh tatsat lo-in a kalsuan mi in thaneem lo ding a, ciangtan om lo itna nei Pa Pasian, na khempeuh Ama deihna hoihna tawh kituakin a sem Pa theihtelna nei ding hi.  Pasian nasem taktak mi in nunghei ding ngaihsun lo ding hi; bang hang hiam cihleh a tawntungin hehpihna tokhom mitsuan uh hi.” PK., 660.

Kikup Ding Dotnate

1.   Zerubbabel, Jeshua leh makai dangte dinmunah a om dingin kingaihsun in. Tua laitakin hihte kiangah mite hong pai-in huhna pia nuam uh hi. Ngaihsun kik lehang tua bangin mite huhna a na nial uh pen thu hoih hi       zaw hi. Adventist khat na hihna tawh koi bangin, bang hun ciangin upna kibang lo mite tawh mapang khawm lo ding theitel ding i hiam?  Koi bangin a man leh a khial khentel thei ding i hiam? Bang siksanin khen ding  i hiam?

2. Lai Siangtho sung hi taleh pawl sungah leitung tawh kipawl thu-upna cihtaklohna hangin a lauhuai-nate i mu hi. Nidang Israel a kipan Babylon saltannate in upna nusiatna panin hong piang hi. Thu khatah a khengval thuzuihna zong lauhuai veve hi lo hiam? Sabbath ni-a a gamtatna hangin Sabbath palsat hi, ci-in Jesuh mahmah in zong mawhsakna thuak hi lo hiam?  (John 9: 14 – 16). Jesuh a mawhsakte in a khengval thuzui hi lo hiam? Koi bangin kalsuan siam ding i hiam?