8. November 23, 2019 | Sanggamnu Gamtatzia
Yvonne Mushimiyimana in a
sangkahna-ah music concert lawp mahmahin, lasa dingin a min pia hi. A lawmte
kiang panin puan le long pant kigak mahmah khat kawm hi. Mite mittu ding deihna
tawh muksanza a san theithei leh mai nuh tuamtuam kinuh hi. A siam theih zahin lasa
hi.
A lasak khit ciangin khangno honkhat
va pai uh a, bang hangin na siamnate selcip na hiam? ci-in dong ngei ngai uh
hi. A lawmte khat in “ Long pant sau teeng nawn kei in. Tu a bangin kizem ta
in. Na puansilh tawh kilawm mahmah hiteh. Hih bangin om suak in. SDA thu-um mi
khat ii puansilhzia dingte tawh na pumpi kilawm kei,” ci uh hi.
Yvonne in tua bangin kiphatnate
zaknopsa hi. Friday nitak hong tungin, a lawmte zotna bangin dance hall cihte
ah va pai hi. A lawmte pawlkhat in tua bang munte ah pai lo-in biakinn ah
kikhawm zaw uh hi. Yvonne in Sabbath ni-in biakinn ah va kikhawmsam hi. Ahi zongin
pawlpi makaite in Yvonne in a lawmte tawh dance hall ah vapai cih za uh hi. A
nga-un daan thuak uh hi. Li in mawhmai ding ngen uh a, Sabbath ni-in tua bangin
gamta nawn lo dingin kiciam uh hi. Ahi zongin Yvonne in a khialhna maisak ding
thuum nuam lo hi. “ Ka sep ngei teng mah sem nuam ing; lasa-in laam ding khol
thei kei ning, pastor aw,” ci-in dawng kik hi.
Yvonne in Sabbath ni-in kikhawm pai
lo hi. A puansilhte nidang bang lo-in a khel no no silh hi. A nunzia tampi
kilamdang hi. A pai-na peuhpeuh ah mite in en lo-in om thei lo uh hi. A sawt
lo-in a sangkahna-ah mi tampi in a gamtatzia hong thei uh hi.
La phuakin a la phuahte kideih
mahmah khat hi-in, minthang semsem hi. Sangnaupangte a kipan sangsiate in a la
phuahte ngai uh hi. Sanghuang sungah mi minthang khat hong suak hi. Yvonne in
nasep tuamtuam nei-in ni khat khit ni khat a sangkah hong pelh to to hi.
Laivuanna-ah mat tampi pi a ngah takteh mite lamdangsa hi. Sangkah ngei lo, mat
hoih mahmah a ngah ciangin, a bangci dan hiam ci-in a kidot ciangin, Yvonne in
dawng thei tuan lo hi. A nu in Yvonne adingin a thungetsakna hang hi ding hi.
Rwanda khuapi Kigali ah Yvonne in mi
minthang khat a suah nading hanciam mahmah hi. Lasak leh laam tuah hi. Zu sai,
night club, dance hall cihte ah lasa leh laam kawikawi hi. Mite etnop theih
theih ding puan silh hi. A bil khatah bilbaih 3 bang koih hi. A nakah zong
nakbah gol mahmah tuah hi. A pumpi leh a khut, a khe cihte ah taatoo tawh kidim
hi.
A nu le pa in tua bangin Yvonne
gamtatzia a theih uh ciangin dah mahmah uh hi. A pa in sangsum ding khak nawn
lo hi. Ahi zongin Yvonne in a ngei mah bang den hi. Yvonne in tua bangin
lasa-in laamna pan a sum ngahte zat kicing lo ahih manin khuapi sung market
khatah numei puanzuakin hong om hi. Tua khit ciangin KG sang khatah laihilh hi.
Jean tom mah teengin, bilbah tampi, muksan mahmah tawh sangkahin naupangte in
muhnopsa mahmah uh hi. A gamtatzia kideih lo ahih manin night club bekah nasem
thei hi. A cih nading dang thei nawn lo hi.
Ni khat inn ah tawlnga-in a om
laitak a inn gei SDA biakinn panin Pasian thugenna khat za hi. Tua thu kigen
ngai nuam lo hi. Kongkhaksan a, a lupna khaan sungah la ngai-in lum hi.
A zingciangin pastor in a thugen zom
kik hi. Tua bangin a zingteh zong a thugen zom kik hi. Kaal 3 sung Ruyenzi SDA
pawlpi in Pasian thugenna nei hi. A tawpna-ah Yvonne in a inn panin tua thu
kigen ngai hi. Thugensia pa thugen in Yvonne lungsim lawngkha-in, amah zong a
zingteh thungai dingin biakinn ah hong kikhawm hi. A thungaihna panin Yvonne in
kikhelin tui kiphum ding khentat hi.
Tu-in Yvonne in kum 27 cing khin hi.
Pasian la tuamtuamte phuakin sa-in mi minthang khat hong suak hi. “ Siatna
tuamtuam panin Topa in hong kemin Ama nasem dingin hong zang ahih manin Topa
tungah ka lungdam mahmah hi. Ama hong kepna om keileh tuni dong ka nungta nawn
kei ding hi,” ci-in tecipang hi.
A nu le pa pantahna hangin amaute
tungah zong lundamna ko hi. “ Pasian phawk lo-in Amah taisan hi mah taleng, ka
nu hong thuhilhnate ka phawk a, ka nunzia hong kikhel hi,” ci-in pulaak hi.
Tu quarter Sabbath School 13 na
sumpi in Kenya, Kisumu Adventist Zato adingin kipuak ding hi. MUC in Tongsial biakinn
leh huang puah nadingin kipuak ding hi.
