7. November 16, 2019 | Tagahte Thahna
Ka nulepa in 1994 kum tualgal hangin
hong nusia uh hi. Ka neulai-in tagahte omna khatah omin nakpi-in ka kahna ka
mangngilh kei hi. Cikteh ka nu tawh ka kimu ding hiam, ci-in siamahte ka dong
hi. “ Mu niteh” ci-in hong dawngkik uh hi. Ka nu pen mun khatah vakkhia hi ding
hi, ci-in ka ngaihsun hi. Ahi zongin ka nu ka mu kha ngawn kei hi.
Siamahte in nu bangin hong kem uh
hi. SDA min khat ka nei a, Brigitte hi. Ka nu thak in biakinn ah hong kikhoppih
a, kikhop nuam ka sa hi.
Kum 7 ka phakciangin kumpi in ka
omna tagah kepna khawlsak ahih manin innkuan khat tawh ka om hi. Ka nuntakna
nop dingin ka lamen a, ka lamet bangin nuntak hamsa mahmah hi.
A kipatcilin kei hong kem innkuan in
hong it uh hi. Kei tawh kikhangual tanu khat nei uh a, Mutesi ci uh hi.
Kikholhpih nei ka hih manin nuam ka sa hi. A tanu uh a it bangin kei zong hong
it ding ka sa hi. Ahizongin tua bangin hong it lo uh hi.
Zingsang sangpai ma-in tui tawi,
innsung hahsiang hi. Tua bangin ka nasepna hangin sangah ka lawmte sangin ka
tung nunung zaw den hi. Tua bangin ka zekai ciangin sat ka thuak hi. Khat vei
vei ciangin inn hong kiciah kiksak hi. Khat veivei leh sangpua-ah hong
kidingsakin, sang sung lut ding hong kiphal lo hi.
Ka nu thak in ama hangin ka sang pai
zekai thei hi. Ahi zongin bangmah kikhelna nei tuan lo hi. A sawt lo-in ama
hehnateng kei tung hong suan hi. An hong pia nuam lo hi. Nu ci-in ka sap hehin,
nu hong ci nawn kei in, ci-in hong gen hi. Kei pen na pianna nu ka hi kei hi,
ci-in hong gen hi. Mutesi in a nu bang lo-in kei bel hong it mahmah hi. A nu in
bawlsiat a muhteh Mutesi in a khitui luang hi. Ama an hong pia-in, tua bang
ciangin a nu in kei an hong piak ding phal lo hi. Mutesi pa in zong hong it hi.
Kum 13 ka phak ciangin na
laivuanna-ah ka ong a, Mutesi in a lai kia hi. A nu heh lua-in inn panin hong
hawlkhia hi. Innkuan dang khat in hong hehpihin amau tawh om dingin hong sam
hi. Kumpi in zong tagah huhna hong pia uh hi. Tan 10 ka zo nawn kei hi.
Lamet bei semsem in ka om hi. Mi
khempeuh ka mudah hi. Mi khempeuh in zong hong mudah uh hi, ci-in ka ngaihsun
hi. Pasian in ka thuaknate a hong thei diam, ci-in ka ngaihsun hi. Pasian
nangawn ka mudah hi. Kei le kei si ding ka hanciam a, zu khaam lua-in ka om ngei
hi.
Ni khat Nyamata khua sungah ka vak
a, Pasian thu kigenna awging khat ka za hi. Tua thugensia pa pen Frederic
Musoni hi-in, amah pen SDA thugensia khat hi. Thugensia pa in “ Na kikhel nuam
uh hiam? ci-in mipi thudong hi. Tua bangin a dot ciangin kei mahmah hong dong
bangin ka ngaihsun hi. Tawl khat sung thu ngai-in ka om a, “ lungnuam in. Ka
hong it hi” ci-in hong hopih aw khat a za tawh ka kibang hi.
Thugensia pa in a ki-ap nuam na om
uhleh ci-in, mipi hong sam a, kei zong ka ki-ap hi. Siapa in thu hong ngetsakin
lungnuam takin inn ka ciah hi. Ka nuntakna-ah tua bangin lungnopna ka nei ngei
kei hi.
Pasian thugenna khitteh mi 150 ka
kituiphum uh hi. 2016 kum, May kha sungin Rwanda gamah mun 2027 ah Pasian
thugenna panin tuikiphum vekpi 110000 (teengh khat, tul sawm le tul khat)
hi-in, hi zahin tui kipum om ngei nai lo hi. Ko zong hihte lakah a kihel ka hi
uh hi. Tui sung pan ka pusuah khiat ciangin lungnopna leh suahtakna ka ngah hi.
Itna ka nei a, Pasian in hong nusia lo hi, cih khamuanna ka nei hi. Kei adingin
hong si Jesuh ka it a, ka nu le ka pa tawh hong omkhawmsak dingin ka lamen hi.
Tu-in kum 25 ka cing khin hi. Vanzat
tuamtuam ka bawl a, tuate zuakin ka nungta hi. Nu le pa in hehpihhuai
naupangte, a gentheite hehpih ding kisam hi. Naupangte tungah kampau hoih lo
zang kha lehang, a khatawnun mangngilh nawn lo uh hi. Nu le pa tawh a om lo
naupangte Pasian in tagahte it, hehpih hi.
Tu quarter Sabbath 13na sumpi in
South Sudan, Wau khua a zum innpi adingin kipuak ding hi. MUC in Tongsial
biakinn leh huang puah nadingin kipuak ding hi.
