6. Nov 9, 2019 | Bus sungah Thuhilhsia
Mi kimkhat in mawtaw sung a tuan
uhteh laisim ahih kei leh phone en cih bangin nasem kuan uh hi. Samuel
Ndagijima in a nasepna Rwanda khuapi Kigali ah a pai-na mawtaw sungah Jesuh leh
Ama hong pai kik baih ding thute gen hi. A thugen a za mite in kikhelna nei
maw, nei maw, ahih keileh bangci bangin huzaap hiam cih pen thei kha lo hi.
Ni khat nasem pai-in lampi khat a
kantan laitakin nupi khat in “ pastor, na khawl in,” ci-in khaam hi. Samuel pen
pastor hi lo hi. Ahi zongin mite in pastor bangin ngaihsun uh hi. Amah zong a
lampai khawlin tua nupi tawh hong kiho hi.
“ Nang kong thei ngei kei hi; i kimu
kha ngei hiam,” ci-in Samuel in dong hi. Tua nu in Daniel kiangah “ Na hoih a
sem hiteh. Ahi zongin nasep hoih sem na hihlam kithei lo hiteh” ci-in dawng kik
hi. “ Bus tungah i kimu ngei a, na telloh thute na gen ngei hi,” ci-in tua nu
in gen hi. Samuel in na khempeuh ah Pasian masak ding gen ngei a, tua thu
hangin hih nu nunzia kikhel hi. Tua thu a zak a kipan tua nu in a nasepna mun a
tun ciangin leh na khempeuh Pasian masak tawntung hi.
Tua nu in “ Ka nasepna-ah hamsatna
tampi om hi. Khukdinin thu ka ngen hi. Ka thuzak om mah bangin na khempeuh ah
Nangmah kong masak hi,” ci-in thungen hi. A thunget khit ciangin lungnopna khat
ngah hi. Tawl khat khit ciangin a makaipa, a boss kiangah va pai hi. A boss
zong ama lamah hong pai phei-in, cik ciangin pai ding i hiam, ci-in tua nu dong
hi.
“ Tua nu in, hong zui zo kei ning.
Mawhna bawl ding ngaihsun keng,” ci-in dawng kik hi. Bang hang hiam cihleh kei
pen pasal nei khin khat hing. Ka pasal tungah ka cihtak ding kisam hi. Kei pen
Khristian thu-um mi khat hing. Ka Honpa tungah ka khial kei ding hi.
Tua banah kei pen ka pawlpi-ah makai
khat hing; mite etteh dingin ka om kul hi,” ci-in a boss pa zolna nial hi. Tua
thu a zak ciangin a boss pa in lamdangsa hi. “ Tam veipi tak hong zol khin ing;
khat vei beek ut keng, ut mah ing, nong ci ngei kei hi. Bang hangin khentatna
hong pia ngei lo na hiam,” ci-in heh kawmsa-in dawng kik hi.
“ Hih na nasepna pan na khawl kul
ding hi,” ci-in a boss in pulaak hi. Tua numei in thuak hamsa hi. A nasepna pan
khawl ding ngaihsun lo hi. “ Topa aw, ka nasepna panin Nangmah kong liansak hi.
Na khempeuh ah nangmah kong masak hi. Ka nasepna pan hong kikhawlsak hileh, ka
tate adingin lampi hong honsak in,” ci-in thungen hi.
A zingsang ciangin a boss pa in
nasep khawlna pia dingin lamen hi. Ahi zongin tua bang nasep khawlsakna lai
ngah lo hi. Ni 2, ni 3 bang pai khin, nasep kikhawlsak ding zakna ngah lo hi.
Ni khat a nasepna pan ciahin inn a tunteh TV a etleh, a boss pa nasep
kikhawlsak hi, cih thutang kipulaak hong za kha hi. Tua numei a khitui luangin
Pasian min phat hi.
Hih bangin a tuahkhak thute numei in
pastor kiangah pulaak hi. “ Ka boss pa nasep kikhawlsakna hangin Pasian min a phat
hi keng. Pasian a masak mi khempeuh, Pasian in kem tawntung ahih manin Ama min
ka phat hi,” ci-in teci pang hi.
Samuel in mawtaw sungah a thugen zom
suaksuak hi. Khat vei vei ciangin lamdungte ah thugen kawikawi hi. A thupi
penpen thuhilhna, awging lo-in thugenna ahi gamtat lukhek tawh Khrih zia le
tong kilangsak dingin hanciam tawntung hi.
Rwan gamah Adventist thupuak masa
penpen in Belgium panin Leitung Galpi Masa khit deuh, 1914 kumin D.E Delhove
hi. Amah pen galkap hi-in gal beiteh a innkuan un missionary nasemin om suak uh
hi. Leitang acre 125 val bang mun khat lei-in tua mun panin nasep kipan uh hi.
Tu quarter Sabbath 13-na sumpi in
South Sudan gam Juba khua-ah sanginn kilam ding hi. MUC in Tongsial biakinn leh
huang puah nadingin kipuak ding hi.
