4. October 26 , 2019 | Pawlpi 13 ah va zong kawikawi
Mary John Ijaa in biakinn muh ding a
hamsatlam thei kha lo hi. South Sudan gamah teengin Khristian innkuan sung
panin khangkhia hi. A pawlpi sungah ki-itna, kipumkhatna mu lo hi. Kum 16 a
phakin pawlpi dang khat lut hi.
Hih pawlpi thakah zong upa, deacon
kituhin khat le khat kilemlo uh hi. Hih pawlpi ah kum nih a om khitteh pawlpi
dang khatah lut leuleu hi. Hih pawlpi in missionary nasep hat uh hileh kilawmsa
hi. Ahi zongin gamdang panin cimawh huhna puan tampi hong tungin, tua puante a
hawmzia ding uh kithu tuak lo uh a, pawlpi mite khat le khat kitawng uh hi. Hih
pawlpi panin zong kihemkhia kik hi.
Pawlpi dang khatah ki-ap kik leuleu
hi. Pawlpi thum vei a laihna hi khin hi. A li na pawlpi sung a lut khit,
biakinn tual hahsiang nasep a sepna panin Mary a cina hi. Mun phiatin a om laitak
a khe na vatin san gawp a, bawk semsem hi. Mary in dawisiamna nei khat kiangah
va pai hi. Tua dawi tawh kipawl siamna nei pa in, inn na phiatna mun khatah
hamsiatna mun khat sik kha na hih manin, tua hangin na khe na hi, ci hi. Pawlpi
mite khat in Mary mudahin hong bum hi, ci hi. Bumleh thei, dawi-ai nei mipa in
lemhiam khat la-in Mary lu pan a khe dong neu no no-in a vun atsak hi. Tua khit
ciangin tuisa sungah kidiahsakin, lopa zung khat tawh a pumpi khempeuh zut hi.
Tua khit ciangin tua tui dawnsak hi. Kum thum sung ni khat nih vei nek ding
zatui pawl khat zong pia hi. Mary in a khe nasa lua-in lampai thei lo, bawkvak
hi.
Ni khat a khe natna hong dam hi.
Lampai thei hi. Tua dawisiamna nei pa in keel nih leh sum honpi khat pia hi.
Mary in tua biakinn ah kikhawm ngam nawn lo hi. A dang pawlpi khat ah va
kikhawm hi. A inn gei khatah biakinn kilam a, a kizawh ciangin, a inn gei-a
biakinn
ah kikhawm hi. Pawlpi a guk vei
khelna hi ta hi. Tua khitteh a sagihna, a giatna dongin khat khit khat laih
kawikawi hi.
Mary in tapa khat hong nei hi. Ni
khat a lup kawm a tui dawn a, a gawl nat cihtakin nasa hi. A ngawng bawkin na
mahmah leuleu hi. Dawisiamna nei pa in Mary kiangah mi khat in hong suamlum
sawm ahih manin, a hai sungah na sih nading khat hong koihsak hi, ci-in gen hi.
Kum khat sung tawntung lupna tungah a hun bei hi. Dawisiampu pa in nisim a dawn
ding zatui pia hi. Kum khat khitteh Mary in a natna pan dam hi.
Mary in itna leh kipumkhatna tawh
kidim pawlpi hong zong leuleu hi. Nih vei thum vei a cina kik zelin, dawisiampu
in bum ngah hiteh ci hi. A li vei-nateh a ngawng nasa-in a pumpi khempeuh
bawkgawp hi. Dawisiampu pa in “ mi khat in na an nek sungah guu hong koihsak
hi, ci-in gen hi. A natna dam thei mahmah lo-in dawisiam khat khit khat ah pai
kawikawi hi. Kuamah in damsak thei lo hi.
Mary in pawlpi a 13 vei-na laihna hi
ta hi. Hih pawlpi ah kikhawmin, cihmah a thungen ngei lo, tu-in thunget hong
kipan hi. Ni thum sung angtangin thungen hi. Tua khitteh zato ah va kilak hi.
Siavuante in Mary antangin thungen a zak uh ciangin, Mary paakta mahmah uh hi;
tua bang ding hi, zato mangte Zota Mangpi Pa tungah damna ngen hiteh, ci-in
dawng kik uh hi. Siavuanpa in zatui sunin Mary natna damsiang hi.
Mary in a natna pan dam khinin, bang
hang hiam cihleh Pasian in a thungetna za hi; ahi zongin lungnopna nei lo hi.
Mary in pastor nih tawh South Sudan khuapi Juba gei mualtung khatah suang nasep
khat sem khawm uh a, a suang ngahte uh bangci zuak ding cih a kithu min zo lo
uh ahih manun, Mary in hih pawlpi in zong ki-itna nei kei, ci-in pawl dang khat
ah tai ding ngaihsun hi.
Tua laitakin Mary in SDA pawlpi
ngaihsun kha hi. Hih pawlpi ah kikhawm ngei lo hi. Mary in Adventist pawlpi
mite tawh a kiho uh ciangin, maitai nuihmai uh ahih manin Adventist pawl lut
ding ngaihsun
hi. A naseppih pastor nihte tungah
SDA pawlpi ah lut ning, ci-in a pulaak ciangin, amau zong lamdangsa uh hi.
Mary in 2017 kumin April kha sung
Pasian thugenna khat om a,tua munah kituiphum hi. Tua zawh a sawt lo-in a pasal
leh a ta u pen zong kituiphum uh hi. Mary in bum kihta nawn lo hi. Bang hang
hiam cihleh dawi-te sangin Jesuh vanglian zaw hi. Tu-in ka suakta hi; ka
lungdam hi, ci-in pulaak thei hi.
Nidang a a naseppih pastor tawh
kimu-in pastor in “ Mary a muh ciangin cidam mel pua-in lamdangsa-in, bangci
bangin na cidam hiam, ci-in dong hi. Mary in “ thuman ka muh a kipan ka natna
khempeuh bei hi; Pasian thu-um mite kipumkhatna sungah damna om hi,” ci-in
dawng hi.
Tu quarter Sabbath 13-na sumpi in
South Sudan gam Juba khua-ah sanginn kilam ding hi. MUC in Tongsial biakinn leh
huang puah nading kipuak ding hi.
