10. Dec 7, 2019 | Sum nei lo Accountant ( Sum sazian
kem)
Martha Etana Chewaka in buai-na
lianpi nei hi. Ethiopia khuapi Addis Ababa ah bank khatah nasem hi-in, kha
simin sum zatsam tawntung hi. Martha in limtak geelkholhna tawh kalsuan hi. A
ngah masak sumte panin sawm-ah khat khia hi. Inn no khat sap hi. Zingsang nitak
annek tuidawn ding a kipan khedap, puansilh kisamte lei hi. Ahi zongin nipi
kaal nunung pen hong tunsialin a lungkham den hi. A sumteng bei-in, nek ding om
nawn lo hi.
Martha in accountant khat tawh
kiteng hi. A nupa un sum zekkhawm uh hi. Kha bei ma-in sum zat kisam veve uh
hi. “ Bang hangin thupha ngah lo hi ding i hiam? ci-in lungkham hi. “ Pasian in
thupha hong pia lo hi ding hi. Bang hang hiam cihleh ni siangtho Sabbath ni-in
ka nasepna hang hi ding hi,” ci-in ngaihsun hi.
A nunzia a ngaihsut sut ciangin “
Bang hangin Sabbath ni-in nasem na hiam. Na sum ngahte in thupha tawh kidim
ding na deihleh ka thupiakte zui in, ci-in Pasian hopihna za hi. A nu le pa in
Sabbath ni-in kikhawm ahihlam uh Martha in phawk kik hi. Kum 21 a phakin bank
ah nasep kipan a, tua a kipan Sabbath ni kikhawm nawn lo hi. Ethiopia gamah ni
6 sung nasem uh a, Saturday ni in nasep tam penpen ni hi thei hi. Martha in a
genthei innkuan sung pan khangkhia ahih manin kha sum tampi pi ngah nuam hi.
A neutung a kipan a kihilh mah
bangin Martha in sawm-ah khat khia hamtang hi. Sabbath nitak lam nasep ciah
baih ciangin pastor kiangah a sumpite va ap thei zel hi. Tua lo ciangin lai ip
sungah koih a, kikhawm ding a lawmte pai sawnsak hi. Sawm-ah khat piak citak
mahmah hi taleh sum zatsam hi tawntung hi. Martha in Pasian tungah “ Sabbath ni
tawlnga thei ding nasep khat hong pia in,” ci-in thungen hi. Kha khat sung
nisim in tua bangin thungen hi. Ahi zongin bang mah kilamdang lo hi.
A pasal kiangah “ka nasep khawl
ning,” ci-in pulaak hi. “Pasian thupiak tawh kituak lo nasepna hangin sum
kizatsam den hi. Ka nasep khawl ning. Na ngahzah zah Pasian in thupha hong pia
ding a, sum zatsam lo-in om thei zaw ni,” ci-in a pasal tungah pulaak hi.
A pasal in zong, “ khawl in” ci-in
dawng kik hi. A pasal zong Adventist khat hi-in, a zi nasep khawl ding deihsak
hi. Ahizongin Martha in a nasep khawl lo hi. Nasep dang khat a muh nading
thungen hi.
Kum 2 khit ciangin Martha in nasem
thei nawn lo hi. Nisim in “ Tu-in na nasep khawl ding hun hi,” ci-in hopihna aw
a za ngitnget tawh kibang hi. Ni 5 sung antangin thungen hi. Tua khit ciangin
bank ah va pai-in, a nasep khawlna thu gen hi.
A seppihte in lamdangsa uh hi. Amah
pen nasem hoih, a kician khat hi-in, a nasep khawl ding awi lo uh hi. Saturday
ni tawlnga thei ding a dang sep ding khat pia dingin vaihawm uh hi. Martha in
nunghei kik lo-in nasep ka khawl ding sawtpi pek hi, ci hi. Kum tampi Pasian
thumang lo-in a nasep sawtkhin, tu-in nasep khawl ding hunta hi, ci-in khentat
hi.
Bank pan a pusuah khiat ciangin
lungnopna khat nei hi. Kum 13 sung bank ah nsem hi-in tua bang nopna ngah ngei
lo hi. Kha khat khit ciangin a nupa un kha bei dong sum zat kisam cih om nawn
lo hi. A nupa un lamdangsa mahmah uh hi.
Martha
in a pasal tungah “ Tuni a kipan Pasian in na kha sum thupha hong pia hi.
Pasian in i kitangsapna khempeuh hong pia hi,” ci-in pulaak hi. Martha-te nupa in nisim kisam annek tuidawn,
silh le teen, kitangsapna bang mah nei nawn lo uh hi. “ Koi panin sum hong pai
hiam. Ka nupa-un thupha sang ka hi uh hi. Sum tampi ngahna sangin Pasian
thupiak man ding thupi zaw hi, ci-in tecipang uh hi.
Tu
quarter Sabbath School 13na sumpi in Ethiopia gamah naupangnote Sabbath School
inn lam nadingin kipuak ding hi.
