HA NIN LEH KAM UIH TAWH KISAI

HA NIN LEH KAM UIH TAWH KISAI

Kam sung keu leh namsia mahmah a, ahihangin ei kam a namsiat lam kithei mello tek hi. Ih kam sungah bacteria tampi om a, tua te in kamnam sia sak hi. Kam namsia 80% pen leinuai pan hong pusuak ahihi. Kam namsia ci in tuibuk, khaini,sadah, kunza cih te tawh kihehnep ding hi peuhlo in tua te in kam sung namsia sak semsem in uih sak liang thei hi.

Tui : Tui siangtho a hun nei in dawn in.

Ciltui : Ciltui in kamnam sia sak bacteria te sisak ahimanin ciltui sia sia kei in valh in. Ciltui valh sak theilo khaini, sadah, tuibuk leh muamtheih te zang vet kei in.

Nasep kinluat ciang leh ngaihsut tam luat ciangin ciltui tawm sak hi. Tui dawn manlo liangin sawtpi ki om thei a, tua bang hun ciangin muam khum leh akikhia khaitheih te ne hamtang in.

Nektheih neng neng na lei ciangin mehteh/mehgah (vegetable) pan a kibawl leh bawngnawi panin a kibawl te lei zaw in, tua te in kamsung siangtho sak hi.

Nek leh dawn ah a khum lua, cil lua leh aman lua lam ne kei in. Na nek a leh na ha nawt pah inla, ha nawt a lem kei leh na kam khuah teitei in. Ha a to sak pen calcium leh phosphorus te hi a, hih tegel pen ciltui lak ah om khin hi.

Singgah, Khaigah te tamnek in. Carrot, ankam pakbawk cihte in ciltui tamsak hi. Apple ne in hoih takin haizan leng kamsung siangtho sak a, ha nawt zah in siang zo hi. Tua banah lutang na zong hoih tuam sak in sisan sang leh niam zong kem hi. Ha nget/heng ding pan zong kem hi.

HA NAWT DAN
Ha zia baih mi na hih leh ha nawtna a nemte zangin.
An nek khit teh ha nawt pah kei in, a tawm pen minute 30 ngak in. Ha bek nawt kenla, na leii zong nawt kawm in. Kha thum khit ciangin na ha nawtna laih in.

Meihawl tawh ha nawt zel in (activated charcoal).
Na hanawtna ah meihawl tawm koih inla, minute 2 sung khawng nawt in. Tua khit ciang haza(teeth whitening) tawh minute 3 sung khawng nawt kik in. Ni 30 sung nawt le cin hong pak sitset dinghi. Company bawl hapaakna te tawh ha siavuan te in hong puah sak khit ciangin puah tuan kei leng a kang/pakza a kiat khit ciangin a ngeina bangin ha nin pah lel a, tua ahimanin ha pen hoih takin kem khol leng hoih in sum tawm bei pen hi.

Ha ninpipi, ha san gemgam, kunza haibang, ha kawm a anteh/sabang pi leh kam uih/kam namsia pipi khawng in na zi/ na pasal tawh kino het kei un, Nungak tangval te in zong kitawp (kiss) khawng ciang lawmte duhloh pipi na muap kawmkawm leh hong kih in hong lau in a itna leh a ngaihna teng zong bei zo dinghi.

Mipi mai leh TV khawngah thugen ih ngaih ciang a muk leh a ha ki nak et pen hi. Na ha siang/pak sitset photphot leh na thugen pen a hoih thei pen in hong ki sansak dinghi.

Ha leh kamsung siantho sakna in ngaihban na leh mipicing hihna kilangsak a, ha leh kamsung nin nena, uih leh namsia te pen mi kihhuai leh miginalo hihna kilang hi.

Bawngnawi a neknekna-in a ha pak hi. Piancil 49:12

@ NK Nang