LESSON 9 AUGUST 24 – 30 THUCIAM THAK PAWLPI NASEP

LESSON 9     AUGUST 24 – 30

THUCIAM THAK PAWLPI NASEP

Sabbath Nitak

Tu Kaal Sung Sim Ding: Sawl. 2: 42 – 47; 4: 32 – 37; 9: 36; Matt. 25: 38; 2Kor. 8: 7 – 15; Rom. 12; James 2: 1-9

KAMNGAH: “ Pa Pasian mai-a a siangtho le a paubaanglo biakna in meigong tagahte haksatna huhna le a hong ninsak thei leitung vaite tawh kisukkhak lohna ahi hi” (James 1:27).

     Matt. 28: 18 – 20 sung a Sawlna Lianpi in Khristian tampi in a theih Lai Siangtho mun hi. Tua in i sep ding hong hilh hi. Hotkhiatna nasepna, tangko-na hong tawi-sawn hi. Hih thu siksanin Khristiante in mun tuamtuamah hotkhiatna thu i gen hi. Kipiakkhiatna tawh hanciamin hotkhiatna thu i pulaak hi.

     Sawlna Lianpi in bang hong hilh hiam?  Mite nungzui-suaksakin, tuiphum ding leh Jesuh thupiakte hilh dingin hong sawl hi (Matt. 28: 20). Jesuh in tasam-te, cimawhte, huhna kisamte huh ding thu hong pia hi. Tua hi-in Jesuh in nungzuipite tungah a thupiak in a thak thupiak, a zak ngei loh thu hi lo-in, Jesuh nasep amaute in a zomsuak dingin thupiak hi. Thu-um mi thak – pawlpi in Jesuh hong hilh thute a nuntakpih takteh Sawlna Lianpi tangtungsak ahi hi.

SUNDAY                August 25

Kipawlna Thak Khat

    

     Jesuh in van a kahtoh khit, Pentecost ah Kha Siangtho hong kum nungah thu-um khang semsem a, Jesuh nungzuipite makaihna tawh pawlpi masa hong piang hi. Ahi zongin hih pawlpi sung a om thu-umte in amau le amau thu-in hong piangtawm hi lo-in, Jesuh nasep le a thuhilh tungah kinga-in, Hebrew Thuciam Lui leh kamsangte bulphuhin kipawlna hong kipan hi.

     Sawl. 2: 42 – 47; 4: 32 – 37 sim in. Bang in pawlpi masa-te kalsuanzia leh a nuntakzia uh pulaak hiam?     ______________________________________________________________     ______________________________________________________________

     Pasian in Israelte nunzia ding a hilh bangin amaute in nungta zo lo uh hi. Thuman thutak tawh nungta uh hileh amaute lakah cimawh, mizawng om lo ding hi, cih kamciam tangtung ding hi (Thkna. 15: 4). Pawlpi masate in hih thupiak limtak zui uh hi. A neihsa, a ngah sum uh tawh pawl sung a omte a kipan (Sawl. 4: 34 – 5:2) kimlepaam a om tasamte huh uh hi; cinate damsak uh hi (Sawl. 3: 1-11; 5: 12 – 16). 

     Tua hi taleh pawlpi masate in a deihhuai penpen hi nai lo hi. Thu-um mi kibehlap ahih manin pawl sungah buai-na tuamtuamte a kipan a diakdiakin cimawh meigongte huhna tawh kisai buai-na hong lut hi (Sawl. 6:1).  Nungzuipite in pawlpi makai-in om uh a, hotkhiatna thu hilh ding mungtup a nei ahih manun, pawl sung buai-na lemtuah dingin pawlpi kalsuanzia etphatna nei uh hi. Tua hi-in mi sagih tengkhia uh a, amaute in pawl sung thuvanpi dingin kiseh hi.  Hih in pawl sungah a masa pen nasep tuamtuam kisehna hi kha ding hi. Tua banah pawlpi nasep leh teci hihna a thupitna hong hilh hi. Moses leh David a kipan Pasian mite kimakaihna-ah thumanna leh thuzuihna-ah hahkatna bulphuhin kimakaihna hi-in, hotkhiatna thu tangko pawlpi masate in limtakin kalsuan thei uh hi.” Ellen G. White, The Acts of the Apostles, 95.

    

      Pawlpi masate nunzia ngaihsun in. Koi bangin tulai thu-um pawlpi in pawlpi masate bangin i kalsuan ding hiam?

MONDAY          August 26

 Dorcas Nasepna Leh A Pulaak Thu

    Jesuh genkholh mah bangin pawlpi in Jerusalem, Judah, Samaria leh leimong dongah kizel hi (Sawl. 1:8). Thu-um mi thakte in Jesuh a upna thu leh Ama nasep pulaak kawikawi uh hi. Amaute lakah Joppa khua pan Tabitha kici Dorcas numei zong kihel hi. Puansilh ding nei lo-te huh dingin Jesuh thuhilh bangin Dorcas in Jesuh adingin nasem hi (Matt. 25: 38, 40).

    Dorcas nunzia leh a nasepte Sawl. 9:36 sim in.  Koi bangin amah bangin na nungta hiam? Na nunzia kipulaak ding hileh koi bangin kipulaak ding na ut hiam?

________________________________________________________________    ______________________________________________________________

   

    Dorcas nasep leh a nunzia in “nungzui” khat ahihna kimu thei hi (Sawl. 9: 36). A cihtakna, a sepzawhna, a mipihte banah midang huh hi. Peter in Jobba khua gei Lydda-ah vazin a, Joppa khua pai-in a si vat Dorcas sigal dingin sam uh hi (Sawl. 9:37 – 41). Joppa a hong tun ciangin Dorca mihuhte in Peter kiang vazuan ngeingai uh hi. Dorca piak puante, ama nasepte Peter tunga pulaak ciat uh hi. Tua khit ciangin Peter in thungen a, Pasian in Dorca hingkiksak hi. Pasian ading a nungta mi in nopna tawh kidim ding hi, cihna hi lo hi. Dorcas in natna tawh a leitung nuntakna bei kik hi. Pawl sung meigongte a makaih Stephen in a upna hangin thahna thuak masa pen hong suak hi (Sawl. 7: 54 – 60).  Pasian nasep in lampi nuam hi lo hi; khat veivei ciangin lauhuai-na tawh kidim hi.

    Dorcas tungtawnin Pasian in Ama vangliatna leh a hong itna hong laak hi. Dorcas nunna leh a sihna in Joppa khua mite huzaap mahmah hi. “Joppa khua mite in Dorcas thu za-in, mi tampi in Topa thu um uh hi (Sawl. 9: 42).

  

    Dorcas bangin na sih khit ciangin mite in na nunzia bang a pulaak uh diam? Koi bangin etteh taakcing nunzia nusiat ding na hiam? Dorcas bangin mite phattuamna a pia thei ding khutsiamna bang na nei hiam?

TUESDAY          August 27

Piakna Tawh Thupha Hawm

     A kikhel khit ciangin Paul in Gentile-te tungah hotkhiat lungdamna thu hilh hi. Tua bangin a nasep lawhcinna panin Khristian upna hong piankhiatna Jew upna leh Jesuh nungzui Gentile mi thak kizopna tawh kisai buai-na hong kipan hi. Jew makaite leh Gentile Khristian makaite in Jerusalem ah kimuhkhopna nei-in tua buai-nate tawh kisai-in Pasian makaihna ngen uh hi. A kikup thute Sawl. 15 sungah kigelh hi.

     Paul in tua thu kikupna-ah a pulaak thute Gal. 2 sung a bangin kimu thei hi. Jerusalem Council sawlna bangin Gentile-te lakah a nasep zomsuak hi: “Kote in amaute lakah a om mizawngte ka phawk ding uh hong kal bek a, tua lah kei zong ngaihsut penin ka neihsa thu mah ahi hi” (Gal. 2:10).  Paul in cimawhte huh ding ngaihsut lianbelin nei hi (Sawl. 20: 35).  Jerusalem a pawlpi masa-te mah bangin Paul in Khristian biakna sungah mi namcin kihel hi, ci-in pulaak hi.

     2Kor. 8: 7 – 15 sim in. Koi bangin Paul in piakhiatna leh hotkhiatna thu gawmtuah hiam?

________________________________________________________

________________________________________________________________

     Paul in Thuciam Lui siksanin a naseppihte hi taleh thu-um mite in cimawh –te huhin panpih ding hanthawn hi. Pasian in Israelte in gamlak sehnel ah khual a zin lai-un manna a piak thu siksanin piakkhiatna thu hilh hi (2Kor. 8:15). Paul in Late 112:9 siksanin “ Amah in citna tawh mizawngte pia zuahzuah a, ama migitna kip tawntung hi,” ci-in genkik hi” (2Kor. 9:9).  Thu-um mite in piakkhiatna a hat dingun Paul in hanthawn den hi. A ngah zahzah uh panin mizawngte huh nading tuamkoihin Titus ahih kei leh amah mah a vapai ciangin kaikhawm a, Jerusalem khua-a mizawngte huhna pia thei uh hi. Tua bang mahin midangte in zong mizawng huhna pia dingin hanthawn hi. “Note in na up uh Jesuh hangin lungdamna thu-ah na cihtakna uhleh amaute le midang khempeuh tungah na cit piakna hangun mi tampite in Pasian’ min phat ding uh hi” (2Kor. 9: 13), ci hi.

     Huh kisam khempeuh huh zo lo mi khat in koi bangin masak zawk ding leh nunun zawk ding khentel thei ding hiam?

WEDNESDAY               August 28

Nunzia Hoih Leh Itna Nei Dingin Paul Makaihna

     Paul in Rome khua thu-umte a laikhak in Khrih a hong sih upna tawh hotkhiatna kingah hi, cih thu limtakin a hong hilhna laikhak hi. Tua bangin a hilh khitteh thudang khat mitsuan kik hi. Jesuh hong lahkhiat Pasian hehpihna leh itna siksanin Paul in nunzia hoih leh itna tawh kidim a i nuntak ding hong hilh hi. “Tua ahih ciangin sanggamte aw, Pasian in eite tam veipi tak hong hehpih ahih manin ama lungkim nading le ama nasep nadingin nomau mahmah a hingtangin Pasian tungah na kipiak nadingun ka hong thum hi.  Tua bang a kipiakna pen Pasian biakna man taktak ahi hi” (Rom. 12:1). Jesuh nuntakna sungah Pasian in i nunzia ding hong hilh hi.

     Romans 12 sim in. Huhna kisamte huh ding leh itzia ding bang hong hilh hiam?

_________________________________________________________

________________________________________________________________

    

     Romans 12 in thu-umte tungah thu tuamtuam tomkimcingin Paul in a pulaakna hi, kici thei hi. Paul in pawl sung a citpiakna, nasepna, thapiaknate a kipan Pasian hong piakkhong tuamtuamte, nasep tuamtuamte pulaak hi (aneu 3-8).  Pasian hong piak bangin nasem ding banah lawpna leh itna tawh sem ding hong hilh hi (aneu 9-11).

     Paul in mikim nuntakpih ding a hong hilh in, hamsat hun, bawlsiatna thuak ciangin lungduai ding, cimawhte huhin, eima tungah kinga ahih ngakleh mi tawh kilem ding hong hilh hi. Siatna, gitlohnate hoihna, migitna leh hoihna tawh thukkik zaw dingin hong hanthawn hi (Rom. 12:20, 21).

     Romans 12 in mi thak, nunna thak, mimal hi taleh mihon – pawlpi  in Pasian na a septheihnate hong hilhcian hi.  Jesuh sung a mi thak khat in a gamtatna, a sep a bawl khempeuh in Pasian masakin, a kikhel nunna hi. Bang hang hiam cihleh Khrih in singlamteh tungah hong si-in tawntung nunna a hong piak a upna uh tawh tua bangin nungta thei uh hi. Kinengniamna, gitlohna tawh kidim Roman Ukpi sungah a nungta amaute in nunzia tuamdeuhin a nungta dingin Paul in hanthawn hi: “Leitung mihingte’ gamtat bangin gamta kei unla, na lungsim uh kikheelin Pasian kipuahphasak un. Tua hileh a hoih nate bang hi a, bangte in amah lungkimsakin, bangte a kicing hiam ci-in thei-in Pasian’deihna na phawk thei ding uh hi” (Rom. 12: 2).

     Jesuh nungzuite in nunzia hoih tawh nungta-in itna nei dingin, lungsimpuak leh ngei-na tatzia bangte nial ding na hiam?

THURSDAY              AUGUST 29

 A THUMAN MIPA JAMES

     Jesuh sanggampa James in Jerusalem pawlpi makai khat hi-in Jerusalem Council ah makaipi sem hi, ci-in Khristian tangthu-ah kiciamteh hi (Sawl. 15; Gal. 1,2). Tua hi-in James laikhak ama gelh hi ding hi. Tua hunlai-in James min nei mi tampi om hi. James minnei dangte tawh a kibatlohna khat in pawlpi makai James ‘a thuman mipa’ ci-in kithei hi. Amah pen pilna tawh kidimin, nawlkhin, dongtuakte lunghimawhin, a don, a kem makai khat hi. James laikhak in Thuciam Thak adingin Paunak Thubu bangin kingaihsun hi. Bang hang hiam cihleh Pasian thu-um, Ama nungzuite’ nunzia ding limtak hong hilh laikhak khat hi.

     James in a laikhakna-ah “Nomau kikhem tawmin thu zak bek tawh maisak kei unla, na zak bangun zui-in semzaw un,” ci hi (James 1: 22). Cimawh, genthei-te a don, a khual mi, kimlepaam gitlohna ki-uksak lo-in siatna a nial mi in a siangtho Pasian deih biakpiakna nei mi hi (James 1:27), ci hi.

     James 2: 1-9; 5: 1-5 sim in. Koi bangin James in mihau-te a muhzia leh leitung mite muhzia kilamdang hiam? Pawl sungah mihau, mizawng kizopzia ding bang hong hilh hiam? __________________________________________________________________________________________________________________________

    

     Puansilh nei lote, daangtak gilkialte i huh, i panpih zo kei zongin, amaute tungah Pasian thupha om dingin thungetna bek in zong tua mite adingin thupha hi. Deihsakna bek hi lo-in nek ding an, dawn ding tui, silh ding puan pia lehang, a thu bekin gen hi lo-in sepna tawh a lak i hi pah hi (James 2:14 – 16). Pasian tawh kizopna-ah James in upna leh gamtat kizopzia tua bangin pulaak hi. Tua banah nisim khuasak nunzia ding Jesuh hong hilh, ei le ei ki-it bangin midangte zong it ding a hong hilh, James in pulaak kik hi. Tua bang mi in Pasian tung leh mite tungah thupha bawl hi-in, hotkhiat ngah nading hi lo-in, upna man nei ahihna a sungpan hong kilang hi zaw hi.

    

Bang hangin mizawngte sangin mihaute kimasak zaw kha pahpha hiam?

FRIDAY      August 30

Ngaihsutbeh Ding: Ellen G. White, “Dorcas – Her Ministry and Its Influence,” 66, 67,  in Welfare Ministry; “ A Liberal Church,” 335 – 345, in The Acts of the Apostles; “ This is Pure Religion,” 35 – 41, in Welfare Ministry.

    “Gim thuak cimawh, zia-et thuakte a kem, a don ding pawlpi adingin Jesuh in  manpha a nuntakna hong pia hi. Pawlpi mite in mizawng, laithei lo, mi nautang hi kha ding uh hi; ahi zongin amaute in inn sung, kimlepaam, pawl sung bek tham lo mundangte ah Khrih adingin nasem mi suak thei uh hi. Amau nasep in tawntung kimang ding nasep hi thei hi.” Ellen G. White, The Desire of Ages, 640.

    “Pawlpi masate in huaiham lo-in phaltakin a kipiakna hangun nuamna tawh kidim uh hi. Amaute nasep in khuamial sung om mite tungah hotkhiat lungdamna thu kizelsak hi. Tua bang nasep in a hoih nasep hi-in, Pasian hehpihna a zak thute uh in a maimang mawk lo hi. Phaltakin a kipiakna uh hangin Kha Siangtho sungah siantho-na tawh kidim thei uh hi. Tua in thu-um mite hi taleh thu-um lote muhna-ah Vantung hehpihna nalamdang lian khat suak hi.” Ellen G. White, The Acts of the Apostles, 344.

KIKUP DING DOTNATE

1.  Koi bangin na pawlpi in Sawltak sung pawlpi masate bangin kalsuan ding hiam? Tua dingin, koi bangin pawlpi makaite in pawlpi makaih ding hiam?

2. Pawlpi masate kalsuanzia siksanin SDA pawlpi in sawm-ah khat leh         sumpi-te leitung mun tuamtuamah hawmkhia uh hi. Tua bangin nasepna hangin a gah bang kimu thei hiam?

3. Romans 12 sung kigelh bangin i nungta thei ding hiam? Ahih kei leh, a piang thei lo ding thu khat deihhuai ahihna pulaak hi lel hiam?

4. James 5: 1-5 sungah Thuciam Lui kamsangte vauhilh kampau kimu hi. Bang hangin tua bangin khuahpau kisam hiam?  Tua bang kampau ding        kilawm mah hiam?

TOMLAKNA: Hotkhiatna thu gen ding Sawlna lianpi om bangin Kha Siangtho vangliatna tawh nungzuipite leh thu-um mi masate in hotkhiatna thu mun tuamtuamah va puak kawikawi uh hi. Jesuh hilh thute leh Hebrew Lai Siangtho siksanin pawlpi masa-te in pawl sung pawl pua-a cimawhte a huh kipawlna thak hong suak hi. Amau nunzia, amau hilh thute tungtawnin pawlpi makai masate in cimawhte huh-in, cihtakna tawh nungta dingin thu-um mite hanthawn hi.