LESSON
8 AUGUST
17 – 23
HIH
KA SANGGAM A NEUPENTE TUNGAH
Sabbath Nitak
Tu Kaal Sung Sim
Ding: Matt. 5: 2-16, 38 – 48; 25: 31 – 46; Rom. 12: 20,
21; Lk. 16: 19-31; 12: 13-21.
KAMNGAH:
“Tua ciangin Kumpipa in amaute kiangah, “Note kiangah kong genin-ah: Hih ka
sanggamte a neupen khat nangawn na limbawl uh ciangin kei tungah a hong bawl na
hi uh hi,” ci-in a dawng ding hi” (Matt. 25:40).
Jesuh in cimawh, genthei-te, a
mangthangte ama itna a pulaak khit ciangin, tua lo midangte tungah zong a itna
pulaak hi. Jesuh in Pasian nungzui mite nunzia ding hong hilh hi. Tua bangin a nungta
mi in thu maan thutak tawh nungta-in, hehpihna, lainatna nei-a Jesuh nunzia nei
ding uh hi.
Jesuh in zong vantung gam thu hong
hilh hi. Tu-in zong i sungah tua vantung gam om thei hi, ci-in hong hilh hi.
Leitung kumpi gam bang hi lo-in, i nuntakna-ah Pasian makaihna, nunzia hoih,
tawntung thumanpha-te tawh nuntakna i nei thei hi. Jesuh hong hilh thute in
vantung gam nunzia hong hilh thute hi. A nuntakna-ah tua vaantung gam a nei mi
in Topa na sem mi hi-in, Topa na a sem mi in mi tawh kizopna hoih nei hi. Mi
hehpih, mi huh, kitangsapte panpih cihte in Topa na i sepna ahi hi.
SUNDAY August 18
Mualtung Thuhilh
Thupatna
Jesuh thugen a sau penpen in Mualtung
thuhilhna hi. Hih sungah thuhilhna tuamtuam kihel hi. Matt. 5-7 in Pasian gam
sung nunzia ding gen a, tua thuhilhna kipatna ciatah thupha kipulaak masa hi.
Matt.
5: 2-16 sim in. Bang thu kipulaak kikkik hiam?
Jesuh in thupha ngah mite a cih kua mite hiam? ___________________________________________________________
________________________________________________________________
Vantung
thute in nisim nuntakpih ding thu hong hilh hi. Jesuh in leitung nuntak sungah
bang mah nei lo-in i omna hong thei hi. Jesuh in thuman diktatna,
kiniamkhiatna, mi hehpihna, mi tawh kilemna, lungsim siantho-na cihte zong hong
hilh hi. Ama hong hilh bangin nungta hi lehang i nunzia akipan leitung in tu-a
bang hi lo-in kilamdang ding hi. Ama hong hilh bangin a nungta dingin a
nungzuite tungah leitung ci, leitung khuavak na hi ding uh hi, hong ci hi
(Matt.9: 13-16).
Ci leh khuavak zangsiam hi lehang
nuntak nuamsak hi. Ci lo-in annek nuam lo hi.
Ci in an limsak hi. Ci in gamtat hoih limcing hi. Tua bang mahin khuavak
in khuamial beisak hi. Khuavak in khuamial sung a om a lauhuai nate hong musak
hi. Khuavak in inn, khua sung bitsak hi.
Khuamial sung a meivak in mun gamla panin kimu thei hi. Zan khuamial sung
meitang bangin Jesuh in “ Khuavak
tangsak un. Tua hileh mite in note gamtat hoih mu-in vantung a om Pa Pasian
minthangsak na hi ding uh hi” (Matt. 5: 16), ci hi.
Ci leh khuavak in nungzuite in mite
nunzia kikhelsak ding huzaap hoih limcing hi. Kiniamkhiat, hehpihna nei, mi
tawh kilem, lungsim siangtho, thuakzawhna neite in ci leh khuavak hi. Jesuh in
mi tampi in manpha a sak loh uh thute Ama gamah manpha ahihna hong hilh hi.
Koi
bangin na pawlpi in ci bangin aal, khuavak bangin tang hiam? Koi bangin na
pawlpi hangin khua sung, kimlepaam in hoihzawkna-in nei hiam? Cihnopna-ah na
pawlpi in mundang khatah kituah ding hileh, a kim a om mite in a hongh uh diam?
MONDAY August 19
Thu Hoih Tawh Thusia
Zo
Jesuh in thu a hilh ciangin ama thugen
a za a ngai-te dinmun, nunzia tawh kituakin thu hilh hi. Jesuh a paipai –na
munah mi honpi in zuinuam tawntung uh hi (Matt 4: 15; 5:1). Mi honpi lakah Roman khutnuai-a om nektawm
zongin nasem tampi kihel hi. Tua banah Jew makaite leh biakna makaite zong
kihel uh hi. Nektawm zong nasemte in nuntak hamsa takin nungta uh hi. Suahtakna
nei lo uh hi. Gam ukte tungah phiangsiah tampi pia uh hi. Biakna thukhun
ngei-na tuamtuamte in ukcip hi. Hih bang mite in bang bang dinmunah a om uh
zongin nunzia hoih, mannei nunna leh mainawtin a nuntak ding uh hilh hi.
Matt. 5: 38 – 48 ah “Na biang lang khat hong kibet leh a lang
khat zong dawh in” “ na puansilh hong kinget leh pia in,” “van pua dingin tai
khat hong kipaipih leh tai khat val paipih in” cih thu in nuntak hoih ding limtak
hong hilh hi. Kimkhat in hih kammalte hangin Jesuh hong hilhnop thu taktak
telkhial uh hi. Hih thute in tua hunlai nautangte nunzia tampi pulaak hi.
Makai, uliante simmawhna thuak tampi om hi. Tha zawhna, tha-tang hatna tawh
neihsa tanlawh mi tampi om hi. Nautangte in Roman galkapte simmawhna, thuneihna
thuaklah uh hi. Tua bangin nautangte in tungsiahte hangin a gimthuaknate uh thu
hoih tawh a thukik zaw dingin hilh hi. Tua in nunzia manphatna ahihlam pulaak
hi. Nautangte in simmawh bawlna a thuak uh ciangin thuhoih, ahih kei leh thusia
tawh thukkik dingin khentat thei uh hi. Thusia pen thuhoih tawh thukkik uh
hileh tungsiatte thuman lohna, gitlohna kilangsak uh hi zaw ding hi.
Matt. 5: 38 – 48 leh Romans 12: 20, 21
enkak in. Koi bangin tua thute nuntakpih
ding i hiam?
________________________________________________________________
________________________________________________________________
Jesuh in “thukham leh kamsangte” pulaak khempeuh pulaak hi. Tua thute khempeuh
in a manpha mahmah thukhun pulaak hi. Tua in “ nang tungah a hong kibawl ding
na deih bangin midangte tungah bawl in” cih thukhun (Matt. 7: 12) i telthei hi.
Koi bangin “Nang tungah a hong kibawl
ding na deih bangin midangte tungah bawl in” cih thupiak na nuntakpih hiam?
TUESDAY August
20
Samaritan Mi Hoih Pa
Lk.
10: 25 – 27 sim in. Jesuh tungah
thukhamhilh siapa thugen in Thuciam Lui tawh kituak Pasian santheih nunzia
pulaak hi.Koi bangin tua thupiak nihte in kizopna nei hiam?
________________________________________________________________
________________________________________________________________
Jesuh a kidong dotna khempeuh a
dawnkik ciangin thudongte lametna tawh kilehbulhin Jesuh in dawngkik hi. Siam.
19:18 siksanin nunzia ding “na pumpi na ki-it bangin na vengte zong it in” cih
thupiak tawh kisai-in biakna makaite’n vengte in kua mi huam hi ding hiam,
ci-in buai uh hi. Jesuh in nungzuipite tungah vengte tawh kisai limtak hilhna
nei khin hi. Vengte in i it mite bek hi lo-in mi khempeuh huam hi. “Ahi zongin
ke’n note kiangah kong genin-ah: Na galte uh na it unla, no hong bawlsiate
a’dingin thu na ngetsak un. Tua hileh vantungah a om na Pa uh tate na hi thei
ding uh hi. Bang hang hiam cihleh amah in mihoihte le misiate tungah a kibangin
ni taangsak khawm a, a gamtat phate le a gamtat sia-te tungah zong a kibang
mahin guah zusak khawm hi” (Matt. 5:45, 46), ci hi. Ahi zongin thukham hilhsia
pa in Jesuh thangsiah ding ngaihsun a, ka vengte kua hiam? ci-in Jesuh lehdot
hi (Lk. 10:29). Jesuh in a dawnkik nadingin Samaritan mi hoih thu pulaak hi.
Jesuh in thukham hilhsia pa tungah kua in vengte hi ding hi, cih a hilh hi
lo-in, Samaritan mipa bangin huhna kisam mi khat huh dingin hilh hi zaw hi
(Lk.10:36,37).
Lk.10:30 -37 sim in. Tua mi thumte
khat ciat kibat lohna, Samaritan mipa in a dangte tawh kibatlohna Jesuh in bang
pulaak hiam?
________________________________________________________________
________________________________________________________________
Jesuh in a thuhilhna-ah biakna makaite
tungah a mawhsiatna lian pen hi.Bang hang hiam cihleh amaute’n cimawh
genthei-te kin lo, awlmawh lo uh hi.Samaritan mihoih pa thu tungtawnin Jesuh in
biakpiakna man hong hilh hi. Biakna man in piakna tuamtuamte, pawlpi thu up
tuamtuamte hi lo hi. Ahi zongin itna tawh nasepna, sitnei lo-in midangte tungah
thu hoih, thupha bawlna hi,ci-in hilh hi.”Ellen G.White, The Desire of Ages,
497.
Tua thuhilhna-ah Jesuh in Pasian
tungah cihtak lo, thuman theilo-in mite’n a ngaihsut uh namdang mi khat nunzia
bangin Jesuh nungzui khempeuh in itna nei dingin hong hilh hi. Jesuh thugen a
za tua hunlai-a mite mah bangin eite in zong tawntung nunna i ngah nadingin
Jesuh kiang i va zuat ciangin, huhna kisamte huh dingin hong hilh hi.
WEDNESDAY August
21
Mihau Pa Leh Lazarus
Mihau pa leh Lazarus thugentehna (Lk.
16: 19-31) in leitung nunzia namnih hong lak hi. Khat in hau-a, khat in zawng
hi. Cimawh, genthei-te a huh ding om lo, imlepaam panin huhna ngah nading om
lo, zato, kipawlna tuamtuam pan huhna cihte om lo ahih manin mizawngpa in mihaute
innmai-ah va pai-in huhna ngen uh hi. Tua bangin mihaute huhna tawh genthei-te
in noptuamna ngah dingin lamen uh hi. Ahi zongin hih thugentehna-ah mihau pa in
kuamah huh nuam lo hi. Huaiham angsung thei mi hi-in, cimawh genthei-te don lo
hi.” Ellen G. White, Chirst’s Object Lessons, 261. Leitungah a nuntak sungah
bangmah kilamdanna a om loh hangin, sihna leh Pasian thukhenna in amau dinmun
hong kilehbulh hi.
Lk. 16:19 – 31 leh Lk. 12: 13 – 21
enkak in. A kibang leh kibang lo thu-te
in bang hong hilh hiam?
____________________________________________________________________ ___________________________________________________________
Hih tangthu sungah siatna lampi tawh
hauhna kimu lo hi. Nasep hahkatna, nate limtak kepna leh Pasian thupha piak
tawh hauhna tawh kidim hi. Ahi zongin nuntakna, Pasian leh sum cihte tungah a
lungsim puak man lo ahih manin tawntung siatna manawh hi. Jesuh in hih leitung
khit nunna tawh kisai a thugentehna mihau pa leh Lazarus in, i khentatna bangin
i ngah ding thute hong hilh hi. Huhna kisamte huh, panpih kisamte panpih a i
nuntakna-ah na dangdangte sangin i masak zawk thute leh i khentatnate a pulaak
hi gige hi. Abraham in cimawhte huh ding a pulaak bangin Lai Siangtho in
khentatna hoih hong hilh bek tham lo-in “Amaute in Moses leh kamsangte nei uh
hi; amaute thugen na ngai uh hen,” ci-in hong hilh hi (Lk. 16: 29).
Jesuh in hauhna in hong khialsak thei
ahihlam hong hilh hi. Hauhnopna, neihlelam kepna, sumlepaai zonna in Topa kiang
pan hong khenkhia thei hi; midangte it ding hong dal thei hi; angsung,
huaihamna khangsak thei hi; kiphatsakna, ei le ei kimuanna hong guan hi. Jesuh
in Pasian gam leh Ama dikna zong masa dingin hong hilh hi. A hong piak
thupha-te huhna kisam, cimawhte huh dingin hong deih hi.
Na
hau a, ahih keileh nektawm zong mi na hi zongin, koi bangin sum leh sum itna in
na nuntakna a hong suksiat loh nadingin kidawm thei ding na hiam?
THURSDAY August 22
Naupangte Tungah
Matthew 24, 25 sung a kigen thute tawh
kizomin kuamah lamet loh thute Jesuh in thuhilhna, mipite thudotna leh dawnna
nei hi. Nungzuipite in Jesuh kiangah hong pai uh a, Jerusalem biakinnpi kisiat
ding leh a hong pai kik ciangin thupiang dingte dong uh hi (Matt. 24: 1-3).
Jesuh in tua thute hilhin a thukhupna-ah gilkialte anpia-in, dangtakte tui
pia-in, khualmite zindo-in puansilh nei lote silh ding pia-in, cinate veh,
thongkia-te kiang hawh cih thute pulaak hi. Tua bangin mi khat in naupangno
khat tung nangawnah a gamtat ciangin Jesuh tungah a bawl, a sem hi (Matt. 25:
40, 45). Pasian thukhenna tawh kisai nungzuipite in Jesuh a dotna tawh kizomin
Jesuh in hih thu a hilh ahi hi.
Matt. 24 sungah Jerusalem kisiat
madeuh a piang ding thute leh leitung bei dingteh lim leh nalamdang piang
dingte kigelh hi. Jesuh a hong pai kik ding vil a ngak dingin limtak hong hilh
hi. Mite lamet loh hun hi taleh lamenin a ngakngak mite ading hi taleh
kiginkholhzia, a pil leh a hai nungak thugenteh in hong hilh hi. Thadah nasem
mi thum gentehna in Jesuh hong pai ding a ngak mite in lawpna leh hoih takin
nasem dingin hong hilh hi. Tua khit banah tuu leh keel gentehna in Pasian mite
in Topa ading tatsat lo-in nasem dingin hong hilh hi.
Matt. 25: 31 – 46 sim in. Jesuh in
bang hong hilh hiam? Bang hangin gamtatna in hotkhiat ngahna kici lo hiam?
Bangci bangin upna tawh hotkhiat kingah hi zaw hi, ci-in hong hilh hiam?
_____________________________________________________________________ ___________________________________________________________
Jesuh hong hilh mah bangin mite tungah
thupha i bawl khempeuh Ama tungah thupha bawl i hi hi. Hih in mi tawh kizopna,
ngaihsutna khempeuh hong puahphat ding kisam hi. Anne dingin Jesuh sam, ahih
keileh thonginn, zato-ah Jesuh va veh, va hawh dingin kingaihsun in. Mite
tungah tua bangin i bawl ciangin Jesuh tungah a bawl hi, ci-in hong hilh hi.
Ama tungah tua bangin na hoih septheihna bangzahin manpha hiam?
Matt.
25: 31- 46 sung a Jesuh gen thute limtak ngaihsun in. Koi bangin gilkial, dangtak mi khat na huhna
in Jesuh mahmah tung a bawl nahihlam theithei ding na hiam? A lian mahmah
masuan leh i nunzia ding hong hilh hi lo hiam?
FRIDAY August
23
Ngaihsutbeh Ding: Ellen
G. White, “The Good Samaritan,” 497 – 505; “ The Least of these my brethren,”
637 – 641 in The Desire of Ages,” “ A Great Gulf Fixed,” 260 – 271; “ Who is my neighbor? 376 – 389, in Christ’s
Object Lessons.
Khrih in mihingte hong khenkham
kilangneihna, huaihamna, behlephung, minam deidanna cihte hemkhia-in mi
khempeuh a kibangin hong it hi. Huaihamna panin mihingte hong lamto-in
kideidanna, kimuhdahnate koihkhia hi. Jesuh in kuamah deidan lo hi. Lawm leh
galte, vengte leh khual mi khen lo-in huh ding kisamte khempeuh huh dingin hong
hilh hi. Huhna kisam mi khat in i vengte hi pah hi; kuamah deidan lo-in mite
tungah thupha bawl dingin hong deih hi.” Ellen G. White, Thoughts from the
Mount of Blessing, 42.
“I tungah a hong kibawl ding i deih
bangin mite tungah gamtat ding thupiak in Khristian dinmun hi. Tua lo khempeuh
in kineihkhemna hi. Khrih in a nunna
tawh a hong tat mihing nunna a niamkoih biakna in a kineih biakna hi. Mihing
kitangsap awlmawh lo, cihmawh genthei-te, gim thuakte, mihing suahtakna a kin
lo biakna in a mawkna biakna hi. Genthei-te, cimawh dongtuakte huh ding a
nungngat mi in Khrih tungah gitlohna a bawl mite hi. Khrih minsuangin thu-um
kici napi-in Khrih zia le tong a nei lo Khristian biakna in vangliatna nei lo
hi.” Ellen G. White, Thoughts From the Mount of Blessing, 136, 137.
KIKUP DING DOTNATE
1. Tu kaal sung thusinte lak pan koi in na
lungsim hong sukha hiam? Bang hang hiam?
2. Ellen G. White hong hilh, genthei, cimawh
mi, thuman lo-in gamtatna a awlmawh lo biakna in a kineih biakna hi. Bang
hangin mi tungah thupha bawl ding kinloh khak ding kidop ding kisam hiam?
3. Thursday ni-a thusin in “thuman ka nei
hi” cih in bang masuan hong guan hiam?
TOMLAKNA:
Pasian gam sung teeng ding mite in leitung bangin nungta lo dingin Jesuh in
hong hilh hi. Thuciam Lui siksanin nengniam thuakte, mizawngte huhin panpih
ding hong deih hi. A hong pai kik ding lamenin a ngak Ama nungzuite in itna,
hehpihna tawh kidim dingin hong hilh hi.
